Hedha popepi naKalunga

“Oto ka yuulukwa omushitwa gwoye”

OSHI ehama okutala gumwe ngoka wu hole ta mono iihuna nota si. Paunshitwe ohatu kala tu uvite oluhodhi omolweso lya tya ngaaka. Ihe ohashi hekeleke okutseya kutya Omushiti gwetu, Jehova Kalunga, oku uvite ko oluhodhi lwetu. Kakele kaashono, okwa yuulukwa okulongitha oonkondo dhe oonene okuyumudha aasi. Ndhindhilika etegameno ndyoka lya gandjwa moohapu dhaJob ndhoka tadhi adhika muJob 14:13-15.

Natu tale edhiladhilo lyadho. Job, omulumentu e na eitaalo lya tongomana, okwa li a piti momamakelo gi ili nogi ili, mwa kwatelwa okukanitha omaliko ge, eso lyaanona ye aaholike nosho wo omukithi guehama. Sho a li e uvite uukweyi, okwa li i ithana Kalunga ti igidha ta ti: “Ando u langeke ndje ashike muusi [mombila yaantu ayehe].” (Ovelise 13) Job okwa li a tala ko uusi owo tawu hulitha po okumona iihuna kwe. Muwo okwa li ta ka kala a manguluka kokumona iihuna nokuuwehame, a fa eliko lya holekwa kuKalunga.a

Mbela Job okwa li ta ka kala sigo aluhe muusi? Job hasho a li ta dhiladhila ngawo. Okwa li a tsikile negalikano lye ta ti: “Andola u . . . ethimbo lyu uthwa e to ka dhimbulukwa ndje ihe konale.” Job okwa li e na etegameno lya kola kutya muusi ota ka kala mo owala okathimbo nonokutya Jehova ite ke mu dhimbwa. Job okwa li a yelekanitha ethimbo ndyoka a li ta ka kala muusi ‘nuudhigu,’ sha hala okutya, ethimbo lyokutegelela emanguluko. Sigo uunake? Okwa ti: “Sigo emanguluko lyandje lya thiki.” (Ovelise 14) Emanguluko ndyoka olya li tali ka tya okumanguluka muusi, niitya yimwe, okuyumuka kuusi.

Omolwashike Job a li e na uushili kutya ota ka manguluka muusi? Omolwaashoka okwa li e shi nkene Omushiti gwetu omunahole ha kala u uvite shi na ko nasha naalongeli ye aadhiginini mboka ya sa. Job okwa ti: “Oto ka ithana ndje notandi ku itaale; oto ka yuulukwa omushitwa gwoye.” (Ovelise 15) Job okwa li a tseya kutya okwa shitwa kuKalunga. Omugandji gwomwenyo ngoka a li e na oshinakugwanithwa shokushitilwa kwaJob moshivalelo ota vulu oku mu yumudha konima yokusa.—Job 10:8, 9; 31:15.

Oohapu dhaJob otadhi tu longo nkene Jehova e li omunahole: Jehova oku hole lela mboka yi igandja miikaha ye, ye etha e ya zule noku ya me ya kale aantu mboka ye na oshilonga momeho ge, ngaashi Job. (Jesaja 64:8) Jehova okwa lenga aalongeli ye aadhiginini. Okwa “yuulukwa” okuyumudha aadhiginini mboka ya sa. Ano omulongwantu gumwe ota ti: Oshitya shOshihebeli shoka sha tolokwa ngawo “kapu na omalimbililo kutya oshi li shimwe shomiitya mbyoka yi na oonkondo okupopya eiyuvo li na ko nasha nomahalo gokuyuulukwa.” Eeno, Jehova iha dhimbulukwa owala aalongeli ye, ihe oha yuulukwa wo oku ya yumudha.

Oshi shi okupandulwa sho membo lyaJob ndyoka li li limwe lyomomambo gOmbiimbeli ngoka ga nyolwa tango, Jehova a mona she eleka okuholola elalakano lye lyokuyumudha aasi.b. Okwa hala oku ku hanganitha ishewe naaholike yoye mboka ya sa. Edhiladhilo ndyoka otali vulu oku shi ninga oshipu kaantu ya vule okwiidhidhimika ngele ya silwa. Omolwashike itoo ilongo oshindji kombinga yohole yaKalunga ndjika nonkene to vulu oku mu etha e ku me wu ninge omuntu ngoka ta ka mona elalakano lye sho tali gwanithwa?

[Omanyolo gopevi]