Ovayuki otava ka tanga Kalunga fiyo alushe
‘Okudimbulukiwa kwomuyuki otaku kala alushe. Ouyuki waye otau kala po alushe.’ — EPS. 112:6, 9.
1. (a) Ovanhu aveshe ovo Kalunga a tala ko kutya ovayuki ova teelela onakwiiwa itunhula ilipi? (b) Epulo lilipi la holoka po?
OVANHU aveshe ovo Kalunga a tala ko kutya ovayuki otava ka kala ve na onakwiiwa ikumwifi. Otava ka hafela okulihonga shihapu kombinga yomaukwatya mawa aJehova fiyo alushe. Omitima davo otadi ka xunga omahambelelo eshi tave ke lihonga shihapu kombinga yeshito laKalunga. Shimwe shomoiteelelwa ya fimana yaavo tava ka hafela onakwiiwa ikumwifi osho “ouyuki,” oo wa divilikwa mEpsalme 112. Ndele mbela ongahelipi Jehova Kalunga oo e li omuyapuki nomuyuki, ta dulu okutala ko ovanhu ovalunde ve li ovayuki? Omafimbo amwe ohatu ningi nokuli omapuko a kwata moiti, kashi na nee mbudi kutya ohatu kendabala shi fike peni okulonga osho sha yuka. — Rom. 3:23; Jak. 3:2.
2. Ohole yaJehova oya li ye mu linyengifa a longe oikumwifilonga yopavali ilipi?
2 Jehova okwa ninga po omalongekido opahole opo ovanhu ovalunde va dule okutalwa ko ve li ovayuki. Mbela osho okwe shi ninga ngahelipi? Tete, Jehova okwa li a longa oshikumwifilonga eshi a lundululila omwenyo wOmona waye omuholike moshidalelo shokakadona Maria opo Jesus a dalwe e li omunhu a wanenena. (Luk. 1:30-35) Ndele konima eshi Jesus a dipawa kovatondi vaye, Jehova okwa li a longa natango oshikumwifilonga shimwe, a nyumuna Jesus koufi e li oshishitwa shopamhepo sha tumbala. — 1 Pet. 3:18.
3. Omolwashike Kalunga a li a pa Omona waye ondjabi yomwenyo womeulu?
3 Jehova okwa li a pa Omona waye ondjabi yomwenyo itau nyonwa po meulu, oo a li ehe na fimbo ina dalwa e li omunhu wokombada yedu. (Heb. 7:15-17, 28) Jehova okwa li a pa Jesus ondjabi, molwaashi okwa li a kanyatela filufilu oudiinini waye koshi yomayeleko manene. Kungaho, Jesus okwa li a nyaneka pomutenya elundilo laSatana olo kutya ovanhu ohava longele Kalunga omolwomatomheno okulihola mwene ndele hamolwaashi ve mu hole shili. — Omayel. 27:11.
4. (a) Jesus okwe tu ningila shike eshi a li a shuna meulu, na Jehova okwa li e linyenga ngahelipi kwaasho? (b) Ou udite ngahelipi kombinga yaasho Jehova naJesus ve ku ningila?
4 Jesus okwa li natango a ninga shihapu eshi a shuna meulu. Okwa li a ‘holoka koshipala shaKalunga molwetu,’ nongushu ‘yohonde yaye.’ Tate yetu womeulu omunahole okwa li a tambula ko nehafo eyambo laJesus li na ondilo li li “ekulilo lomatimba etu.” Nokungaho, ohatu dulu “okulongela Kalunga omunamwenyo” oilonga iyapuki, tu na ‘eliudo la koshoka.’ Osho otashi tu pe etomheno tu twe kumwe neendjovo dopehovelo lEpsalme 112, odo tadi ti: “Halleluya!” — Heb. 9:12-14, 24; 1 Joh. 2:2.
5. (a) Otu na okuninga po shike opo tu kale twa hokiwa kuKalunga? (b) Epsalme 111 nosho yo Epsalme 112 okwa unganekwa ngahelipi?
5 Opo tu kale twa hokiwa kuKalunga, otu na okukala tu na eitavelo tali longo mohonde yaJesus ya tika. Inatu efa pa pite nande efiku limwe inatu pandula Jehova, molwaashi oku tu hole neenghono. (Joh. 3:16) Otwa pumbwa yo okukala hatu konakona Eendjovo daKalunga nokuninga eenghendabala ngaashi hatu dulu tu kale metwokumwe nado. Epsalme 112 otali yandje omayele mawa kwaaveshe ovo va hala okukala ve na eliudo la koshoka koshipala shaKalunga. Omapsalme oo avali okwa unganekwa momushingo wa faafana. Omapsalme oo okwa hovela neingido “Halleluya!” Melaka lopehovelo, konima youtumbulilo oo Halleluya!, omukweyo keshe owa li wa tetekelwa kondada yoalfabeta yOshiheberi.a
Osho tashi dulu oku tu etela ehafo
6. Ongahelipi “omulumenhu” omutilikalunga oo a hokololwa mEpsalme 112 a nangekwa noupuna?
6 ‘Omulumenhu omunelao oye ou ha tila Omwene, ndele ta hokwa shili oipango yaye. Ovana vaye otava ka kala ovanaenghono moshilongo; oludi lovayuki otali ka punikwa.’ (Eps. 112:1, 2) Didilika kutya omupsalme oo okwa tumbula tete “omulumenhu” umwe pauhandimwe, ndele moshitukulwa shaxuuninwa shovelishe 2 okwa tumbula ‘ovayuki.’ Ovelishe oyo otai ulike kutya Epsalme 112 otali dulu yo okuyukifwa kovanhu ve li ongundu. Shihokwifa, omuyapostoli Paulus okwa li a nwefwa mo a shange shi na sha nOvakriste vomefelemudo lotete, a tofa mEpsalme 112:9. (Lesha 2 Ovakorinto 9:8, 9.) Epsalme 112 ola holola nawa nghee ovashikuli vaKristus vokombada yedu tava dulu okukala va hafa.
7. Omolwashike ovapiya vaKalunga va pumbwa okukala ve na etilofimaneko la yuka loku mu tila, nohava tale ko ngahelipi oipango yaye?
7 Ngaashi sha ulikwa mEpsalme 112:1, Ovakriste vashili ova hafa neenghono molwaashi ohava “tila Omwene.” Etilofimaneko la yuka la tya ngaho lokutila okunyemateka Kalunga ohali kwafele Ovakriste va kondjife omhepo younyuni waSatana. Ohava “hokwa shili” okukonakona Eendjovo daKalunga nokudulika koipango yaye. Ohava dulika yo koshipango shi na sha nokuudifa onghundana iwa yOuhamba mounyuni aushe. Ovakriste ohava ningi eenghendabala okuninga ovanhu vomoiwana aishe ovahongwa nohava londwele ovakolokoshi shi na sha nefiku laKalunga letokolo olo li li pokuuya. — Hes. 3:17, 18; Mat. 28:19, 20.
8. (a) Ovapiya vaKalunga ovo ve mu liyandjela ova nangekwa noupuna ngahelipi omolwouladi wavo kunena? (b) Ovo ve na eteelelo loku ka kala nomwenyo kombada yedu otava ka mona omanangeko noupuna elipi monakwiiwa?
8 Molwaashi ovapiya vaKalunga ohava dulika koipango ya tya ngaho, omuvalu wavo kunena ou fike pomamiliyona aheyali lwaapo mounyuni aushe. Kape na oo ta dulu okupatana kutya oshiwana shaKalunga osha ninga “ovanaenghono moshilongo.” (Joh. 10:16; Eh. 7:9, 14) Oshiwana shaKalunga otashi ka “punikwa” natango eshi Kalunga ta ka wanifa po omalalakano aye. Ovo ve na eteelelo loku ka kala nomwenyo kombada yedu otava ka xupifwa ve li ongudu ‘poudjuu munene, NW’ oo u li pokuuya notava ka ninga oshitukulwa ‘shedu lipe’ “omo tamu ka kala ouyuki.” Mokweendela ko kwefimbo, ovaxupipo puHarmagedon otava “ka punikwa” neenghono. Otava ka kala ve lilongekidila okuhambelela ovanhu omamiliyona ovo tava ka nyumunwa. Olo kali fi tuu etimaumbwile likumwifi! Hauxuuninwa, ovo va “hokwa shili” oipango yaKalunga otava ka fika mewaneneno notava ka hafela fiyo alushe ‘emanguluko loshinge shovana vaKalunga.’ — 2 Pet. 3:13; Rom. 8:21.
Otwa pumbwa okulongifa omaliko etu pandunge
9, 10. Ovakriste vashili ohava longifa ngahelipi oupuna wavo wopamhepo, nongahelipi ouyuki wavo tau kalelele?
9 ‘Meumbo laye omu yadi oinima noupuna, nouyuki waye otau kalelele. Ovayuki ote va [minikile, NW] ngaashi ouyelele momulaulu, omunalukeno nomunanghenda nomuyuki.’ (Eps. 112:3, 4) Pefimbo lOmbibeli, ovapiya vaKalunga vamwe ova li va shiivika nawa molwaashi ova li oipuna. Ndele ovo Kalunga a li a hokwa ova li va ninga oipuna shili, nonande kava li oipuna meityo loinima yopamaliko. Ngaashi ashike ovanhu vopefimbo laJesus, oshoshili kutya ovanhu ovo va hoolola okukala ovapiya vaKalunga kunena otashi dulika va kale va hepa painiwe nova dinika. (Luk. 4:18; 7:22; Joh. 7:49) Ndele nande otu kale oipuna ile eehepele, atushe ohatu dulu okukala twa punapala pamhepo. — Mat. 6:20; 1 Tim. 6:18, 19; lesha Jakob 2:5.
10 Ovakriste ovavaekwa nosho yo oovakwao veedi dimwe, ihava ngungunine oupuna wavo wopamhepo. Ponhele yaasho, ohava “minikile” momilaulu dounyuni waSatana ve li ngaashi ‘ouyelele kovayuki.’ Osho ohave shi ningi ngeenge tava kwafele vamwe va mone ouwa momamona opamhepo oo taa yandje ounongo neshiivo lokushiiva Kalunga. Ovapataneki ova ninga eenghendabala okukangheka oilonga yavo yokuudifa Ouhamba ndele inava pondola. Oshiimati shoilonga yOvakriste youyuki otashi “kalelele.” Ngeenge ovapiya vaKalunga ova diinine ouyuki wavo ngeenge tava yelekwa, otava dulu okukala noushili kutya otava ka kala nomwenyo fiyo alushe, sha hala okutya, tava “kalelele.”
11, 12. Ovapiya vaKalunga ohava longifa oiniwe yavo meenghedi dilipi?
11 Oshiwana shaKalunga, ovavaekwa nosho yo “ongudu inene,” ohava yandje oiniwe yavo nehalo liwa. Epsalme 112:9 ola ti: ‘Ota yandje neke la kamutuluka, neehepele ohe di pe oshali.’ Kunena, Ovakriste vashili luhapu ohava yambidida ovaitaveli vakwao painiwe nohava kwafele yo ovashiinda ovo ve na omhumbwe. Ohava longifa yo oiniwe yavo opo va kwafele shi na sha noikonga yoikwafa ngeenge pa holoka oiponga yopaushitwe. Okuyandja ohaku va etele ehafo, ngaashi ashike Jesus a li a popya. — Lesha Oilonga 20:35; 2 Ovakorinto 9:7.
12 Kakele kaasho, diladila kutya ohaku longifwa oimaliwa i fike peni opo ku nyanyangidwe Oshungonangelo momalaka 172, novapopi vahapu vomalaka oo ova hepa neenghono. Didilika yo kutya oshifo eshi ohashi nyanyangidwa momalaka okuudika e lili noku lili nosho yo meendada doshipofi.
Omulumenhu omunalukeno nomuyuki
13. Oolyelye va tula po oshihopaenenwa sha denga mbada shokuyandja nolukeno, nongahelipi hatu dulu oku va hopaenena?
13 ‘Ou ha file onghenda ndee ta yandje nokuhateelela sha, oye omukalinawa.’ (Eps. 112:5) Nopehe na omalimbililo, otashi dulika wa didilika kutya ovanhu vamwe ovo hava kwafele vakwao haalushe hava kala ve na olukeno. Ovanhu vamwe ohava kwafele vakwao nelalakano lokuulika kutya ove na oiniwe ihapu ile tave shi ningi ndele hanehalo liwa. Ihashi kala shiwa okukwafelwa komunhu oo te ku ningifa u kale u udite kutya kufi sha ile u kale u udite kutya ou li omutengi kuye. Mepingafano naasho, ohashi kala shihafifa neenghono okukwafelwa komunhu oo e na olukeno. Jehova oo ha yandje nehafo, okwe tu tulila po oshihopaenenwa sha denga mbada sholukeno. (1 Tim. 1:11; Jak. 1:5, 17) Jesus Kristus okwa li a hopaenena Xe filufilu mokuulika olukeno. (Mark. 1:40-42) Onghee hano, ngeenge otwa hala okutalika ko kuKalunga tu li ovayuki, otu na okukala hatu yandje nehafo notu na olukeno, unene tuu ngeenge hatu kwafele ovanhu ve lihonge kombinga yaye.
14. Omeenghedi dimwe dilipi hatu dulu okuulika kutya ohatu ‘diinine oinima pauyuki’?
14 ‘Oha diinine oinima yaye pauyuki.’ (Eps. 112:5) Ngaashi sha xunganekwa, elenga leumbo lidiinini ohali pashukile oinima yOmwene walo, tali longo metwokumwe nouyuki waJehova. (Lesha Lukas 12:42-44.) Ouyuki wongudu yomupiya ohau limonikila mewiliko lopamishangwa olo hai yandje kovakulunhuongalo, ovo omafimbo amwe hava ungaunga nomanyono a kwata moiti meongalo lopaKriste. Ouyuki wayo ohau limonikila yo mewiliko lopamishangwa olo hai yandje komaongalo aeshe, komaumbo aBetel nosho yo ovatumwa li na sha nanghee e na okulonga. Ovakriste aveshe mwa kwatelwa ovakulunhuongalo, ove na okukala hava ungaunga pauyuki novanhu aveshe moinima aishe, mwa kwatelwa oinima yopangeshefa. — Lesha Mika 6:8, 11.
Ovayuki otava ka nangekwa noupuna
15, 16. (a) Eenghundana dii domounyuni ohadi kumu ngahelipi ovayuki? (b) Ovapiya vaKalunga ova tokola toko okutwikila okuninga shike?
15 ‘Shaashi ye iha tengauka nande; okudimbulukuwa kwomuyuki otaku kala alushe. Omalwaambo mai ye ite a tila; omutima waye itau mbadapala, we lineekela Omwene. Omutima waye owa dja oumbada, ye ita tila nande osha, fiyo ota tale ovatondi vaye.’ (Eps. 112:6-8, yelekanifa OB-1986.) Inapa kundanekwa nande onale oinima ii mondjokonona yovanhu ngaashi oita, oukulo, omikifi dipe naadi dikulu, ominyonena, oluhepo nenyateko lomudingonoko la nyika oshiponga. Ovanhu ovo Kalunga a tala ko kutya ovayuki navo ohava kumwa keenghundana odo dii, ndele nande ongaho, eenghundana da tya ngaho ihadi va mbadameke. Omitima davo ihadi “mbadapala” noda “dja oumbada” molwaashi ova taalela onakwiiwa nelineekelo ve shii kutya ounyuni mupe waKalunga wouyuki ou li popepi. Ngeenge opa holoka oiponga yopaushitwe, ovayuki ohava dulu okulididimikila eenghalo da tya ngaho kekwafo laJehova. Jehova iha efa nande ovayuki vaye va ‘tengauke,’ ndele ohe va kwafele nohe va pe eenghono opo va dule okulididimika. — Fil. 4:13.
16 Ovayuki ohave lididimikile yo outondwe nomitotolombo odo hadi tandavelifwa kovapataneki vavo, ndele oinima ya tya ngaho kai na efiku i ye moshipala oilonga yavo yokuudifa. Ponhele yaasho, ovapiya vaKalunga otava twikile okuwanifa po oilonga oyo va pewa kuJehova nouladi nopehe na okutengauka, oilonga yokuudifa onghundana iwa yOuhamba nokuninga ovanhu ovo tave linyenge nawa ketumwalaka ovahongwa. Nopehe na omalimbililo, ovayuki otava ka patanekwa neenghono eshi exulilo tali ehene popepi. Outondwe wa tya ngaho otau ka hapupala neenghono eshi Satana Ondiaboli, oo e li Gog yaMagog, ta ka ponokela ovayuki mounyuni aushe. Opo nee, hauxuuninwa ohatu ka ‘tala eshi ovatondi vetu’ tava hanaunwa po fiyo alushe. Itashi ka kala tuu shihafifa okumona nghee edina laJehova tali ka yapulifwa filufilu! — Hes. 38:18, 22, 23.
Omuyuki ota ka ‘tumbalekwa pombada’
17. Ongahelipi ovayuki tava ka ‘tumbalekwa pombada’?
17 Itatu ka kala tuu twa hafa eshi hatu ka tanga Jehova twa hangana, nopehe na omapataneko okudja kOndiaboli nosho yo kounyuni wayo! Aveshe ovo va hokiwa kuKalunga otava ka hafela oku mu tanga fiyo alushe. Itava ka fifwa ohoni, molwaashi Jehova okwa udaneka kutya “oluvinga” lovayuki vaye otali ka “yeluka pombada la tumbalekwa.” (Eps. 112:9) Ovayuki otava ka tumbalekwa eshi Jehova ta ka finda aveshe ovo itava yambidida ounamapangelo waye.
18. Eendjovo dEpsalme 112 dopexulilo otadi ka wanifwa ngahelipi?
18 ‘Omulunde ote shi mono, ndele tashi mu twifa ondubo; ota kwesha omayoo ndele ta xulu po; omahalelo ovadinikalunga ihaa wanifwa, taa kala ngaho.’ (Eps. 112:10) Aveshe ovo tava twikile okupataneka oshiwana shaKalunga otava ka ‘xulifwa po’ mafiku, molwaashi ove na ondubo noutondwe. Ehalo lavo lokukala va hala okumona oilonga yetu ya xula po otali ka xulifwa po pamwe navo ‘poudjuu munene’ oo u li pokuuya. — Mat. 24:21.
19. Ohatu dulu okukala tu na elineekelo lashike?
19 Mbela oto ka kala umwe womwaavo tava ka xupa puHarmagedon? Ngeenge owa fi komukifi ile koukulupe fimbo ounyuni waSatana inau xulifwa po, mbela oto ka kala mokati ‘kovayuki’ ovo tava ka nyumunwa? (Oil. 24:15) Enyamukulo komapulo oo otali ka kala heeno ngeenge owa twikile okukala u na eitavelo tali longo mekuliloyambo laJesus nokuhopaenena Jehova, ngaashi ovo tava fanekwa ‘komulumenhu’ omuyuki oo a hokololwa mEpsalme 112. (Lesha Ovaefeso 5:1, 2.) Jehova ota ka shilipaleka kutya “okudimbulukiwa” kwovayuki noilonga yavo youyuki itai ka dimbuwa. Otava ka dimbulukiwa notava ka kala va hokiwa kuJehova fiyo alushe. — Eps. 112:3, 6, 9.
[Eshangelo lopedu]
a Oushili oo kutya omapsalme oo avali okwa unganekwa momushingo wa faafana ou liwetikile momutungilo nomoshikalimo shao. Ngeenge owa yelekanifa Epsalme 111:3, 4 nEpsalme 112: 3, 4, oto ka mona kutya omaukwatya aKalunga oo a divilikwa mEpsalme 111 okwa endululwa ‘komulumenhu’ omutilikalunga mEpsalme 112.
Omapulo okudilonga
• Omatomheno amwe elipi tu na okwiingida hatu ti “Halleluya!”?
• Oiningwanima yokunena ilipi tai hafifa Ovakriste vashili?
• Jehova oha hokwa omunhu oo ha yandje ngahelipi?
[Efano pepandja 25]
Opo tu kale twa hokiwa kuKalunga, otu na okukala tu na eitavelo tali longo mohonde yaJesus ya tika
[Efano pepandja 26]
Omayambidido ehalo liwa ohaa yambidida oilonga yokuyandja oikwafa nosho yo okunyanyangidwa kwoishangomwa yopaMbibeli