Yunyu

Yehova aahaareeliha Akristu a mu nsana noopacerya vaavaa yiikhovelelihaaya mikhalelo seihe soovila. Awo wiiliwiili yaaniikariwa, nave ikwaha sincipale, mu elukuluku yeeyo yahaaweheryaaya. Moone yeeyo yeeren’ye ni Parnape vamoha ni Paulo vaavaa yaalaleeryaaya o Listra. Woopaceryani, achu yaahiwaakhela phaama nave yaanawiriyana yeeyo yaalocaaya. Nave voocharela, amwiicani, ‘yaahituunyerya muloko’ nave akina a yaale yaawiriyanne woopaceryani, yaahimvonya Paulo maluku nave emuhiya wi akhwe. (Saw. 14:19) Naamwi hiihaa, Parnape ni Paulo yaahititelela olaleerya mmapuro makina. Teevi yaari yookhumelela? Awo yaahaapaka “oohuserya ancipale.” Ohiya yeeyo, masu ni yootakiherya aya yaahaalipiha anna a mu elukuluku yeele. (Saw. 14:21, 22) Paulo ni Parnape hiyaahin’ye olaleerya naamwi yiikariwaka, nave nthowa na yeeyo ancipale yaahiphuravo. Nahihiya ophara muteko yoowo Yehova onirummeiye, moohikhwa minikwa nnahaala tho oreelihiwa. w23.04 ipaax. 16-17 ipara. 13-14

Mwene Tavite aahikhalano amwiicani ancipale awoopiha variyari va okumi awe, nave mu ikwaha sincipale owo aahaavya nikhaviheryo na Yehova mu nivekelo. Mulipa oomurepa salmu, Tavite, aanaroromela wi Yehova aanawiriyana ni waakhula mavekelo awe. Piipiliya onnaniroromeliha wi Yehova onanwerya onivaha miruku ni ikuru nnachunaahu wi nivilele. Owo onanwerya opharihela emusi ahu yoomunepani ophiyerya tho yaale ahinamurumeela wi enivahe nikhaviheryo nammoori. Naamwi akhweya Yehova ilukuluku sincipale ahaakhulaka mavekelo ahu mmukhalelo naaweheryaahu, noosuwela wi owo onahaala waakhula yaawo. Owo onahaala ovahererya yeeyo ene nnachunaahu ni mu elukuluku yoophwanelela. Mwawiihiiha, mutitelele ovekela, muroromelaka wi Yehova onahaala wookhapelelaani hiihava nave wi owo onahaala woovahaani ichu soothene ‘seiho munakhwelaanyu’ mu elapo evyaani enoorwa.—Sal. 145:16. w23.05 epaax. 8 epara. 4; epaax. 13 ipara. 17-18

Ti yaphaama otikitheryeya mu miphurelo sa waakhwaniherya yoolakelela anyu. Mmiphurelo taani munaphwanelaanyu otikitheryeya? Yaari wi yoolakelela anyu ori omwaalakhanya Piipiliya ni ovekela, muupuwele mukhalelo ichu seiha inahaalaaya olipiha onthamwene anyu ni Yehova. (Sal. 145:18, 19) Waakhanle wi yoolakelela anyu ori wunnuwiha mikhalelo Seekristu, mutikitheryeye mukhalelo eyo enahaalaaya olipiha onthamwene anyu ni akina. (Ako. 3:14) Mpake elista ya miphurelo soothene inarweela mu waakhwaniherya soolakelela sanyu. Mvareryeke elista yeeyo moohihiyererya. Nave tho, mmaliheke elukuluku ni yaawo anahaala wooceenyeryaani. (Mas. 13:20) Oloca eparipari, oothene ahu ninnakhalano mahiku yaawo nihinakhalaahuno nchuno. Apwanne eyo enataphulela wi hanniilipixerya ntakhara yoolakelela ahu? Hooye. Nnnanwerya wiilipixerya ntakhara soolakelela sahu naamwi mu ilukuluku seiho nihinakhalaahuno nchuno. Mweeparipari, ela tahi yookhweya. Nyenya munahaala okhala oohakalala vaavaa muneeraanyu mwaakhwaniherye yoolakelelaanyu. w23.05 ipaax. 27-28 ipara. 5-8

Osuwela wi nookhalano murici wa weemererya sookhumelela sa soolakelela sahu enanwerya onikhaviherya olokoha soocheka sahu, oreherya yeeyo nipankaahu ni osepa wuuluulela echu emohamoha. Opaka ichu seiho inamunikhaviherya otitelela mu ochimaka wahu ntakhara okumi. Wakhala wi moopaka yoolakelela nave mukhalano ekeerelani, tiheeni munaphwanelaanyu weera? Muhiyeleele elukuluku anyu ni ikuru sanyu mweereryaka wiikuphelela wa nthowa na yoolakelela mpamkaanyu naari waaphwanyerya mathowa akina. Ohiya yeeyo, mweemererye wi moohesa nave mpake owetha mwawiiwanana ni mikhalelo sanyu sa hiihaano. Wakhala wi munniiphwanyerya mathowa wa echu yeeyo mpankaanyu, mukhale awiiyeviha ni mvekele wa Yehova mweemereryaka yoohesa anyu nave mveke wi owo ooleveleleeni. (Sal. 25:11; 51:3, 4) Mveke nikhurumuwelo wa yaale mwaachekenlaanyu, wakhala wooweryeya mveke nikhaviheryo wa asiitokweene a muloko. (Tiy. 5:14, 15) Muhuseryevo echu va yoohesa anyu nave musepe opaka yeeyo wanaawiili. Mweerano yeela, muroromele wi Yehova onahaala woomorelaani ikharari ni woovahereryaani nikhaviheryo nenlo munachunaanyu.—Sal. 103:8-13. w23.08 ipaax. 28-29 ipara. 8-9

Yehoyata aamukhaviherya mwene Yowasi okhala muchu aphaama. Ntoko yookhumelela, vaavaa aareiye mmiravo, Yowasi aanachuna omuhakalaliha Yehova. Nyenya Yehoyata amanle okhwa, Yowasi aahipacerya ovoloweliwa ni ahoolelei yaawo yaahaamwiiwelela Yehova. (2 Math. 24:4, 17, 18) Yehova aahithanana vancipale ni yeeyo. Naamwiihiiha, owo ‘aahaarumihela alipa a miririmu a waalopola ni waakookiherya wa Apwiya. . . , nto achu hiyaakhwenleru owiiwelela.’ Awo hiyaachunneru naari mano vakhaani onwiriyana Sakariya, yoowo aari mulipa a miririmu ni mulipa a mukucho a Yehova ni pirimu a Yowasi. Mwene Yowasi aahilamulela wi Sakariya iiphiwe. (2 Math. 22:11; 24:19-22) Yowasi haamoova Yehova mmukhalelo woophwanelela. Yehova aaloca: “Yaawo anakinyemula anarwa eyevihiwa.” (1 Sam. 2:30, PMM) Wookuchulani, naamwi owo aarino “anakhoco ancipale,” Yowasi aahivoothiwa nnikhuuru nikhaani na anakhoco o Siriya, yaawo yaamuhiyenrye “makhwaca matokotoko.” (2 Math. 24:24, 25) Yowasi aahiiphiwa ni alapeli awe wanthowa na omwinlela ikuhu Sakariya. w23.06 ipaax. 18-19 ipara. 16-17

Murummwa Paulo aahimaliha elukuluku o Efesu alaleeryaka ni ahusihaka michaka saphaama. (Saw. 19:1, 8-10; 20:20, 21) Owo aanaasivela vancipale annawe nave aanachuna waakhaviherya otitelela okhala ororomeleya wa Yehova. Aefesu yaawo Paulo aarepenleiye khalai yaari akapuro a miruku sawootha sa malapelo ni onamulosiwe. Achu o Efesu meecelo aya yaari oonanara nave hiyuuliwano muru. Ochekula wa wuuliha muru waari wawunlaana owiriyaniwa mu mathatelo a epooma nave tho ophiyerya mu ifesta sa malapelo. (Aef. 5:3) Ancipale yaakhala weiwo yayeleela “makhalelo oothene aphaama,” masu yaawo anataphulela “ohiya woona wiicela.” (Aef. 4:17-19) Ehakumve ohuserya yeeyo yaari yeeparipari naari yeeyo yaari yoonanara, Aefesu hiyoona wiicela wa yawuupuxerya-ya-murima. Paulo anwerya orepa wi yaari ntoko wi “mupuwelo aya ori mweepiiphi nave aarakamelana ni okumi onarwa wa Muluku.” Aefesu akina, hiyaatitelenle okhala mu epiiphi. w24.03 epaax. 20 ipara. 2, 4; epaax. 21 ipara. 5-6

Kiteyoni aahiilipixerya vancipale wi arumeele ntoko muthoriha. Vaavaa a Mitiyana yaachawaaya variyari va ekhoco ya ohiyu, Kiteyoni aahiwiikara mmukuma wa Xesereyeli ophiyerya o Muhice Yortano. (Amut. 7:22) Apwanne Kiteyoni aaheemela mu Yortano? Hooye! Naamwi yaari oovelavela, owo ni alopwana awe 300 yaalapuwa nave etitelela owiikara. Vookuchulani, awo yaahaaphwanya a Mitiyana nave yaahaavootha. (Amut. 8:4-12) Kiteyoni aahimuroromela Yehova wi aahaala omvaha ikuru nave owo haawaarino ekeerelani. (Amut. 6:14, 34) Mu elukuluku emoha, Kiteyoni ni alopwana awe yaahiwiikara ni meco mamwene meeli a Amitiyani, nave awo yiiha echawaka yaawenle akameelo. (Amut. 8:12, 21) Naamwi hiiha, nnikhaviheryo na Yehova a Isarayeli yaahaaphara ni waavootha yaawo. Atokweene tho anaphwanela omuroromela Yehova, yoowo ‘ohinavelavela nave ohinaphweeleya.’ Owo onahaala waavaha ikuru vaavaa awo anachunaaya.—Yes. 40:28, 29. w23.06 epaax. 6 ipara. 14, 16

Nnanwerya okhalano murima woohicikinyeya moohipwacha saweeha nnaweryaahu ohoolela. Mwawihiha , mmuroromele Yehova. Moone mukhalelo Paraki aakhumelenleiye phaama nthowa na ororomela ohoolela wa Yehova. Mu elukuluku yeele, achu o Isarayeli hiyaari ooreheryeya ntakhara owana, ophiyerya tho wi hiyaawarino ikaruma sa owana. Nyenya Yehova aaloca ni Paraki wi awane ni muhooleli a anakhoco o Kanani, Sisera, yoowo aarino ikaruma sincipale sa owana. (Amut. 5:8) Mulipa a miririmu amwaamuthiyana Tepora aaloca wa Paraki wi aye mmakupa mammoori a mureyareya wi akumane ni Sisera ni ikaaro sawe sakhoco sawaakhwana 900. Waamukhala wookhweya wa Akanani owana va nipuro nenle na mureyareya nthowa na ikaaro saya, naamwiihiiha, Paraki aahiiwelela. Vaavaa yaakhuruwaaya o Mwaako Tevori, Yehova aamoriha epula etokweene. Ikaaro sakhoco sa Sisera, saacora vancokwani nave Yehova aahimweeriha Paraki ovootha. (Amut. 4:1-7, 10, 13-16) Mmukhalelo mmohamoha, Yehova onahaala oneeriha ovootha wakhala wi ninnaroromela sooleeliherya sawe seiho onanivaheiye orweela mmarehereryo awe. w23.07 epaax. 19 ipara. 17-18

Nnaphwanela okhala oopixa murima wakhala wi ninnachuna okhala okhala wookhala. Hiihaa ntoko alapeli akhalai nnaphwanela okhala oopixa murima ni onweherya Yehova waakhwaniherya soolakelela sawe. (Ahe. 6:11, 12) Piipiliya onnalikanyiha mukhalelo ahu ni mulipa oolima. (Tiy. 5:7, 8) Mulipa oolima onnalapa moowetha wi aale ni ohelela maahi mmiso awe, nyenya owo hanasuwela phaameene elukuluku taani onahaalaaya omela. Mwawihihaa, mulipa oolima onaphwanela owehererya moopixa murima, awehereryaka wi owo onahaala ohepha yeeyo aanleiye. Mmukhalelo mmohamoha, nnaphwanela okhala ooweiwa ni ichu soomunepani, naamwi ‘nihisuwelaka nihiku nenlo apwiya anarwaaya.’ (Mat. 24:42) Hiyaano ninnaweherya moopixa murima, nihikhwaaka minikwa wi mu elukuluku yoophwanelela, Yehova onahaala waakhwaniherya soororomeliha sawe soothene opankeiye. Naahikhala oopixa murima nnamukhala oovelavela oweherya nave vakhaani-vakhaani nnamukhala ocai wa Yehova. Hiyaano nnanwerya okhala ootikitheryeya wa ichu nnoonaahu wi inanwerya onivaha ohakalala wawaaca hiihaano. Nyenya, nakhala oopixa murima, nnahaala owerya ovilela ophiyerya omakuchuwelo ni ovuluxiwa.—Mik. 7:7. w23.08 epaax. 22 epara. 7

Vaavaa nnalikanyihaahu yooloherya yeela ya Taniyeli 2:41-43 ni ikina sa liivuru a Taniyeli ni Wupulula, ninnaphiyerya makuchuwelo wi inaani sa eruku inamweemelela Estatu Unitu ni Krapretanya. Maloko yaala meeli annalapa vamoha ni olamulelo wa elapo yoothene. Vooloca sa olamulelo yoola wa elapo yoothene, Taniyeli olonce wi okhopolomoha waahaala okhala “omwene wooceecheya ni woolipa.” Nyenya ntakhara heeni Taniyeli aaloca wi okhopolomoha waahaala okhala omwene wooceecheya? Nthowa nawi achu a mweelaponi, yaawo aneemelela oloko, annaakaaha owerya waya wa opaka ichu mwakuru ntoko olipa wa muthipo. Hiyaano nnanwerya ohuserye iparipari soochuneya mu eruku Taniyeli otharinheiye. Ntoko yootakiherya, noohuserya wi Olamulelo wa Elapo Yoothene ya Ankolo-Amerikana onnooniherya ikuru sawe mmikhalelo soohiyanahiyana. Ntoko yootakiherya, Estatu Unitu aari variyari va ilapo seiyo saavonthe ekhoco Yoopacerya ni Yanawiili ya Elapo Yoothene. Nyenya olamulelo yoola onamvira okhalaka wooceecheya, nave onamutitelela okhala hiihaa, nthowa nawi achu ari ookawanyeya nave hanasiveliwa ni olamulelo yoowo. Eparipari ekina nihusenryaahu ti yawi omwene yoola onahaala okhala wookuchula olamulela, Omwene wa Muluku ohaakumve otoloxa olamulelo woothene wa achu. w23.08 ipaax. 10-11 ipara. 12-13

Ikwaha sincipale, Tavite aanasooseya murima nthowa na makacamiho ni saweeha aahooleleiye. (Sal. 18:4, 5) Mwawiihiiha, osivela woohimala ni okhapelela wa Yehova waahimulipiha. Yehova aahimukuxa nthamwene awe ooceecheya nave amukeriha “onikhuwani na munyepu” vamoha ni nipuro oriwo ‘maahi ooriirya.’ Ntoko yookhumelela, Tavite aahiphwanya ikuru sawe wanawiili nave aatitelela omurumeela Yehova moohakalala. (Sal. 18:28-32; 23:2) Mmukhalelo mmohamoha, olelo ‘nthowa na osivela woororomeleya wa Apwiya hannuukhuwa’ vaavaa nnahoolelaahu saweeha ni ochimaka ntakhara okumi. (Wiik. 3:22; Ako. 1:11) Ilukuluku sincipale okumi wa Tavite waari va yawoopiha nave owo aahikhalano amwiicani ancipale oowerya. Mwawiihiiha, osivela wa Yehova waahimweeriha okhala ookhapeleleya. Tavite aanawerya woona wi Yehova aari ni yoowo ilukuluku soothene nave eyo yaanamuhakararya. Mwawiihiiha, owo aanwerya omwiipela Yehova: ‘Ookaakiha mu woova waka woothene.’ (Sal. 34:4) Woova wa Tavite waari weeparipari, nyenya osivela wa Yehova waari woolipaxa opwaha woova wawe. w24.01 epaax. 30 ipara. 15-17

Muhuserye orweela wa soolakelela soonanara sa Yowasi. Yehoyata amanle okhwa, Yowasi aapacerya okhalano asinthamwene oonanara. (2 Math. 24:17, 18) Owo aalakelela ocharihaka ikano sa ahooleli a Ayuta, yaawo yaahaamusivela Yehova. Akhweya munamweemererya wi Yowasi aaphwanela okhala ocai wa onthamwene wa mukhalelo yoowo. Ohiya yeeyo, owo aari mulolo nave alakelela waawiriyana anamiruku yaale oonanara. Pirimu awe Sakariya aaheererya omookolola nave Yowasi aalamulela wi iiphiwe. (2 Math. 24:20, 21; Mat. 23:35) Wookuchulani, owo aahiiphiwa ni alapeli awe. (2 Math. 24:22-25) Ichu saahaala omweecela phaama waakhanle wi ootitelela onwiriyana Yehova ni yaale anamusivela! w23.09 epaax. 9 epara. 6

Yesu aanasuwela wi Petru anwerya otitelela okhala oororomeleya. Mwawiihiiha, Yesu mooreera murima aahiloca wa Petru “ohoove.” Masu yaala annooniherya wi Yesu aanamuroromela Petru, nave ela yaahitoroka okumi awe. Ohoolo waya, Petru ni munnawe Antre yaahihiya muteko aya wa ototha ihopa nave enamuhoola Yesu mu orummwa awe. Wa nthowa na yeeyo, awo yaahaakhela mareeliho mancipale a Yehova. (Mar. 1:16-18) Ntoko oomuchara a Kristu, Petru aahikhalano okumi woohakalaliha. Owo aahimoona Yesu aapenuxaka areca, iikaraka Masololo nave ophiyerya wi aaviihaka alipa ookhwa. (Mat. 8:14-17; Mar. 5:37, 41, 42) Petru tho aahikhalano yawoona ya Yesu ntoko mwene oomwaahiyu a Omwene wa Muluku, nave eyo yaahivolowela vancipale okumi awe. (Mar. 9:1-8; 2 Pet. 1:16-18) Petru aahoona ichu seiyo ahaahaaleiye woona ahikhanle oomuchara a Yesu. Mweeparipari, owo aahakalalaxa nthowa na owerya ovootha miyoonelo sawe soohiphwanelela ni okhalano ekari ya waakhela mareeliho mancipale! w23.09 epaax. 21 ipara. 4-5

Mu ekaarata awe yoopacerya, murummwa Petru ooloca sa “osivela weeparipari.” Osivela ntoko yoola onnanikhaviherya okhurumuwela, ohiya pahiru soocheka savakhaani nyenya ‘soocheka sawaaca.’ (1 Pet. 4:8) Akhweya Petru aahuupuwela yeeyo aahusenryeiye ni Yesu mu iyaakha sa muculi vooloca sa okhurumuwela. Mu elukuluku ene yeeyo Petru eemererya wi aakhala ooreera murima vaavaa owo aalonceiye wi munna aaphwanela olevelela “ikhwa thanu napiili.” Nyenya Yesu aahimuhusiha—Petru, ophitaanyerya oothene ahu—olevelela ophiyerya “ikwaha makhumi mathanu napiili ni thanu napiili 77” naari wi ikwaha soothene onakhalaaya woochuneya. (Mat. 18:21) Waakhanle wi munnoona okhala woovila opharihela ekano yeela, muhiceecheye! Oothene ahu ninnakhalano ilukuluku seiho onakhalaaya woovila olevelela. Echu yoochuneya ori omulevelela munninyu ni opaka onthamwene ni yoowo. w23.09 epaax. 29 epara. 12

Ari mmirimani mwa ehopa, Yona aanaroromela wi Yehova aahaala wiiwa nivekelo nawe nawiiyeviha nave wi Yehova aahaala omukhaviherya. Yehova aahivuluxa okumi wa Yona, nave ohoolo waya, owo aari ooreheryeya waakhwaniherya murici yoowo Yehova aamvanheiye. (Yona 2:10–3:4) Apwanne yohintoko weereya ni nyuwaano ohoolela nikacamiho noovilaxa nave muhinawerya omuleela Yehova mukhalelo mwiisoonaanyu? Apwanne munniisoona okhala ooceecheyaxa ophiyerya muhinawerya ohuserya? Muupuwele wi Yehova oosuwela phaameene yeeyo munahoolelaanyu. Mwawiihiiha, naamwi mpanke nivekelo nookhweya, munanwerya ororomela wi Yehova onahaala woovahaani yeeyo ene munachunaanyu. (Aef. 3:20) Wakhala wi ohooxeya omwiilini naari mmuupuweloni onneeriha okhala woovila wa nyuwaano omwaalakhanya ni omuhuserya Piipiliya, mweererye owiriyana waalakhanyiwa wa Piipiliya wookaravaariwa naari soolaleeryiwa ikina inathipeleya Mpiipiliyani. Owiriyana macipo ni woona ixilema sa mu jw.org onanwerya tho wookhaviheryaani. Moorweela wa ovekela wa Yehova ni waavya naakhulo mu soovaha soomunepani owo onavahereryeiye, nyuwaano munanwopa owo wi oolipiheeni. w23.10 epaax. 13 epara. 6; epaax. 14 epara. 9

Musakala ni ipa sa Muluku saatekiwe ohoolo waya o Yerusalemu saanatepa olikana mpuwa. Mpuwa yaahikhalamo mapuro meeli—“Nipuro Naweela” ni “Nipuro Naweelaxa”—yaawo yaavalaanyihiwe ni ekurtina. (Ahe. 9:2-5; Muk. 26:31-33) Mpuwa mwa Nipuro Naweela waahikhalamo epanthi, altare ntakhara opahavo mukucho ni emeesa ya iphaawu sootheteiwa. Pahiru ‘alipa a mukucho yaathanliwe’ yaahikhalano weemereryiwa ovolowa mu Nipuro Naweela wi ephare miteko saya saweela. (Nam. 3:3, 7, 10, PMM) Mu Nipuro Naweelaxa aahikhalamo arka awaataana aahuruweliwe ni ooru yoowo ooniherya wi Yehova aari vaavale. (Muk. 25:21, 22) Pahiru mulipa a mukucho mutokweene taarino weemereryiwa wa ovolowa mu Nipuro Naweelaxa ekwaha emoha vayaakhani mu Nihiku na Oveleela Soocheka. (Onam. 16:2, 17) Owo aanavolowa nnikhami na axinama wi aveleele soocheka sawe ni sa muloko woothene. Wookuchulani, Yehova, aahihiya mookwakwaleya yootaphulela yeeparipari ya mukhalelo yoola wa musakala.—Ahe. 9:6, 7. w23.10 epaax. 27 epara. 12

Wiiliwiili Mmasu a Muluku, ninnaphwanyamo nlamulo na “osivelana mukina ni mukhwaawe.” (Yoh. 15:12; Aro. 13:8; 1 Ate. 4:9; 1 Pet. 1:22; 1 Yoh. 4:11) Mwawiihiiha, osivela mukhalelo wa mmurimani naari wa omuchu wampuwa, nave haavo muchu onawerya woona murima ahu. Vano, nni niwerye hai wooneiha osivela wahu wa mukina ni mukhwaawe? Moorweela wa masu ahu ni saweera sahu. Sookhalavo mikhalelo mincipale seiyo nnaphwanelaahu wooniherya wi ninnaasivela anna ni arokora ahu. Moone sootakiherya ikina: “Muloceke eparipari mukina ni mukhwaawe.” (Sak. 8:16, PMM) “Mukhale a murecele mukina ni mukhwaawe.” (Mar. 9:50) Mutitelele wooniherya “ocicimihana mukina ni mukhwaawe.” (Aro. 12:10) “Mwaakhelaneke mukina ni mukhwaawe.” (Aro. 15:7) “Mutitelele . . . olevelelana mukina ni mukhwaawe.” (Ako. 3:13) “Mutitelele woorolana mirici mukina ni mukhwaawe.” (Aka. 6:2) “Mutitelele ohakararyana mukina ni mukhwaawe.” (1 Ate. 4:18) “Mutitelele . . . otikitheryana mukina ni mukhwaawe.” (1 Ate. 5:11) “Mvekelelaneke mukina ni mukhwaawe.”—Tiy. 5:16. w23.11 epaax. 9 ipara. 7-8

Mahiku oothene, ninnapaka soolakelela seiho onachuneya okhalano nroromelo noolipa. Ntoko yootakiherya, ninnapaka soolakelela inaavolowela asinthamwene ahu, mathatelo, exikola, othela, anamwane ni muteko. Nnaphwanela wiipakela makoho ntoko ala: ‘Apwanne soothanla saka sinnooniherya wi kinnaroromela wi mukhalelo yoola wa ichu ti wa elukuluku vakhaani nave wi moohilekela onahaala oraceeliwa ni elapo evyaani ya Muluku? Naari wi soothanla saka sinavoloweliwa ni achu yaawo anoona ntoko wi okhwa makuchuwelo wa ichu soothene?’ (Mat. 6:19, 20; Luka 12:16-21) Nnahaala opakaka soothanla saphaama wakhala wi noolipiha nroromelo nahu nawi elapo evyaani enahaala orwa moohilekela. Ninnahoolela makacamiho yaawo onachuneya okhalano nroromelo noolipa. Akhweya ninnahoolela wiikariwa, ereca etokweene, naari echu ekina yeeyo enaniceecheiha. Woopaceryani, akhweya nnahaala woonaka wi nri ooreheryeya wi nivilele ni makacamiho ahu. Nyenya makacamiho ntoko yaala wiiliwiili annamaliha elukuluku yincipale, mwawiihiiha, nnahaala ochuna nroromelo noolipa wi nivilele ni otitelela omurumeela Yehova moohakalala.—1 Pet. 1:6, 7. w23.04 epaax. 27 ipara. 4-5

Yehova onaweherya wi neereke ichu mwawiiwanana ni mavekelo ahu. Ntoko yootakiherya, munna onanwerya omveka Yehova wi amukhaviherye ovahiwa ifolka wi awerye woonela muthukumano wa muceche. Ti mwawiihai Yehova aahaaleiye waakhula nivekelo nenlo? Owo onanwerya omvaha olipa murima wi aloce ni apatarau awe. Nyenya munna onaphwanela okhala oorehereya ochariha yeeyo onaphwaneleiye weera. Vakina vaya, onamuchuneya oveka mwawuuluulela. Ophiyerya tho wi owo akhweya onamuchuna otoroka elukuluku ya olapa ni namuteko mukina. Naari onanwerya oveka ifeeriya seiho sihinahaala ochuna oliviwa. Yehova onaweherya wi nivekeleke mwawuuluulela vooloca sa ichu soochuneya wa hiyaano. Yesu aahooniherya wi mavekelo ahu makina hiyaahaala waakhuliwaka mu elukuluku yeeyo nnachunaahu. (Luka 11:9) Hamunaphwanela ovelavela! Mvekeleke ovinyerya vathi va murima, ni moohihiyererya. (Luka 18:1-7) Vaavaa nnapakaahu yeela wa Yehova vooloca sa echu emohamoha, ninnooniherya wa Yoowo wi ninnaroromela wi mavekelo ahu tahi asiiyo. Ohiya yeeyoru, ninnooniherya nroromelo mu owerya wawe wi onahaala onikhaviherya. w23.11 epaax. 22 ipara. 10-11

Yehova aahimuroromeliha nthamwene awe Aparahamu wi owo aahaala omvaha mwaana ni wi maloko oothene a veelaponi yaahaala waakhela mareeliho orweela wa yoowo. (Map. 15:5; 22:18) Aparahamu aahikhalano nroromelo noolipa wa Muluku, wanthowa na yeela, owo aahilekecheya moomalela wi Muluku aahaala waakhwaniha yoororomeliha awe. Nyenya Aparahamu aarino iyaakha 100 nave Sara 90, nlelo mutheli yoola oororomeleya hawaarino mwaana. (Map. 21:1-7) Moohipwacha yeeyo, Piipiliya oni: “Moorweela wa ewehereryo, [Aparahamu] aaroromela wi aahaala okhala tiithi a maloko mancipale mwawiiwanana ni yeeyo Muluku aalonceiye.” (Aro. 4:18) Nave nyuwaano mohoona wi yeeyo Aparahamu aaweheryeiye yoheereya chiri. Owo aahikhala tiithi a mwaana yoowo aanweheryeiye, Isaki. Nyenya ntakhara heeni Aparahamu aanaroromela wi Yehova aahaala waakhwaniherya yoororomeliha awe? Aparahamu aahimusuwela phaameene Yehova, wanthowa na yeeyo “aalekecheya wi yeele [Muluku] aaroromelinheiye” yaahaala waakhwanela. (Aro. 4:21) Yehova aahimweemererya Aparahamu nave aahimweera awookololowa wanthowa na nroromelo nawe.—Tiy. 2:23. w23.12 epaax. 8 ipara. 1-2

Mmiravo ori oororomeleya onnathokororya phaama mirici sawe soothene. Muupuwele yootakiherya yoophaameya ya Yesu. Yesu hintonko okhala khamiteko naari muchu ooporora. Ohiya yeeyo, owo aahaakhwaniherya mirici Yehova amvaheiye, naamwi waari woovila weerano yeeyo. Owo aanaasivela achu—xaxaxa oohuserya awe—nave aari ooreheryeya ovaha okumi awe ntakhara yaawo. (Yoh. 13:1) Munanwerya omutakiherya Yesu moorweela wa olapa mwakuru wi mwaakhwaniherye murici vyakala munavahiwaanyu. Wakhala wi hamusuwenle phaama mukhalelo wa weerano, mukhale awiiyeviha nave mveke nikhaviheryo na anna amavyakelo. Muhaakhwaneliwe ni opaka pahiru ichu savakhaani soochuneya. (Aro. 12:11) Ohiya yeeyo, mwaakhwaniheryeke mirici sanyu, ntoko munamweerela “Yehova, ohiya achu.” (Ako. 3:23) Eparipari wi nyuwaano tahi mwa muchu oophaameya, mwawiihiiha mukhale oophimelela nave tho mweemererye yoohesa vyakala muneeraanyu mpake.—Mas. 11:2. w23.12 epaax. 26 epara. 8

Ninnahakalala vaavaa nnapatisiwaahu ni opaka makupa mu emusi ya Yehova. Yaale erino ekari ene yeela, enammweemererya mulipa oomurepa salmu Tavite, yoowo olonce wi: “Oohakalala ti yoole nyuwo munamuthanlaanyu nave mmuruuha vakhiviru vanyu, [Yehova].” (Sal. 65:4, PMM) Yehova hanamwiichanela muchu vyakala mpa mwawe. Owo onawaacamela yaale anooniherya wi annachuna okhalano onthamwene wawaacameleya ni Yoowo. (Tiy. 4:8) Vaavaa nyuwaano muniiveleelaanyu wa Yehova ni opatisiwa, munanwerya ororomela wi, ovinyerya vaavaa, owo ‘onamooyeeheryaani mareeliho, ophiyerya tho esareye moopwahaxa.’ (Mal. 3:10; Yer. 17:8) Opatiso mapacereryo. Nyuwaano munanwerya opaka owetha wanyu wi mukhaleke mwawiiwanana ni nlakano nanyu na wiiveleela, naamwi mu ilukuluku sa saweeha naari weereryiwa nroromelo. (Ekle. 5:4, 5) Ntoko oohuserya a Yesu, nyuwaano munahaala ochariha yootakiherya ni malamulo a Yesu moohihiyererya. —Mat. 28:19, 20; 1 Pet. 2:21. w24.03 epaax. 8 ipara. 1-3

Vano, hanka wakhala wi nyuwaano ni oothelana anyu hamunamaliha elukuluku vamoha? Tiheeni munaphwanelaanyu weera? Muthokororye sa mooro. Mooro honatitelela ovarela meekhaya. Nyuwaano munaphwanela otitelela ohelavo ikhuuni. Moolikana, munoona hai opacerya moorweela wa omaliha elukuluku vakhaani vamoha nihiku nnihiku? Mpakeke ichu seiho sinoosivelani oopiili. (Tiy. 3:18) Moorweela wa opacerya opaka ichu ikhaani, akhweya munamoona osivela wa mmoha ti mmoha wunnuwaka wanaawiili. Ncicimiho ti noochuneya mu othela. Owo ori ntoko okisixeeniyu oneeriha mooro ovarela. Ahirivo okisixeeniyu, mooro onnaakuvela oxipha. Mmukhalelo mmohamoha, ohirivo ncicimiho, mutheli onanwerya woona wi osivela waya onnariirya mwawaakuveya. Moolikana, mulopwana ni mwaariye, yaawo anooniheryana ncicimiho mukina ni mukhwaawe, anneeriha wi osivela waya otitelele okhala woolipa. Nyenya, muupuwele wi echu yoochuneya tahi wuupuwela wi munnamucicimiha oothelana anyu, nto echu yoochuneya ori wi oothelana anyu ooneeke wi munnamucicimiha yoowo. w23.05 epaax. 22 epara. 9; epaax. 24 ipara. 14-15

Mpiipiliyani, alapeli oororomeleya a Muluku annaloca sa ilukuluku seiyo yaaryaaya awuukhuwa ni oothukumela nthowa na amwiicani aya naari okhinyererya okina. (Sal. 18:4; 55:1, 5) Moolikana tho nnanwerya ohoolela waakaaha oxikola, omutekoni, wa amusi ahu naari tho wa alamuleli. Ophiyerya tho nnanwerya ohala vakhaani okhwa nthowa na nikacamiho nammoori. Variyari va ilukuluku seiya, nnanwerya wiisoona ohikhapeleleya ntoko nikwiya. Ti mwawiihai Yehova onanikhaviheryeiye mu ilukuluku seiho soovila? Owo onnanihakararya ni onimaaliha. Mmaliheke elukuluku yincipale ni Yehova, mvekelaka wa yoowo nave tho mwaalakhanyaka Masu awe. (Sal. 77:1, 12-14) Wakhala wi mookhalano yookhovelela ene yeela, echu yoopacerya akhweya munahaalaanyu weera vaavaa munakhalaanyu onyeenyeya ori waavya nikhaviheryo na Tiithi anyu awirimu. Mmuleele Yehova yeeyo munoovaanyu nave tho yeeyo enaweerihaani okhala awuukhuwa. Voocharela munwiriyane yoowo moorweela wa waalakhanya masu awe, nave munahaala woona mukhalelo owo onoohakararyeiyeni.—Sal. 119:28. w24.01 ipaax. 24-25 ipara. 14-16

Ti woochuneya okhalano nchuno noolipa wi mwaakhwaniherye yoolakelela anyu yoomunepani. Wakhala wi mookhalano nchuno noolipa na waakhwaniherya yoolakelela anyu munahaala wiilipixerya weerano yeeyo. Nave wakhala wi nookhalano nchuno noolipa, nnanwerya waakhwaniherya yoolakelelaahu. Mwawiihiiha, tiheeni munaphwanelaanyu weera wi mwaakhwaniherye yoolakelela anyu? Mvekele mvekaka nchuno ntokweene. Moorweela wa munepa awe, Yehova onanwerya wookhaviheryaani waakhwaniherya yoolakelela anyu. Ikwaha ikina ninnatikitherya soolakelela nthowa nawi ninnasuwela wi nnanwerya okhwaaniherya, nave eyo echu yaphaama. Nyenya akhweya hinaanoru nchuno neeparipari wi nakhwaniherye seiho. Muupuwelele vooloca sa ichu seiho Yehova opankeiye ntakhara nyuwaano. (Sal. 143:5) Murummwa Paulo aanuupuwelela vooloca sa mahala matokweene a Yehova wa yoowo, nave eyo yaahimukhaviherya opaka owetha wawe ntakhara Yehova. (1 Ako. 15:9, 10; 1 Tim. 1:12-14) Moolikana, vaavaa munuupuwelelaanyu vancipale vooloca sa ichu Yehova opankeiye ntakhara nyuwaano, munahaala okhalano nchuno ntokweene na waakhwaniherya yoolakelela anyu.—Sal. 116:12. w23.05 epaax. 27 ipara. 3-5

Ninnamuhakalaliha Tiithi ahu a wirimu vaavaa nnacicimihaahu nsina nawe. (Sal. 119:108) Apwanne eyo enataphulela wi Muluku a ikuru soothene onalikana ni achu oohiphaameya yaawo anachunaxa ocicimihiwa wi ekhale oolipiheya? Hooye. Vaavaa nnamucicimihaahu Tiithi ahu a wirimu, ninnakhaviherya okhooca sawootha seiho sinamvolowela mmoha ti mmoha a hiyo. Satana onneemererya wi haavo onahaala waakiha moororomeleya nsina na Muluku. Owo olonce wi haavo ori oororomeleya wa Muluku vaavaa muchu oneehiweiye. Ooloca tho wi oothene ahu nnanwerya omaala omurumeela Yehova wakhala wi nohuupuwela wi eyo ti yaphaama wa hiyo. (Yupu 1:9-11; 2:4) Nyenya Yupu aanasuwela wi Satana aari nawoothe. Hanka nyuwaano? Mmoha ti mmoha a hiyo ookhalano ekari ya waakiha nsina na Tiithi ahu ni omuhakalaliha nimurumeelaka moororomeleya. (Mas. 27:11) Mweeparipari, ela ekari etokweene weerano yeela. w24.02 ipaax. 8-9 ipara. 3-5

Evinre elukulukuya ya Mose ni Yosuwa, Yehova aanaathanla athoryiha wi yaahooleleke achu awe. Nave, variyari va ilukuluku sa mamwene, Yehova aahaathanla alipa a miririmu wi yaahooleleke achu awe. Mamwene oororomeleya yaanachariha miruku sa alipa a miririmu. Ntoko yootakiherya, Mwene Tavite mwawiiyeviha aaheemererya ekano ya mulipa a miririmu Natani. (2 Sam. 12:7, 13; 1 Math. 17:3, 4) Mwene Yehosafate aahipharihela ohoolela yoowo mulipa a miririmu amvaherenryeiye wi aahoolele ni waalipiha wi ‘ekhaleno nroromelo wa alipa a miririmu a [Muluku].’ (2 Math. 20:14, 15) Vaavaa Mwene Esekiya aareiye va yawoopiha, aahiveka nikhaviheryo wa mulipa a miririmu Yesaya. (Yes. 37:1-6) Ilukuluku soothene mamwene yaacharihaaya ohoolela wa Yehova, awo yaanareelihiwa nave achu yaanakhapeleliwa. (2 Math. 20:29, 30; 32:22) Yaari yawooneya wi Yehova aapharihela alipa a miririmu awe wi yaahoolele achu awe. w24.02 epaax. 21 epara. 8

Satana onachuna wi nikhaleke vamoha ni achu yaawo anahaala oneeriha okhala woovila wa hiyaano ochara malakiheryo a Yehova. Nnaphwanela wuupuwelela wi waataana wahu honakwateleleya ni yaale nnakhalahuno vamoha. Mwawiihiiha, nnaphwanela okhalano ekaasoope mu ochekula wa mu interneti. Nnaphwanela owaniha ni muupuwelo wa elapo yeela wawi meecelo oocapaheya taweemereryeya. Hiyaano noosuwela wi ti yoonanara. (Aef. 4:19, 20) Ti waphaama wiikoha: ‘Apwanne kinnakhalano ephoole ya waapaka asinthamwene oohichuneya ntoko asinthamwene oomutekoni, ooxikola naari mano asinthamwene akinaaku yaawo ahinacicimiha malamulo awookololowa a Yehova? Apwanne kinnaakiha moolipa murima malakiheryo a Yehova, naamwi akina ekiichanaka ntoko mulolo mu weerano yeeyo?’ Ntoko etharihiwaaya mu 2 Timotiyu 2:20-22, nnaphwanela tho okhalano ekaasoope vaavaa nnaathanlaahu asinthamwene awaacameleya mpuwa mwa muloko Weekristu. Nnaphwanela wuupuwela wi akina akhweya hewerya onikhaviherya otitelela okhala oororomeleya mmuteko ahu wa Yehova. w24.03 ipaax. 22-23 ipara. 11-12

Apwanne mohintoko waanyiherya mukhalelo Yehova oreiye? Naamwi Yehova ari oohooneya, Piipiliya onnamuloca mmikhalelo soohiyanahiyana. Owo onniichaniwa ntoko ‘omwaleela ni naakiho,’ ni “mooro wootoloxa.” (Sal. 84:11, PMM; Ahe. 12:29) Va munyukhuni vawe yaakhalavo echu yaalikana ni nluku nawaarya, muthipo wawaarya ni ekhwiini yawaarya. (Ese. 1:26-28) Woona wi hannawerya omoona Yehova, nnanwerya okhwaaka minikwa waakhanle wi owo onnanisivela. Akina anuupuwela wi Yehova harwa aasivela nthowa na saweera saya sakhalai. Yehova onniiwexexa mukhalelo yoola achu aniisoonaaya ni mukhalelo eyo enanivolowelaaya. Wi anikhaviherye, owo onnaloca mikhalelo sawe saphaama Mpiipiliyani. Masu mamoha anathariha omuchu wa Yehova ti osivela. (1 Yoh. 4:8) Osivela onnamusuwanyeiha. Nave onnavolowela ichu soothene onapakeiye. Osivela wa Muluku ti waphaama, wakuru, ophiyerya wi onnawooniherya yaale ahinamusivela.—Mat. 5:44, 45. w24.01 epaax. 26 ipara. 1-3

Yehova aahimuthanla Mose wi aahoolele Aisarayeli okhuma Oyikuputu, nave ntoko sawooniherya sawooneya owo aanaahoolela othana nneeku naweemela nave ohiyu ni mooro. (Muk. 13:21) Mose aanachara neeku naweemela, nenlo naamukunxe owo ni Aisarayeli naakerihaka o eniya yooxeera. Nyenya achu yaahikhala awoova vaavaa yoonaaya wi yaari veeri, eniya ni anakhoco Oyikuputu. Yehova aahimpharihela Mose waahoolela achu awe ophiyerya weiwo. (Muk. 14:2) Muluku aahiwoopola mmukhalelo wootikhiniha. (Muk. 14:26-28) Mu iyaakha 40, Mose aahititelela ororomela neeku wi aahoolele achu a Muluku mutakhwani. (Muk. 33:7, 9, 10) Orweela mu neeku, Yehova aanaloca ni Mose, nave owo aanavahererya malakiheryo wa achu. Aisarayeli yaanawerya woona mookwakwaleya wi Yehova aanamparihela Mose wi aahooleleke. w24.02 epaax. 21 ipara. 4-5