Nkene egongalo lyopaKriste lyu unganekwa

Jehova oKalunga kelandulathano. (1 Aakorinto 14:33) Onkee tu li oshigwana she, otu na okukala tu na elandulathano. Egongalo lyopaKriste olya unganekwa ngiini? Ongiini tatu vulu oku li ambidhidha, opo li shi endithe nawa?

1. Olye omutse gwegongalo?

“Kristus oye omutse gwegongalo.” (Aaefeso 5:23, OB-1954) Jesus ota wilike iilonga yoshigwana shaJehova muuyuni awuhe, okuza megulu. Okwa langeka po “omumati omwiinekelwa nomunandunge,” nenge tu tye, omupiya omudhiginini nomunandunge, ano okangundu okashona kaakuluntugongalo, hoka haki ithanwa wo Olutuwiliki. (Lesha Mateus 24:45-47.) Ngaashi aayapostoli naakuluntu yomuJerusalem yomethelemumvo lyotango, Olutuwiliki ohalu gandja omalombwelo kegongalo lyopaKriste muuyuni awuhe. (Iilonga 15:2) Ihe aalumentu mboka hayo aawiliki yehangano lyetu. Ohaya kongo ewiliko kuJehova nomOohapu dhe, nohaya vulika kewiliko lyaJesus.

2. Aakuluntugongalo oyo oolye nohaya ningi shike?

Aakuluntugongalo aalumentu Aakriste mboka ya kala aadhiginini omimvo odhindji. Ohaya longo oshigwana shaJehova okuza mOmbiimbeli nohaye shi kwathele noku shi tsa omukumo. Ihaya futwa omolwoshilonga shawo shoka. Pehala lyaashono, ohaya longo ‘nehalo ewanawa, hakethiminiko, ihaya longo nelalakano lyokukonga eliko, ihe onehalo tali zi momwenyo.’ (1 Petrus 5:1, 2) Aakuluntugongalo ohaya kwathelwa kaayakuligongalo, mboka nayo mokweendela ko kwethimbo haya ka ninga aakuluntugongalo.

Olutuwiliki ohalu langeke po aakuluntugongalo yamwe ya ninge aatonatelishikandjo. Ohaya talele po omagongalo gi ili nogi ili, ye ga pe omalombwelo noye ga tse omukumo. Aatonatelishikandjo ohaya langeke po aakuluntugongalo naayakuligongalo, mboka ya gwanitha po iitegelelwa yopamanyolo. — 1 Timoteus 3:1-10, 12; Titus 1:5-9.

3. Onzapo yaJehova kehe oyi na oshinakugwanithwa shashike?

Ayehe megongalo “ohaya hambelele edhina lyOmuwa” mokukutha ombinga mokugongala kehe kwegongalo nomiilonga yokuuvitha, shi ikolelela koonkalo dhawo. — Lesha Episalomi 148:12, 13.

ILONGA OSHINDJI

4. Jesus omuwiliki omunahenda

Jesus ote tu hiya momukalo gwombili. Lesha Mateus 11:28-30, e tamu kundathana epulo tali landula:

• Jesus okwa hala tu kale tu uvitile ngiini ewiliko lye?

OKAVIDIO: Aakuluntugongalo taya kwathele pethimbo lyekakamo lyevi moNepal (4:56)

Ombiimbeli otayi shi popi sha yela nkene aakuluntugongalo ye na okulonga iilonga yawo.

Lesha Jesaja 32:2 nosho wo 1 Petrus 5:1-3, e tamu kundathana omapulo taga landula:

• Ohashi ku uvitha ngiini okutseya kutya ngaashi Jesus, aakuluntugongalo nayo ohaya kambadhala okutalaleka yalwe?

• Omomikalo dhimwe dhini aakuluntugongalo haya holele Jesus?

5. Aakuluntugongalo ohaya longo yalwe okupitila moshiholelwa shawo

OKAVIDIO: Aakuluntugongalo kwateleni komeho! (7:39)

Jesus okwa pa mboka haya kwatele komeho megongalo omalombwelo ngoka ye na okulandula. Lesha Mateus 23:8-12, e tamu kundathana epulo tali landula:

• Ngele tashi ya pokutula miilonga shoka Ombiimbeli tayi ti, eyooloko lini wa mona pokati kaakuluntugongalo naawiliki yomalongelokalunga galwe?

1. Aakuluntugongalo ohaya kaleke ekwatathano lyawo naJehova lya kola nohaya kwathele wo aanegumbo yawo ya ninge sha faathana

2. Aakuluntugongalo ohaya sile oshimpwiyu aantu ayehe megongalo

3. Aakuluntugongalo ohaya kutha ombinga miilonga yokuuvitha pandjigilile

4. Aakuluntugongalo ohaya longo aantu Ombiimbeli nohaya kwathele wo mokwoopaleka nomiilonga yilwe

6. Otatu vulu okulongela kumwe naakuluntugongalo

Ombiimbeli otayi tu pe etompelo lya simana kutya omolwashike tu na okulongela kumwe naakuluntugongalo. Lesha Aahebeli 13:17, e tamu kundathana omapulo taga landula:

• Oshi li ngaa pandunge sho Ombiimbeli tayi tu ladhipike tu vulike kwaamboka taya kwatele komeho? Omolwashike to tile ngawo?

Lesha Lukas 16:10, e tamu kundathana epulo tali landula:

• Omolwashike sha simana tu kale hatu vulika kaakuluntugongalo nomiinima mbyoka tu wete inaayi simana lela?

OWI ILONGO SHIKE?

Jesus oye omutse gwegongalo lyopaKriste. Ohatu vulika nehalo ewanawa kaakuluntugongalo, oshoka ohaya longo taya wilikwa kuJesus. Ohaye tu talaleke nohaye tu tulile po oshiholelwa oshiwanawa, shoka tu na okulandula.

Omapulo geendululo

• Olye omutse gwegongalo lyopaKriste?

• Aakuluntugongalo ohaya kwathele ngiini egongalo?

• Oshilonga shomulongeli gwaJehova kehe oshini?

UUYELELE WA GWEDHWA PO

Tala shoka tashi ulike kutya Olutuwiliki naakuluntugongalo oye na ko nasha lela nAakriste kunena.

Taya tsu aamwatate omukumo pethimbo iilonga yetu ya li yi indikwa (4:22)

Mona uuyelele kombinga yiilonga yaatonatelishikandjo.

Onkalamwenyo yomutonatelishikandjo ta longele koshitopolwa shokuushayi (4:51)

Lesha kombinga yonkandangala ndjoka aakiintu taya dhana megongalo.

“Mbela mOonzapo dhaJehova omu na aauvithi aakiintu?” (Oshungolangelo, 1 Septemba 2012)

Tala nkene aakuluntugongalo haya longo nuudhiginini ya tse omukumo ooitaali ooyakwawo.

“Aakuluntugongalo Aakriste ‘ohaya longo pamwe natse omolwenyanyu lyetu’” (Oshungolangelo, 15 Januali 2013)