Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
7-13 KOTOBA
OMALIKO OKUZA MOOHAPU DHAKALUNGA | JAKOB 3–5
“Ulika uunongo wopakalunga”
(Jakob 3:17) Ihe uunongo wokombanda tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime.
Oho tula ngaa miilonga ‘uunongo wopombanda’?
9 ‘Tango owa yogoka.’ Okukala wa yogoka otashi ti okukala wa yela nowaa na onyata yasha kolutu nomomutima. Ombiimbeli otayi faathanitha uunongo nomutima, ihe uunongo wopombanda itawu vulu okuya momutima ngoka gwa nyatekwa komadhiladhilo omawinayi, komahalo nokomainyengotompelo omawinayi. (Omayeletumbulo 2:10; Mateus 15:19, 20) Ihe ngele omutima gwoye ogwa yogoka, shi thike mpoka aantu inaa gwanenena taya vulu okukala ye li, oto ka “gamuka kuuwinayi e to longo uuwanawa.” (Episalomi 37:27; Omayeletumbulo 3:7) Mbela inashi eleka sho uuyogoki owo wa tumbulwa tango momusholondondo gwiilonga iiwanawa? Ngele inatu yogoka pamikalo nopambepo, ongiini tatu ki imika omaukwatya galwe guunongo wopombanda?
10 ‘Ou na wo ombili.’ Uunongo wopombanda ohawu tu kwathele tu lalakanene ombili ndjoka yi li iiyimati yombepo yaKalunga. (Aagalati 5:22) Ohatu kambadhala kaatu yone ‘ombili ndjoka tayi mangele kumwe’ nokuhanganitha aapiya yaJehova. (Aaefeso 4:3) Ohatu kambadhala wo okupaathana ombili ngele twa ningathana nooyakwetu. Omolwashike sha simana? Ombiimbeli otayi ti: “Kalunga kohole nokombili ota kala pamwe nane.” (2 Aakorinto 13:11) Shampa owala tatu tsikile okukala nombili, Kalunga kombili ota kala pamwe natse. Omukalo ngoka hatu ungaunga naalongelikalunga ooyakwetu otagu ulike ekwatathano lyetu naJehova. Ongiini tatu vulu okuulika kutya otu li aanambili? Natu tale koshiholelwa.
(Jakob 3:17) Ihe uunongo wokombanda tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime.
Oho tula ngaa miilonga ‘uunongo wopombanda’?
12 ‘Ondjele.’ Okukala nondjele osha hala okutya shike? Aalongwantu yOmbiimbeli Aagreka otaya ti kutya oshitya shoka sha tolokwa “ondjele” muJakob 3:17 (NW) oshidhigu okutoloka. Omatoloko gamwe gOmbiimbeli oge shi toloka “okukala nombili,” “ontalanteni” nosho wo “ondjaalela.” Ihe oshitya shOshigreka otashi ti lelalela “okutifuka.” Ongiini tatu ku ulika kutya uunongo mbuka wopombanda otwe wu tula miilonga?
Oho tula ngaa miilonga ‘uunongo wopombanda’?
14 ‘Owi ilongekidha okuvulika.’ Uutumbulilo wOshigreka mboka wa tolokwa ‘ilongekidha okuvulika’ owa longithwa owala lumwe mOmanyolo gopaKriste gOshigreka. Omulongwantu gumwe gwOmbiimbeli okwa ti kutya uutumbulilo mboka “olundji ohawu longithwa okuulika kevuliko lyopakwiita.” Otawu gandja edhiladhilo “lyokutompwa nuupu” nosho wo “okuvulika.” Omuntu ngoka ha wilikwa kuunongo wopombanda oha taamba ko nuupu shoka Omanyolo taga ti. Ke na iikala yokwiinekela moondunge dhe mwene nenge a tinde iinima mbyoka itaayi tsu kumwe naashoka i itaala. Pehala lyaashono, oha taamba ko nziya uuyelele wopamanyolo mboka tawu ulike kutya okwa ninga epuko nenge okwa thika pehulithodhiladhilo lya puka. Mbela aantu oye ku shile uukwatya mboka?
“Ou udha ohenda niilonga iiwanawa”
15 ‘Ou udha ohenda niilonga iiwanawa.’ Ohenda oyi li uukwatya wa simana wuunongo wopombanda, molwaashoka uunongo wa tya ngaaka otawu popiwa wu ‘udha ohenda.’ Ndhindhilika kutya “ohenda” nosho wo “iilonga iiwanawa” oya tumbulwa pamwe. Shika oshe eleka molwaashoka mOmbiimbeli oshitya ohenda olundji ohashi popiwa tashi ulike kokukala wu na ko nasha nayalwe nenge kolukeno ndoka halu inyengitha omuntu a longe iilonga oyindji yohenda. Embo limwe otali fatulula ohenda kutya oyo “okuuvila gumwe olukeno omolwonkalo ombwinayi moka e li nokuninga po sha.” Onkee ano, uunongo wopakalunga inawu kwatela mo owala omadhiladhilo, ihe owa kwatela mo wo enyanyu, omaiyuvo gomuule niikala yokuyaalela. Ongiini tatu vulu okuulika kutya otu na ohenda shili?
(Jakob 3:17) Ihe uunongo wokombanda tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime.
Oho tula ngaa miilonga ‘uunongo wopombanda’?
18 ‘Kau na ontondo.’ Uunongo wopombanda ohawu tu kwathele twaaha kale nokatongo nenge nuukwamuhoko. Ngele otawu tu wilike otatu ka vudha mo iikala yokakombo noludhi momitima dhetu. (Jakob 2:9) Itatu ka ningila yamwe uuwanawa omolwelongo lyawo, uuyamba nenge omolwondondo ndjoka ye na megongalo noitatu ka kala twa dhina ooitaali ooyakwetu molwaashoka taya monika ya fa ye li pevi kutse. Jehova oku hole aantu ya tya ngaaka, onkee ano, natse otu na okukala tu ya hole.
19 ‘Kau na uufudhime.’ Oshitya shOshigreka shoka sha tolokwa “uufudhime” ohashi longithwa wo okuulika komuntu “ngoka ta dhana onkandangala moshinyandwa.” MuGreka nOmuroma shonale, aantu mboka haya dhana iinyandwa oya li haya kala ya zala iinima mbyoka hayi kala ya siikila iipala yawo. Onkee ano, oshitya shOshigreka shoka sha tolokwa “uufudhime” ohashi longithwa wo okuulika komuntu ngoka ti iningitha nenge ta kengelele. Iilonga iiwanawa yopakalunga oyi na oku tu ningitha twaaha kale nuufudhime momukalo moka hatu ungaunga nooitaali ooyakwetu nosho wo nkene hatu kala tu ya uvitile.
Konga omaliko mOmbiimbeli
(Jakob 4:5) Enyolo itali popi osima, sho tali ti: “Ombepo ndjika Kalunga e yi tula mutse, oku na uukodhi nayo.”
Omanenedhiladhilo okuza moontumwafo dhaJakob naPetrus
4:5 — Openi Jakob a li a totha ovelise ndjika? Jakob ina totha nando ovelise yontumba kondandalunde. Ihe edhiladhilo lyoohapu ndhika dha nwethwa mo otashi vulika lya kankamena komanyolo ngaashi Genesis 6:5; 8:21; Omayeletumbulo 21:10 nosho wo Aagalati 5:17.
(Jakob 4:11, 12) Aamwameme, inamu lundilathana. Ngoka ta lundile mukwawo nenge te mu pangula, oye ota lundile ompango e te yi pangula. Ngele oto pangula ompango, nena ito vulu we oku yi gwanitha, ihe oto ningi omupanguli gwayo. 12 Kalunga oye omugandjimpango nomupanguli. Oye awike ta vulu okuhupitha nokweekelahi. Ongoye lye ano, u vule okupangula mukweni?
w97 12/1 ep. 15-16, okat. 8
Eitaalo Otali Tu Kaleke nOkwiidhidhimika nOkugalikana
8 Osho uulunde okulundila omwiitaali omukweni. (Jakob 4:11, 12) Ihe yamwe ohaya tamaneke Aakriste ooyakwawo, tashi vulika shi li oshilanduliko shomikalo dhawo dhokwiishi uuyuuki nenge molwashoka ya hala okwiitumbaleka yo yene mokudhina yalwe. (Episalomi 50:20 50:20; Omayeletumbulo 3:29) Uutumbulilo woshitya shOshigreka sha tolokwa ‘okulundila’ otau ulike uutondwe notau ti okugandja ombedhi sha pitilila nenge paifundja. Shika osha hala okutya to pangula nayi omumwatate. Ongiini mbela shika tashi ‘lundile notashi pangula ompango yaKalunga’? Aanongoraamata nAafarisayi oye “etha oshipango shaKalunga” noya pangula pamithikampango dhawo yene. (Markus 7:1-13, OB-1986) Sha faathana, ngele twa pangula omumwatate ngoka Jehova itee ke mu pangula, itashi ti mbela kutya otatu ‘pangula ompango yaKalunga’ e tatu yono mokutya kutya inayi gwana? Nomokugandja uusama shaahe li pauyuuki komumwatate, itatu ka gwanitha ompango yohole. — Aaroma 13:8-10.
Elesho lyOmbiimbeli
(Jakob 3:1-18) Aamwameme! Mokati keni inamu kala oyendji ya hala okuninga aalongi, oshoka omu shi shi kutya tse aalongi otatu ka pangulwa nepangulo edhigu li vule lyayalwe. 2 Tseni atuheni ohatu puka olwindji. Omuntu ngoka ihaa puka moohapu, oye okwa pwa nokwa gwana okupangela okukala kwe akuhe. 3 Tse ohatu tula oshitomo mokana kokakambe nohatu ka vulikitha e tatu ka ukitha shaa mpoka twa hala. 4 Natu dhiladhile osikepa. Oyo onene nohayi endithwa koombepo oonankondo, ihe ohayi goyolwa nokahingitho okashona, nomuhingi ote yi ukitha mpoka a hala, yi uke. 5 Osho wo elaka lyomokana li li. Olyo eshona, ihe ohali itangele iinima iinene. Dhiladhila, nkene ohandje yimwe tayi fike okuti. 6 Nelaka olya fa omulilo, olyo uuyuni wa vuka muuwinayi. Elaka ohali nyateke omuntu aguhe nohali hwameke okukalamwenyo kwe akuhe kwokombanda yevi, nomulilo tagu zi moheli yoyene. 7 Omuntu ota vulu okudheula iinamwenyo ayihe: iilikama, oondhila, iihono noohi. 8 Ihe kaku na nando omuntu gumwe ta vulu okudheula elaka. Olyo uuwinayi waa na evululuko nou udha uuzigo hau lyana. 9 Elaka ndyoka hatu hambelelitha Omuwa Tate, olyo wo hatu tukitha ooyakwetu ya shitwa mondjelo yaKalunga. 10 Oohapu dhehambelelo nodhetukano otadhi zi mokana tuu hoka. Aamwameme, itashi vulika, shi kale ngaaka! 11 Kaku na oluthithiya halu vulu okufuluka omeya omatoye nomalulu molunza lumwe. 12 Aamwameme, omukwiyu itagu vulu okwiima oomono, nomuviinu itagu vulu okwiima oonkwiyu. Osho wo omuthima omululu itagu vulu okuza omeya omatoye. 13 Olye ngoka omunandunge nomunamayele mokati keni? Oye oku na oku shi ulika mokukala kwe okuwanawa, miilonga ye iiwanawa ya longwa meifupipiko nomoondunge. 14 Ihe omitima dheni ngele odhu udha efupa, uululu nomu hole olugodhi, nena kaleni inaamu inenepeka nomu ludhikithe oshili. 15 Uunongo wa tya ngeyi itau zi kombanda megulu, ihe owomuuyuni. Owo owopantu nowoompwidhuli, 16 oshoka mpoka aantu ya silathana efupa noye hole olugodhi, opo wo pu na evundakano nuuwinayi auhe. 17 Ihe uunongo wokombanda tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime. 18 Uuwanawa owo eteyo ndyoka lya imi koombuto ndhoka aatungimbili ye dhi kunu mombili.
14-20 KOTOBA
MALIKO OKUZA MOOHAPU DHAKALUNGA | 1 PETRUS 1–2
“Omu na okukala aayapuki”
(1 Petrus 1:14, 15) Vulikeni kuKalunga ne inamu etha, okukalamwenyo kweni ku pangelwe kuuhalu mboka mwa li nawo, manga mwa li mwaa na oondunge. 15 Ihe kaleni aayapuki mwaayihe mbyoka tamu yi ningi, ngaashi Kalunga ngoka e mu ithana, omuyapuki.
Ekulilo “omagano ga gwana ga pwa” ga za kuTate
5 Ongiini tatu vulu okuulika kutya otu hole edhina lyaJehova? Okupitila meihumbato lyetu. Jehova okwa tegelela tu kale aayapuki. (Lesha 1 Petrus 1:15, 16.) Shika otashi ti kutya otu na owala okulongela Jehova nokuvulika kuye nomitima dhetu adhihe. Nonando otatu hepekwa, otatu ka ninga ngaashi tatu vulu tu kale metsokumwe nomakotampango nonoompango dhe dhuuyuuki. Uuna tatu longo uuyuuki, uuyelele wetu otawu yele, naashika otashi ka simanekitha edhina lyaJehova. (Mat. 5:14-16) Tu li aayapuki, otatu ku ulika mokukalamwenyo kwetu kutya oompango dhaJehova oombwanawa nomapopyo gaSatana ogiifundja. Uuna twa ninga epuko, natu iyele ombedhi shili e tatu etha iilonga mbyoka itaayi simanekitha Jehova. — Eps. 79:9.
(1 Petrus 1:16) Oshoka enyolo otali ti: “Omu na okukala aayapuki, oshoka ongame omuyapuki.”
Nkene to vulu okuhogolola omainyanyudho ngoka ga yogoka
6 Paulus okwa li a kumagidha Aakriste yokuRoma a ti: “Inamu gandja iilyo yomalutu geni muulunde.” Okwa li wo e ya lombwele ya ‘dhipage iilonga yolutu.’ (Rom. 6:12-14; 8:13, OB-1954) Petameko lyontumwafo ye ndjoka a li a nyolele Aaroma okwa popya po iiholelwa yimwe ‘yiilonga yolutu.’ Okwa li a popi kombinga yaalunde a ti: ‘Omakana gawo ogu udha omatukano omadhigu. Oompadhi dhawo odhu uluma okutilahi ombinzi. Etilokalunga kali li montaneho yomeho gawo.’ (Rom. 3:13-18, yelekanitha OB-1954 nosho wo NW.) Omukriste ota nyateke olutu lwe ngele okwa longitha ‘iilyo yolutu’ iilonga mbyoka yuulunde. Pashiholelwa, ngele Omukriste oha tala owina iinima ya nyata, ngaashi omathano giipala, nenge ha tala iinima ya kwatela mo elongitho lyoonkondo, ota “gandja [omeho ge] muulunde” nokungawo ota nyateke olutu lwe aluhe. Okulongela Kalunga kwe akuhe otaku kala eyambo kaali shi we eyapuki noitaali vulu okutaambwa ko kuKalunga. (Deut. 15:21; 1 Pet. 1:14-16; 2 Pet. 3:11) Iilanduliko mbyoka hayi etithwa kokuhogolola omainyanyudho inaaga yogoka kayi shi tuu yiyemateka!
Konga omaliko mOmbiimbeli
(1 Petrus 1:10-12) Ehupitho ndika olyo tuu ndyoka lya li lya kongwa nolya konakonwa neitulomo kaahunganeki. Oyo oya hunganeke uuwanawa mbuka Kalunga e u mu pa. 11 Oya kambadhala okukonakona ethimbo, uuna nonkene ehupitho ndika tali ka holoka. Oshoka Ombepo yaKristus oya longo muyo noyu ulike kethimbo ndika mokuhunganeka omahepeko ngoka ge na okwaadha Kristus, nesimano mpoka li thike ndyoka tali ka landula. 12 Kalunga okwa hololele aahunganeki mbaka kutya iilonga yawo kaya li ekwatho lyawo yene, ihe olyeni, sho ya popi iinima mbika. Elaka ndika etoye omwe li etelwa ngashingeyi kaayuvithi mboka ya popi koonkondo dhOmbepo Ondjapuki ya tumwa kuKalunga. Mbika oyo iinima mbyoka naayengeli ya hala oku yi uva ko.
Omanenedhiladhilo okuza moontumwafo dhaJakob naPetrus
1:10-12. Aayengeli oya li ya hala okuuva ko ooshili dhaKalunga ndhoka aapolofeti yonale ya nyola shi na ko nasha negongalo lyAakriste aagwayekwa. Ihe ooshili ndhoka odha ka yela owala sho Jehova a tameke okweendathana negongalo ndyoka. (Ef. 3:10) Mbela katu na okulandula oshiholelwa shaayengeli nokukambadhala okukonakona ayihe “noyomuule womadhiladhilo gaKalunga”? — 1 Kor. 2:10.
(1 Petrus 2:25) Omwa li mwa fa oonzi dha kana, ihe ngashingeyi omwa galulilwa kegumbo, opo mu landule omusita nomutekuli gwoomwenyo dheni.
it-2-E ep. 565, okat. 3
Omutekuli
Omutekuli Omunenenene. MuPetrus gwotango 2:25 omu na oohapu dha za muJesaja 53:6 tadhi popi kombinga yaamboka ‘ya fa oonzi dha kana.’ Petrus okwa gwedha ko wo a ti: “Ihe ngashingeyi omwa galulilwa kegumbo, opo mu landule omusita nomutekuli gwoomwenyo dheni.” Omutekuli ngoka a popiwa mo oku na okukala Jehova Kalunga, oshoka mboka ya li ya nyolelwa kuPetrus ontumwafo ndjono, kaya li ya ya kokule naJesus Kristus, ihe okupitila muye oya li ya galukile kuJehova Kalunga, ngoka e li Omusita Omunenenene gwoshigwana she. (Eps 23:1; 80:1; Jer 23:3; Hes 34:12) Jehova oku li wo Omutekuli ngoka ha konakona aantu. (Eps 17:3) Uuna ta konakona (Gr., episkopos) oha pangula wo, ngaashi a li a ningile Jerusalem methelemumvo lyotango E.N. Aantu yomoshilando moka kaya li ya dhimbulula kutya otashi ‘konakonwa’ kuJehova [episkopos]. (Luk 19:44, NW) Nenge ohe shi ningi wo shi etele aantu uuwanawa, ngaashi mboka haye mu simaneke pethimbo te ya ‘konakona’ [Gr., episkopos].’ — 1 Pet 2:12, NW.
Elesho lyOmbiimbeli
(1 Petrus 1:1-16) Ontumwafo ndjika oya zi kuPetrus, omuyapostoli gwaJesus Kristus.Oya nyolelwa aahogololwa yaKalunga, aapongekwa mboka yi ihanena iitopolwa yomuPontus, Galatia, Kappadokia, Asia naBitinia. 2 Okuhogololwa kweni okwa zi nale medhiladhilo lyaKalunga Tate nomwa yapulwa kOmbepo ye, opo mu vulike kuJesus Kristus, ngoka e mu yelitha nombinzi ye. Esilohenda nombili nayi mu indjipalele. 3 Kalunga He yOmuwa gwetu Jesus Kristus na hambelelwe! Oshoka molwesilohenda lye enene okwe tu pe omwenyo omupe, sho a yumudha Jesus Kristus kuusi. Shika oshe tu pe etegameno lya kola, 4 kutya megulu Kalunga okwe tu pungulila eliko enene, ndyoka itaali wapa okwoola, okuyonuuka nokuhula po. 5 Molwaashoka mwi inekela Kalunga meitaalo, ote mu gamene noonkondo dhe, sigo tamu mono ehupitho ndyoka lya longekidhwa oku ka hololwa pehulilo lyomathimbo. 6 Onkee ano nyanyukilweni ehupitho ndika, nonando omu na okusa oluhodhi mokathimbo okafupi kowala omolwomamakelo ogendji tage mu adha. 7 Ogo otaga lalakanene okutala, eitaalo lyeni ngele olya kola. Noshingoli wo, shoka hashi yonuka, ohashi yelekwa momulilo. Osho wo neitaalo lyeni, ndyoka li na ondilo li vule oshingoli, oli na okuyelekwa, opo li vule okukala lya kola. Nena otamu ka pewa epandulo, eadhimo nesimaneko mesiku ndyoka Jesus Kristus ta ka holoka. 8 Oongoka mu mu hole, nando inamu mu mona; omwe mu itaala, nando kamu mu wete ngashingeyi. Onkee ano ohamu kala mu na enyanyu enene tali adhima notali nyengana okutumbulwa, 9 oshoka otamu adha elalakano lyeitaalo lyeni, nokutya ehupitho lyoomwenyo dheni. 10 Ehupitho ndika olyo tuu ndyoka lya li lya kongwa nolya konakonwa neitulomo kaahunganeki. Oyo oya hunganeke uuwanawa mbuka Kalunga e u mu pa. 11 Oya kambadhala okukonakona ethimbo, uuna nonkene ehupitho ndika tali ka holoka. Oshoka Ombepo yaKristus oya longo muyo noyu ulike kethimbo ndika mokuhunganeka omahepeko ngoka ge na okwaadha Kristus, nesimano mpoka li thike ndyoka tali ka landula. 12 Kalunga okwa hololele aahunganeki mbaka kutya iilonga yawo kaya li ekwatho lyawo yene, ihe olyeni, sho ya popi iinima mbika. Elaka ndika etoye omwe li etelwa ngashingeyi kaayuvithi mboka ya popi koonkondo dhOmbepo Ondjapuki ya tumwa kuKalunga. Mbika oyo iinima mbyoka naayengeli ya hala oku yi uva ko. 13 Kaleni mwi ilongekidhila shoka mu na oku shi ninga. Kaleni mwa tonata nomwa tegamena uuwanawa mboka tamu ke u pewa, uuna Jesus Kristus ta holoka. 14 Vulikeni kuKalunga ne inamu etha, okukalamwenyo kweni ku pangelwe kuuhalu mboka mwa li nawo, manga mwa li mwaa na oondunge. 15 Ihe kaleni aayapuki mwaayihe mbyoka tamu yi ningi, ngaashi Kalunga ngoka e mu ithana, omuyapuki. 16 Oshoka enyolo otali ti: “Omu na okukala aayapuki, oshoka ongame omuyapuki.”
21-27 KOTOBA
OMALIKO OKUZA MOOHAPU DHAKALUNGA | 1 PETRUS 3–5
“Ehulilo lyiinima ayihe oli li popepi”
(1 Petrus 4:7) Ehulilo lyiinima ayihe oli li popepi. Omu na okwiikwata nawa nomwa tonata, opo mu vule okugalikana.
‘Kaleni mwa tonata, opo mu vule okugalikana’
OMUNIILONGA gumwe ngoka a li ha longo uusiku ota ti: “Ethimbo ndyoka hali kala edhigu okukala wa tonata, okoongulasha.” Otashi vulika yalwe mboka ye na okukala ya tonata uusiku awuhe taye shi zimine. Aakriste yokunena oya taalela eshongo lya faathana oshoka onkalelo ndjika yaSatana ya kolokosha ngashingeyi oya fa yi li pethimbo lyuusiku uule mpoka kwa luudha thokothoko. (Rom. 13:12) Itashi ka kala tuu sha nika oshiponga kutse ngele otwa kotha pethimbo ndika! Osha simanenena tu ‘kale tu na omadhiladhilo gu uka’ nokutula miilonga ekumagidho ndyoka lyopamanyolo tu kale twa “tonata, opo tu vule okugalikana.” — 1 Pet. 4:7, yelekanitha NW.
(1 Petrus 4:8) Komeho gaayihe holathaneni nomwenyo aguhe, oshoka ohole ohayi siikile omayono ogendji.
w99-E 4/15 ep. 22, okat. 3
Nkene to vulu okudhimbulula mo nokusinda shoka tashi nkundipaleke ekwatathano lyoye naJehova
Hugunina, kaleka momadhiladhilo ekumagidho lyopahole lyomuyapostoli Petrus ndyoka tali ti: “Ehulilo lyiinima ayihe oli li popepi. Omu na okwiikwata nawa nomwa tonata, opo mu vule okugalikana. Komeho gaayihe holathaneni nomwenyo aguhe, oshoka ohole ohayi siikile omayono ogendji.” (1 Petrus 4:7, 8) Oshipu okukonenena nokudhiladhila komapuko gayalwe nogetu naashoka ohashi vulu okukala omukundu noku tu pundukitha. Satana oku shi shi lela kutya aantu oye na uunkundi mbuka. Okutopola nokukwata ko aantu ogwo omukalo gwiineya ngoka ha longitha. Onkee ano, otu na okukala hatu dhimine po yalwe meendelelo pahole, opo ‘kaatu pe omuhindadhi ompito.’ — Aaefeso 4:25-27.
(1 Petrus 4:9) Yakuleni aayenda momagumbo geni mwaa na omangungutulo.
Okuyakula aayenda, oshinima shinyanyudha shoka sha pumbiwa!
2 Petrus okwa li a ladhipike aamwahe a ti: “Yakuleni aayenda momagumbo geni.” (1 Pet. 4:9) Oshitya “yakula” mOshigreka otashi ti lelalela “okuhola nenge okukenukila mboka kuu shi.” Ndhindhilika kutya Petrus okwa li a ladhipike ooitaali ooyakwawo ya kale haya yakula ‘aayenda momagumbo gawo,’ ano mboka ye shi nale nohaya endathana nayo. Ongiini shoka sha li tashi ke ya kwathela?
3 Shoka osha li tashi ke ya kwathela ya kale ya hangana. Dhiladhila koshimoniwa shoye mwene. Mbela opu na oshikando wa li wa hiywa kugumwe? Mbela ino za po wa nyanyukwa esiku ndyono? Sho wa li wa hiya yamwe yomegongalo lyeni, mbela kasha li sha koleke ekwatathano lyeni? Uuna tatu yakula aamwatate naamwameme momagumbo getu, ohashi tu kwathele tu ya tseye nawa lela paumwene. Aakriste yopethimbo lyaPetrus, oya li ya pumbwa okukala ya hangana, sho oonkalo tadhi ende tadhi nayipala. Shoka osha faathana wo nAakriste ‘yomomasiku ngaka gahugunina.’ — 2 Tim. 3:1.
Konga omaliko mOmbiimbeli
(1 Petrus 3:19, 20) nomokukala kwopambepo okwa yi e tu uvithile oombepo moshaasi. 20 Oombepo ndhika odho aantu mboka inaaya vulika kuKalunga, sho a tegelele neidhidhimiko eitedhululo lyawo pomasiku ngoka Noowa a tungu onguluwato. Monguluwato omwa hupithilwa aantu yahetatu ayeke komeya.
Omapulo ga za kaaleshi
Ombiimbeli otayi popi kutya Jesus okwa li ‘u uvithile oombepo ndhoka dhi li mondholongo.’ (1 Pet. 3:19, OB-1954) Mbela shika osha hala okutya shike?
▪ Omuyapostoli Petrus okwa popi kutya oombepo ndhoka oondhoka dha li ‘inaadhi vulika kuKalunga, sho a tegelele neidhidhimiko pomasiku gaNoowa.’ (1 Pet. 3:20) Osha yela kutya, Petrus okwa li ta popi kombinga yiishitwa yopambepo mbyoka ya li ya hogolola yi imbwange mumwe naSatana muunashipotha we. Judas okwa popi kombinga yaayengeli mboka “ya kondo omautho ngoka ye ga pewa e taa thigi po ehala lyawo yene,” a ti kutya “oye li momalyenge gaaluhe momilema dhomuule. Omo moka Kalunga e ya edhilile sigo omesiku enene moka taa ka pangulwa.” — Jud. 6.
Omomukalo guni iishitwa yopambepo ya li inaayi vulika pomasiku gaNoowa? Manga Eyelu inaali ya, iishitwa mbika yopambepo iikolokoshi oya li yi izaleke omalutu gopantu, oshinima shoka kaasha li elalakano lyaKalunga. (Gen. 6:2, 4) Shimwe ishewe, aayengeli mboka ya li ya yi momilalo naakiintu oya ningi oshinima kaashi li paunshitwe. Kalunga ka li a shiti iishitwa yopambepo yi kale hayi yi momilalo. (Gen. 5:2) Aayengeli mbaka aakolokoshi, noinaya vulika otaya ka hanagulwa po kuKalunga pethimbo lye. Ngaashi Judas a popi, ngashingeyi oye li “momilema dhomuule,” ano tu tye mondholongo yopambepo.
Uunake nongiini Jesus a li u uvithile ‘oombepo ndhika dhi li mondholongo’? Petrus okwa li a nyola kutya shika osha li sha ningwa konima sho Jesus a “tulwa omwenyo pambepo.” (1 Pet. 3:18, 19) Ndhindhilika wo kutya Petrus okwa ti kutya Jesus okwa li u ‘uvitha.’ Sho Petrus a longitha epitathimbo otashi ulike kutya Jesus okwa li u uvitha manga Petrus inaa nyola ontumwafo ye yotango. Osha fa shi li ngeyi kutya konima yeyumuko lye, Jesus okwa li u uvithile iishitwa yopambepo mbika iikolokoshi kombinga yegeelo li li pauyuuki ndyoka tayi ka pewa. Jesus ka li e yi uvithile andola yi kale yi na etegameno lyasha. Okwa li e yi uvithile epangulo. (Jona 1:1, 2) Molwaashoka Jesus okwa li u ulike eitaalo nuudhiginini we sigo omeso nokonima ta yumudhwa, sha hala okutya, u ulike kutya Ondiapoli kayi na oonkondo dhasha dhi vule dhe, Jesus okwa li e na ekankameno lyokuuvitha epangulo. — Joh. 14:30; 16:8-11.
Monakuyiwa, Jesus ota ka manga nokuumbila Satana naayengeli mboka molumbogo lwomuule. (Luk. 8:30, 31; Eh. 20:1-3) Sigo ethimbo lyawo lyokuhanagulwa po lya thiki, iishitwa mbika inaayi vulika oyi li momilema dhomuule dhopambepo nehanagulo lyawo lyahugunina otali ka ningwa shili. — Eh. 20:7-10.
(1 Petrus 4:6) Shika osho sha ningitha, elaka etoye li uvithilwe wo aasi, oomboka mokukala kwawo kombanda yevi ya pangulwa ngaashi aantu ayehe. Oyo oyu uvithilwa, opo mokukalamwenyo kwawo kwopambepo ya kale ye na omwenyo, ngaashi Kalunga e na omwenyo.
Omanenedhiladhilo okuza moontumwafo dhaJakob naPetrus
4:6 — “Aasi” yeni ya li ‘yu uvithilwa elaka etoye’? Aasi mboka ya li ya ‘sa pambepo omolwokwaavulika kuKalunga nomolwoondjo dhawo,’ omanga inaaya uva elaka etoye nenge onkundana ombwanawa. (Ef. 2:1) Konima ihe sho yi itaale onkundana ombwanawa oya ningi “omwenyo” pambepo.
Elesho lyOmbiimbeli
(1 Petrus 3:8-22) Pafupi nandi tye: ne omu na okukala mu na edhiladhilo limwe neuvitopamwe. Kaleni mu holathane ongaamwayinathana. Silathaneni ohenda ne mu ifupipikilathane. 9 Ngoka te mu ningile uuwinayi nenge te mu thingi, inamu mu thinga. Ihe mu shunithileni elaleko nuuyamba, oshoka eyambeko olyo Kalunga e mu uvanekela, sho e mu ithana. 10 Ngaashi enyolo tali ti: “Ngoka a hala okunyanyukilwa okukalamwenyo nokumona omasiku ge na elago, ne ethe okupopya uuwinayi, nomilungu dhe inadhi pititha iifundja. 11 Na ze mo miilonga iiwinayi, a longe uuwanawa. Na konge ombili e te yi lalakanene. 12 Oshoka omeho gOmuwa oge wete aayuuki, naaluhe ota pulakene omaindilo gawo; ihe ota thigi po mboka haa longo uuwinayi.” 13 Olye te mu etele oshiponga, ngele otamu lalakanene okulonga uuwanawa? 14 Nongele omu na okwaadhika komahepeko, sho hamu longo shoka shu uka, one aanelago. Inamu tila aantu ne inamu kala mwa piyagana. 15 Ihe simanekeni Kristus momitima dheni ne mu mu ninge Omuwa gweni. Kaleni mwi ilongekidha aluhe okuyamukula kehe ngoka te mu pula okufatulula etegameno ndyoka li li mune. 16 Ihe shi ningeni nombili nesimaneko. Kaleni mu na eiyuvo ewanawa. Ngele tamu dhiginine omikalo omiwanawa dhaalanduli yaKristus, aasheki yeni otaa sithwa ohoni kokupopya kwawo. 17 Oshoka okuhepekelwa iilonga iiwanawa, ngele oshi li pahalo lyaKalunga, oshi vule okuhepekelwa iilonga iiwinayi. 18 Oshoka Kristus okwa si omolweni; okwa si lumwe aluke omolwoondjo, omuyuuki omolwaalunde, opo e mu fale kuKalunga. Oye okwa dhipagwa palutu nokwa tulwa omwenyo pambepo; 19 nomokukala kwopambepo okwa yi e tu uvithile oombepo moshaasi. 20 Oombepo ndhika odho aantu mboka inaa vulika kuKalunga, sho a tegelele neidhidhimiko eitedhululo lyawo pomasiku ngoka Noa a tungu onguluwato. Monguluwato omwa hupithilwa aantu yahetatu ayeke komeya. 21 Omeya ngaka ogo efano tali ulike eshasho ndyoka tali mu hupitha ngashingeyi. Eshasho ihali theta po ongaga yokolutu, ihe mulyo otatu pula, Kalunga e tu pe eiyuvo ewanawa omolweyumuko lyaJesus Kristus. 22 Oye okwa londo a yi megulu noku li kolulyo lwaKalunga ta pangele aayengeli, aapangeli yomegulu naanankondo.
28 KOTOBA–3 NOVOMBA
OMALIKO OKUZA MOOHAPU DHAKALUNGA | 2 PETRUS 1–3
‘Endelelitheni esiku lyaKalunga’
(2 Petrus 3:9, 10) Omuwa ina tokelwa okutsakanitha shoka e shi uvaneke, ngaashi aantu yamwe taa dhiladhila. Oye okwe mu idhidhimikile owala, oshoka ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo. 10 Ihe esiku lyOmuwa otali ya lya fa omufuthi. Mesiku tuu ndyoka omagulu otaga ka kana po nomatopo omanene. Iikwakegulu otayi ka pya po e tayi yonuka po, nevi wo niinima ayihe yi li ko otayi ka lunguna po.
Jehova ota ka ‘utha’ iinima
11 Ihe mbela otu uvite ko ngiini eshilipaleko lyaJesus ndyoka tali ti kutya Jehova ota ka gwanitha uuyuuki “mbalambala”? Oohapu dhaKalunga otadhi ulike kutya nonando ‘ohe tu tegelelitha,’ ota ka gwanitha nziya uuyuuki pethimbo lye lya opala. (Lukas 18:7, 8; 2 Petrus 3:9, 10) Sho Eyelu lya li lye ya pethimbo lyaNoa, aakolokoshi oya li ya hanagulwa po nokaapu na okwoongaonga. Sha faathana, pethimbo lyaLot, aakolokoshi oya li ya hanagulwa po komulilo gwa zi megulu. Jesus okwa ti: “Osho tashi ka kala wo nomesiku ndyoka lyOmuna gwOmuntu ta ka holoka.” (Lukas 17:27-30) Natango, aakolokoshi otaya ka adhika ‘ohaluka kehanagulo.’ (1 Aatessalonika 5:2, 3) Onkee ano, natu kale neinekelo kutya Jehova ita ka etha nando uuyuni waSatana wu tsikile okukala po ngele ethimbo lye lyokuukitha iinima lya thiki.
(2 Petrus 3:11, 12) Ngele ano iinima ayihe otayi ka yonwa po pamukalo nguno, ne aantu omu na okwaadhika mwa tya ngiini? Omu na okwiiyapulila Kalunga noku mu igandjela, 12 sho mwa tegelela esiku lyaKalunga. Hwameni moku li tegelela, mu li endelelithe, esiku tuu ndyoka, uuna omagulu taga ka pya po e taga ka yonuka po, niikwakegulu tayi ka hemukithwa kuupyu.
“Esiku enene lyOmuwa oli li popepi”
18 Molwaashoka osha simanenena okukala twa tonata, omuyapostoli Petrus okwe tu ladhipike tu ‘endelelithe esiku lyaKalunga.’ Mbela ongiini tatu vulu okweendelelitha okuya kwesiku ndyoka? Itatu vulu lela okweendelelitha ethimbo ndyoka lya hupa ko lyokuya kwesiku ndyoka. Ihe okukutha ombinga ‘moondjenda oondjapuki nomiilonga yometilokalunga,’ otashi ke tu kwathela tu kale twa tegelela nondjuulukwe okuya ‘kwesiku lyaKalunga.’ (2 Petrus 3:11, 12, NW) Shimwe ishewe, ngele otwa kala twi ipyakidhila miilonga yaKalunga manga twa tegelela esiku ndyoka, otatu ka mona ethimbo tali endelele noonkondo, nokungawo otatu endelelitha okuya kwesiku ndyoka, oku shi popya pathaneko. — 1 Aakorinto 15:58.
Konga omaliko mOmbiimbeli
(2 Petrus 1:19) Omolwaashoka otu na wo einekelo enene melaka lyu uvithwa kaahunganeki. Nane wo otamu ningi nawa, ngele tamu li tala nawa, oshoka olya fa olamba tayi minikile momilema, sigo taku shi nonyothi yokoongulasha tayi minikile momitima dheni.
Omanenedhiladhilo okuza moontumwafo dhaJakob naPetrus
1:19 — Olye ‘onyothi yokoongulasha,’ uunake ta minikile, notu shi shi ngiini kutya shika osha ningwa nale? ‘Onyothi yokoongulasha’ oJesus Kristus konima sho a ningi Omukwaniilwa gwUukwaniilwa waKalunga. (Eh. 22:16) Mo 1914 Jesus okwa li a minikile iishitwa ayihe mUukwaniilwa we wopaMesiasa, shoka sha li tashi ulike kutya esiku epe olya tameka. Sho Jesus a li a shitululwa, osha li sha gandja eadhimo lye nkene tali ka kala sho e li moonkondo dhUukwaniilwa, shoka sha li tashi tsu omuthindo uushili woohapu dhopahunganeko dhaKalunga. (Markus 9:1-3) Ngele otatu gandja eitulomo koohapu ndhoka dhi minikile momitima dhetu, otatu ka kala tu shi shi nokutya onyothi yokoongulasha otayi minikile.
(2 Petrus 2:4) Oshoka Kalunga ine etha inaa geela aayengeli mbeyaka ya yono, ihe okwe ya umbile moheli, moka ye li mo ya mangwa nomalyenge, ya tegelela esiku lyepangulo.
Omanenedhiladhilo okuza moontumwafo dhaJakob naPetrus
2:4 — ‘Oheli’ nenge ‘oombogo’ (OB-1954) ndjoka tayi popiwa movelise ndjoka oshike, nuunake oompwidhuli dha li dhu umbilwa mo? Melaka lyOshigreka oshitya shoka sha tolokwa oheli nenge oombogo osho “Tartarus,” shoka tashi ulike konkalo moka iishitwa yopambepo hayi kala ya ngambekwa, ihe haantu nando. Oyi li onkalo yomilema thokothoko naamboka ye li mo kaye na nando uuyelele waKalunga. Mboka ye li muTartarus kaye na etegameno lyasha lyonakuyiwa. Kalunga okwa li u umbile mo aayengeli mboka inaaya vulika kuye pethimbo lyaNoowa notaya kala monkalo moka ya fa ye li mombwili sigo ya hanagulwa po.
Elesho lyOmbiimbeli
(2 Petrus 1:1-15) Ontumwafo ndjika oya zi kuSimon Petrus, omumati nomuyapostoli gwaJesus Kristus. Oya nyolelwa mboka ya pewa eitaalo ewanawa ngaashi lyetu omoluuyuuki waKalunga ketu nowOmukulili Jesus Kristus. 2 Esilohenda nombili nayi mu indjipalele, mu tseye Kalunga naJesus, Omuwa gwetu. 3 Oonkondo dhe dhopakalunga odhe tu pe ashihe sha pumbiwa opo tu kale tu na omwenyo netilokalunga, okokutseya nguka e tu ithanitha eadhimo lye negwaneneno. 4 Osho ngeyi okwe tu pe omauvaneko ge na ondilo nomanenenene. Moku ga taamba otatu vulu okuya ontuku eolelo ndyoka li li muuyuni omoluuhalu, nokupewa oshitopolwa shuukwatya wopaKalunga. 5 Onkee ano kambadhaleni, eitaalo lyeni li ze iilonga iiwanawa; niilonga iiwanawa yi ze oondunge; 6 oondunge dhi ze eikwatonawa; eikwatonawa li ze eidhidhimiko; eidhidhimiko li ze okusimaneka Kalunga; 7 okusimaneka Kalunga ku ze ohole yaamwayinathana; ohole yaamwayinathana yi ze ohole yokuhola ayehe. 8 Mbika oyo iinima mbyoka mwe yi pumbwa, nongele omu yi na ya gwana e tayi indjipala, otayi mu tula miilonga mbyoka tayi eta iiyimati mokutseya kweni Omuwa gwetu Jesus Kristus. 9 Ihe ngoka kee yi na, oye omuposi ngoka a dhimbwa kutya oondjo dhe dhonale odha dhimwa po. 10 Onkee ano aamwameme, kambadhaleni natango mwa mana mo, okwiithanwa nokuhogololwa kweni kuKalunga ku kale aluhe kwa mena omidhi mune. Oshoka ngele tamu shi ningi, itamu ihata po we. 11 Nena otamu ka pewa ihe ompito yokuya mOshilongo shaaluhe shOmuwa gwetu noshOmukulili Jesus Kristus. 12 Onkee ano otandi kala noku mu dhimbulutha iinima mbika, nonando omu yi shi nale nomwa kolelela moshili ndjoka mwe yi pewa. 13 Onde shi tala shu uka, ndi mu penduthe noku mu dhimbulutha iinima mbika, manga natango ndi na omwenyo. 14 Oshoka onda tseya kutya otandi ka za mo mbala molutu nduka lweso, ngaashi Omuwa gwetu Jesus Kristus e shi lombwele ndje sha yela. 15 Otandi kambadhala oku mu ulukila ondjila, mu vule okudhimbulukwa aluhe iinima mbika nongele nda mana oondjenda.