Kala wu shi kutya Jehova ote ku dhimine po

1-2. Aayoni mboka yi iyela ombedhi ohaya kala yu uvite ngiini, uuna Jehova a dhima po omayono gawo? (Tala wo ethano .)

OMUKWANIILWA David okwa li e shi nkene omuntu ha kala e uvite ondjo omolwomapuko ge gomonakuziwa. (Eps. 40:12; 51:3; enyolo lyopombanda) Okwa li a ningi omapuko ga kwata miiti monkalamwenyo ye. Nonando ongawo, okwi iyele ombedhi omolwomapuko ge, na Jehova okwa li e mu dhimine po. (2 Sam. 12:13) Oshizemo, David okwa li a nyanyukwa sho a mono kutya Jehova okwe mu dhimina po. — Eps. 32:1.

² Ngaashi David, natse otatu vulu okukala twa nyanyukwa uuna twa mono kutya Jehova okwe tu ulukila ohenda nokwe tu dhimina po omayono getu. Itashi hekeleke tuu okutseya kutya Jehova okwa hala okudhima po omayono getu, nokuli naangoka ga kwata miiti, ngele otwi iyela shili ombedhi, twa hempulula omayono getu nokuninga ngaashi tatu vulu kaatu ga endulule we? (Omayel. 28:13; Iil. 26:20; 1 Joh. 1:9) Itashi tu mbilipaleke tuu okutseya kutya ohe tu dhimine po thiluthilu nohatu kala twa fa inaatu yona nando osha! — Hes. 33:16.

3-4. Omumwameme gumwe okwa li e uvite ngiini konima sho a ninginithwa, noshike tatu ka kundathana moshitopolwa shika?

³ Omathimbo gamwe, yamwe otashi vulika ya mone oshidhigu oku shi taamba ko kutya Jehova okwe ya dhimina po. Natu taleni koshimoniwa shomumwameme Jennifer, ngoka a putudhilwa moshili. Sho e na omimvo omulongo nasha, okwa li e na eihumbato lya nyata nokwa li e na onkalamwenyo yopaali. Ihe konima yomimvo dhontumba, okwa ningi omalunduluko nokwi iyapulile Jehova, e ta ninginithwa. Okwa ti: “Monakuziwa, onda li handi kutha ombinga momilalo dha nyata, handi nu sha pitilila, omugeyentu, nonda li nda pititha komeho omaliko monkalamwenyo yandje. Onda li ndi shi kutya Ombiimbeli otayi ti kutya pakankameno lyekuliloyambo lyaJesus, Jehova ota vulu okudhima po omayono getu. Ihe nonando onda li ndi iyela ombedhi nokupula Jehova a dhimine ndje po, kanda li nda tompwa kutya onda dhiminwa po.”

⁴ Mbela omathimbo gamwe oho shi mono oshidhigu okukala wa tompwa kutya Jehova okwa dhima po omayono goye gomonakuziwa? Ngaashi owala David a li a nyanyukwa sho Jehova e mu dhimina po, Jehova naye okwa hala wu kale wa nyanyukwa uuna e ku dhimine po omolwohenda ye. Moshitopolwa shika, otatu ka kundathana kutya omolwashike twa pumbwa okutaamba ko edhiminopo lyaJehova nosho wo kutya oshike tashi ke tu kwathela tu ninge ngaaka.

OMOLWASHIKE TWA PUMBWA OKUTAAMBA KO EDHIMINOPO LYAJEHOVA?

5. Satana okwa hala tu itaale shike? Gandja oshiholelwa.

⁵ Okutaamba ko edhiminopo lyaJehova, otaku vulu oku tu kwathela tu yande okugwila moomwigo dhaSatana. Dhimbulukwa kutya Satana ota ka ninga kehe shimwe ta vulu, e tu ningithe tu ethe po okulongela Jehova. Opo a adhe elalakano lye, Satana otashi vulika e tu ningithe tu itaale kutya omayono getu itaga vulu okudhimwa po. Natu ka taleni koshimoniwa shomulumentu gumwe gwomuKorinto, ngoka a li a kuthwa mo megongalo omolwokukutha ombinga momilalo dha nyata. (1 Kor. 5:1, 5, 13) Lwanima sho i iyele ombedhi, Satana okwa li a hala mboka yomegongalo kaaye mu dhimine po nokaaye mu taambe ko ishewe. Shimwe ishewe, Satana okwa li a hala omulumentu ngoka i iyela ombedhi a kale e uvite itaa vulu okudhiminwa po, nokukala “a gwililwa po unene koluhodhi,” shoka tashi ke mu ningitha a ethe po okulongela Jehova. Satana ina lundulula elalakano lye nenge omakoto ge. Ihe tse “omakoto ge otu ga shi.” — 2 Kor. 2:5-11.

6. Oshike tashi vulu oku tu kwathela, ngele natango otu uvite kutya Jehova ine tu dhimina po omolwomayono getu gomonakuziwa?

⁶ Okutaamba ko edhiminopo lyaJehova, otaku ke tu kwathela tu ethe po okukala tu uvite ondjo. Uuna twa yona, oshi li paunshitwe okukala tu uvite ondjo. (Eps. 51:17) Shono oshinima oshiwanawa. Eiyuvo lyetu otali vulu oku tu kwathela tu katuke oonkatu dhi li mondjila, opo tu ninge omalunduluko. (2 Kor. 7:10, 11) Ngele otwa tsikile okukala tu uvite kutya Jehova ine tu dhimina po, otashi vulika tu ethe po oku mu longela. Ihe uuna twa taamba ko edhiminopo lyaJehova, otashi ke tu kwathela kaatu kale we tu uvite ondjo. Opo nee, otatu ka longela Jehova ngaashi a hala tu mu longele, neiyuvo lya yela nosho wo nenyanyu enene. (Kol. 1:10, 11; 2 Tim. 1:3) Ihe ongiini tatu vulu okukala twa tompwa kutya Kalunga okwe tu dhimina po?

OSHIKE TASHI VULU OKU TU KWATHELA TU TAAMBE KO EDHIMINOPO LYAJEHOVA?

7-8. Jehova okwa li a lombwele shike Moses kombinga ye, notatu vulu okukala tu na uushili wuni? (Eksodus 34:6, 7)

⁷ Dhiladhila kushoka Jehova a popi kombinga ye. Pashiholelwa, ndhindhilika shoka Jehova a li a lombwele Moses kondundu Sinai.a (Lesha Eksodus 34:6, 7.) Nonando Jehova oku na omaukwatya ogendji omawanawa, okwa li a hogolola okulombwela Moses kutya oku li ‘Kalunga omunamutimahenda nomunalukeno.’ Mbela Kalunga e na omaukwatya ga tya ngawo, ota ka tinda ngaa okudhimina po omulongeli gwe ngoka i iyela ombedhi shili? Hasho nando! Ngele okwa ningi ngawo, otashi ka ulika kutya ke na ohenda noku na onyanya. Ihe Jehova ke na esiku u ulike omaukwatya ga tya ngaaka.

⁸ Otatu vulu okukala nuushili kutya sho Jehova a ti kutya ye omunahenda, ota popi oshili, molwaashoka iha fundju. (Eps. 31:5) Onkee otatu vulu okwiitaala oohapu dhe. Ngele oho kala wu uvite ondjo omolwomayono goye gomonakuziwa, ipula ngeyi: ‘Mbela ondi itaala ngaa kutya Jehova oku li shili omunahenda nomunalukeno nosho wo kutya ke na esiku a tinde okudhimina po omuyoni kehe ngoka i iyela ombedhi? Mbela kandi na oku shi tamba ko kutya okwa dhimina ndje po?’

9. Osha hala okutya shike okudhiminwa po omayono getu? (Episalomi 32:5)

⁹ Tedhatedha kwaashoka Jehova a nwetha mo aanyoli yOmbiimbeli ya nyole kombinga yedhiminopo lye. Pashiholelwa, natu ka taleni kunkene omunyoli gwOmbiimbeli, David, a hokolola edhiminopo lyaJehova. (Lesha Episalomi 32:5.) David okwa ti: ‘Owa dhimi po oondjo dhandje adhihe.’ Oshitya shOshihebeli shoka sha tolokwa “okudhima po,” osha hala okutya “okuyelula po,” “okukutha po” nenge “okuhumbata.” Sho Jehova a dhimine po David, okwa fa a humbata po omayono ge noku ga fala kokule. David okwa li a nyanyukwa sho Jehova e mu dhimine po thiluthilu. (Eps. 32:2-4) Natse otatu vulu okukala twa nyanyukwa. Uuna twi iyela ombedhi shili omolwomayono getu, inatu pumbwa okutsikila okukala twa humbata omutenge gokukala tu uvite ondjo omolwomayono getu ngoka Jehova a humbata po noku ga fala kokule natse.

10-11. Oohapu ndhoka tadhi ti ‘oho tu dhimine po,’ otadhi tu lombwele shike kombinga yaJehova? (Episalomi 86:5)

¹⁰ Lesha Episalomi 86:5. David okwa popi kutya Jehova ‘ohe tu dhimine po.’ Embo limwe lyuuyelele wOmbiimbeli olya ti ngeyi kombinga yaJehova: “Oha dhimine po. Osho owala e na uukwatya wu li ngaaka.” Mbela omolwashike Jehova ha dhimine po? Oshitopolwa sha landula ko shovelise ndjoka osha yelitha ngeyi: “Ou na esilohenda kumboka taye ku indile.” Ngaashi twi ilongo moshitopolwa sha zi ko, ohole yi na uudhiginini ohayi ningitha Jehova a kale e na ekwatathano lyopothingo naalongeli ye aadhiginini. Ohole ye yi na uudhiginini ohayi mu inyengitha a “kuthile po” aayoni ayehe mboka yi iyela ombedhi. (Jes. 55:7) Ngele oho shi mono oshidhigu okutaamba ko edhiminopo lyaKalunga, oto vulu okwiipula ngeyi: ‘Mbela ondi itaala ngaa kutya Jehova oha dhimine po, nonokutya okwi ilongekidha okudhimina po ayehe mboka yi iyela ombedhi, mboka taye mu indile e ya sile ohenda? Mbela kandi na oku shi taamba ko kutya okwa dhimina ndje po, sho nde mu lilile a sile ndje ohenda?’

¹¹ Ohashi tu hekeleke okukala tu shi kutya Jehova oku uvite ko thiluthilu kutya inatu gwanenena. (Eps. 139:1, 2) Natu ka taleni kwaashoka David a popi mepisalomi lye limwe, nankene shoka tashi vulu oku tu kwathela tu taambe ko edhiminopo lyaJehova.

JEHOVA OHA DHIMBULUKWA SHIKE KOMBINGA YETU?

12-13. Shi ikolelela kEpisalomi 103:14, oshike shoka Jehova ha dhimbulukwa kombinga yetu, naashoka ohashi mu inyengitha a ninge shike?

¹² Lesha Episalomi 103:14. David okwa popi kutya Jehova “oku shi shi kutya otse ontsi yevi.” David okwa li a popi oohapu ndhoka a yelithe etompelo limwe kutya omolwashike Jehova i ilongekidha okudhimina po aalongeli ye mboka yi iyela ombedhi, ndyoka kutya: Oku shi kutya inatu gwanenena. Opo tu shi uve ko nawa, natu ka taleni nawa koohapu dhaDavid.

¹³ David okwa ti kutya Jehova “okwa tseya kutya otwa shitwa nashike.” Okwa shita Adam okuza ‘montsi yevi,’ noku shi kutya aantu inaaya gwanenena oye na omangambeko, pashiholelwa, oya pumbwa okulya, okukotha nokufudha. (Gen. 2:7) Ihe sho Adam naEva ya yono, aantu oya ningi ontsi yevi momukalo gulwe ishewe. Tu li oluvalo lwawo, otwa thigulula okwaagwanenena hoka haku tu ningitha tu ninge iinima ya puka. Jehova ke shi owala kutya inatu gwanenena, ihe David okwe mu popi kutya ohe shi “dhimbulukwa” wo. Oshitya shOshihebeli shoka sha longithwa mpaka, otashi vulu okugandja eityo lyokukatuka oonkatu oombwanawa. Otatu vulu okungonga eityo lyoohapu dhaDavid momukalo nguka: Jehova oku uvite ko kutya otatu ka ninga omapuko omathimbo gamwe, nuuna twe shi ningi, ote ke tu sila ohenda noku tu dhimina po, ngele otwi iyela ombedhi shili. — Eps. 78:38, 39.

14. (a) David okwa yelitha ishewe ngiini edhiminopo lyaJehova? (Episalomi 103:12) (b) Oshike tatu ilongo komukalo ngoka Jehova a dhimine po David? (Tala oshimpungu “Nkene Jehova ha dhimine po nokudhimbwa.”)

¹⁴ Oshike ishewe tatu ilongo mEpisalomi 103, kombinga yankene Jehova he tu dhimine po? (Lesha Episalomi 103:12.) David okwa ti kutya uuna Jehova e tu dhimine po, Oha fala omayono getu kokule “ngaashi uuzilo u li kokule nuuninginino.” Uuzilo owu li kokulekule nuuninginino, noombinga ndhoka mbali kadhi na siku dhi tsakanene. Mbela shoka otashi tu lombwele shike kombinga yomayono ngoka Jehova ha dhimi po? Embo limwe olya yelitha ovelise ndjoka ngeyi: “Kalunga oha kutha po omayono getu, e te ga fala kokule, naashoka osha fa ezimba lyoshinima shontumba, ndyoka kaali po we nandonando. Onkee otatu vulu okukala nuushili kutya ke na siku a dhiladhile kombinga yago nenge e ga dhimbulukwe ishewe.” Dhiladhila owala kutya ezimba otali vulu oku ku dhimbulukitha oshinima shontumba shoka sha ningwa nale. Ihe uuna Jehova a dhimi po eyono, kapu na shoka hashi mu ningitha a dhimbulukwe eyono lyetu nokutokola e tu geele omolwalyo. — Hes. 18:21, 22; Iil. 3:19.

15. Oshike tatu vulu okuninga ngele otatu kondjo nokukala tu uvite tu na ondjo omolwomayono gomonakuziwa?

¹⁵ Oohapu dhaDavid ndhoka tadhi adhika mEpisalomi 103, otadhi vulu ngiini oku tu kwathela tu taambe ko edhiminopo lyaJehova? Ngele otatu kondjo nokukala tu uvite tu na ondjo omolwomayono gomonakuziwa, otatu vulu okwiipula ngeyi: ‘Mbela ohandi dhimbwa shoka Jehova ha dhimbulukwa, sha hala okutya mbela ohandi dhimbwa kutya oku shi kutya inandi gwanenena, nota ka dhimina po omuyoni ngoka i iyela ombedhi ngaashi ngame? Mbela ohandi dhimbulukwa shoka Jehova a hogolola okudhimbwa, sha hala okutya mbela ohandi dhimbulukwa omayono gandje ngoka a dhima po noke na siku a ka geele ndje omolwago?’ Jehova iha gandja eitulomo komayono getu gomonakuziwa. Natse inatu pumbwa oku shi ninga. (Eps. 130:3) Uuna twa taamba ko edhiminopo lyaJehova, otatu ka vula okwiidhimina po tse yene, omolwomayono getu gomonakuziwa nokupula komeho.

16. Gandja oshiholelwa shoka tashi ulike kutya osha nika oshiponga okukala wu uvite ondjo omolwomayono gomonakuziwa. (Tala wo ethano.)

¹⁶ Natu ka taleni oshiholelwa tashi landula. Okukala wu uvite ondjo omolwomayono gomonakuziwa osha fa omuntu ta hingi ohauto yu uka komeho, ihe ota tsikile okutala mesipili lyokutala konima. Oshiwanawa okutala mesipili ethimbo nethimbo, opo wu vule okumona iiponga mbyoka tashi vulika yi holoke po okuza konima yoye. Ihe opo wu vule okuya komeho wu li megameno, owa pumbwa okugandja eitulomo komeho hoka wu uka. Sha faathana, otashi ke tu kwathela ngele otwa kala hatu dhiladhila kombinga yomapuko getu gomonakuziwa omathimbo gamwe, molwaashoka otatu vulu okwiilonga sha kugo, shoka tashi ke tu kwathela tu yande oku ga endulula. Ihe ngele otwa tsikile okugandja eitulomo komapuko getu gomonakuziwa, otashi ke tu ningitha tu kale tu uvite ondjo omolwago, notashi vulika shi tu ngambeke mwaashoka tatu vulu okuninga ngashingeyi sho tatu longele Kalunga. Pehala lyaashono, natu tsikile okugandja eitulomo kondjila ndjoka yu uka komeho. Otu li mondjila ndjoka tayi fala komwenyo muuyuni uupe waKalunga mboka u uvaneka, moka iinima iiwinayi ‘tayi ka dhimbiwa thiluthilu.’ — Jes. 65:17; Omayel. 4:25.

TSIKILA OKUTOMPA OMUTIMA GWOYE

17. Omolwashike twa pumbwa okutsikila okutompa omitima dhetu kutya Jehova oku tu hole nohe tu dhimine po?

¹⁷ Otwa pumbwa okutsikila okutompa omitima dhetu kutya Jehova oku tu hole nohe tu dhimine po. (1 Joh. 3:19) Omolwashike mbela? Omolwaashoka, Satana ota tsikile nokuninga oonkambadhala e tu ningithe tu kale tu uvite kutya Jehova ke tu hole noke na esiku e tu dhimine po. Elalakano lye, okwa hala oku tu ethitha po okulongela Jehova. Satana ota ka tsikila okuninga oonkambadhala dha mana mo, molwaashoka oku shi kutya oku na ko owala okathimbo okafupi. (Eh. 12:12) Inatu etha nando a pondole!

18. Oshike to vulu okuninga, opo wu kale wa tompwa kutya Jehova oku ku hole nokwi ilongekidha aluhe oku ku dhimina po?

¹⁸ Opo wu koleke einekelo lyoye kutya Jehova oku ku hole, tula miilonga omaetopo ngoka ga kundathanwa moshitopolwa sha tetekele. Opo wu kale wa tompwa kutya Jehova okwi ilongekidha aluhe oku ku dhimina po, dhiladhila kwaashoka Jehova a popi kombinga ye. Tedhatedha kwaashoka a nwetha mo aanyoli yOmbiimbeli ya nyole kombinga yedhiminopo lye. Ino dhimbwa kutya oku shi nawa kutya ino gwanenena nota ka ungaunga nangoye nohenda. Dhimbulukwa wo kutya uuna a dhimine po, ohe shi ningi thiluthilu. Opo ihe ngaashi David a li e na einekelo mohenda yaJehova, nangoye oto ka vula okutya, “Tangi Jehova, sho ‘wa dhimi po oondjo dhandje adhihe’!” — Eps. 32:5.