Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
5-11 Maalitsa
OMALIKO OKUZA MOOHAPU DHAKALUNGA | MATEUS 20–21
“Ngoka gwomune a hala, a ninge omunene, oye na ninge omuyakuli gweni”
(Mateus 20:3) Ano sho a piti mo potundi ontimugoyi, okwa mono ko yamwe ya thikama owala pomalandelo.
nwtsty ethano
Omalandelo
Omahala gamwe gokulandithila, ngaashi ndyoka li li methano ndika, oga li haga kala pooha dhoondjila. Aalandithi olundji oya li haya tula iilandithomwa yawo oyindji mepandaanda e tayi thitike ondjila. Aantu yomoshitopolwa moka oya li haya vulu okulanda iinima yomegumbo, iiyuma, iikwamakende yondilo nosho wo iiyimati niikwamboga. Molwaashoka kapwa li ookila dhokutula iinima yi talale, aantu oya li haye ya komalandelo esiku kehe ya lande shoka ya pumbwa. Ngele omulandi a yi komalandelo okwa li ha vulu okukundana ko sha kaahalithi nenge kaatalelipo, aanona omo ya li haya dhanene naamboka kaaye na iilonga oya li haya vulu okukala mo ya tegelela ya pewe iilonga. Jesus omo a li a aludhile aantu, na Paulus omo a li hu uvithile. (Iil 17:17) Mepingathano naashoka, aanongompango nAafarisayi aanuuntsa oya li ye hole okwiimonikitha nokukundilwa pomahala ngoka mpoka hapu kala pu udha aantu.
(Mateus 20:20, 21) Nena yina yaana yaSebedeus okwe ya kuJesus pamwe noyana mboka nokwa tsu oongolo koshipala she oku mu pula sha. 21 Jesus okwe mu pula a ti: “Owa hala shike?” Oye a yamukula a ti: “Pitika aamwandje mbaka yaali, ya ka kuutumbe gumwe okolulyo lwoye nomukwawo okolumoho lwoye mOshilongo shoye.”
nwtsty uuyelele wokukonakonwa wa kankamena kuMat 20:20, 21
yina yaana yaSebedeus: Nguka oye yina yomuyapostoli Jakob naJohannes. Mehokololo lyaMateus omwa popiwa kutya Jakob naJohannes oyo ye ya kuJesus. Osha yela kutya oyo ya pula, ihe oye shi ningi okupitila muyina, Salome, ngoka tashi vulika a li yinagona yaJesus. — Mat 27:55, 56; Mark 15:40, 41; Joh 19:25.
gumwe okolulyo lwoye nomukwawo okolumoho lwoye: Movelise ndjika oombinga adhihe otadhi ulike kesimano nokoonkondopangelo, ihe ombinga ndjoka hayi kala aluhe ya simana konkwawo, olulyo. — Eps 110:1; Iil 7:55, 56; Rom 8:34.
(Mateus 20:25-28) Jesus okwe ya ithana ayehe e ta ti kuyo: “One omu shi shi, aapangeli ohaa lele iigwana, naanenentu ohaye yi pangele pankondo dhawo. 26 Ihe inashi kala ngaaka mokati keni. Ngoka gwomune a hala, a ninge omunene, oye na ninge omuyakuli gweni. 27 Naangoka gwomune a hala, a ninge gwotango, oye na kale omupika gweni. 28 Oshoka nOmuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.”
nwtsty uuyelele wokukonakonwa wa kankamena kuMat 20:26, 28
omuyakuli: Nenge “omupiya.” Olundji Ombiimbeli ohayi longitha oshitya shOshigreka diakonos ngele tayi ulike komuntu ngoka ihaa sholola mokulongela yalwe neifupipiko. Oshitya shoka osha longithwa tashi popi Kristus (Rom 15:8), aayakuli nenge aapiya yaKristus (1Kor 3:5-7; Kol 1:23), aayakuli yegongalo (Fil 1:1; 1Tim 3:8), aayakuli yomomagumbo (Joh 2:5, 9) naakwanepangelo (Rom 13:4).
ine ya okuyakulwa, ihe okuyakula: Nenge “ine ya okulongelwa, ihe okulongela.”
Konga omaliko gopambepo
(Mateus 21:9) Ano oongundu dhaamboka ya kwata komeho naamboka ye mu landula, oyi igidha mokule ya ti: “Hosianna, Omuna gwaDavid! Na lalekwe nuuyamba kuKalunga, oonguka te ya medhina lyOmuwa! Hosianna, gwokombandambanda!”
nwtsty uuyelele wokukonakonwa wa kankamena kuMat 21:9
Hosianna: Uutumbulilo mbuka wOshigreka owa za kuutumbulilo wOshihebeli tawu ti “otatu galikana, hupitha” nenge “alikana, hupitha.” Movelise ndjika uutumbulilo mboka owa longithwa wu li eindilo kuKalunga a hupithe nenge a gandje esindano. Otawu vulu okutolokwa taku ti “alikana, hupitha.” Owa li wo hawu longithwa wu ukithwa kokugalikana nokokuhambelela. Uutumbulilo wOshihebeli otawu adhika mEpisalomi 118:25, ndyoka li li oshitopolwa shOmapisalomi gaHallel ngoka ga li hagi imbwa aluhe pethimbo lyOpaasa. Onkee ano, uutumbulilo mboka owa li hawu ya momadhiladhilo gaantu pethimbo ndyoka. Omukalo gumwe moka Kalunga a li a yamukula egalikano ndyoka a hupithe Omuna gwaDavid, omokuyumudha Jesus kuusi. MuMateus 21:42, Jesus okwa totha Episalomi 118:22, 23 nokwa ti kutya otali popi Mesiasa.
Omuna gwaDavid: Uutumbulilo mbuka otawu ulike kokutseya kutya Jesus ogwomezimo lini nosho wo onkandangala ndjoka ta dhana e li Mesiasa ngoka u uvanekwa.
(Mateus 21:18, 19) Jesus sho a meneka ongula ta shuna koshilando, okwa li a sa ondjala. 19 Pondjila okwa mono omukwiyu nokwa yi kugwo, ihe ina mona mo sha, omafo ageke. Oye a ti kugwo: “Ku imi we iiyimati sigo aluhe.” Omukwiyu nogwa si mbala.
jy-E ep. 244, okat. 4-6
Omukwiyu ogwa longithwa okulonga aantu oshiilongomwa kombinga yeitaalo
Ihe omolwashike Jesus a kukutike omukwiyu? Okwa gandja etompelo sho a ti: “Ongame tandi mu lombwele: Andola mu na eitaalo, ne itamu limbililwa, ando otamu vulu, hashika ashike sha ningilwa omukwiyu, ihe otamu vulu wo okulombwela ondundu ndjika: ‘Itumba po mpaka, u iyundulile mefuta,’ notashi ningwa. Nongele mwi itaala, otamu pewa kehe tuu shoka tamu shi indile megalikano.” (Mateus 21:21, 22) Kungeyi, okwa li te endulula oshitsa shoka a li a popi petameko kutya eitaalo otali vulu okwiinyengitha ondundu. — Mateus 17:20.
Opo Jesus a longe aantu kutya oye na okwiitaala muKalunga, okwa kukutike omukwiyu. Okwa ti: “Shaa shoka tamu shi indile nokugalikana, itaaleni kutya omwe shi pewa, notamu ke shi pewa.” (Markus 11:24) Shika kashi shi tuu oshiilongomwa sha simana kaalanduli yaJesus ayehe! Osha li nokuli sha simanenena kaayapostoli, oshoka oya li pokutaalela oonkalo oondhigu. Opu na ishewe ekwatathano lilwe pokati kokukukuta kwomukwiyu nokukala neitaalo lya kola.
Ngaashi omukwiyu ngoka, oshigwana shaIsraeli osha li shi na iikala yokwiiningitha. Aantu yasho oya li ya ninga ehangano naKalunga notaya monika ya fa haya vulika kOmpango ye. Ihe oshigwana ashihe kasha li shi na eitaalo nokasha li tashi imike iiyimati iiwanawa. Kasha li nokuli sha hala okutaamba Omwana gwaKalunga. Ano sho Jesus a thingi omukwiyu ngoka ihaagu imi iiyimati gu kukute, okwa li tu ulike shoka tashi ka ningilwa oshigwana shika ihaashi imike iiyimati nokaashi na eitaalo.
Elesho lyOmbiimbeli
(Mateus 20:1-19) “Oshilongo shegulu osha fa omusamane a meneka, a ka kongele eyana lye lyomiviinu aalongi. 2 Sho yu uvathana naalongi oshimaliwa shesiku, okwe ya tumu keyana lye lyomiviinu. 3 Ano sho a piti mo potundi ontimugoyi, okwa mono ko yamwe ya thikama owala pomalandelo. 4 Oye a ti kuyo: ‘Nane wo indeni keyana lyomiviinu, otandi ke mu futa pauyuuki.’ 5 Oyo noya yi. Oye a piti mo ishewe potundi ontimulongo nambali nopontitatu nokwa ningi ngaashi a ningile. 6 Oye a piti mo ishewe potundi ontintano nokwa adhele ko ishewe yamwe ya thikama e ta ti kuyo: ‘Omolwashike mwa thikama owala mpaka esiku alihe?’ 7 Oyo ya ti kuye: ‘Oshoka katu na ngoka e tu hiya.’ Oye a ti kuyo: ‘Nane wo indeni keyana lyandje lyomiviinu.’ 8 “Ano sho kwa ningi ongulohi, mwene gweyana lyomiviinu okwa lombwele elenga lye a ti: ‘Ithana aalongi, u ya fute ondjambi yawo. Tameka kumboka yahugunine sigo okumboka yotango.’ 9 Mboka ye ya potundi ontintano, oya pewa kehe gumwe oshimaliwa she. 10 Mbeyaka yotango sho ye ya, oya li ye shi, otaa pewa oshindji shi vule shayakwawo, ihe nayo wo oya pewa ondjambi oyo tuu ndjoka. 11 Sho ye yi pewa, oya tameke okutamaneka mwene gweyana 12 e taa ti: ‘Aahugunini oya longo otundi yimwe ayike, ihe ngoye owe ya yeleke natse mbaka twa Iongo esiku alihe momutenya omupyu.’ 13 “Nena mwene gweyana okwa yamukula gumwe gwomuyo e ta ti: ‘Kuume kandje, inandi ku yuga. Inatu uvathana nani ondjambi oyo tuu ndjono? 14 Kutha po yoye, u ye. Ngame onda hala okupa nguka omuhugunini shi thike pushika shoye. 15 Ondi indikwa nani okuninga ngaashi nda hala niimaliwa yandje? Nenge ou na efupa molwashoka ngame ndi na ohenda?’” 16 Jesus nokwa hulitha a ti: “Osho aahugunini otaa ka ninga aatango, naatango otaa ka ninga aahugunina.” 17 Jesus sho kwa li ta londo ta yi kuJerusalem, okwa kutha aalongwa mboka omulongo nayaali. Manga ya li mondjila, okwe ya lombwele yi ikalela a ti: 18 “Tala, otatu yeni kuJerusalem, hoka Omuna gwOmuntu ta ka gandjwa miikaha yaayambi aakuluntu noyaalongimpango, notaye mu pangulile eso. 19 Oyo otaye ke mu gandja ishewe kaapagani, mboka taye mu sheke e taye mu dhenge notaye mu alele komushigakano, ihe esiku etitatu ota yumudhwa.”
12-18 Maalitsa
OMALIKO OKUZA MOOHAPU DHAKALUNGA | MATEUS 22–23
“Vulika kiipango iyali iinene”
(Mateus 22:36-38) “Muhongi, oshipango oshinene shomompango oshinipo?” 37 Jesus okwa ti kuye: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ 38 Shika osho oshipango oshinene noshotango.
nwtsty uuyelele wokukonakonwa wa kankamena kuMat 22:37
omutima: Oshitya shika otashi ulike kuukwatya awuhe womuntu womeni, ngele tashi longithwa pathaneko. Ihe ngele tashi tumbulwa pamwe noshitya ‘omwenyo’ nosho wo ‘omadhiladhilo,’ osha yela kutya ohashi kala shi na eityo lyokondandalunde nohashi ulike komaiyuvo gomuntu, komahalo ge nokunkene u uvite. Omautumbulilo gatatu ngoka ga longithwa movelise ndjika (omutima, omwenyo nomadhiladhilo) otaga longele kumwe notaga tsu lela omuthindo kutya otwa pumbwa okukala tu hole Kalunga thiluthilu.
omwenyo: Nenge “olutu aluhe.”
omadhiladhilo: Otashi ulike kukehe shimwe sha pamba omadhiladhilo. Omuntu okwa pumbwa okulongitha omadhiladhilo ge a tseye Kalunga nokukokeke ohole ye yoku mu hola. (Joh 17:3; Rom 12:1) MuDeuteronomium 6:5, momanyolo gOshihebeli gopetameko omwa longithwa omautumbulilo ngaka gatatu: ‘omutima, omwenyo noonkondo.’ Ihe mehokololo lyaMateus ngaashi lya nyolwa mOshigreka, uutumbulilo ‘omadhiladhilo’ owo wa longithwa pehala lyuutumbulilo ‘oonkondo.’ Otashi vulika pu na omatompelo gontumba kutya omolwashike uutumbulilo mbuka wa yoolokathana wa longithwa. Lyotango, nonando Oshihebeli shonale kasha li shi na oshitya shokondandalunde tashi ti ‘omadhiladhilo,’ oshitya shOshihebeli shoka tashi ti ‘omutima’ nasho olundji osha li sha kwatela mo omadhiladhilo. Ngele oshitya omutima sha longithwa pathaneko, ohashi ulike kuukwatya awuhe womuntu womeni, ngaashi omadhiladhilo ge, omaiyuvo ge, iikala ye nomainyengotompelo ge. (Deut 29:4; Eps 26:2; 64:6; tala uuyelele wokukonakonwa kombinga yoshitya omutima shoka sha longithwa movelise ndjika.) Omolwetompelo ndika, mpoka oshitya ‘omutima’ sha longithwa momanyolo gOshihebeli, mo-Septuagint yOshigreka omwa longithwa olundji oshitya shOshigreka shoka tashi ti ‘omadhiladhilo.’ (Gen 8:21; 17:17; Omayel 2:10; Jes 14:13) Etompelo lilwe kutya omolwashike Mateus a longitha oshitya shOshigreka shoka tashi ti ‘omadhiladhilo’ pehala lyoshitya ‘oonkondo’ sho a totha muDeuteronomium 6:5 olyo kutya oshitya shOshihebeli shoka tashi ti ‘oonkondo [nenge “oonkondo tadhi longo”]’ osha kwatela mo oonkondo dhopalutu nomadhiladhilo. Kutya nduno etompelo olini, omadhiladhilo ngaka taga popi oshinima shimwe ge na ko nasha nuutumbulilo wOshigreka nowOshihebeli, otaga vulu oku tu kwathela tu mone kutya omolwashike sho aanyoli yOmavaangeli ya totha muDeuteronomium inaaya longitha iitya ya faathana thiluthilu.
(Mateus 22:39) Oshitiyali shi thike pusho osho shika: ‘Hola mukweni ngaashi ngoye wi ihole mwene.’
nwtsty uuyelele wokukonakonwa wa kankamena kuMat 22:39
Oshitiyali: MuMateus 22:37 omwa nyolwa eyamukulo lyu ukilila ndyoka Jesus a pe Omufarisayi, ihe movelise 39 okwa yamukula epulo lye e te mu lombwele ishewe oshipango oshitiyali (Lev 19:18). Kungeyi, oku ulike kutya iipango mbika iyali oya pambathana nosho wo kutya Ompango ayihe nomahunganeko oya kwatelwa mo miipango mbyoka. — Mat 22:40.
mukweni: Oshitya shOshigreka shoka tashi ti “mukweni” (tashi ti lelalela “ngoka e li popepi nangoye”) inashi kwatela mo owala mboka haya kala popepi nangoye. Osha kwatela mo omuntu kehe ngoka ho popi naye. — Luk 10:29-37; Rom 13:8-10.
(Mateus 22:40) Ompango ayihe nomahunganeko agehe oya kwatelelwa miipango mbika iyali.”
nwtsty uuyelele wokukonakonwa wa kankamena kuMat 22:40
Ompango . . . nomahunganeko: “Ompango” otayi ulike komambo gOmbiiimbeli okuza kuGenesis sigo okuDeuteronomium. ‘Omahunganeko’ otagu ulike komambo gOmbiimbeli ngoka taga popi kombinga yomahunganeko ngoka ge li mOmanyolo gOshihebeli. Ihe ngele omautumbulilo ngoka taga tumbulwa pamwe, otaga vulu okuuviwa ko kutya otagu ulike kOmanyolo gOshihebeli agehe. — Mat 7:12; 22:40; Luk 16:16.
kwatelelwa: Oshityalonga shOshigreka shoka tashi ti lelalela “okwiikwatelela” osho sha longithwa movelise ndjika pathaneko tashi ti “okukala wi ikolelela koshinima; okukala wa kankamena koshinima.” Kungeyi, Jesus okwa li tu ulike kutya Ompango nIipango Omulongo hayo owala ya kankamena kohole, ihe Omanyolo gOshihebeli agehe oko ga kankamena. — Rom 13:9.
Konga omaliko gopambepo
(Mateus 22:21) Oyo ya yamukula: “Olyomupangeli Omuroma.” Nena Jesus okwe ya lombwele a ti: “Ano shono shomupangeli, shi peni omupangeli, naashoka shaKalunga, shi peni Kalunga.”
nwtsty uuyelele wokukonakonwa wa kankamena kuMat 22:21
shono shomupangeli, shi peni omupangeli: Meyamukulo ndika lyaJesus naandyoka lya nyolwa momahokololo ga faathana muMarkus 12:17 naLukas 20:25, omo owala Jesus a popya kombinga yomupangeli Omuroma. “Shono shomupangeli” osha kwatela mo oofuto dhiilonga mbyoka hayi longwa kepangelo, esimano ndyoka li na okupewa aapangeli nosho wo okuvulika kuyo. — Rom 13:1-7.
naashoka shaKalunga, shi peni Kalunga: Shika osha kwatela mo okulongela Kalunga nomutima aguhe, oku mu hola nomwenyo aguhe nosho wo okuvulika kuye thiluthilu. — Mat 4:10; 22:37, 38; Iil 5:29; Rom 14:8.
(Mateus 23:24) One aakwatiketi aaposi! Omwe otamu yi dhindi mo, ihe ongamelo otamu yi nina.”
nwtsty uuyelele wokukonakonwa wa kankamena kuMat 23:24
Omwe otamu yi dhindi mo, ihe ongamelo otamu yi nina: Omwe nongamelo oya li ya kwatelwa miinamwenyo iinene niishona mbyoka Aaisraeli ya li ye shi kutya inayi yogoka. (Lev 11:4, 21-24) Jesus okwa li a popi molupe lwomutoto nosho wo lwenyonkelo, ta ti kutya aawiliki yomalongelokalunga ohaya dhindi omwe mwaashoka taya nu, oshoka inaya hala ya kale ye na oshipwe, ihe iinima yi na oshilonga yomOmpango, ihaye yi simaneke nandonando, shoka tashi vulu okuyelekanithwa nokunina ongamelo.
Elesho lyOmbiimbeli
(Mateus 22:1-22) Jesus okwe ya lombwele ishewe momayele a ti: 2 “Oshilongo shegulu otashi yelekwa nomukwaniilwa a longekidhile omwana omumati oshituthi shohango. 3 Oye okwa tumu aamati ye, ye ki ithane aahiywa, ye ye koshituthi, ihe oya li inaa hala okuya. 4 Onkee okwa tumununa ko aamati yalwe e ta ti: ‘Lombweleni aahiywa kutya ngashingeyi oshituthi shandje onde shi longekidha, oondumetana niimuna yo ondodhwa oya tselwa, ashihe osha longekidhwa. Ileni kohango.’ 5 Ihe aahiywa oya li kaaye na ko nasha; oyo ya yi. Gumwe okwa yi kepya lye, nomukwawo okwa ka halitha. 6 Ooyakwawo oya kwata aamati ye, oye ya hepeke e taye ya dhipaga. 7 Omukwaniilwa okwa geye ihe, okwa tumu ko aakwiita ye, okwa hanagula po aadhipagi mboka nokwa fike po oshilando shawo. 8 Oye a ti kaamati ye: ‘Oshituthi shohango osha pwa okulongekidhwa, ihe aahiywa inaye shi opalela. 9 Indeni ano koompagiila dhoondjila, ayehe mboka tamu mono, ya hiyeni kohango.’ 10 Aamati oya yi noondjila noye eta mo ayehe mboka ya mono, aawinayi naawanawa, ohango noyu udha aayenda.” 11 “Ano omukwaniilwa sho a yi okutala aayenda, okwa mono mo omuntu gumwe kee na onguwo yoshituthi. 12 Oye okwe mu pula: ‘Kuume, owe ya mo ngiini muka waa na onguwo yoshituthi?’ Ihe oye okwa mwena. 13 Nena omukwaniilwa okwa ti kaamati ye: ‘Mu mangeni omaako nomagulu, ne mu mu umbile momilema dhopondjelela.’ Omo hamu kala elilagano neikokoto lyomayego.” 14 “Oshoka oyendji oyi ithanwa, ihe aashona ya hogololwa.” 15 Nena aafarisayi oya yi noya kundathana, nkene ye na okuyula Jesus moohapu. 16 Oyo ya tumu kuye aalongwa yawo pamwe naamboka ya gama kuHerodes ya ti: “Muhongi, otu ku shi kutya ongoye omunashili, iho ipula nomadhiladhilo gaantu noiho tala olupe lwomuntu. 17 Tu lombwela, oto ti ngiini, osho opala okupa omupangeli Omuroma oompale, nenge inashi opala?” 18 Jesus sho a dhimbulula uuwinayi wawo, okwa ti: “Aafudhime ne, omolwashike tamu makele ndje? 19 Ulukilii ndje oshimaliwa shoshene!” Oyo oye mu pe oshimaliwa oshisiliveli. 20 Jesus okwe ya pula a ti: “Efano ndino nenyolo li li ko, olyalye?” 21 Oyo ya yamukula: “Olyomupangeli Omuroma.” Nena Jesus okwe ya lombwele a ti: “Ano shono shomupangeli, shi peni omupangeli, naashoka shaKalunga, shi peni Kalunga.” 22 Sho ye shi uvu, oya kumwa noye mu thigi po e taa yi.
19-25 MAALITSA
OMALIKO OKUZA MOOHAPU DHAKALUNGA | MATEUS 24
“Kala wa tonata pambepo momasiku ngaka gahugunina”
(Mateus 24:12) Uulunde otau ka lunda pombanda, nohole yoyendji otayi huhwa.
it-2-E ep. 279, okat. 6
Ohole
Ohole yomuntu ohayi vulu okuhuhwa. Sho Jesus Kristus a li ta lombwele aalongwa ye iinima mbyoka tayi ka ningwa komeho, okwa li a popi kutya ohole (agape) yoyendji mboka taya ti kutya oyi itaala Kalunga otayi ka talala. (Mat 24:3, 12) Omuyapostoli Paulus okwa ti kutya momathimbo omadhigu ngoka tage ke ya aantu otaya ka kala “ye hole eliko.” (2Tim 3:1, 2) Onkee ano, osha yela kutya omuntu ota vulu okukala inaa simaneka we omakotampango guuyuuki nonokutya ota vulu okukala kee na we ohole. Shoka otashi tsu omuthindo esimano lyokuulika aluhe ohole noku yi kokeka, mokukala ho dhiladhila muule Oohapu dhaKalunga nomokweetha omakotampango Ge ga zule onkalamwenyo yoye. — Ef 4:15, 22-24.
(Mateus 24:39) yo inaye shi tseya, sigo eyelu lye ya nolye ya hanagula po ayehe, osho tuu taku ka kala, uuna Omuna gwOmuntu te ya.
w99 12/1 ep. 15, okat. 5
Mbela Oto Gwanitha Po Ngaa Oshinakugwanithwa Shoye Ashihe Shoka Wa Pewa KuKalunga?
5 Jesus Kristus okwa popi shi na ko nasha nomathimbo omadhigu ngoka tu li mugo a ti: “Ngaashi sha li pethimbo lyaNoa, osho tuu taku ka kala, uuna Omuna gwOmuntu te ya. Ngaashi aantu ya li pethimbo ndiyaka lya tetekele eyelu, ya kala taa li notaa nu, taa hokana notaa hokanitha, sigo esiku ndyoka Noa a yi monguluwato, yo inaye shi tseya, sigo eyelu lye ya nolye ya hanagula po ayehe, osho tuu taku ka kala [pokukala po kwOmuna gwOmuntu NW].” (Mateus 24:37-39) Okulya nokunwa pandjele inaku puka, yo ondjokana oyi li elongekidho lya totwa po kuKalunga mwene. (Genesis 2:20-24) Ihe ngele otwa mono kutya iinima yonkalamwenyo yakehe siku oyo unene twi itula muyo, omolwashike itaatu galikana kombinga yasho? Jehova ota vulu oku tu kwathela tu kale twa pititha komeho iinima mbyoka tayi humitha komeho Uukwaniilwa, tu ninge shoka shu uka notu gwanithe po oshinakugwanithwa shoka e tu pa. — Mateus 6:33; Aaroma 12:12; 2 Aakorinto 13:7.
(Mateus 24:44) Onkee ano nane wo kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.”
jy-E ep. 259 okat. 5
Aayapostoli taya pula ya pewe endhindhiliko
Jesus okwa ti kutya aalongwa ye otaya ka pumbwa okukala ya tonata noyi ilongekidha. Elondodho ndika okwe li tsu omuthindo neudhi lilwe tali ti: “One omu shi shi, mwene gwegumbo ngele oku na owino kutya opethimbo lini omufuthi te ya, nena ota tonatele egumbo lye, opo lyaa gwayelwe. Onkee ano nane wo kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.” — Mateus 24:43, 44.
Konga omaliko gopambepo
(Mateus 24:8) Ayihe mbika otayi ningi ongetameko lyoshitheta, okanona ngele taka valwa.
nwtsty uuyelele wokukonakonwa wa kankamena kuMat 24:8
oshitheta: Oshitya shika mOshigreka otashi ulike lelalela kuuwehame uunene mboka hawu kala po sho omuntu ta mono okanona. Nonando oshitya shika movelise ndjika otashi ulike kuudhigu uunene, kuuwehame nokokumona iihuna meityo lya mbwalangandja, otashi vulika sha hala okutya ngaashi uuwehame wokuvala hawu ende tawu indjipala, tawu dhigupala nohawu kwata ethimbo ele, ano nomaupyakadhi nosho wo okumona iihuna hoka kwa hunganekwa osho taku ka kala manga uudhigu uunene inaawu ya mboka wa popiwa muMateus 24:21.
(Mateus 24:20) Galikaneni, okufadhuka po kweni kwaa ningwe pokufu nenge mesiku lyEsabati.
nwtsty uuyelele wokukonakonwa wa kankamena kuMat 24:20
pokufu: Omvula yepoola, efundja nosho wo ombepo ontalala pethimbo ndyoka ohayi shi ningi oshidhigu okweenda nokumona iikulya nosho wo ehala lyokukala. — Esra 10:9, 13.
mesiku lyEsabati: Miitopolwa yimwe ngaashi muJudea, omangambeko ge na ko nasha nompango yEsabati oga li ge shi ninga oshidhigu kaantu okweenda oshinano oshile nokuhumbata oondongelwa; nosho wo omiyelo dhoshilando odha li hadhi kala dhe edhila mesiku ndyoka. — Tala Iilonga 1:12 nosho wo okambo Ekwatho kungoye Oshitopolwa 16.
Elesho lyOmbiimbeli
(Mateus 24:1-22) 1 Jesus okwa zi mo motempeli nokwa yi. Aalongwa ye oye ya kuye noye mu ulukile oongulu dhotempeli. 2 Oye a ti kuyo: “Kamu dhi wete adhihe ndhika! Ongame tandi mu lombwele: Itapu thigwa mpaka emanya lya tentekwa kekwawo inaali kumunwa po.” 3 Jesus sho a kuutumba kOndundu yooholivi, aalongwa oye ya kuye, manga ya li yi ikalela. Oyo oye mu pula ya ti: “Tu lombwela, uunake ano tashi ka ningwa, nendhindhiliko olini tali holola, uuna to ya nehulilo lyuuyuni?” 4 Jesus okwe ya yamukula a ti: “Kotokeni, mwaa pukithwe nando okulye. 5 Aantu oyendji otaa ke ya taa ti: ‘Ongame Mesias!’ notaa pukitha oyendji. 6 Otamu ka uva omalugodhi noonkundana dhomalugodhi, ihe inamu tulwa uumbanda. Oshoka mbika oyi na okuningwa, ihe ehulilo inali thikana natango. 7 Iigwana otayi ka thikama okukondjithathana, iilongo otayi ka matukilathana. Otaku ke ya oondjala nomakakamo gevi okoombinga noombinga. 8 Ayihe mbika otayi ningi ongetameko lyoshitheta, okanona ngele taka valwa. 9 “Aantu otaye ke mu kwata notaye ke mu gandja, mu hepekwe, e taye mu dhipaga. One tamu ka tondwa kaantu ayehe omolwandje. 10 Aantu oyendji otaa ka etha eitaalo, otaa ka gandjathana e taa tondathana. 11 Otaku ka za aahunganeki aafundja oyendji e taa pukitha oyendji. 12 Uulunde otau ka lunda pombanda, nohole yoyendji otayi huhwa. 13 Ihe ngoka ti idhidhimike sigo ehulilo, ota hupithwa. 14 Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” 15 “Ngele tamu mono iihuna yeshunduko, mbyoka ya popiwa komuhunganeki Daniel, yi li meha eyapuki” (omuleshi na ndhindhilike nawa), 16 “nena ayehe mboka ye li muJudea, naa tembukile koondundu. 17 Ngoka ta adhika kombanda yongulu ina kuluka ko, a ka pitule iinima ye megumbo. 18 Ngoka ta adhika mepya, ina shuna, a ka tale ko onguwo ye. 19 Yayee aasimba naamwali yopomasiku ngoka! 20 Galikaneni, okufadhuka po kweni kwaa ningwe pokufu nenge mesiku lyEsabati. 21 Oshoka omasiku ngoka otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we. 22 Omasiku ngoka ando itaga fupipikwa, ando kaku na nando omuntu ta hupithwa. Ihe Kalunga ota fupipike omasiku ngoka omolwaahogololwa ye.
26 MAALITSA–1 APILILI
OMALIKO OKUZA MOOHAPU DHAKALUNGA | MATEUS 25
“Kala wa tonata”
(Mateus 25:1-6) Nena Oshilongo shegulu tashi ka kala sha fa aakadhona omulongo mboka ya kutha oolamba dhawo noya ka tsakaneka ombushiki. 2 Yatano yomuyo oya li aagoya nooyakwawo yatano oya li aanandunge. 3 Aagoya oya kutha oolamba dhawo, yo inaa kutha omahooli. 4 Ihe aanandunge oya kutha iiyuma yomahooli noolamba dhawo. 5 Ano ombushiki sho a kala ko, ayehe oya lendenda noya kotha. 6 “Ihe pokati kuusiku okwi igidhwa: ‘Ombushiki oye ngu! Indeni, mu ke mu tsakaneke!’
(Mateus 25:7-10) Aakadhona ayehe oya penduka noyo opaleke nawa oolamba dhawo. 8 Aagoya oya lombwele aanandunge: ‘Tu pii mo wo momahooli geni, oshoka oolamba dhetu otadhi dhimi.’ 9 Aanandunge oya yamukula ya ti: ‘Itage tu gwaneni, otse nane. Indeni, mu ki ilandele kaalandithi.’ 10 Ano sho ya yi, ya ka lande, ombushiki okwe ya. Oye nokwa yi mo pamwe naakadhona yatano mboka ya adhika yi ilongekidhila oshituthi shohango, osheelo noshe edhilwa po.
(Mateus 25:11, 12) “Ohugunina aakadhona ooyakwawo oye ya wo noyi igidha ya ti: ‘Omuwa, Omuwa, tu egulula!’ 12 Ombushiki okwa yamukula a ti: ‘Ongame tandi mu lombwele: Kandi mu shi.’
Konga omaliko gopambepo
(Mateus 25:31-33) “Ano uuna Omuna gwOmuntu te ya meadhimo lyuukwaniilwa we pamwe naayengeli ye ayehe; nena ota ka kuutumba koshipangelapundi shuukwaniilwa we. 32 Aantu ayehe yokombanda yevi otaa ka gongelwa ihe koshipala she, note ke ya yoolola mooyakwawo, ongashika omusita ta yoolola oonzi miikombo. 33 Oonzi ote dhi gameke kolulyo Iwe, iikombo okolumoho lwe.
Natu longeni pamwe naamwahe yaKristus nuudhiginini
7 Ngashingeyi eyele lyoonzi niikombo otu li uvite ko nawa. Otu shi shi kutya “Omuna gwOmuntu” nenge “omukwaniilwa,” oJesus. ‘Aamwahe’ yOmukwaniilwa, aantu mboka ya gwayekwa nombepo ondjapuki, mboka taya ka pangela pamwe naJesus megulu. (Rom. 8:16, 17) “Oonzi” nosho wo “iikombo,” aantu yomiigwana ayihe. Aantu mboka otaya ka pangulwa lwopehulilo lyuudhigu uunene mboka wu li pokutameka. Otu shi shi wo kutya Jesus ota ka pangula aantu shi ikolelela kunkene yu ungaunga naagwayekwa mboka ye li natango kombanda yevi. Otwa pandula Jehova sho e tu kwathela tu uve ko eyele ndika nomakwawo ngoka ge li muMateus ontopolwa 24 no 25.
(Mateus 25:40) Nena omukwaniilwa ote ya yamukula ta ti: ‘Ongame tandi mu lombwele: Ayihe mbyoka mwe yi ningile gumwe gwaamwatate mbaka aashuushuka, ongame mwe yi ningile.’
w09 10/1 ep. 23-24, okat. 16-18
“One ookuume kandje”
16 Ngele owu na etegameno lyokukala nomwenyo kombanda yevi kohi yUukwaniilwa waKalunga, ongiini to vulu okuulukila aamwahe yaKristus ohole? Natu taleni omikalo ndatu. Gwotango, okukutha ombinga miilonga yokuuvitha nomutima aguhe. Kristus okwa lombwele aamwahe yu uvithe onkundana ombwanawa muuyuni auhe. (Mat. 24:14) Ihe otashi ka kala oshidhigu koshihupe shaamwahe yaKristus okuuvithila aantu kombanda yevi alihe ngele itaya kwathelwa koonzi dhilwe. Ethimbo kehe iilyo yoonzi dhilwe tayi uvitha, otayi kwathele lela aamwahe yaKristus okugwanitha po oshilonga shoka oshiyapuki. Kristus nongundu yomupiya omudhiginini nomunandunge ohaya pandula unene ngele tatu shi ningi.
17 Omukalo omutiyali ngoka oonzi dhilwe tadhi vulu okukwathela aamwahe yaKristus, ogwo okwaambidhidha pashimaliwa iilonga yokuuvitha. Jesus okwa ladhipike aalanduli ye yi ikongele ookuume “neliko lyomuuyuni mbuka.” (Luk. 16:9) Shika inashi hala kutya otu na okulanda uukuume naJesus nenge naJehova. Pehala lyaashono, otu na okulongitha iiniwe yetu yopamaliko tu humithe komeho iilonga yUukwaniilwa, shoka tashi ulike uukuume nohole ‘yashili ndjoka tayi iholola miilonga,’ ihe hamokupopya owala. (1 Joh. 3:16-18) Ohatu ambidhidha pashimaliwa ongundu ndjoka uuna tu li miilonga yokuuvitha, ngele tatu ambidhidha iilonga yokutunga nokwoopaleka omahala getu moka hatu gongalele nosho wo ngele tatu ambidhidha iilonga yokuuvitha muuyuni auhe. Jehova naJesus ohaya pandula omayambidhidho ngoka tatu gandja, kutya nduno omashona nenge ogendji. — 2 Kor. 9:7.
18 Omukalo omutitatu ngoka atuhe tatu ulike kutya otu li ookuume yaKristus, ogwo okutaamba ko ewiliko ndyoka tatu pewa kaakuluntugongalo. Aalumentu mbaka oya hogololwa kombepo ondjapuki kohi yewiliko lyaKristus. (Ef. 5:23) Omuyapostoli Paulus okwa nyola a ti: “Vulikeni kaawiliki yeni, [ne] mu landule omalombwelo gawo.” (Heb. 13:17) Omathimbo gamwe otashi vulika shi kale oshidhigu okuvulika komayele gOmbiimbeli ngoka tatu pewa kaakuluntugongalo. Otashi vulika tu shi uunkundi wawo notashi vulu oku tu ningitha tu dhine omayele gawo. Ihe Kristus, Omutse gwegongalo okwa hokwa okulongitha aalumentu mboka inaaya gwanenena. Onkee ano, omukalo moka hatu inyenge komalombwelo gawo ogwa guma uukuume wetu naKristus. Ngele ihatu konenene omapuko gawo nokulandula ewiliko lyawo nenyanyu, otatu ku ulika kutya otu hole Kristus.
Elesho lyOmbiimbeli
(Mateus 25:1-23) Nena Oshilongo shegulu tashi ka kala sha fa aakadhona omulongo mboka ya kutha oolamba dhawo noya ka tsakaneka ombushiki. 2 Yatano yomuyo oya li aagoya nooyakwawo yatano oya li aanandunge. 3 Aagoya oya kutha oolamba dhawo, yo inaa kutha omahooli. 4 Ihe aanandunge oya kutha iiyuma yomahooli noolamba dhawo. 5 Ano ombushiki sho a kala ko, ayehe oya lendenda noya kotha. 6 “Ihe pokati kuusiku okwi igidhwa: ‘Ombushiki oye ngu! Indeni, mu ke mu tsakaneke!’ 7 Aakadhona ayehe oya penduka noyo opaleke nawa oolamba dhawo. 8 Aagoya oya lombwele aanandunge: ‘Tu pii mo wo momahooli geni, oshoka oolamba dhetu otadhi dhimi.’ 9 Aanandunge oya yamukula ya ti: ‘Itage tu gwaneni, otse nane. Indeni, mu ki ilandele kaalandithi.’ 10 Ano sho ya yi, ya ka lande, ombushiki okwe ya. Oye nokwa yi mo pamwe naakadhona yatano mboka ya adhika yi ilongekidhila oshituthi shohango, osheelo noshe edhilwa po. 11 “Ohugunina aakadhona ooyakwawo oye ya wo noyi igidha ya ti: ‘Omuwa, Omuwa, tu egulula!’ 12 Ombushiki okwa yamukula a ti: ‘Ongame tandi mu lombwele: Kandi mu shi.’ 13 “Kaleni ano mwa tonata, oshoka inamu tseya esiku notundi.” 14 “Oshoka otaku ningi ngashika omulumentu te ke enda kiilongo: Oye okwi ithana aamati ye e te ya pe eliko lye. 15 Gumwe okwe mu pe iimaliwa omayuvi gatano, omukwawo omayuvi gaali nomutitatu eyuvi limwe. Kehe gumwe okwa pewa shoka sha yeleka uupenda we. Oye nokwa yi. 16 “Ngoka a pewa iimaliwa omayuvi gatano, okwa yi nziya nokwe yi likolitha iimaliwa iikwawo omayuvi gatano. 17 Nosho wo nguka a pewa iimaliwa omayuvi gaali, okwa likolitha iimaliwa iikwawo omayuvi gaali. 18 Ihe ngoka a pewa iimaliwa eyuvi limwe, okwa yi e ta fulu oshilambo mevi nokwa fumvike mo iimaliwa yomuwa gwe.” 19 “Konima yethimbo ele omuwa gwaamati mbeyaka okwa galuka ihe nokwe ya yalulitha. 20 Nena omumati ngoka a li a pewa iimaliwa omayuvi gatano, okwe ya nokwe eta iimaliwa iikwawo omayuvi gatano e ta ti: ‘Omuwa, ongoye wa pele ndje iimaliwa omayuvi gatano. Tala, nkene nde yi likolitha iimaliwa iikwawo omayuvi gatano.’ 21 Omuwa gwe okwa ti kuye: ‘Iyaloo, mumati ngoye omwaanawa nomwiinekelwa! Ongoye wa kala omwiinekelwa miishona, otandi ku pe okupangela oyindji. Inda menyanyu lyomuwa gwoye!’” 22 “Omumati ngoka a li a pewa iimaliwa omayuvi gaali, okwe ya nokwa ti: ‘Omuwa, ongoye wa pele ndje iimaliwa omayuvi gaali. Tala, nkene nde yi likolitha iimaliwa iikwawo omayuvi gaali.’ 23 Omuwa gwe okwa ti kuye: ‘Iyaloo, mumati ngoye omwaanawa nomwiinekelwa! Ongoye wa kala omwiinekelwa miishona, otandi ke ku pa okupangela oyindji. Inda menyanyu lyomuwa gwoye!’”