Elalakano lyonkalamwenyo olyashike?
OMOLWASHIKE SHA SIMANA OKUMONA EYAMUKULO? Oshinima shoka tashi polimaneke aantu unene noonkondo osho edhiladhilo kutya onkalamwenyo kayi na eityo nenge elalakano lyasha. Mepingathano naashoka, omuntu ngoka e shi nawa elalakano lyonkalamwenyo oha vulu okwiidhidhimikila oonkalo oombwinayi. Omunongononipangi gwomikithi dhoonerve, Viktor E. Frankl, ngoka a li wo a hupu mEdhipago Enene kAanazi, okwa nyola a ti: “Muuyuni kamu na sha shoka tashi vulu okukwathela omuntu a hupe moonkalo oondhigu noonkondo, kaashi shi owala ontseyo kutya onkalamwenyo ye otayi ti sha.”
Ihe opu na omadhiladhilo nomaipumomumwe ogendji gi ili nogi ili ge na ko nasha noshinima shika. Aantu oyendji otaya dhiladhila kutya omuntu oku na okutokola kuye mwene kutya elalakano lyonkalamwenyo olyashike. Mepingathano naashoka, yamwe mboka yi itaala moevolusi otaya longo aantu kutya onkalamwenyo kayi na eityo lyasha naanaa.
Nonando ongaaka, omukalo gu li lela pandunge gwokumona kutya elalakano lyonkalamwenyo olyashike ogwo okupula omayele kOmugandji gwOmwenyo, Jehova Kalunga. Tala shoka Oohapu dhe tadhi ti kombinga yaashoka.
Shoka Ombiimbeli tayi ti
Ombiimbeli otayi longo aantu kutya Jehova Kalunga okwa li e nine omulumentu nomukulukadhi gwe elalakano lyokondandalunde sho e ya shiti. Jehova okwa li a gandja omalombwelo ngaka taga landula kaakuluntu yetu yotango.
Genesis 1:28. “Valathaneni, ne mu indjipale nokuudha evi alihe. Li tuleni mepangelo lyeni; pangeleni oohi dhomefuta noondhila dhokegulu niinamwenyo ayihe tayi inyenge kombanda yevi.”
Elalakano lyaKalunga olya li kutya Adam naEva nosho wo aanona yawo ya ninge evi alihe oparadisa. Kalya li aantu ya kulupe noya se, noka li a hala ya yone omudhingoloko. Ihe molwaashoka aakuluntu yetu yotango oya li ya ningi ehogololo kaali li pandunge, otwa thigulula kuyo uulunde neso. (Genesis 3:2-6; Aaroma 5:12) Nonando ongaaka, elalakano lyaJehova inali lunduluka. Masiku evi otali ka ninga oparadisa.—Jesaja 55:10, 11.
Jehova okwe tu shita tu na oonkondo dhopalutu nodhokudhiladhila opo tu gwanithe po elalakano lye. Ine tu shita tu kale twa manguluka ko kuye. Tala nkene elalakano lyaKalunga li na ko nasha natse lya fatululwa momanyolo gomOmbiimbeli taga landula:
Omuuvithi 12:13. “Ekota lyaashihe shu uvika, olyo ndika: Tila Kalunga nou dhiginine iipango ye, oshoka aantu ayehe osho ye na okuninga.”
Mika 6:8, OB-1954. ‘Oshikwawo, Omuwa te shi ku pula, oshini po ando, osho ashike, ngu u longe shoka shu uka, ngu u hole esilohenda, ngu u ende koshipala shOmuwa gwoye nokwiifupipika?’
Mateus 22:37-39. “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’”
Nkene eyamukulo lyOmbiimbeli tali eta ombili yashili yopamadhiladhilo
Opo oshitopolwa kehe sheshina shi longe nawa, oshi na okulongithwa nawa nosho wo momukalo moka sha nuninwa komuningi gwalyo. Sha faathana, ngele otwa hala okuyanda okwiiyehameka tse yene, pambepo, pamadhiladhilo, pamaiyuvo nenge palutu, otwa pumbwa okulongitha onkalamwenyo yetu momukalo moka Omushiti gwetu e yi nunina. Tala nkene okutseya elalakano lyaKalunga taku tu etele ombili yopamadhiladhilo moonkalo tadhi landula dhonkalamwenyo yetu.
Uuna taya ningi omatokolo ngoka ye wete ga simana monkalamwenyo yawo, aantu oyendji kunena ohaya dhiladhila kutya okwiigongelela iinima yuuyamba oko oshinima sha simanenena monkalamwenyo. Ihe Ombiimbeli otayi londodha kutya “mboka ya hala okuninga aayamba, otaa gwile memakelo. Oyo otaa yulwa kuuhalu uuwinayi wuugoya mboka tau ya fala moshiponga nomekano.”—1 Timoteus 6:9, 10.
Mepingathano naashika, mboka yi ilonga okukala ye hole Kalunga pehala lyiimaliwa ohaya kala ya gwanenwa. (1 Timoteus 6:7, 8) Ohaya kala yu uvite ko esimano lyokulonga nuudhiginini noye shi shi kutya oye na oshinakugwanithwa shokusila oshimpwiyu oompumbwe dhawo dhopalutu. (Aaefeso 4:28) Ihe ohaya pulakene wo kelondodho lyaJesus ndyoka tali ti: “Kaku na ngoka ta vulu okulongela aawa yaali; oshoka ota tondo gumwe ye e ta kala e hole mukwawo, nenge ta simaneke nguka, ye e ta dhini ngwiyaka. Kamu vulu okulongela Kalunga pamwe nemona.”—Mateus 6:24.
Onkee ano, pehala lyokupititha komeho iilonga yokwiikongela omboloto nenge okulalakanena omaliko, mboka ye hole Kalunga ohaya pititha komeho okulonga ehalo lye monkalamwenyo yawo. Oye shi shi kutya ngele oya tala ko okulonga ehalo lyaKalunga kutya oko kwa simanenena monkalamwenyo yawo, nena Jehova Kalunga ote ke ya sila oshimpwiyu. Odhoshili kutya Jehova okwi itala ko ye mwene e na oshinakugwanithwa shoku shi ninga.—Mateus 6:25-33.
Ngele tayu ungaunga nayalwe, aantu oyendji oyi iholele komeho. Kunena muuyuni kamu na ombili, unene tuu molwaashoka aantu oyendji ‘oyi ihole nokaye na olukeno nohenda.’ (2 Timoteus 3:2, 3) Uuna ya ningwa nayi nenge gumwe itaa tsu kumwe netaloko lyawo, ohaya popi ‘nekehuko, nondjahi, noontamanana netukano.’ (Aaefeso 4:31, OB-1954) Pehala lyokweeta po ombili yopamadhiladhilo, okwaaheneipangelo kwawo hoka ohaku ‘tukula owala oontamanana.’—Omayeletumbulo 15:18.
Mepingathano naashoka, mboka haya pulakene oshipango shaKalunga shokuhola ooyakwawo ngaashi yi ihole ohaya ‘kalathana nuukuume, nolukeno nohaya silathana ohenda nokudhiminathana po oondjo.’ (Aaefeso 4:32; Aakolossa 3:13) Nonando yamwe otaye ya ningi nayi, ohaya kambadhala okuholela Jesus ngoka a li a tukwa, ihe “ina tuka mboka ye mu tuku.” (1 Petrus 2:23) Ngaashi Jesus, oye na olupandu ndoka halu zi mokuyakula yalwe, nokuli naamboka ihaaya pandula shoka taye ya ningile. (Mateus 20:25-28; Johannes 13:14, 15; Iilonga 20:35) Jehova Kalunga oha gandja ombepo ondjapuki kwaamboka haya holele Omwana, nombepo ndjoka ohayi ya etele ombili yashili monkalamwenyo yawo.—Aagalati 5:22.
Ihe ongiini etaloko lyoye li na ko nasha nonakuyiwa tali vulu okuguma ombili yoye yopamadhiladhilo?