Tiivi Eri Yoohulela ya Okumi wa Echoko Yoohakalala?

PIIPILIYA ONI

“Oohakalala ti yaale aniiwa masu a Muluku nave enachariha!”​—Luka 11:28.

EYO ENATAPHULELA EHEENI WA NYUWO

Ophwanya osivela weeparipari.​—Aefesu 5:28, 29.

Opuha ncicimiho neeparipari.​—Aefesu 5:33.

Okhalano wiichaala weeparipari.​—Marku 10:6-9.

HIYAANO NNAPHWANELA WEEMERERYA CHIRYENE YEEYO PIIPILIYA ONALOCEIYE?

Aai, moone mathowa meeli:

• Muluku ti Mpatuxa a okumi wa echoko. Piipiliya onaloca wi “imusi soothene” anakuxa nsina naya mwa Yehova Muluku. (Aefesu 3:14, 15) Mmasu makina, marehereryo a echoko aakhalavo ntakhara wi Yehova topatunxe. Tiheeni eyo enataphulelaaya?

  Muthokororye: Waakhanle wi moolya yoolya yoosiva nave munachuna ohuserya ichu iheliwemo, taani mwaahaalaanyu omukoha? Mwawooneya, muchu yoowo opanke.

  Moolikana, wi nsuwele ichu inahakalaliha okumi wa echoko, nnaphwanela omukoha Yehova, Mpatuxa a marehereryo a echoko.​—Mapacereryo 2:18-24.

• Muluku onnookhapelelani. Ichoko sa miruku sinnaavya ikano sa Yehova seiyo owo ovanheiye mu Masu awe. Ntakhara heeni? “Woona wi owo onnookhapelelaani.” (1 Petru 5:6, 7) Yehova onachuna wi mukhale phaama​—nave elukuluku yoothene ikano sawe sinnaphara muteko!​—Masiposipo 3:5, 6; Yesaya 48:17, 18.