Jehova oye ‘enyanyu lyetu’

1-2. (a) Aantu oyendji ohayi iyadha monkalo yini kunena? (b) Oshike tatu ka kundathana moshitopolwa shika?

AANTU oyendji kunena ohaya kambadhala okuninga kehe shimwe, opo ya kale ya nyanyukwa. Nonando ongawo, ihaya mono enyanyu tali kalelele. Oyendji ohaya kala ye uvite uuwike noyu uvite kaaye na oshilonga. Otashi vulika yamwe yomaapiya yaJehova nayo ya kale ye uvite ngaaka. Molwaashoka otu li “momasiku gahugunina,” otashi vulika twi iyadhe moonkalo oondhigu ndhoka hadhi tu ningitha tu kale twa gwililwa po, nenge tu kale tu uvite nayi, notadhi ulike kutya otu li momathimbo “omadhigu lela okukaliwa mugo.” — 2 Tim. 3:1.

² Moshitopolwa shika, otatu ka kundathana kutya iinima yini hayi vulu okuyona po enyanyu lyetu, naashoka tatu vulu okuninga, opo tu kale ishewe twa nyanyukwa. Ihe tango, otwa pumbwa okumona kutya Onzo yini hayi tu etele enyanyu lyashili.

ONZO YENYANYU LYASHILI

3. Eshito otali tu longo shike kombinga yaJehova? (Tala wo omathano.)

³ Jehova oha kala aluhe a nyanyukwa, nokwa hala wo natse tu kale twa nyanyukwa. Onkene itashi kumitha sho hatu mono enyanyu lye miinima mbyoka a shita, ngaashi opulanete yetu ombwanawa, omalwaala ogendji ga yoolokathana, nkene iinamwenyo hayi dhana nosho wo iikulya oyindji iitoye. Kalunga oku tu hole shili nokwa hala tu nyanyukilwe onkalamwenyo.

Okandjambona: Image © Romi Gamit/Shutterstock; uumbwingini: Vladimir Seliverstov/500px via Getty Images; uukombwena: Rita Kochmarjova/stock.adobe.com; oodolfina mbali: georgeclerk/E+ via Getty Images

4. (a) Omolwashike Jehova ha kala a nyanyukwa, nonando oku wete okumona iihuna hoka ku li muuyuni? (b) Jehova okwe tu pa omagano geni? (Episalomi 16:11)

⁴ Nonando Jehova oku li ‘Kalunga omunyanyukwi,’ oha kala e wete omaupyakadhi nokumona iihuna hoka ku li muuyuni. (1 Tim. 1:11) Ihe ina etha nando shoka shi kuthe po enyanyu lye. Oku shi kutya okumona iihuna kehe okwopakathimbo, oshoka oye mwene e shi kutya ote ke ku hulitha po uunake. Oti idhidhimike wo sigo esiku ndyoka ta ka kutha po iinima ayihe mboka hayi tu nikitha oluhodhi nosho wo okumona iihuna sigo aluhe. Ihe Jehova oku uvite ko oonkalo ndhoka hatu piti mudho ngashingeyi nokwa hala oku tu kwathela. Ohe tu kwathele ngiini? Ohe tu pe omagano genyanyu. (Lesha Episalomi 16:11.) Ndhindhilika nkene Jehova a li a pe Omwana, Jesus, omagano ngoka.

5-6. Omolwashike Jesus a nyanyukwa?

⁵ Miishitwa ayihe yaJehova, Jesus oye omunyanyukwi e vule iishitwa ayihe. Omolwashike mbela? Natu taleni komatompelo gaali. (1) “Oye oshifetha shaKalunga ihaa monika,” noha holele thiluthilu uukwatya waHe momukalo kehe. (Kol. 1:15.) (2) Jesus okwa kala ethimbo olindji naHe, ngoka e li Onzo yenyanyu.

⁶ Jesus oha nyanyukilwa aluhe okuninga iinima mbyoka He te mu pula a ninge. (Omayel. 8:30, 31; Joh. 8:29) Nomolwaashono Jehova e mu hokwa lela. — Mat. 3:17.

7. Ongiini tatu vulu okumona enyanyu lyashili?

⁷ Natse otatu vulu okumona enyanyu lyashili mokuhedha popepi naJehova, ngoka e li Onzo yashili. Ngele otwa kala hatu longitha ethimbo lyetu olindji twi ilonge kombinga yaJehova noku mu holela, otatu ka kala twa nyanyukwa. Otatu ka mona wo enyanyu ngele otwa kala hatu longo ehalo lyaKalunga, nokukala tu shi kutya okwe tu hokwa.a (Eps. 33:12) Ihe mbela ongiini ngele omathimbo gamwe ihatu kala twa nyanyukwa, nenge ngele ihatu kala twa nyanyukwa nandonando? Mbela shoka osha hala okutya Jehova ine tu hokwa? Hasho nando! Inatu gwanenena, nomathimbo gamwe ohatu kwatwa kuuwehame, hatu kala tu uvite nayi, notu niwe kepolimano. Jehova oku uvite ko oshinima shoka. (Eps. 103:14) Natu ka kundathaneni kutya iinima yini hayi kutha po enyanyu lyetu, naashoka tatu vulu okuninga, opo tu kale ishewe twa nyanyukwa.

INO ETHA NANDO OSHA SHI YONE PO ENYANYU LYOYE

8. Ongiini uupyakadhi wonkalamwenyo tawu vulu oku tu guma?

⁸ Uupyakadhi wonkalamwenyo. Mbela owa taalela omahepeko, iiponga yopaunshitwe, oluhepo, uuwehame, nenge wu li momimvo dhuukokele? Ohatu vulu okukanitha enyanyu lyetu nuupu uuna twa taalela oonkalo ndhoka oondhigu, unene tuu ngele itatu vulu okuninga po sha tu dhi lundulule. Ombiimbeli oya popya paushili kutya “uudhigu womomutima ohau nikitha omwenyo uuthigwa.” (Omayel. 15:13) Babis, omukuluntugongalo ngoka a silwa omumwayinamati nosho wo aavali ye ayehe, muule owala womimvo ne, ota ti: “Onda li ndi uvite ndi li ongame awike nokandi na ekwatho lyasha. Omathimbo gamwe, onda li wo handi kala nda gwililwa po, oshoka manga inaaya sa, onda li handi kala nda hala okukala nayo, ihe kanda li nda vulu oku shi ninga, oshoka onda li handi kala ndi ipyakidhila unene.’ Uupyakadhi wonkalamwenyo ohawu vulu shili oku tu lolodha palutu nosho wo pamaiyuvo.

9. Oshike tashi vulu oku tu kwathela tu kale ishewe twa nyanyukwa? (Jeremia 29:4-7, 10)

⁹ Oshike tashi vulu oku tu kwathela tu kale ishewe twa nyanyukwa? Otatu vulu okukala ishewe twa nyanyukwa ngele otwa etha po okukala tu na oshimpwiyu niinima mbyoka itaatu vulu okulundulula, nokukala tu na olupandu omolwiinima mbyoka tu na. Uuyuni otawu humitha komeho edhiladhilo ndyoka kutya onkalamwenyo yetu oyi na okukala yaana uupyakadhi washa, opo tu kale twa nyanyukwa. Ihe shoka kashi shi shoshili. Pashiholelwa, Jehova okwa li a lombwele Aajuda mboka ya li muupongekwa muBabilon, ya taambe ko onkalo yawo ndjoka ompe ye li oonkwatwa mevi lyaashi lyawo, nokuninga ngaashi taya vulu ya nyanyukilwe onkalamwenyo. (Lesha Jeremia 29:4-7, 10.) Oshiilongomwa oshini kutse? Kambadhala okutaamba ko onkalo moka wu li, nokukala wu na olupandu omolwiinima iiwanawa mbyoka wu na monkalamwenyo yoye. Dhimbulukwa kutya, Jehova ote ke ku kwathela aluhe. (Eps. 63:7; 146:5) Effie, ngoka a li moshiponga shoka she mu thiga a sa ombanda, ota ti: “Onda li nda pewa ekwatho enene nonda yambidhidhwa kuJehova, kuyaandjetu nosho wo kaamwatate megongalo. Onkene onda li ndi uvite kutya ngele onda shuna omutse miipeta, kungawo itandi ulike kutya onde ya pandula. Onda hala okuulukila Jehova nosho wo ookuume kandje kutya onde ya pandula noonkondo omolwekwatho lyawo.”

10. Omolwashike tatu vulu okukala twa nyanyukwa nuuna twa taalela uupyakadhi?

¹⁰ Nuuna tu na uupyakadhi, nenge uuna iinima iiwinayi ye tu ningilwa, nenge ya ningilwa mboka tu hole, otatu vulu okukala twa nyanyukwa.b (Eps. 126:5) Omolwashike mbela? Oshoka enyanyu lyetu inali ikolelela koonkalo dhetu. Maria, ngoka e li omukokolindjila, ota ti: “Uuna wa taalela uupyakadhi, okukala wa nyanyukwa itashi ti kutya otwi ipwililikile omaiyuvo goye. Pehala lyaashono, otashi ti kutya ino dhimbwa kombinga yomauvaneko gaJehova. Tate yetu ote ke tu kwathela, opo tu kale twa nyanyukwa.” Dhimbulukwa kutya, nonando onkalo oyi kale ondhigu ngashingeyi shi thike peni, uudhigu wetu awuhe owopakathimbo, noitawu kala po sigo aluhe. Masiku, Jehova ota ka kutha po iinima ayihe mboka hayi tu monitha iihuna noku tu uvitha nayi.

11. Oshiholelwa shomuyapostoli Paulus otashi ku ladhipike ngiini?

¹¹ Ongiini ngele otwa tameke okukala tu na omalimbililo kutya uupyakadhi wetu otawu ulike kutya inatu hokiwa we kuJehova? Ngele osho wu uvite ngawo, oto vulu okudhiladhila kombinga yaapiya yaJehova mboka ya li ya taalela oonkalo oondhigu noonkondo. Natu taleni koshiholelwa shomuyapostoli Paulus. Okwa li a hogololwa kuJesus ye mwene, a ka uvithe onkundana ombwanawa ‘kiigwana, kaakwaniilwa nokoyana yaIsraeli.’ (Iil. 9:15) Mboka owa li lela uuthembahenda kuye! Nonando ongawo, Paulus okwa li e na uupyakadhi monkalamwenyo ye. (2 Kor. 11:23-27) Mbela uupyakadhi mboka Paulus a li e na, nowa li tawu monika wa fa kaawu na esiku wu hule po, owa li tawu ulike kutya Jehova ke na ko we nasha naye? Hasho nando! Pehala lyaashono, eidhidhimiko lye olya li lya ulike kutya Jehova ote mu yambeke note mu kwatha. (Rom. 5:3-5) Ngashingeyi dhiladhila kombinga yonkalo yoye. Oto tsikile okulongela Jehova nuudhiginini, nonando owa taalela omaudhigu. Onkene nangoye oto vulu okukala wu na uushili kutya Jehova okwe ku hokwa.

12. Ngele shoka twa li twa tegelela inashi ningwa, ohashi vulu ngiini okuyona po enyanyu lyetu?

¹² Ngele shoka twa li twa tegelela inashi ningwa. (Omayel. 13:12) Ohole yetu yokuhola Jehova nosho wo olupandu lwetu, ohayi twi inyengitha twi itulile po omalalakano miilonga yaJehova. Nonando ongawo, ngele omalalakano ngoka twi itulila po itatu vulu oku ga adha omolwoonkalo dhetu, otashi vulika shi tu teye omukumo. (Omayel. 17:22) Omukokolindjila gumwe gwedhina Holly, ota ti: “Onda li nda hala okuya kOsikola yAauvithi yUukwaniilwa, oku ka uvithila koshilongo shilwe, nenge ndi ka longe koproyeka yokutunga koRamapo. Ihe onkalo yandje oya lunduluka, noka nda li we tandi vulu okwaadha omalalakano gandje ngoka. Onda li nda teka omukumo. Ohashi uvitha omuntu nayi, uuna wa hala okuninga iinima yontumba, ihe ito vulu oku yi ninga.” Oyendji yomaapiya yaJehova ohaya kala ye uvite ngaaka.

13. Ngele oonkalo dhetu itadhi tu pitike tu ninge iinima yontumba, omalalakano geni tatu vulu okwiitulila po, ngoka tatu vulu okwaadha?

¹³ Oshike tashi vulu oku tu kwathela tu kale ishewe twa nyanyukwa? Dhimbulukwa kutya Jehova ihe tu thiminike tu longe sha. Ina tegelela tu ninge oshindji shi vulithe pwaashoka tatu vulu okuninga, ye ine tu tala ko tu na ongushu shi ikolelela kwaashoka hatu longo miilonga ye. Jehova okwa hala tu kale tu na ondjele notu li aadhiginini. (Mika 6:8; 1 Kor. 4:2) Oku na ko nasha unene nuuntu wetu womeni, shi vulithe shoka hatu ningi. Onkene inatu kala twa tegelela tu ninge oshindji shi vulithe pwaashoka tatu vulu okuninga.c Nonando onkalo yoye itayi ku pitike wu ninge oshindji miilonga yaJehova, kambadhala okugandja eitulomo kokuninga shoka to vulu okuninga. Pashiholelwa, oto vulu okukwathela mokudheula omugundjuka gwontumba, nenge wu kale ho ladhipike aakokele. Oto vulu wo okwiitulila po elalakano lyokutsa yalwe omukumo oshipala noshipala, oku ya dhengela ongodhi, nenge oku ya nyolela etumwalaka. Jehova ote ke ku yambeka, moku ku pa enyanyu sho to ningi ngaashi to vulu wi itulile po omalalakano ngoka to vulu okwaadha. Kaleka wo momadhiladhilo kutya masiku, otatu ka kala tu na oompito odhindji dhaa na ehulilo muuyuni uupe waJehova, dhoku mu longela momikalo odhindji ndhoka twa li inaatu tegelela. Holly, ngoka a popiwa metetekelo, okwa hulitha noohapu tadhi ti: “Uuna nda tameke okukala ndi uvite nda teka omukumo, ohandi mwena po e tandi dhimbulukwa kutya otandi ka kala nomwenyo sigo aluhe. Kekwatho lyaJehova, otandi ka vula okwaadha omalalakano gandje gamwe muuyuni uupe.”

14. Oshike ishewe tashi vulu okuyona po enyanyu lyetu?

¹⁴ Okwiinyanyudha mwene. Otashi vulika tu mone aantu komapandja gomakwatathano gopaintaneta, mboka taya monika ya fa ya nyanyukwa lela omolwiinima iiwanawa mbyoka haya nyanyukilwa ethimbo alihe. Aantu ohaya ladhipikwa ya tule komeho monkalamwenyo yawo iinima ngaashi, iinima mbyoka ye hole, okulanda iinima, nokuya komahala gi ili nogi ili. Inashi puka okuninga iinima mbyoka tu hole. Jehova okwe tu shita momukalo moka hatu vulu okunyanyukilwa iinima iiwanawa. Nonando ongawo, oyendji oya mona kutya shoka ya li taya dhiladhila kutya otashi ke ya etela enyanyu, inashi ya etela enyanyu shili. Eva, ngoka e li omukokolindjila, okwa ti, “Uuna wa kala owala to gandja eitulomo kokwiinyanyudha monkalamwenyo yoye, ito ka kala nando wa gwanenwa.” Okwiinyanyudha mwene otaku vulu oku tu ningitha tu kale tu uvite nayi, noku tu teya omukumo.

15. Oshike tatu vulu okwiilonga kOmukwaniilwa Salomo?

¹⁵ Otatu vulu okwiilonga koshiholelwa shOmukwaniilwa Salomo, kombinga yiizemo mbyoka hayi zi mokwiinyanyudha mwene. Okwa li a kambadhala okumona enyanyu mokugwanithwa po omahalo ge, ngaashi okutyapula iikulya iitoye, omusika ombwanawa nosho wo iinima ayihe iiwanawa mbyoka iimaliwa ya li hayi vulu okulanda pethimbo lye. Ihe iinima mbyoka kaya li ye mu etele enyanyu. Okwa ti: “Eho ihali kuta okutala, kwo okutsi ihaku vulwa okupulakena.” (Omuuv. 1:8; 2:1-11) Iinima mbyoka aantu muuyuni taya dhiladhila kutya ohayi eta enyanyu, oya fa iimaliwa mbyoka kaayi shi yoshili. Ohayi monika ya fa yi na ongushu, ihe kayi na esiku yi tu etele enyanyu lyashili.

16. Ongiini okukala hatu gandja kuyalwe, haku tu kwathele tu kale ishewe twa nyanyukwa? (Tala wo omathano.)

¹⁶ Oshike tashi vulu oku tu kwathela tu kale ishewe twa nyanyukwa? Jesus okwe tu longa kutya, “okugandja ohaku eta enyanyu enene ku vule okutaamba.” (Iil. 20:35) Omukuluntugongalo gwedhina Alekos, okwa ti: “Ohandi gandja eitulomo kokuningila yalwe uunima uushona. Uuna tandi gandja kuyalwe, ohashi kwathele ndje kaandi gandje unene eitulomo kungame mwene, nohashi nyanyudha ndje.” Oshike to vulu okuningila yalwe? Ngele owa mono gumwe a gwililwa po, kambadhala oku mu tsa omukumo. Otashi vulika kuu kuthe po uupyakadhi we, ihe oto vulu oku mu hekeleka mokupulakena kuye nolukeno, moku mu kenukila, nomoku mu dhimbulukitha a fale uudhigu we kuJehova. (Eps. 55:22; 68:19) Oto vulu wo oku mu kwathela noku mu shilipaleka kutya Jehova ine mu iteka po nando. (Eps. 37:28; Jes. 59:1) Otashi vulika nokuli wu mu ningile sha, ngaashi oku mu telekela iikulya nenge mu ka ende mo naye. Mu hiya mu ka longe pamwe muukalele, shoka tashi ke mu kwathela a kale a nyanyukwa. Etha wu longithwe kuJehova wu ladhipike yalwe. Ngele otwa gandja eitulomo kokukwathela yalwe, otatu ka kala twa nyanyukwa shili. — Omayel. 11:25.

17. Oshike tu na okuninga, ngele otwa hala tu kale twa nyanyukwa shili? (Episalomi 43:4)

¹⁷ Otatu vulu okukala twa nyanyukwa shili, ngele otwa tsikile okuhedha popepi naTate yetu gwomegulu. Ombiimbeli otayi tu shilipaleke kutya Jehova oku li ‘enyanyu lyetu, OB-1977.’ (Lesha Episalomi 43:4.) Onkee ano kutya nduno otatu ungaunga nashike monkalamwenyo, otatu vulu okukala tu uvite twa gamenwa. Natu tsikileni nduno okugandja eitulomo lyetu kuJehova, ngoka e li Onzo yenyanyu lyetu! — Eps. 144:15.