Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2024 Watch Tower Bible and Tract Society of Pennsylvania
3-9 MAALITSA
OMALIKO OKUZA MOOHAPU DHAKALUNGA OMAYELETUMBULO 3
Ulika kutya owa inekela muJehova
ijwbv-E oshileshwa 14 okat. 4-5
Omayeletumbulo 3:5, 6 — ‘Ino igameka koondunge dhoye mwene’
“Inekela Omuwa nomutima gwoye aguhe.” Ohatu ulike kutya otwa inekela Kalunga, uuna hatu ningi iinima momukalo ngoka a hala. Natu inekele Kalunga thiluthilu nomutima gwetu aguhe. MOmbiimbeli oshitya omutima, olundji ohashi longithwa okuulika kuuntu womeni mboka wa kwatela mo omaiyuvo gomuntu, omainyengotompelo, omadhiladhilo nosho wo iikala ye. Onkee okwiinekela Jehova nomutima gwetu osha kwatela mo oshindji, ihe hamaiyuvo owala getu. Ohatu ningi etokolo ndyoka, molwaashoka otwa tompwa kutya Omushiti gwetu oku shi shoka she tu opalela. — Aaroma 12:1.
‘Ino igameka koondunge dhoye mwene.’ Otwa pumbwa okwiinekela Kalunga, oshoka itatu vulu okwiinekela omadhiladhilo getu ngoka inaaga gwanenena. Ngele otwa inekele owala mu tse yene, nenge tu ethe omaiyuvo getu ogo ga tokole shoka tatu ningi, otashi vulika tu ka ninge omatokolo ngoka taga ka monika ga fa omawanawa, ihe lwanima ota ge ke tu etela iilanduliko iiwinayi. (Omayeletumbulo 14:12; Jeremia 17:9) Uunongo waKalunga owu vule kokule wetu. (Jesaja 55:8, 9) Ngele otwa kala hatu wilikwa komadhiladhilo ge, otatu ka pondola monkalamwenyo. — Episalomi 1:1-3; Omayeletumbulo 2:6-9; 16:20.
ijwbv-E oshitopolwa 14 okat. 6-7
Omayeletumbulo 3:5, 6 — ‘Ino igameka koondunge dhoye mwene’
“Mu tseya moondjila dhoye adhihe.” Natu kale tu na etaloko lya fa lyaKalunga mu kehe shimwe kondandalunde mokukalamwenyo kwetu nosho wo momatokolo kehe ngoka hatu ningi. Shika ohatu shi ningi uuna tatu galikana kuye e tu wilike nosho wo mokulandula shoka te tu lombwele mOohapu dhe, Ombiimbeli. — Episalomi 25:4; 2 Timoteus 3:16, 17.
“Nena oondjila dhoye ote dhi yelekanitha.” Kalunga oha yelekanitha oondjila dhetu moku tu kwathela tu kale metsokumwe nomithikampango dhe dhopauyuuki. (Omayeletumbulo 11:5) Kungawo, ohatu yanda omamakelo ngoka inaaga pumbiwa nohatu nyanyukilwa onkalamwenyo ombwanawa. — Episalomi 19:7, 8; Jesaja 48:17, 18.
Ino ‘geyela nando Jehova’
Ino kala itoo tonatele ekwatathano lyoye naJehova. Otatu vulu okuhenuka egamo lyopantu inaali gwanenena li tu ningithe kaatu geyele Kalunga, ngele otwa kala tu na ekwatathano lyopothingo naye. (Lesha Omayeletumbulo 3:5, 6.) Otwa pumbwa okukala twi inekela muJehova. Otwa pumbwa wo okuhenuka okukala aanawino momeho getu yene nenge okugandja eitulomo kutse yene. (Omayel. 3:7; Omuuv. 7:16) Uuna twa ningi ngaaka, itatu ka pa Jehova uusama uuna iinima iiwinayi ya ningwa.
Omaliko gomOmbiimbeli
Omanenedhiladhilo okuza membo lyOmayeletumbulo
3:3. Otu na okukala twa lenga ohole nuudhiginini noku yi ulika montaneho ngaashi omuntu ha zala okalyenge ke na ondilo mothingo. Otu na wo okunyolela omaukwatya ngaka momitima dhetu noku ga ninga oshinima sha simana kutse.
10-16 MAALITSA
OMALIKO OKUZA MOOHAPU DHAKALUNGA OMAYELETUMBULO 4
“Tonatela omutima gwoye”
Ongiini to vulu okutonatela omutima gwoye?
Oshitya “omutima” shoka sha popiwa mOmayeletumbulo 4:23, osha ukitha ‘kuuntu womeni,’ NW. (Lesha Episalomi 51:6.) Niitya yimwe, “omutima” ogwa ukitha komadhiladhilo getu, kunkene hatu kala tu uvite, komainyengotompelo nokomahalo getu. Omutima otagu ulike kunkene twa tya meni, ihe hakeholokopo lyetu lyokombanda.
w19.01 ep. 17, okat 10-11
Ongiini to vulu okutonatela omutima gwoye?
Ngele otwa hala tu pondole mokutonatela omitima dhetu, otu na okutseya iinima mbyoka ya nika oshiponga nokuninga po sha nziya tu igamene. Oshitya shoka sha tolokwa “tonatela” mOmayeletumbulo 4:23, otashi tu dhimbulukitha iilonga mbyoka ya li hayi longwa komulangeli. Pethimbo lyomukwaniilwa Salomo, aalangeli oya li haya kala komadhingililokuma goshilando, nuuna ya mono sha sha nika oshiponga tashi ya, oya li haya gandja elondodho. Okuthaneka shoka momadhiladhilo, otashi tu kwathele tu uve ko shoka tu na okuninga, opo kaatu ethe Satana a nyateke omadhiladhilo getu.
Pethimbo lyonale, aalangeli oya li haya longo epepe nepepe naakeeleli yopomiyelo dhoshilando. (2 Sam. 18:24-26) Elalakano lyawo ayehe olya li okugamena oshilando, mokushilipaleka kutya omiyelo odha patwa, uuna aatondi ye ya popepi nasho. (Neh. 7:1-3) Eiyuvo lyetu ndyoka lya dheulwa kOmbiimbeli, otali vulu okulonga li li omulangeli gwetu notali vulu oku tu londodha, uuna Satana ta kambadhala okunwetha mo omitima dhetu. Niitya yimwe, ano uuna ta kambadhala okunwetha mo omadhiladhilo getu, nkene tu uvite, omainyengotompelo getu nenge omahalo getu. Ethimbo kehe eiyuvo lyetu tali tu londodha, otwa pumbwa okupulakena kulyo, ano okweedhila omweelo pathaneko.
Ongiini to vulu okutonatela omutima gwoye?
Okutonatela omitima dhetu, okwa kwatela mo okutinda iinima iiwinayi, nokweethela mo mbyoka iiwanawa. Dhiladhila natango kombinga yoshiholelwa shedhingililokuma lyoshilando. Omutonateli gwoposheelo okwa li ha pata omiyelo dhoshilando, opo kaamu ponokelwe komutondi. Ihe omathimbo gamwe, okwa li he dhi egulula, opo mu etwe iikulya nosho wo iinima yilwe. Ando omiyelo odha li ihaadhi egululwa nando, ando aakalimo yomoshilando oya kala taya dhengwa kunakayidhi. Sha faathana, otwa pumbwa okweetha aluhe omitima dhetu dhi nwethwe mo komadhiladhilo gaKalunga.
‘Gamena omutima gwoye!’
Omolwashike tu na okugamena omutima gwetu gwopathaneko? Kalunga okwa li i inyengitha omukwaniilwa Salomo a nyole ta ti: ‘Gamena omutima gwoye shi vulithe ayihe mbyoka yi na okugamenwa, oshoka omo mu na ekota lyomwenyo.’ (Omayeletumbulo 4:23, yelekanitha NW.) Ongushu yonkalamwenyo yetu ngashingeyi nosho wo etegameno lyetu lyonakuyiwa olyi ikolelela konkalo moka omutima gwetu gwopathaneko gu li. Omolwashike mbela? Omolwaashoka Kalunga oha mono shoka shi li momitima dhetu. (1 Samuel 16:7) Kalunga oha tokola kutya oku tu uvitile ngiini, shi ikolelela ‘komuntu gwomeni gwokomwenyo’ nenge tu tye kwaashoka tu li meni. — 1 Petrus 3:4, OB-1954.
Omaliko gomOmbiimbeli
Mbela oto ka tegelela ngaa Jehova a katuke oonkatu?
Omayeletumbulo 4:18 otaga ti: “Ondjila yaayuuki oya fa uuyelele weluwa tali tende, mboka tau yele sigo kwa shi.” Ovelise ndjoka otayi shi ulike sha yela kutya Jehova oha kwathele oshigwana she shu uve ko elalakano lye kashona nakashona. Ovelise ndjika otayi vulu wo oku tu kwathela tu mone kutya ohashi pula ethimbo, opo omuntu a ninge omalunduluko monkalamwenyo ye noku hedhe popepi naJehova. Otwa pumbwa okukonakona Oohapu dhaKalunga nuukeka noku dhi tula miilonga, mwa kwatelwa wo omayele ngoka hatu pewa kehangano lyaJehova. Ngele otwa kala hatu shi ningi, otashi ke tu kwathela tu kokeke kashona nakashona omaukwatya ga fa gaKristus notashi ke tu kwathela wo tu tseye Jehova nawa. Natu ka taleni kethaneko ndyoka Jesus a li a gandja kombinga yoshinima shoka.
17-23 MAALITSA
OMALIKO OKUZA MOOHAPU DHAKALUNGA OMAYELETUMBULO 5
Ikaleka kokule nomilalo dha nyata
w00-E 7/15 ep. 29, okat. 1
Oto vulu okukala wa yogoka muuyuni mbuka wa yonana
Omuntu ngoka a popiwa meyeletumbulo ndika oku li ‘omukiintu omukwiilongo,’ ano ombwanda. Oohapu dhomaheka ndhoka ha popi a yule yalwe, oontoye dha fa omagadhi goonyushi nodhi na omuthenu dha fa omagadhi gooholivi. Mbela olundji omilalo dha nyata ihadhi tameke momukalo gwa tya ngaaka? Pashiholelwa, natu taleni oshimoniwa shaAmy, amushanga gwomimvo 27, ngoka a li ha monika nawa. Okwa ti: “Omulumentu gumwe kiilonga okwa li ha gandja eitulomo olindji kungame nokwa li ha popile ndje muuwanawa ompito kehe ta mono. Ohashi kala oshiwanawa uuna yalwe ta ulike ohokwe mungoye. Ihe osha li sha yela kutya ohokwe ndjoka a li ta ulike mungame, oya li owala yi na ko nasha nomilalo. Kanda li tandi ka zimina oonkambadhala dhe.” Oohapu dhomaheka ndhoka hadhi popiwa komulumentu nenge komukiintu ohadhi kala tadhi monika dha fa tadhi hokitha, okuninga owala ngele twe dhi dhimbulula mo kuyele. Opo tu shi ninge otwa pumbwa okudheula okudhiladhila kwetu.
Tsikila okumona uuwanawa metilokalunga
Opu na omatompelo omawanawa kutya omolwashike tu na okuyanda omilalo dha nyata. ‘Omukiintu egoya’ okwa hokololwa ta ti: “Omeya ga yakwa omatoye.” “Omeya ga yakwa” oshike? Ombiimbeli otayi yelekanitha omilalo pokati komusamane nomukulukadhi nomeya gomothithiya. (Omayel. 5:15-18) Omusamane nomukulukadhi mboka ya hokana paveta oya pitikwa okunyanyukilwa pamwe omilalo mondjokana yawo. Ihe “omeya ga yakwa” oge li shimwe shi ili. Omeya ga yakwa otashi vulika tagu ulike komilalo dhi indikwa. Aantu mboka haya yi momilalo dha nyata, olundji ohaya kambadhala oku shi ninga meholamo, ngaashi naanaa omufuthi ha kambadhala okuyaka. “Omeya ga yakwa” otashi vulika ga monike ga fa omatoye, unene tuu ngele mboka taye shi ningi otaya dhiladhila kutya kapu na gumwe ta ka mona shoka ya ninga. Shoka itashi yemateke tuu! Jehova oku wete kehe shimwe. Ngele otwa kala inaatu hokiwa we kuJehova, ohashi kala oshiwinayi noonkondo, oshinima shoka tashi vulu oku tu ningilwa nokashi shi oshiwanawa nando. (1 Kor. 6:9, 10) Ihe opu na ishewe oshindji tashi vulu oku holoka po.
Omilalo dha nyata otadhi vulu okuningitha omuntu a kale e uvite a sa ohoni, kee na oshilonga, a ninge etegelelo inee shi hala nokuteya po omaukwanegumbo. Oshi li pandunge okutinda ehiyo lyomukiintu omugoya, uuna te ku hiya wu ka lye ‘megumbo’ lye. Kakele kokukanitha uukuume wawo naJehova aantu oyendji mboka haya yi moluhondelo ohaya kwatwa komikithi ndhoka tadhi vulu oku ya dhipaga. (Omayel. 7:23, 26) Ovelise 18 yontopolwa 9 otayi hulitha tayi ti: “Aahiywa ye oye li muule woshaasi.” Omolwashike nduno aantu oyendji haya taamba ko ehiyo lye ndyoka tali fala moshiponga sha tya ngawo? — Omayel. 9:13-18.
w15 6/15 ep. 16-17, okat. 8-10
Otatu vulu okukala twa yogoka
MOmayeletumbulo 5:8, Kalunga ote tu londodha tu kale kokule nonyata yiipala. MOmayeletumbulo ontopolwa ontiheyali, ota mu popiwa kombinga yomumati ngoka a li te ende mepandaanda, popepi pokolonela yegumbo lyomukiintu ohonda. Omukiintu ngoka okwa li “a zala lela ngohonda.” Okwe ende u uka komumati e te mu shambakana, nokwe mu thipi komilungu. Okwe mu lombwele wo oohapu ndhoka dha pendutha muye omahalo ga nyata. Omumati ngoka ka li a yanda omahalo ngoka, naashoka oshe mu fala sigo a yi naye momilalo. Okwa yono, nonando kali e na elalakano lyokuyona. Konima yeyono lye, okwa ka mona iilanduliko iiwinayi. Andola okwa dhiladhilile nawa koshizemo sholuhondelo, andola okwa kala kokule nomukiintu ngoka. — Omayeletumbulo 7:6-27.
Ngaashi omumati ngoka a popiwa mOmayeletumbulo, natse otatu vulu okuninga omatokolo kaage li mondjila, molwaashoka inaatu konenena oshiponga manga shi li kokule. Pashiholelwa, oopolohalama dhimwe uusiku kotiivii ohadhi ulike iinima ya nyata. Otashi ka kala oshiponga oshinene okukala tatu tala otiivii pethimbo ndyoka, tatu lundulukile koopolohalama dhi ili nodhi ili. Osha nika wo oshiponga ngele ohatu yi komapandja gokointaneta ngoka kaatu shi kutya oge na shike nenge komahala hoka aantu hayi itumine omatumwalaka paintaneta, ihe ohaku kala wo omatseyitho ge na sha niinima ya nyata nosho wo omathano giipala. Moonkalo dha tya ngawo, otashi vulika shoka tatu tala shi kokeke omahalo ga puka mutse, ngoka tage ke tu ningitha kaatu vulike kuJehova.
Ombiimbeli otayi tu lombwele nkene aalumentu ye na okukalathana naakiintu. (Lesha 1 Timoteus 5:2.) Omukriste ke na okukala e na ekwatathano lya pitilila nomuntu ngoka kee shi kuume ke kopandjokana nenge kee shi omuntu ngoka a hala okuya naye mondjokana. Ke na okudhana nomaiyuvo ga yakwawo. Aantu yamwe ohaya dhiladhila kutya kashi na epuko lya sha okwiihumbatela omuntu momikalo dhiihole, ngaashi okundifauka, okutala omuntu miikolo yomeho noku mu pepa nomeho, shampa owala anuwa itoo mu gumu. Ngele aantu yaali oya tameke okukala ye na ekwatathano lya pitilila pokati kawo, otashi vulika ya tameke okukala ye na omadhiladhilo ga nyata, shoka tashi ka fala moluhondelo. Oshinima shika osha ningwa nale, notashi vulu okuningwa natango.
Omaliko gomOmbiimbeli
Ombiimbeli otayi ti ngiini kombinga yomilalo?
Omilalo omagano ga za kuJehova. Okwa hala dhi kale pokati komulumentu nomukiintu, mboka ya hokana. Omagano ngaka ihaga kwathele owala aaihokani ya mone aanona, ihe oyu ulukilathane wo ohole momukalo gwopaunshitwe notagu ya uvitha nawa. Onkee ano, Oohapu dhaKalunga otadhi ti: “Nyanyukilwa omukulukadhi gwoye wa za naye kuufuko.” (Omayeletumbulo 5:18, 19) Jehova okwa tegelela aaihokani Aakriste ya kale aadhiginini kookuume kawo kopandjokana, opo kaaya ye moluhondelo. — Lesha Aahebeli 13:4.
24-30 MAALITSA
OMALIKO OKUZA MOOHAPU DHAKALUNGA OMAYELETUMBULO 6
Oshike tatu vulu okwiilonga kuudhidhi?
it-1-E ep. 115, okat. 1-2
Uudhidhi
‘Owino yopaunshitwe.’ ‘Owino’ yuudhidhi inayi za pamwe pu ili, ihe oya shitilwa muwo kOmushiti gwiishitwa ayihe. Ombiimbeli oye wu popi kutya ‘otau longekidha iikulya yawo mothinge, nota wu pungula iipalutha yawo peteyo.’ (Omayel 6:8) Oludhi lumwe luudhidhi mboka hawu ithanwa (Messor semirufus) owu li wumwe womomaludhi ogendji ngoka haga teya notawu adhika moPalestina. Ohawu pungula iilya oyindji pethimbo lyoshitemamvula nolyothinge nohawu ka longitha iikulya mbyoka pethimbo lyokufu, mpoka ihaapu monika iikulya nuupu. Olundji, uudhidhi mboka ohawu adhika piipale mpoka hapu kala pu na oombuto nosho wo oomuma dhiilya odhindji. Ngele omvula oya loko e tayi tutike oomuma ndhoka dha pungulwa kuudhidhi mboka hawu teya, ohawu dhi kutha mo noku dhi fala pomutenya dhika kukute. Shimwe ishewe, ohawu lumata ko ombinga yomuma ndjoka hayi vulu okumena, opo kaayi mene sho ya pungulwa. Pomakwena guudhidhi mboka hawu tutu iikulya, opu na uundjila wa yela nawa wokweenda uudhidhi noposheelo shomakwena gawo ohapu kala pu na iipeta yoonkenya.
Omaukwatya ngoka tatu vulu okuholela. Okwa konakonwa paufupi kutya uudhidhi ohawu yambidhidha elombwelo ndyoka ta li ti: “Omunanyalo ngoye, inda kuudhidhi, u tale oondjila dhawo e to ningi oondunge.” (Omayel 6:6) Okwiilongekidhila onakuyiwa yawo hayo owala hatu mono onkumithi, ihe okwaatyololoka wo nokutokola toko kwawo. Olundji ohawu humbata nenge wu nane iinima mbyoka yi na ondjundo yawo yi li po lwaali nenge yi vulithe po. Ohawu ningi kehe shoka tawu vulu, opo wu vule okugwanitha po oshinakugwanithwa shontumba nohawu tindi okushuna omutse miipeta, nonando owu punduke sho tawu gwanitha po iilonga yawo. Ohawu longele kumwe momukalo omukumithi, hawu kale ke omakwena gawo ga yela, nohawu ulike kutya owu na ko nasha nuukwawo mboka hawu longo nawo. Poompito dhimwe, ohawu kwathele mboka wa ehamekwa nenge mboka wa loloka, sho tawu shuna komakwena.
w00-E 9/15 ep. 26, okat. 3-4
Gamena edhina lyoye
Ngaashi uudhidhi, mbela natse otwa pumbwa oku kala hatu longo nuudhiginini? Okulonga nuudhiginini nokukambadhala okuninga omalunduluko miilonga yetu, ohashi tu etele uuwanawa kutya nduno opu na mboka ye tu wete nenge hasho. Odhoshili kutya otwa pumbwa okuninga ngaashi tatu vulu, uuna tu li kosikola, kiilonga nosho wo ngele tatu kutha ombinga miinima yopambepo. Ngaashi owala uudhidhi hawu mono uuwanawa mokulonga kwawo nopwaa na ezimbuko, Kalunga naye okwa hala tu “nyanyukilwe iilonga” yetu yuudhiginini. (Omuuvithi 3:13, 22; 5:18) Okukala neiyuvo lya yela nosho wo okukala twa nyanyukwa, oku li ondjambi yokulonga nuudhiginini. — Omuuvithi 5:12.
Salomo okwa li a longitha omapulo gaali guuletoli, opo a penduthe aananyalo a ti: “Munanyalo ngoye, oto lala sigo uunake, oto ka papudhuka luni moomposi dhoye?” Mokuyelekela omunanyalo, omukwaniilwa okwa gwedha ko a ti: “To kotha po kashona, to kumuka po okathimbo, to gonyo oshikaha shoye u gondje po, noluhepo otalu matuka lwa fa omuyugi, nuuthigona wa fa omulumentu a homata.” (Omayeletumbulo 6:9-11) Manga omunanyalo a lala, oha adhika koluhepo meendelelo onga omuyugantu ta yugu neendelelo nompumbwe ohayi mu ponokele ya fa omulumentu a homata. Omapya gaananyalo ohaga kala ge na omwiidhi niigwanga. (Omayeletumbulo 24:30, 31) Oongeshefa dhe ihadhi humu komeho nohadhi mbangolota meendelelo. Sigo uunake omuniilonga ta idhidhimikile emanopo lyethimbo ndyoka? Shimwe ishewe, mbela omulongwa ngoka e na onyalo yokwiilonga oha kala a tegelela e shi endithe nawa?
Omaliko gomOmbiimbeli
w00-E 9/15 ep. 27, okat. 3
Gamena edhina lyoye
Iinima iheyali mbyoka ya popiwa mOmayeletumbulo oya simana noya kwatela mo omaludhi agehe guuwinayi kehe. “Omeho ge na uuntsa” nosho wo “omutima tagu dhiladhila omatedho giiponga,” oge li omayono ngoka haga ningwa pamadhiladhilo. “Elaka lyiifundja” nosho wo ‘okutaandelitha uunzapo wiifundja,’ omayono ngoka haga ningwa mokupopya. “Iikaha tayi tilehi ombinzi yaa na ondjo” nosho wo “oompadhi tadhi endelele okuya kuuwinayi,” mbika iilonga iiwinayi. Shoka unene shi tondike kuJehova, aantu mboka haya nyanyukilwa okuhumitha komeho ondumbo maantu mboka haya kala pamwe na yalwe nombili. Omwaalu sho gwa indjipala okuza kuhamano sigo oheyali, shoka otashi ulike kutya hapo owala tagu hulile mpoka, oshoka aantu otaya tsikile nokulonga uuwinayi.
31 MAALITSA–6 APILILI
OMALIKO OKUZA MOOHAPU DHAKALUNGA OMAYELETUMBULO 7
Yanda oonkalo ndhoka tadhi vulu oku ku ningitha wu yone
‘Ino igameka koondunge dhoye mwene’
Opo tu kondjithe omamakelo, osha simanenena tu galikane tatu shi ningi pethimbo lyu uka. Tala shoka sha ningilwa omulumentu omugundjuka ngoka a popiwa mOmayeletumbulo 7:6-23. Okwa li te ende kwa wiwila mepandaanda moka hamu kala ohonda. Ohonda oye mu hongolola noohapu noye mu pukitha nomuthenu gwomilungu dhayo, omulumentu okwe yi landula a fa ondumetana tayi ka tselwa. Omolwashike omulumentu ngoka a li e ende mepandaanda ndyoka? Ombiimbeli otayi ti kutya okwa li ‘egoya’ notashi vulika a li e na omahalo ga puka. (Omayel. 7:7) Ethimbo lini a li e na okugalikana? Okwa li e na okugalikana sho omukiintu ta popi naye, opo a kondjithe emakelo ndyoka. Ihe osha li shi li nawa kuye a galikane tango sho a kwatwa kedhiladhilo e ke ende mepandaanda moka.
Otatu vulu okukala twa yogoka
MOmayeletumbulo 5:8, Kalunga ote tu londodha tu kale kokule nonyata yiipala. MOmayeletumbulo ontopolwa ontiheyali, ota mu popiwa kombinga yomumati ngoka a li te ende mepandaanda, popepi pokolonela yegumbo lyomukiintu ohonda. Omukiintu ngoka okwa li “a zala lela ngohonda.” Okwe ende u uka komumati e te mu shambakana, nokwe mu thipi komilungu. Okwe mu lombwele wo oohapu ndhoka dha pendutha muye omahalo ga nyata. Omumati ngoka ka li a yanda omahalo ngoka, naashoka oshe mu fala sigo a yi naye momilalo. Okwa yono, nonando kali e na elalakano lyokuyona. Konima yeyono lye, okwa ka mona iilanduliko iiwinayi. Andola okwa dhiladhilile nawa koshizemo sholuhondelo, andola okwa kala kokule nomukiintu ngoka. — Omayeletumbulo 7:6-27.
Tsikila okumona uuwanawa metilokalunga
Omilalo dha nyata otadhi vulu okuningitha omuntu a kale e uvite a sa ohoni, kee na oshilonga, a ninge etegelelo inee shi hala nokuteya po omaukwanegumbo. Oshi li pandunge okutinda ehiyo lyomukiintu omugoya, uuna te ku hiya wu ka lye ‘megumbo’ lye. Kakele kokukanitha uukuume wawo naJehova aantu oyendji mboka haya yi moluhondelo ohaya kwatwa komikithi ndhoka tadhi vulu oku ya dhipaga. (Omayel. 7:23, 26) Ovelise 18 yontopolwa 9 otayi hulitha tayi ti: “Aahiywa ye oye li muule woshaasi.” Omolwashike nduno aantu oyendji haya taamba ko ehiyo lye ndyoka tali fala moshiponga sha tya ngawo? — Omayel. 9:13-18.
Omaliko gomOmbiimbeli
w00-E 11/15 ep. 29, okat. 1
“Dhiginina iipango yandje, opo u kale u na omwenyo”
Salomo okwa tsikile ko a ti: “Ga zala kominwe dhoye, ngoye u ga nyolele koshipelende shokomutima gwoye.” (Omayeletumbulo 7:3) Ngaashi owala ominwe dhetu hatu kala tu dhi wete ethimbo alihe nodha simana mokugwanitha po iinakugwanithwa yetu, iiyilongomwa mbyoka hatu ilongo momanyolo nenge ontseyo ndjoka hatu mono mOmbiimbeli, oyi li edhimbulukitho tali kalelele noku tu wilika mwaashihe shoka hatu ningi. Onkee natu dhi nyolele koshipelende shokomutima gwetu, noku dhi kaleka dhi li oshitopolwa shonkalamwenyo yetu.
7-13 APILILI
OMALIKO OKUZA MOOHAPU DHAKALUNGA OMAYELETUMBULO 8
Pulakena kowino yaJesus
“Ngame ondi hole Tate”
Movelise 22, owino otayi popi tayi ti: “OMUWA okwa shiti ndje omutango gwiilonga ye, okuza konalenale.” Osha yela kutya ovelise ndjika itayi popi owino yo yeneyene, molwaashoka uukwatya mboka kawu na etameko. Jehova ngoka e na owino oko a kala nale. (Episalomi 90:2) Ihe Omwana gwe oye “omutango gwiishitwa ayihe.” Oku na etameko molwaashoka oye a shitwa tangotango kuJehova. (Aakolossa 1:15) Ngaashi sha popiwa mOmayeletumbulo, Omwana okwa kala ko nalenale omanga evi negulu inaayi shitwa. Jehova oku ulike owino ye nenge uunongo we wa gwanenena okupitila mOmwana e li Ohapu nenge Omupopikalelipo gwe. — Johannes 1:14.
“Ngame ondi hole Tate”
Omanga Jesus inee ya kombanda yevi, okwa kala ta longo shike megulu uule wethimbo olindjilindji ndyoka a kala mo? Ovelise 30 otayi mu popi e li “engomba” a tegama naKalunga. Shoka osha hala okutya shike? Aakolossa 1:16 otaya yelitha taya ti: “Kalunga okwa shititha Kristus iinima ayihe yomegulu noyokombanda yevi, [ayihe oya shitilwa muye noye mu shitilwa, KB].” Jehova Kalunga oye Omushiti gwiinima ayihe, ihe okwa longitha Omwana, engomba mokushita iinima mbyoka kutya nduno iishitwa yopambepo mbyoka ihaatu mono yi li megulu, ewangandjo enenenene, evi nosho wo iimeno niinamwenyo yi ili noyi ili tayi kumitha mbyoka yi li ko, mwa kwatelwa aantu mboka ye li iishitwa ya dhenga mbanda. Otatu vulu okufaathanitha ekwatathano ndyoka li li pokati kaJehova nOmwana naandyoka hali kala pokati komuthaneki gwomatungo (omusindi) nomutungi ngoka ha tungu naanaa a landula momisinda dhomuthaneki. Kehe shimwe shoka tashi tu kumitha meshito, nena otatu tanga Omusindi Omunene. (Episalomi 19:1) Onkee ano Omushiti nOmwana gwe “engomba” oya kala ye na ekwatathano tali shambula ethimbo ele.
Uuna aantu yaali inaaya gwanenena taya longo pamwe, omathimbo gamwe ihaya tsu ya thithe. Ihe Jehova nOmwana oya li yu uvitathane. Omwana okwa kala ta longo pamwe naHe uule wethimbo ele noonkondo ‘naaluhe okwa dhanene koshipala She.’ (Omayeletumbulo 8:30) Jehova nOmwana oya li shili ya nyanyukilwa okukala pamwe. Omwana sho a koko okwa li a fa He, molwaashoka okwa li ha holele omaukwatya gaHe. Shoka osho sha koleke ekwatathano lyawo. Onkee ano ekwatathano nohole pokati kawo oya za nalenale.
w09-E 4/1 ep. 31, okat. 14
Pandula onkandangala ndjoka Jesus ta dhana e li David nosho wo Salomo
Opwa li owala omuntu gumwe kombanda yevi ngoka a li e na uunongo e vule Salomo, nomuntu ngoka okwa li Jesus Kristus. Jesus okwa li iipopi ye mwene a ti kutya “oku vule Salomo.” (Mat. 12:42) Jesus okwa li a popi “oohapu ndhoka tadhi gandja omwenyo gwaaluhe.” (Joh. 6:68) Pashiholelwa, mEuvitho lye lyokOndundu, Jesus okwa li a yelitha nawa omakotampango gaSalomo nokwa li a gwedhele ko gamwe ishewe. Salomo okwa li a popya iinima oyindji mbyoka tayi vulu okweetela aapiya yaJehova elago. (Omayel. 3:13; 8:32, 33; 14:21; 16:20) Jesus okwa li a tsu omuthindo kutya elago lyashili ohali etwa kiilonga mbyoka hatu longele Jehova nosho wo kokugwanithwa po kwomauvaneko Ge. Jesus okwa ti: “Mboka ye shi kutya oya pumbwa ewiliko lyaKalunga oya nyanyukwa, oshoka Uukwaniilwa womegulu owawo.” (Mat. 5:3, NW) Mboka haya tula miilonga omakotampango ngoka taga adhika moohapu dhaJesus, otaya ka hedha popi elela naJehova, ngoka e li “oluthithiya lwomwenyo.” (Eps. 36:9; Omayel. 22:11; Mat. 5:8) Kristus okwa ulika kutya oku na ‘uunongo waKalunga.’ (1 Kor. 1:24, 30) Jesus Kristus, Omukwaniilwa gwopaMesiasa, oku na “ombepo yuunongo.” — Jes. 11:2.
Omaliko gomOmbiimbeli
Owino otayi igidha muule
MIILONGO oyindji, otwa kala olundji hatu mono aauvithi yUukwaniilwa yi ipyakidhila momapandaanda ya nyanyukwa taya gandja iileshomwa kwaamboka taya ende puyo. Mbela nangoye owa kutha ombinga miilonga mbyoka iihokithi yokuuvitha? Ngele osho, nokaapu na omalimbililo owu na okukala wa dhiladhila kombinga yoohapu oohokithi dhi li membo lyOmayeletumbulo, ano owino tayi igidha aantu momapandaanda ya pulakene komayele gayo. (Lesha Omayeletumbulo 1:20, 21.) Ombiimbeli nosho wo iileshomwa yetu yopaMbiimbeli oyi na “owino yashili,” owino yaJehova. Uuyelele mboka wo aantu ya pumbwa opo ya ka mone omwenyo gwaaluhe. Ohatu kala twa nyanyukwa ngele omuntu gwontumba a taamba ko iileshomwa yetu. Ihe haayehe haye yi taamba ko. Yamwe ihaya kala ya hala okutaamba ko shoka Ombiimbeli tayi ti. Yalwe ohaye tu yolo. Ohaya dhiladhila kutya Ombiimbeli oya kwisha. Omanga yamwe haya popile muuwinayi omalongo gOmbiimbeli, ge na ko nasha neihumbato lyopamikalo taya ti kutya mbono haye ga landula oye na omikalo omiwinayi yo oyi ishi uuyuuki. Ihe Jehova ota tsikile nokugandja owino yashili kaantu ayehe. Ohe shi ningi momikalo dhini?
Omukalo gumwe ngoka Jehova ha longitha okugandja owino yashili okupitila mOohapu dhe, Ombiimbeli. Embo ndyoka konyala oli niwe kaantu ayehe. Ongiini shi nasha niifo yetu ya kankamena kOmbiimbeli? Otatu pandula Jehova, molwaashoka iifo mbyoka oyi li momalaka ge vulithe peyovi. Mboka haa pulakene, ano haya lesha nokutula miilonga shoka tayi ilongo otaya ka mona mo uuwanawa. Ihe aantu oyendji oya tokola kaaya pulakene kuJehova. Uuna taya ningi omatokolo, ohayi igameke koondunge dhayo yene nenge ya pulakene kaantu ooyakwawo. Ohashi vulika kaaye tu simaneke, molwaashoka twa hogolola okulandula shoka Ombiimbeli tayi ti. Oshitopolwa shika, otashi ka kundathana kutya omolwashike aantu hayi inyenge ngaaka. Tango, natu ka taleni kunkene tatu vulu okumona owino ndjoka okuza kuJehova.
14-20 APILILI
OMALIKO OKUZA MOOHAPU DHAKALUNGA OMAYELETUMBULO 9
Kala omunandunge, ino tinda omayele
‘Pulakena koohapu dhaanawino’
Uushili owo kutya omathimbo gamwe ohashi vulika shi kale oshidhigu lela okutaamba ko nokutula miilonga omayele ngoka twa pewa ge tu ukilila. Otashi vulika nokuli tu geye. Omolwashike mbela? Nonando oshipu kutse okupopya kutya inatu gwanenena, otashi vulika tu shi mone oshidhigu okutaamba ko omayele ngele omuntu gumwe okwe tu lombwele kondandalunde epuko ndyoka twa ninga. (Lesha Omuuvithi 7:9.) Otashi vulika tu ninge omaipopilo. Otashi vulika tu ipule kutya omolwashike omuntu ngoka e tu pe omayele nenge tu geye omolwomukalo moka e ge tu pe. Otashi vulika nokuli tu mu pe uusama tatu ti: ‘Ke na uuthemba woku pa ndje omayele. Naye oha ningi omapuko!’ Hugunina, ngele omayele ngoka otu wete inaage tu opalela, otashi vulika tu gi ipwililikile nenge tu ka pule omuntu gulwe ngoka tu wete kutya ote ke tu lombwela shoka twa hala okuuva.
‘Pulakena koohapu dhaanawino’
Mbela oshike tashi vulu oku tu kwathela tu taambe ko omayele? Otwa pumbwa okwiifupipika nokudhimbulukwa kutya inatu gwanenena nosho wo kutya omathimbo gamwe ohatu ningi iinima ya nika uugoya. Ngaashi twa zi noku shi kundathana muutendo wa tetekele, petameko Job okwa li e na etaloko lya puka, ihe lwanima okwa lundulula okudhiladhila kwe, na Jehova okwe mu yambeke. Omolwashike mbela? Omolwaashoka Job okwa li omwiifupipiki. Okwa ulike kutya ye omwiifupipiki shili sho a taamba ko omayele ngoka Elihu e mu pe, nonando Elihu okwa li lela omugundjuka kuye. (Job 32:6, 7) Eifupipiko otali ke tu kwathela wo tu tule miilonga omayele ngoka tatu pewa, nonando otu uvite kutya inatu ga pumbwa nenge kutya ngoka te ge tu pe omugundjuka kutse. Omukuluntugongalo gumwe gwokoKanada okwa ti: “Otashi ka kala oshidhigu kutse tu ninge ehumokomeho, ngele kapu na ngoka he tu pe omayele.” Atuheni otwa pumbwa okutsikila okukokeka iiyimati yombepo nokuninga aauvithi naalongi yonkundana ombwanawa ya pyokoka. — Lesha Episalomi 141:5.
Kala ho tala ko omayele ge li euliko kutya Kalunga oku ku hole. Jehova oha kala aluhe e tu halela uuwanawa. (Omayel. 4:20-22) Uuna te tu pe omayele okupitila mOohapu dhe, moshileshomwa sha kankamena kOmbiimbeli nenge okupitila momwiitaali ngoka a pyokoka, kungawo ote tu ulukile kutya oku tu hole. Aahebeli 12:9, 10 otaya ti kutya ‘ohe shi ningi omoluuwanawa wetu yene.’
Kala ho gandja eitulomo komayele, ihe hakomukalo moka we ga pewa. Omathimbo gamwe otashi vulika tu kale tu uvite kutya ngoka e tu pe omayele ine shi ninga momukalo omwaanawa. Odhoshili kutya ngoka ta gandja omayele oku na oku ga gandja momukalo ngoka tagu ningitha ngoka te ga pewa e ga taambe ko nuupu. (Gal. 6:1) Ihe ngele otse tatu pewa omayele, otwa pumbwa okukala hatu gandja eitulomo kwaashoka tage tu longo nonando otu uvite kutya otwa li tu na oku ga pewa momukalo omwaanawa. Otatu vulu okwiipula tatu ti: ‘Nonando inandi panda omukalo moka nda pewa omayele ngaka, mbela oshike tandi vulu okwiilonga mugo? Pehala lyokugandja eitulomo kokwaagwanenena kwaangoka e ga pe ndje, omolwashike owala itaandi gandja eitulomo kwaashoka taga longo ndje?’ Otashi ka kala pandunge ngele otwa kala hatu kongo omikalo moka tatu vulu okumona mo uuwanawa momayele ngoka hatu pewa. — Omayel. 15:31.
w01-E 5/15 ep. 30, okat. 1-2
‘Omasiku getu otaga ka kala omale, ngele otu na owino’
Omukalo moka omuntu omunandunge ha taamba ko epukululo, ogwa yooloka ko kugwaangoka omusheki. Salomo okwa ti: “Geela omunandunge, nota kala e ku hole. Longa omunandunge, noondunge dhe otadhi koko natango.” (Omayeletumbulo 9:8b, 9a) Omuntu omunandunge oku shi kutya “pethimbo ndyoka tatu geelwa, kombinga yetu kashi shi enyanyu, aawe, oluhodhi, ihe konima yethimbo mboka ya putudhwa kegeelo ndyoka, otaa ka mona ombili omolwokukalamwenyo kwawo kwo opalela Kalunga.” (Aahebeli 12:11) Nonando epukululo ohali ehameke, omolwashike tu na oku li shunithila omuntu nenge okwiipopila, ngele oku li taamba ko ohaku tu ningi aanawino?
Omukwaniilwa omunandunge okwa tsikile ko a ti: “nongeka omuyuuki, noti indjipalitha uunongo we.” (Omayeletumbulo 9:9b) Kapu na nando omuntu e na oondunge odhindji nenge a kulupa unene, nokutsikila okwiilonga. Itashi nyanyudha tuu okumona nokuli naamboka ye li moomvula dhuukokele taya taamba ko oshili nokwiiyapulila Jehova! Natu tsikile wo okukala tu na ehalo lyokwiilonga nokukala twa ipyakidhila.
w01-E 5/15 ep. 30, okat. 5
‘Omasiku getu otaga ka kala omale, ngele otu na owino’
Oshi li oshinakugwanithwa shomuntu kehe pauhandimwe a ninge oonkambadhala, opo i imonene owino. Salomo okwa tsu omuthindo uushili mbuka sho a ti: “Ngoye ngele omunawino, owino yoye otayi ku kwatha; ngele omusheki, nena oto ke shi mona.” (Omayeletumbulo 9:12) Omuntu omunawino oha mono mo uuwanawa mowino ye mwene, naangoka omusheki oha pewa uusama omolwokumona iihuna kwe mwene. Odhoshili kutya ohatu teya shoka twa kuna. Onkee ano ‘gameka okutsi kwoye kowino.’ — Omayeletumbulo 2:2.
Omaliko gomOmbiimbeli
Omanenedhiladhilo okuza membo lyOmayeletumbulo
9:17 — “Omeya ga yakwa” oshike, nomolwashike “omatoye”? Molwaashoka Ombiimbeli otayi yelekanitha okunyanyukilwa omilalo mondjokana nokunwa omeya omatalala ga tekwa momuthima, omeya ga yakwa otagu ulike omilalo dhomeholamo pondje yondjokana. (Omayeletumbulo 5:15-17) Omeya ngoka omatoye molwaashoka mboka taye ga nu otaya dhiladhila kutya itaya ka monika.
21-27 APILILI
OMALIKO OKUZA MOOHAPU DHAKALUNGA OMAYELETUMBULO 10
Ongiini tatu vulu okukala twa nyanyukwa shili?
w01-E 7/15 ep. 25, okat. 1-3
‘Omayambeko ogomuyuuki’
Omuyuuki okwa yambekwa momukalo gumwe gwi ili. “Ngoka ha tonyaleke omaako, oha si oluhepo, ihe iikaha yondjungu ohayi yambapaleke. Omumati omunandunge oha pungula poshikufuthinge, ihe ngoka ha kotha peteyo, oha sitha ohoni.” — Omayeletumbulo 10:4, 5.
Shoka sha simanenena, oohapu dhomukwaniilwa ndhoka a lombwele aanamapya pethimbo lyeteyo. Ethimbo lyeteyo halyo lyoomposi. Ihe ethimbo lyokulonga nuudhiginini ethimbo ele. Onkee otatu vulu okutya olyo ethimbo lyeendelelo.
Natu kaleke momadhiladhilo eteyo lyaantu ndyoka Jesus a li a lombwele aalanduli ye, sho a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, [Jehova Kalunga] a tume aalongi keteyo lye.” (Mateus 9:35-38) Momumvo 2000, aantu omamiliyona 14 oya li pEdhimbuluko lyeso lyaJesus, omwaalu ngoka gu vulithe pomwaalu gwOonzapo dhaJehova lwiikando yi vulithe pu iyali. Onkee ano, olye ta vulu okuludhika kutya “omapya oga thika okuteywa”? (Johannes 4:35) Aakriste yashili ohaya pula Mwene gweteyo a tume aalongi oyendji, omanga taya longo nuudhiginini miilonga yokuuvitha metsokumwe nomagalikano gawo. (Mateus 28:19, 20) Osha yela kutya Jehova ota yambeke oonkambadhala dhawo! Momumvo gwiilonga 2000, omwa li mwa ninginithwa aantu ye vulithe po 280 000. Mbaka nayo wo otaya kambadhala ya ninge aalongi yOohapu dhaKalunga. Natu kale twa nyanyukwa notwa gwanenwa pethimbo ndika lyeteyo, mokukala hatu kutha ombinga miilonga mbika yokuninga aantu aalongwa.
w01-E 9/15 ep. 24, okat. 3-4
Enda “mondjila yaa na iiponga”
Omukwaniilwa Salomo okwa tumbula esimano lyuuyuuki sho a ti: “Eliko lyomuyamba olyo oshilando she sha kola, ihe uuthigona otau mana po oohepele. Shoka omuyuuki ta likola, otashi gandja omwenyo, uuyamba womukeenakalunga otau mu etele egeelo.” — Omayeletumbulo 10:15, 16.
Uuyamba ohawu vulu okukala egameno kiimpwiyu yimwe yonkalamwenyo, ngaashi owala oshilando sha kola hashi kala egameno kaakalimo yasho. Shimwe ishewe, oluhepo otalu vulu oku kala lwa nika oshiponga, uuna pwa holoka ehumokomeho inaali tegelelwa. (Omuuvithi 7:12) Onkee ano, omukwaniilwa omunandunge otashi vulika a li a ta popi kombinga yoshiponga shoka hashi etithwa kuuyamba noluhepo. Omuntu omuyamba otashi vulika a kale a inekela meliko lye unene, nokudhiladhila kutya iinima ye mbyoka yi na ongushu oyi li “ngashika ekuma eleeleka lyaa shi kukondwa.” (Omayeletumbulo 18:11) Omanga ohepele tashi vulika yi dhiladhile kutya kayi na etegameno lyasha. Kungawo, ayehe oya ndopa okwiiningila edhina ewanawa naKalunga.
it-1-E ep. 340
Eyambeko
Jehova ta yambeke aantu. Ombiimbeli otayi ti: “Eyambeko lyOmuwa otali yambapaleke, nuupyakadhi wiilonga itau gwedhele ko sha.” (Omayel 10:22) Jehova oha yambeke mboka a hokwa, mokuya gamena, mokuya wilika, mokuya kwathela ya tompole, nosho wo mokusila oshimpwiyu oompumbwe dhawo, opo ya mone iizemo iiwanawa.
Omaliko gomOmbiimbeli
Eyumuko otali ulike ohole yaKalunga, uunongo neidhidhimiko lye
Kohi yelelo lyUukwaniilwa, aapiya yaKalunga ayehe otaya ka mona kutya oohapu ndhoka dha popiwa mOmayeletumbulo 10:22 odhi li paushili, sho dha ti: “Eyambeko lyOmuwa olyo hali yambapaleke omuntu, [noiha gwedha ko uudhigu washa kulyo, NW].” Kekwatho lyombepo ondjapuki yaJehova, aapiya yaKalunga otaya ka kala lela ye na uupambepo uuwanawa. Ano taya ka kala ya fa Kristus notaye ke endela ko yu uka megwaneneno. (Joh. 13:15-17; Ef. 4:23, 24) Kehe esiku omalutu gawo otaga ka kala ge na uukolele shi vulithe nale notaya ka kala aantu ye li nawa. Onkalamwenyo itayi ka kala tuu yinyanyudha! (Job 33:25) Ihe okutedhatedha kombinga yeyumuko otaku vulu oku ku kwathela ngiini?
28 APILILI–4 MEI
OMALIKO OKUZA MOOHAPU DHAKALUNGA OMAYELETUMBULO 11
Ino shi popya!
w02-E 5/15 ep. 26, okat. 4
Uudhiginini ohawu kwathele aantu ya longe shoka shu uka
Uudhiginini waayuuki nosho wo uuwinayi waakolokoshi ohawu gumu yalwe. Omukwaniilwa gwaIsraeli okwa ti: “Koohapu dhomokana omukeenakonasha ta tula mukwawo moshiponga, ihe kowino omuyuuki ta hupithwa.” (Omayeletumbulo 11:9) Mbela olye ta pataneke kutya okulundila, okuhokola yalwe, okupopya oohapu dha nyata nosho wo oohapu dhaa na oshilonga ohayi yono po yalwe? Mepingathano naashono, oohapu dhomuyuuki odha yela, dha dhiladhilwa nawa nohadhi popiwa nondjaalela. Owino ye ohayi mu gamene, molwaashoka uudhiginini we ohawu mu pe omatompelo ga pumbiwa, opo a ulike kutya aatamaneki ye otaya fundju.
w02-E 5/15 ep. 27, okat. 2-3
Uudhiginini ohawu kwathele aantu ya longe shoka shu uka
Aantu yomondoolopa mboka haya longo shoka sha uka ohaya humitha komeho ombili, uulinawa wa yalwe nohaya tungu yalwe momudhingoloko. Kungawo, ondoolopa ohayi tumbalekwa mehumokomeho lyayo. Ihe mboka haya lundile yalwe, haye ya uvitha nayi, ohaya ningi iinima yapuka mbyoka hayi piyaganeke yamwe, hayi yono po enyanyu, uukumwe nohayi eta uupyakadhi. Shika ohashi ningwa, ngele aantu mboka oyo unene haya nwetha mo yalwe. Ondoolopa ndjoka ihayi kala we yi na elandulathano, hayi kala nuulingilingi, ya yonana pamikalo, nuuhupilo wayo otashi vulika wu kale tawu shongola.
Ekotampango ndyoka li li mOmayeletumbulo 11:11 ota li longo wo no kaapiya yaJehova, oshoka nayo ohaya endathana nayalwe momagongalo gawo ngoka taga faathanithwa nondoolopa. Egongalo ndyoka li na aantu mboka ye na ekwatathano lya kola naJehova, ano mboka haya longo shoka sha uka nohaya mono uuwanawa mokukala aadhiginini, enwethomo lyawo ohali ningitha egongalo li kale lya nyanyukwa, lya mwenyopala, naamboka ye li mo ohaya simanekitha Kalunga. Jehova oha yambeke egongalo ndyoka nohali shi enditha nawa pambepo. Omathimbo gamwe, aashona owala tashi vulika ya ngungutule nokukala inaaya gwanenwa oyo haya mono omapuko, nohaya popi nayi kombinga yomukalo moka iinima hayi ningwa. Aantu mboka oya fa “oshimeno oshilulu” shoka hashi taandelitha uuzigo washo kiimeno iikwawo. (Aahebeli 12:15) Olundji aantu mboka ohaya kala ya hala oonkondopangelo dha gwedhwa po nesimano. Ohaya humitha komeho iifundja kutya opu na okwaanuuyuuki, okatongo, nenge kutya opu na mboka ye holike megongalo nenge maakuluntugongalo. Shoka haya popi ohashi vulu lela okweetitha etopoko megongalo. Mbela inatu pumbwa okuyanda okupulakena komapopyo gawo nokulalakanena okukala tu na ekwatathano lya kola naJehova ndyoka hali gwedha ko kombili nokuukumwe megongalo?
Ethimbo lini lyo opala okupopya?
Oho ningi po shike, uuna omumwatate nenge omumwameme e shi uuyelele mboka wu li oshiholekwa? Pashiholelwa, ngele owa tsakanene nagumwe ngoka ha zi moshilongo moka iilonga yetu yi indikwa, mbela oho kala wa hala e ku lombwele nkene aamwatate naamwameme haya uvitha moshilongo moka? Odhoshili kutya einyengotompelo lyoye ewanawa. Otu hole ooitaali ooyakwetu nohatu kala twa hala okutseya monkalo moka ye li. Otwa hala wo tu kale hatu ya tumbula kondandalunde, uuna tatu galikana. Nonando ongawo, ndika olyo ethimbo twa pumbwa “okuhila omiya dhoshitomo” shetu shopathaneko nokukala twa mwena. Ngele otwa thiminike omuntu ngoka e shi uuyelele mboka wu li oshiholekwa, kungawo otatu ulike kutya katu mu hole, mwa kwatelwa aamwatate naamwameme mboka ye mu inekela kutya ote ke shi mwenena. Odhoshili kutya kapu na gumwe gwomutse a hala okugwedha ko komaupyakadhi gaamwatate naamwameme mboka ye li miilongo moka iilonga yetu yi indikwa. Sha faathana, kapu na omumwatate nenge omumwameme miilongo moka, ta ka kala a hala okugandja uuyelele kombinga yankene haya uvitha nenge haya ningi omaipyakidhilo gawo gopaKriste.
Osha simanenena unene tuu aakuluntugongalo ya vulike kekotampango lyopaMbiimbeli ndyoka li li mOmayeletumbulo 11:13, mokukala itaaya popi iiholekwa. (Lesha.) Shoka ohashi vulu okukala eshongo, unene tuu ngele omukuluntugongalo okwa hokana. Aaihokani ohaya kaleke ekwatathano lyawo lya kola, mokukala haya popi pandjigilile, mokulombwelathana iiholekwa yawo, nkene ye uvite nosho wo iimpwiyu mbyoka ye na. Ihe omukuluntugongalo oku shi kutya ke na okulombwela omukadhi “iiholekwa” yaakwanegongalo. Ngele okwe shi ningi, itaya ka kala we ye mu inekela nota ka nyatekitha edhina lye. Mboka ye na iinakugwanithwa megongalo, kaye na okupopya “iifundja.” (1 Tim. 3:8) Shoka osha hala okutya, itaya vulu okukotokela yalwe nenge oku ya hokola. Ngele omukuluntugongalo oku hole shili omukadhi, ite ke mu lombwela uuyelele mboka inaa pumbwa okuuva.
Omaliko gomOmbiimbeli
Olukeno — uukwatya mboka hawu ulikwa moohapu nomiilonga
Ombiimbeli otayi ti: “Omulumentu omunamikalo ota kala nawa.” (Omayel. 11:17) Aantu oye hole okukala nomuntu ngoka e na olukeno, nohashi ya inyengitha wo ye mu ulukile olukeno. Jesus okwa ti: ‘Oshiyelekitho shoka tamu shi yelekitha yakweni, osho wo nayo taye ke mu yelekitha.’ (Luk. 6:38, yelekanitha OB-1954.) Onkene, omuntu ngoka e na olukeno, oha mono nuupu ookuume ye li nawa noku ya kaleka po.
Omuyapostoli Paulus okwa li a ladhipike aantu yomegongalo lyomuEfeso a ti: “Kalathaneni mu na uukuume nolukeno. Silathaneni ohenda nokudhiminathana po oondjo.” (Ef. 4:32) Egongalo ohali mono uuwanawa lela, ngele oli na Aakriste ye na ondjaalela, mboka haya ulukile yalwe olukeno nohaya kwathelathana. Aakriste ya tya ngawo ihaya dhiladhila ya popye oohapu oonkukutu, ihaya gandja uusama unene nenge ya sheke yalwe. Pehala lyokutaandelitha oluhoko, ohaya kambadhala ya longithe elaka lyawo ya kwathele yalwe. (Omayel. 12:18) Oshizemo? Egongalo ohali kala lya kola nohali longele Jehova nenyanyu.
Eeno, olukeno uukwatya mboka hawu ulikwa moohapu nomiilonga. Ngele otu na olukeno, otatu ulike uukwatya uuwanawa waKalunga ketu, Jehova. (Ef. 5:1) Ngele otu na uukwatya mboka otatu koleke egongalo notatu ka nanena yalwe kelongelokalunga lyashili. Onkee ano, natu kale aluhe tu shiwikile uukwatya wolukeno.