Kambadhala okwiilonga iinima iipe uuna to konakona

Sho tatu ilongekidha tu konakone, otashi vulika tu ipule ngeyi: ‘Onda hala okwiilonga kombinga yashike?’ Ihe nonando ongawo, ohatu ningi ngaashi tatu vulu kaatu ethe omangambeko getu kaa ge tu ningithe tu pilamene shoka Jehova te tu lombwele tu ninge. Ongiini tatu vulu okwiilonga iinima iipe, uuna tatu konakona?

Galikana wu pewe owino. Pula Jehova e ku kwathele wu uve ko shoka a hala wu ilonge pethimbo ndyoka. (Jak. 1:5) Yanda okwiinekela mwaashoka wu shi nale. — Omayel. 3:5, 6.

Etha oohapu dhaKalunga dhi longe monkalamwenyo yoye. “Oohapu dhaKalunga odhi na omwenyo.” (Heb. 4:12) “Oohapu” dhaKalunga dhi na omwenyo otadhi vulu oku tu nwethamo momikalo dha yoolokathana, ethimbo kehe tatu lesha Ombiimbeli, ihe shoka otashi vulika owala ngele otwa zimine kutya otwa pumbwa okwiilonga shoka Kalunga te tu longo.

Pandula ashihe shoka Jehova ha longitha opo e tu longe. Iikulya yopambepo mbyoka hatu pewa kuJehova oya fa “oshituthi shoontumba.” (Jes. 25:6) Ino henuka okulesha iitopolwa mbyoka wu wete itoo ka nyanyukilwa,oshoka oto ka mona mo uuwanawa na oto ka pitika Kalunga e ku kwathele wu kale omuntu e li nawa noto ka nyanyukilwa wo okukonakona Oohapu dhe.