Otwa za peni?
OMOLWASHIKE SHA SIMANA OKUMONA EYAMUKULO? Aantu oyendji ohaya longwa kutya onkalamwenyo kombanda yevi oye ya po kuyo yene. Ohaya lombwelwa kutya aantu oya za moolunkima noya lunduluka omolwoevolusi e taya kala ye na omaiyuvo, oondunge dhokudhiladhila nehalo lyiinima yopambepo.
Ihe dhiladhila kutya: Ngele otwe ya po shili okupitila moevolusi nokaku na Omushiti, ano osha yela kutya aantu oye li oothigwa. Nokapu ngoka te ya pe omayele ga dhenga mbanda, sha hala okutya, kapu na ngoka te ke ya kwathela okukandula po omaupyakadhi gawo. Nongele osho shi li ngawo, nena otwi inekela owala uunongo waantu opo tu yande iiponga yopaunshitwe, okukandula po omaipumomumwe gopapolotika noku tu kwathela tu pondole omaupyakadhi getu gopaumwene.
Mbela shoka otashi ku etele ngaa ombili yopamadhiladhilo? Ngele hasho, kala wu shi shi kutya opu na Omushiti ngoka ta vulu oku tu kwathela. Shoka itashi hokitha owala, ihe oshi li wo shopandunge.
Shoka Ombiimbeli tayi ti
Ombiimbeli otayi ti kutya aantu oya shitwa kuKalunga mwene. Ihe inatu ya po okupitila moevolusi. Pehala lyaashono, otu li oyana yaTate omunahole nomunandunge. Tala koohapu ndhika dha yela nawa dhi li mOmbiimbeli.
Genesis 1:27. “Kalunga okwa shiti omuntu oshifetha she, e ya shiti omulumentu nomukiintu.”
Episalomi 139:14. “Otandi ku hambelele e tandi ku simaneke, oshoka onda shitwa nuunkulungu. Iilonga yoye iikumithi; shika ondi shi shi nawa.”
Mateus 19:4-6. “Inamu lesha nani kutya petameko Omushiti okwe ya shiti omulumentu nomukiintu? Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taya ningi omuntu gumwe. Kaye li we yaali, aawe, oyo omuntu gumwe. Ano shoka Kalunga e shi tula kumwe, inashi kuthwa kumwe komuntu.”
Iilonga 17:24, 25. “Kalunga ngoka a shiti uuyuni niinima ayihe yi li mo, oye Omuwa gwegulu nogwevi. Oye iha kala mootempeli dha tungwa kaantu. Moku mu longele ina pumbwa, a pewe ando sha kaantu, oshoka oye mwene ha pe aantu ayehe omwenyo nomufudho niinima ayihe.”
Ehololo 4:11. “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!”
Nkene omayamukulo gOmbiimbeli tage tu etele ombili yashili yopamadhiladhilo
Okutseya kutya ‘ezimo kehe kombanda yevi olya lukilwa’ Kalunga, otashi nwetha mo nkene hatu tala ko yalwe. (Aaefeso 3:15, OB-1954) Okukala tu na ontseyo ndjoka otashi nwetha mo wo nkene hatu itala ko tse yene nosho wo omaupyakadhi getu. Omadhiladhilo getu otaga ka nwethwa mo momikalo ndhika tadhi landula.
Uuna tatu ningi omatokolo omadhigu, itatu ka kala tatu ipula unene nomadhiladhilo gaantu taga kondjithathana. Pehala lyaashono, otu na okwiinekela omayele gOmbiimbeli. Omolwashike? Omolwaashoka “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulikila omuntu ondjila yu uka, opo kehe ngoka ta longele Kalunga, a kale a gwana a pwa nokwoopalela oshilonga kehe oshiwanawa.”—2 Timoteus 3:16, 17.
Odhoshili kutya okutula miilonga omayele gOmbiimbeli osha kwatela mo okuninga oonkambadhala nosho wo eipangelo mwene. Omathimbo gamwe omayele gayo otashi vulika taga pula tu katuke momikalo ndhoka tadhi kondjithathana naashoka twa hala. (Genesis 8:21) Ihe ngele otu shi shi nokutya otwa shitwa kuTate omunahole gwomegulu, ano oshi li pandunge okuthika pehulithodhiladhilo kutya ye okwa tseya nawa shoka tu na okuninga opo tu mone uuwanawa. (Jesaja 55:9) Oohapu dhe otadhi tu shilipaleke tadhi ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” (Omayeletumbulo 3:5, 6) Ngele tatu tula omayele ngoka miilonga, iimpwiyu oyindji mbyoka hatu kala tu na uuna twa taalelwa komaupyakadhi nosho wo kokuninga omatokolo itayi ka kala po we.
Uuna tatu ningwa okatongotongo, itatu ka kala tu uvite kutya otu li pevi, tatu dhiladhila kutya katu na oshilonga shasha notu vulike kaantu yomihoko nenge yomaputuko galwe. Pehala lyaashono, otatu ka kala twi itala ko nawa tse yene. Omolwashike? Omolwaashoka Tate yetu, Jehova Kalunga, “aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.”—Iilonga 10:34, 35.
Shika otashi ke tu keelela wo twaaha kale niikala yokatongotongo shi na ko nasha nayalwe. Otu shi shi nokutya katu na okukala nomaiyuvo kutya otu vule aantu yomihoko dhilwe, molwaashoka Kalunga “okwa kutha omihoko adhihe dhaantu momulumentu gumwe nokwe ya tula kombanda yevi alihe.”—Iilonga 17:26.
Ngele otu na uushili mboka kutya otwa shitwa nosho wo kutya Omushiti gwetu oku na ko nasha natse otashi ke tu etela ombili yashili yopamadhiladhilo. Ihe oshindji osha pumbiwa natango ngele otwa hala okukala tu na ombili yokomwenyo.
[Oohapu dha simana pepandja 4]
Mbela omihoko dhaantu odhe ya po okupitila moevolusi?