Tamununa mo oompito dhoye dhokusimaneka Jehova
1. Elongekidho epe lini tali vulu oku tu kwathele tu ‘hambelele Jehova?’
1 Nuumvo muMaalitsa opwa li pwa totwa elongekidho epe. Aauvithi oya li ya pewa ompito okuhogolola ya longe oowili 30 uuna taya kutha uukwathelikokolindjila muMaalitsa naApilili nosho wo momwedhi moka omutonatelishikandjo ta talele po egongalo lyeni. Ngele etalelopo lyomutonatelishikandjo olya tameke pehulilo lyomwedhi sigo opetameko lyomwedhi gwa landula ko, aauvithi mboka ya kutha uukwathelikokolindjila woowili 30 otaya vulu okuhogolola pokati koomwedhi ndhoka mbali kutya ogunipo taya ka kokola ondjila. Ayehe mboka ya kutha uukwathelikokolindjila otaya vulu okukala pokugongala akuhe hoka omutonatelishikandjo ha ningi naakokolindjila yondjigilile nosho wo mboka yi ikalekelwa. Onkee ano, ngele itatu vulu okulonga oowili 50 ndhoka dhi li oshitegelelwa kwaamboka haya kutha uukwathelikokolindjila, otatu vulu natango ‘okuhambelela Jehova’ iikando ine momumvo mokukokolondjila tatu longo owala oowili 30. — Eps. 109:30; 119:171.
2. Mboka taya ka kutha uukwathelikokolindjila pethimbo lyetalelopo otaya ka mona uuwanawa wuni?
2 Pethimbo lyetalelopo lyomutonatelishikandjo: Aantu oyendji otaya ka vula okukutha uukwathelikokolindjila pethimbo mpoka notaya ka nyanyukilwa etsomukumo ndyoka hali monika kwaamboka taya longo pamwe nomutonatelishikandjo muukalele. (Rom. 1:11, 12) Oyendji mboka ya kutha uukwathelikokolindjila, otaya ka kala ya hala okukutha esiku limwe mokati koshiwike, opo ya longe pamwe nomutonatelishikandjo. Mboka haya yi kiilonga otaya vulu oku mu pula ya longe naye mOlyomakaya nenge mOsoondaha. Otashi ka tsa omukumo mboka ya kutha uukwathelikokolindjila uuna taya kala pokugongala hoka omutonatelishikandjo ha ningi naakokolindjila yondjigilile nosho wo mboka yi ikalekelwa.
3. Omolwashike shi li nawa okukutha uukwathelikokolindjila muMaalitsa naApilili?
3 Omwedhi Maalitsa naApilili: Mboka ya li haya mono uuwanawa melongekidho lyokulonga oowili 30 omwedhi gumwe, pethimbo lyEdhimbuluko, ngashingeyi otaya vulu natango okugwedha ko ‘komahambelelondjambo’ gawo. (Heb. 13:15, NW) Maalitsa naApilili odhi li oomwedhi ombwanawa kutse tu tamununemo uukalele wetu mokukutha uukwathelikokolindjila. Omumvo kehe, muMaalitsa nenge muApilili ohamu kala oshikonga shokuhiya aantu kEdhimbuluko. Shimwe ishewe, otatu vulu okulonga naauvithi yi ili noyi ili, molwaashoka oyendji yomuyo ohaya tamununamo uukalele wawo poomwedhi ndhoka. Aluhe konima yaashono, ohatu shuna kwaamboka ya li ye ya kEdhimbuluko noyu ulika ohokwe noku ya hiya ye ye natango ya pulakene koshipopiwa shi ikalekelwa. Mbela omutima goye otagu ke ku inyengitha ngaa wu longithe oompito ndhoka dha gwedhwa po wu kuthe uukwathelikokolindjila? — Luk. 6:45.