Omupiya waJehova “okwa tuwa molwomatauluko etu”

‘Okwa tuwa molwomatauluko etu, nokwa nyanyaulwa molwowii wetu, ndele otwa velulwa omolwoipute yaye.’ — JES. 53:5.

1. Ohatu dimbuluka shike ngeenge hatu dana Edimbuluko lefyo laKristus, nexunganeko lilipi tali ke tu kwafela?

OHATU dana edimbuluko lefyo laKristus opo tu dimbuluke aishe oyo ya wanifwa po okupitila mefyo nenyumuko laye. Edimbuluko ohali tu dimbulukifa shi na sha nokuyukipalifwa kwounamapangelo waJehova, okuyapulifwa kwedina laye nosho yo okuwanifwa kwomalalakano aye, mwa kwatelwa okuxupifwa kwovanhu. Kape na vali exunganeko limwe mOmbibeli la hokolola nawa ekuliloyambo laKristus nosho yo osho la wanifa po li dule exunganeko olo tali hangwa muJesaja 53:3-12. Jesaja okwa xunganeka shi na sha nokuhepekwa kwOmupiya nokwa yandja yo ouyelele wokondadalunde u na sha nefyo laKristus nosho yo omauwa oo efyo laye la etela ovamwaxe ovavaekwa nosho yo ‘eedi dimwe.’ — Joh. 10:16, OB-1986.

2. Exunganeko laJesaja otali yandje oumbangi ulipi, notali ke tu kuma ngahelipi?

² Omafelemido aheyali fimbo Jesus ine uya kombada yedu, Jehova okwa li a nwefa mo Jesaja a xunganeke kutya Omupiya waYe omuhoololwa ota ka kala omudiinini nonande okuyelekwe fiyo omefyo. Oushili oo kutya Jehova oye a li a nwefa mo Jesaja a xunganeke shi na sha noudiinini waJesus otau ulike kutya Jehova okwa li e lineekela filufilu kutya Omona waYe ota ka kala omudiinini. Ohatu ka kala tu na olupandu neitavelo letu otali ka pamekwa eshi hatu konakona exunganeko olo laJesaja.

Omupiya okwa li a ‘dinika’ nokwa li a talika ko “a fa oshinima shongaho”

3. Omolwashike Ovajuda va li ve na okutambula ko Jesus, na ponhele yoku mu tambula ko ova li va ninga po shike?

³ Lesha Jesaja 53:3. Diladila ashike kutya Omona waKalunga ewifa okwa li e udite ngahelipi eshi a fiya po Xe, oo va kala tava longo pamwe naye nehafo, nokuuya kombada yedu a yandje omwenyo waye u li oikulila opo a xupife ovanhu koulunde nefyo! (Fil. 2:5-8) Omayambo oinamwenyo oo kwa li haa yambwa koshi yOmhango yaMoses okwa li ashike omudidimbe waasho sha li tashi ka wanifwa po keyambo laJesus. Eyambo laJesus ole shi ninga tashi shiiva opo ovanhu va dule okudiminwa po filufilu omatimba avo. (Heb. 10:1-4) Ovajuda ova li ngeno ve na okutambula ko Messias omuudanekwa noku mu fimaneka, molwaashi ova kala va teelela Messias. (Joh. 6:14) Ndele ponhele yokutambula Kristus, Ovajuda ova li ve mu ‘dina’ nova li ve mu tala ko “a fa oshinima shongaho” ngaashi ashike Jesaja a li a xunganeka. Omuyapostoli Johannes okwa popya shi na sha naJesus a ti: “Okwe uya kovambulavo, ndele ava vokombulavo inave mu tambula.” (Joh. 1:11) Omuyapostoli Petrus okwa li a lombwela Ovajuda a ti: “Kalunga kootate, Oye a fimanekifa Omona Jesus, Oye tuu ou nye mwe mu yandja, nomwe mu lidimbika koshipala shaPilatus, ye eshi kwa li a pangela oku mu efa. Ndele nye mwe lidimbika Omuyapuki nOmuyuki.” — Oil. 3:13, 14.

4. Omeityo lilipi Jesus a li a ika ouyahame?

⁴ Jesaja okwa li yo a xunganeka kutya Jesus ota ka kala ‘omwiiki wouyahame.’ Omafimbo amwe, Jesus okwa li shili ha kwatwa keloloko fimbo a li moukalele waye, ndele kape na oumbangi oo tau ulike kutya Jesus okwa li a kwatwa koudu ile komukifi wonhumba. (Joh. 4:6) Ashike Jesus okwa li a ika ouyahame wovanhu ovo a li ta udifile. Okwa li ha kala e uditile ovanhu ovo onghenda nokwa li a velula ovanaudu vahapu. (Mark. 1:32-34) Kungaho, Jesus okwa li a wanifa po exunganeko olo tali ti: “Okwe litwika oudu wetu, nokwa humbata omauyahame etu.” — Jes. 53:4a; Mat. 8:16, 17.

Omupiya okwa li a talika ko a “dengwa kuKalunga”

5. Ovajuda vahapu ova li va tala ko efyo laJesus ngahelipi, nomolwashike osho sha li sha wedela ko kouyahame waye?

⁵ Lesha Jesaja 53:4b. Ovanhu vahapu ovo va li ko pefimbo laJesus kava li ve udite ko kutya omolwashike Jesus a li e na okuhepekwa nokufya. Ova li tava diladila kutya Kalunga okwa li a handukila Jesus, a fa ngeno te mu hepeke nomukifi wonhumba unyanyalifi. (Mat. 27:38-44) Ovajuda ova li tava lundile Jesus kutya okwa sheka Kalunga. (Mark. 14:61-64; Joh. 10:33) Ndele nande ongaho, Jesus ka li omulunde noka li ha sheke Kalunga. Omapopyo oo kutya Jesus okwa li ta ka dipawa molwaashi a sheka Kalunga oku na okukala a li a wedela ko kouyahame waye, molwaashi Jesus okwa li e hole Xe neenghono. Ndele nande ongaho, Jesus okwa li a halela okuwanifa po ehalo laJehova. — Mat. 26:39.

6, 7. Omeityo lilipi Jehova a li a “nyanyaula” Omupiya waye omudiinini, nomolwashike osho sha li sha etela Jehova ehafo?

⁶ Itashi kumwifa eshi omuprofeti Jesaja a li a xunganeka kutya ovanhu vamwe otava ka tala ko Kristus a fa a “dengwa kuKalunga,” ndele eshi tashi kumwifa osheshi kutya Jesaja okwa ti yo vali kutya “osha wapalela Omwene oku mu nyanyaula.” (Jes. 53:10) Ngeenge Jehova okwa tile kutya: ‘Tala, omupiya wange, omuhoololwa wange, ou omwenyo wange we mu hokwa,’ omolwashike Jehova ta tile vali kutya ‘oshe mu wapalela oku mu nyanyaula’? (Jes. 42:1) Omeityo lilipi taku dulu okutiwa kutya osho osha li sha etela Jehova ehafo?

⁷ Opo tu ude ko oshitukulwa osho shexunganeko, otu na okudimbuluka kutya eshi Satana a li a shonga ounamapangelo waJehova okwa li yo a tula oudiinini wovapiya vaJehova aveshe vomeulu nosho yo vokombada yedu momalimbililo. (Job 1:9-11; 2:3-5) Jesus okwa li a yandja enyamukulo la denga mbada komhata oyo ya etifwa po kuSatana, eshi a li a kanyatela oudiinini waye fiyo omefyo. Kape na omalimbililo kutya Jehova okwa li e udite nai eshi a li ta tale Omupiya waye ta dipawa kovatondi vaye, nonande okwa li a efa osho shi ningwe. Ndele Jehova okwa li a hafa neenghono eshi Omona waye a li a kanyatela filufilu oudiinini waye. (Omayel. 27:11) Natango, Jehova okwa li a hafa neenghono molwaashi okwa li e shii kutya efyo lOmona waye otali ka etela ovanhu ovo ve livela ombedi ouwa. — Luk. 15:7.

Omupiya “okwa tuwa molwomatauluko etu”

8, 9. (a) Ongahelipi Jesus a li a “tuwa molwomatauluko etu”? (b) Ongahelipi Petrus a li a koleka oushili oo?

⁸ Lesha Jesaja 53:6. Ngaashi odi ya kana, ovanhu ovalunde ova kala tava elaela nova kala tava kongo ou te va mangulula kefyo olo va fyuulula kuAdam nosho yo komikifi. (1 Pet. 2:25) Kape na nande oumwe womoludalo laAdam a li ta dulu okukulila ovanhu, molwaashi aveshe inava wanenena. (Eps. 49:8) Ndele omolwohole yaJehova inene, ‘okwa twika omatauluko etu atushe’ kombada yOmona waye omuholike, Omupiya waye omuhoololwa. Eshi Kristus a li a efa a ‘tuwe omolwomatauluko etu’ “nokwa nyanyaulwa molwowii wetu,” okwa humbata po omatimba etu komuti womahepeko nokwa dipawa molwetu.

⁹ Omuyapostoli Petrus okwa ti: “Osheshi osho tuu eshi mwe shi ifanenwa, osheshi naKristus yo okwe mu hepekelwa nokwe mu fiila oshihopaelelwa mu shikule oshikoti shaye. Oye ou a humbata Ye mwene omatimba etu omolutu laye noku a londeka [komuti womahepeko, NW], opo tu longele ouyuki.” Opo nee, Petrus okwa li a tofa eendjovo odo di li mexunganeko laJesaja, tadi ti: “Oye ou mwa velulwa koipute yaye.” (1 Pet. 2:21, 24; Jes. 53:5) Osho osha li sha yeululila ovalunde omhito opo va dule okuhanganifwa vali naKalunga. Petrus okwa koleka oushili oo, eshi a ti: ‘Kristus okwa fila omatimba lumwe aluke, omuyuki ponhele yovalunde, opo e tu twale kuKalunga.’ — 1 Pet. 3:18.

Omupiya okwa li ngaashi “odjona tai twalwa i ka dipawe”

10. (a) Johannes Omuninginifi okwa ti ngahelipi eshi a li a mona Jesus? (b) Omolwashike sha li sha yeleka eshi Johannes a popya eendjovo odo?

¹⁰ Lesha Jesaja 53:7, 8. Eshi Johannes Omuninginifi a li a mona Jesus te uya kuye, okwa li a ingida a ti: “Tala, Odjona yaKalunga tai kufa po omatimba ounyuni.” (Joh. 1:29) Eshi Johannes a ti kutya tala Odjona ta ulike kuJesus, otashi dulika a li ta diladila eendjovo daJesaja, odo tadi ti kutya Jesus okwa li ‘ngaashi odjona tai twalwa i ka dipawe.’ (Jes. 53:7) Jesaja okwa li a xunganeka kutya Jesus ota ka “yandja omwenyo waye mefyo.” (Jes. 53:12) Shihokwifa, oufiku oo Jesus a li a dika po Edimbuluko lefyo laye, okwa li a pa ovayapostoli vaye ovadiinini 11 eholo lomaviinyu, ndele ta ti: “Olo ohonde yange, ohonde yehangano, tai tilwashi [molwavahapu okudima] po omatimba.” — Mat. 26:28.

11, 12. (a) Okudimina kwaIsak okuyamba po omwenyo waye nehalo liwa okwa li taku faneke shike shi na sha neyambo laKristus? (b) Oshike tu na okudimbuluka shi na sha naAbraham Munene, Jehova, eshi hatu dana Edimbuluko?

¹¹ Ngaashi Isak, Jesus okwa li a yamba po omwenyo waye nehalo liwa ngaashi Jehova a li a hala a ninge. (Gen. 22:1, 2, 9-13; Heb. 10:5-10) Nonande Isak okwa li a dimina nehalo liwa okuyamba po omwenyo waye, Abraham oye a li a ninga etokolo lokuyamba po omona waye. (Heb. 11:17) Sha faafana, Jesus okwa li a dimina nehalo liwa a ka dipawe, ndele Jehova oye a li tokola kutya ekuliloyambo oli na okuyandjwa ngahelipi. Kalunga okwa li a ulika kutya okuhole ovanhu nohole yomoule eshi a yamba po Omona waye.

¹² Jesus okwa ti: “Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Joh. 3:16) Omuyapostoli Paulus okwa ti: “Kalunga okwe tu hololela ohole yaye oku tu hola, Kristus eshi e tu fila fimbo twa li natango ovalunde.” (Rom. 5:8) Onghee hano, eshi hatu fimanekeni Kristus mokudimbuluka efyo laye, inatu dimbwa nande kutya Abraham Munene, Jehova, oye a li a ninga etokolo li na sha nanghee eyambo olo li na okuyandjwa. Natu fimanekifeni yo Jehova eshi hatu dana Edimbuluko.

Omupiya ota ka ninga “vahapu ovayuki”

13, 14. Ongahelipi Omupiya waJehova a ninga ovanhu “vahapu ovayuki”?

¹³ Lesha Jesaja 53:11, 12. Jehova okwa popya kombinga yOmupiya waye omuhoololwa, a ti: “Omupiya wange omuyuki ota ka ninga vahapu ovayuki.” Mbela osho okwa li te ke shi ninga ngahelipi? Oshitukulwa shaxuuninwa shovelishe 12 oshe tu etela popepi enyamukulo kepulo olo. Ovelishe oyo oya ti: ‘[Omupiya] okwa ilikanena ovanyoni.’ Ovana vaAdam aveshe ova dalwa ovalunde, ile tu tye, “ovanyoni.” Onghee hano, “ondjabi youlunde” oyo efyo. (Rom. 5:12; 6:23) Kungaho, ovanhu ovalunde ova li va pumbwa okuhanganifwa naJehova. Etukulwa 53 laJesaja ola yelifa nawa nghee Jesus a ‘ilikanena’ ile tu tye a popila ko ovanhu ovalunde, eshi la ti: “Ehandu ole mu hanga, opo tu kale tu na ombili, ndele twa velulwa molwoipute yaye.” — Jes. 53:5.

¹⁴ Eshi Kristus a humbata omatimba etu nokwa fya molwetu, kungaho okwa ninga ovanhu “vahapu ovayuki.” Paulus okwa ti: “Osheshi osho sha wapalela Xe, muye [Kristus] mu kale ouyadi aushe, ndele mokuninga ombili omolwohonde [‘oyo a tilashi komuti womahepeko,’ NW], ohandi ti: molwaye, a hanganife aishe muye naai yokombada yedu nainya yomeulu.” — Kol. 1:19, 20.

15. (a) Oinima “yomeulu” oyo ya popiwa kuPaulus otai ulike koolyelye? (b) Oolyelye ve na oufemba wokukufa ombinga mokulya nokunwa omadidiliko e na sha nEdimbuluko, nomolwashike?

¹⁵ Oinima “yomeulu” oyo ya hanganifwa naJehova omolwohonde yaJesus ya tika oyo Ovakriste ovavaekwa, ovo ve na eifano loku ka pangela pamwe naKristus meulu. Ovakriste ovo ve na ‘eifano lomeulu,’ ove na “eyukipalifo lomwenyo.” (Heb. 3:1; Rom. 5:1, 18) Onghee hano, ova ninga ovanamati vaJehova vopamhepo. Omhepo iyapuki oyo hai hepaulula pamwe nomhepo yavo kutya ova ninga ‘ovafyuululi pamwe naKristus,’ nova shivwa va ka pangele pamwe naKristus mOuhamba womeulu ve li eehamba novapristeri. (Rom. 8:15-17; Eh. 5:9, 10) Kungaho, ova ninga oshitukulwa shaIsrael shopamhepo, ‘Israel yaKalunga,’ nova ninga oilyo ‘yehangano lipe.’ (Jer. 31:31-34; Gal. 6:16) Molwaashi ova ninga oilyo yehangano lipe, kungaho ovo aveke ve na oufemba wokukufa ombinga mokulya nokunwa omadidiliko e na sha nEdimbuluko, mwa kwatelwa eholo lomaviinyu matilyana. Jesus okwa popya shi na sha neholo lomaviinyu, a ti: “Eholo eli olo ehangano lipe omohonde yange tai tilwashi molweni.” — Luk. 22:20.

16. Oinima “yokombada yedu” otai ulike kushike, noya yukipalifwa koshipala shaJehova meityo lilipi?

¹⁶ Oinima “yokombada yedu” oyo eedi dimwe daKristus, ovanhu ovo ve na eteelelo loku ka kala nomwenyo fiyo alushe kombada yedu. Ovanhu ovo navo ova ninga ovayuki koshipala shaJehova omolwOmupiya waJehova omuhoololwa. Molwaashi ove na eitavelo mekuliloyambo laKristus nova “kosha oikutu yavo, ndele ve i yelifa mohonde yOdjona,” Jehova okwe va tala ko ovayuki, ndele inava ninga ovanamati vaye vopamhepo. Ponhele yaasho, ova ninga ookaume kaKalunga nove na etimaumbwile likumwifi loku ka xupa “moudjuu munene.” (Eh. 7:9, 10, 14, NW; Jak. 2:23) Molwaashi kave li oshitukulwa shehangano lipe nokave na eteelelo loku ka kala meulu, eedi dimwe ihadi kufa ombinga mokulya nokunwa omadidiliko e na sha nEdimbuluko, ndele ohadi kala po ashike di li ovatali nefimaneko.

Jehova nOmupiya waye oo a hokwa ova wana filufilu okupandulwa

17. Ongahelipi okukonakona omaxunganeko aJesaja e na sha nOmupiya kwe tu kwafela tu kale twe lilongekidila Edimbuluko?

¹⁷ Okukonakona omaxunganeko aJesaja e na sha nOmupiya okwe tu kwafela tu kale twe lilongekidila nawa Edimbuluko lefyo laKristus. Okwe tu kwafela yo tu kale twa tala ‘komuhoveli nomuwanifi weitavelo.’ (Heb. 12:2) Otwe lihonga yo kutya Omona waKalunga ke fi omunashibofa. Mepingafano naSatana, Omona waKalunga oha tambula ko nehafo ehongo olo ta pewa kuXe, nokwa dimina kutya Jehova oye Omwene Omunamapangelo aeshe. Otwe lihonga yo kutya eshi Jesus a li moukalele waye wokombada yedu, okwa li a ulikila ovanhu ovo a li ta udifile olukeno, nokwa li a velula ovanhu vahapu palutu nosho yo pamhepo. Kungaho, okwa li a ulika osho ta ka ninga mounyuni mupe e li Ohamba yopaMessias, eshi ta ka ‘dika eyukifilopangelo kombada yedu.’ (Jes. 42:4) Okuudifa kwaJesus Ouhamba nouladi e li ‘ouyelele wovapaani’ otaku dimbulukifa ovashikuli vaye kutya ove na oshinakuwanifwa shokuudifa nouladi onghundana iwa mounyuni aushe. — Jes. 42:6.

18. Omolwashike omaxunganeko aJesaja a yadifa omitima detu olupandu okupandula Jehova nosho yo Omupiya waye omudiinini?

¹⁸ Omaxunganeko aJesaja okwe tu kwafela yo tu hapupalife eudeko letu li na sha neyambo linene olo Jehova a ninga eshi a tuma Omona waye omuholike kombada yedu opo a hepekwe nokufye molwetu. Jehova ka li a hafa okutala Omona waye ta hepekwa, ndele okwa li a hafa eshi Jesus a li a kanyatela oudiinini waye filufilu fiyo omefyo. Ngaashi Jehova, nafye otu na okukala twa hafa eshi twa shiiva ashishe osho Jesus a li a ninga opo a ulike kutya Satana omunaipupulu, a yapulife edina laJehova noku yukipalife ounamapangelo waJehova. Kakele kaasho, Kristus okwa humbata omatimba etu nokwa fya molwetu. Kungaho, okwe shi ninga tashi shiiva opo okangudu kovamwaxe ovavaekwa nosho yo eedi dimwe va dule okukala va yukipalifwa koshipala shaJehova. Omitima detu nadi kale di yadi olupandu okupandula Jehova nosho yo Omupiya waye omudiinini, eshi hatu ka ongala pamwe tu dane Edimbuluko.

Omapulo eendululo

• Omeityo lilipi Jehova a li e wete ‘sha wapala okunyanyaula’ Omona waye?

• Ongahelipi Jesus a li a “tuwa molwomatauluko etu”?

• Ongahelipi Omupiya a li a “ninga vahapu ovayuki”?

• Ongahelipi okukonakona omaxunganeko e na sha nOmupiya kwe tu kwafela tu lilongekidile Edimbuluko?

[Efano pepandja 26]

‘Okwa li a dinika, nokwa talika ko a fa oshinima shongaho’

[Efano pepandja 28]

“Okwa yandja omwenyo waye mefyo”

[Efano pepandja 29]

‘Eedi dimwe’ ohadi kala pEdimbuluko di li ovatali nefimaneko