Otupuru

Apwanne ikwaha ikina munnoona okhala woovila wiiwelela? Mwene Tavite oona tho hiihaa, ti nthowa nene owo aavekenleiye wa Muluku: “Mukivahe munepa wawiiwelela.” (Sal. 51:12, PMM) Tavite aanamusivela Yehova. Naamwiihiiha, ikwaha ikina, owo aanoona okhala woovila omwiiwelela nave eyo enneereya tho ni hiyaano. Ntakhara heeni? Yoopacerya, nthowa nawi na achu oohiphaameya, nave niyariwe ni mathitimanelo a ohiiwelela. Yanaawiili, nthowa nawi Satana ikwaha sincipale onneererya oneeriha okhala ntoko yoowo, wi nivaanyihaneke ni Yehova hiihaa ntoko owo. (2 Ako. 11:3) Yaneeraru, hiyaano nrukureryiwe ni meecelo oomwaryeya a elapo yeela, “munepa yoowo vano onalapa mwa anamwane oohiiwelela.” (Aef. 2:2) Nnaphwanela wiilipixerya wi niwanihe ni mathitimanelo a yoocheka ni okhinyererya wa Satana ni elapo awe enaneeriha okhala oohiiwelela. Ninneerano yeela wi nimwiiwelele Yehova ni achu yaawo aathanlileiye wi enilamuleleke. w23.10 epaax. 6 epara. 1

Tiheeni nnahuseryaahu mu yootikhiniha ya Yesu ya otatuxa maahi ekhala eviinyu? Ninnahuserya okhala awiiyeviha. Yesu hiiruminhe vooloca sa yootikhiniha yeele, nave mweeparipari owo hintonko wiirumiha vooloca sa echu vyakala aapankeiye. Moohiyana, mwawiiyeviha ni mwawuuluulela owo aaveleela ncicimiho noothene wa Atiithi awe. (Yoh. 5:19, 30; 8:28) Wakhala wi ninnamutakiherya Yesu moorweela wa otitelela okhalano moonelo wa wiiyeviha vooloca sa hiyo, hinnahaala wiirumiha vooloca sa echu vyakala nnapakaahu. Hankooni niirumiheke, ohiya vooloca sa hiyo nyenya vooloca sa ekari nryaahuno ya omurumeela Tiithi ahu aphaamaxa. (Yer. 9:23, 24) Nnaphwanela omvaha ncicimiho noothene onaphwaneleiye. Opwaha soothene, echu taani yaphaama naahaalaahu opaka nihirino nikhaviheryo na Yehova? (1 Ako. 1:26-31) Vaavaa nnakhalaahu awiiyeviha, hanchuna wiiruuhela ncicimiho ntakhara ichu saphaama niweerenlaahu akina. Ninnasiveliwa osuwela wi Yehova onnoona nave onnavaha esisapo yeeyo nnapakaahu. (Mulikanyihe ni Mateyu 6:2-4; Ahe. 13:16) Chiryeene, ninnamuhakalaliha Yehova vaavaa nnamutakiheryaahu Yesu mu wooniherya wiiyeviha.—1 Pet. 5:6. w23.04 epaax. 4 epara. 9; epaax. 5 ipara. 11-12

Mooveereliwa, murummwa Paulo ohaaceenyerya Akristu okuha mu nipuro noopacerya soochuna sa akina. Nni nipharihele hai ekano yeela variyari va mithukumano? Muupuwele wi hiihaa ntoko hiyaano, akina tho annachuna opaka makupa. Muupuwele ela: Vaavaa munachekulaanyu ni asinthamwene, apwanne munoona oloca meekhiinyu muhaavahaka ekari wi eloce? Mweeparipari hooye! Munnachuna tho wi awo epake makupa mu ochekula. Mmukhalelo mmohamoha, mmithukumanoni, ninnachuna wi ancipale a annihu evahererye maakhulo. Mukhalelo mmoha waphaama wa waalipiha annihu ori moorweela wa waavaha ekari wi yooniherye nroromelo aryaayano moorweela wa maakhulo aya. (1 Ako. 10:24) Mwawiihiiha, nnaphwanelaahu ovahererya maakhulo ookhuveya, hiihaa achu akina tho anahaala okhalano ekari ya ovaha maakhulo. Naamwi mvahaka maakhulo ookhuveya, mweererye ohiloca ipontu soothene mu elukuluku emohamoha. Wakhala wi moovahererya maakhulo mulocaka soothene iri va iparakrafo, hehala echu wi akina evahe maakhulo. w23.04 ipaax. 22-23 ipara. 11-13

Hiyaano ninnaphwanela wuupuwelela wi ti woochuneyaxa otitelela waakhaviherya akina, xaxaxa oorweela mmuteko woolaleerya. Mmuteko woolaleerya nnaphwanela okhala awaakuveya. Mmuteko woolaleerya ninnaaphwanya achu a mapuro oohiyanahiyana yaawo arino sookhovelela ni malapelo oohiyanahiyana. Murummwa Paulo aahisuwela wiikhoveleliha, nave hiyaano nnanwerya ohuserya vancipale ni yootakiherya awe. Yesu aamuthanla Paulo ntoko “murummwa a maloko.” (Aro. 11:13) Paulo aahaalaleerya Ayuta, Akriki, achu yaahusenryexa ni achu oohihuserya, alamuleli ni mamwene. Wi atannye murima wa achu oothene, Paulo aahikhala “ichu soothene wa achu a mukhalelo woothene.” (1 Ako. 9:19-22) Paulo aanathokororya sookhovelela ni yeeyo awo yaaroromelaaya, mwawiihiiha, owo aaniiwananiha ni mukhalelo aalaleeryeiye. Hiyaano tho nnanwerya okhumelela phaama mmuteko woolaleerya wakhala wi ninniiwananiha ni soochuna sa achu. w23.07 epaax. 23 ipara. 11-12

Okhala oomaaleleya henataphulela wi mwa muchu ooceecheya, nto mukhalelo wa achu oolipa. Ti woochuneya okhalano ikuru sa mpuwa wi ntitelele okhala oomaaleleya vaavaa nnahoolelaahu mikhalelo soovila. Wiichacala naari omaaleleya, mukhalelo mmoha wa “yawiima ya munepa.” (Aka. 5:22, 23) Masu a Ekiriki awi “wiichacala” naari omaaleleya yaanaphariheliwa wi elociwe sa akavalo ootakhwani yaawo yaakusiwa wi enakhala vaate. Emanle okuxiwa mutakhwani nave enakhala vaate, akavalo annakhala oomaaleleya ni oohuukhuwa, nyenya awo annatitelela okhala akuru. Vano hanka hiyo? Ti mwawiihai nneeraahu nikhale oomaaleleya nave mu elukuluku emohamoha okhala oolipa? Haniwerya weerano yeeyo mukhatiihu. Nnaphwanela ovekela nivekaka nikhaviheryo na Muluku wi ninnuwihe mukhalelo yoola wooreera. Sookhalavo sootakiherya sincipale seiho sinooniherya wi ti wooweryeya ohuserya okhala oomaaleleya. Anna ni arokora ancipale aatitelela okhala oomaaleleya, naamwi vaavaa yaakhalihiwaaya moonanara, nave aahiya yootakiherya yaphaama wa achu yaavarerya.—2 Tim. 2:24, 25. w23.09 epaax. 15 epara. 3

Mooveereliwa, Yohani aahiwoona atokweene 24 emulapaka Yehova wirimu. Awo yaanamucicimiha Muluku, nave yaanaloca wi owo aahikhalano ophwanelela wa waakhela “ovuwa, ncicimiho ni owerya.” (Wup. 4:10, 11) Ankeelo tho oororomeleya aakhalano mathowa mancipale a omucicimiha ni omvuwiha Yehova. Awo anakhala wirimu vamoha ni yoowo nave aamusuwela phaama Yehova. Awo annoona mikhalelo sawe moorweela wa yeeyo onapakeiye. Vaavaa anamoonaaya Yehova apakaka ichu, awo annaceenyeryeya omucicimiha yoowo. (Yupu 38:4-7) Hiyaano tho nnaphwanela omucicimiha Yehova mmavekelo ahu, nlocaka yeeyo enansivela ni yeeyo nnathamalelaahu wa yoowo. Vaavaa munamwaalakhanyaanyu ni omuhuserya Piipiliya, mweererye woona mikhalelo sa Yehova, xaxaxa seiho sinootikhinihaani. (Yupu 37:23; Aro. 11:33) Voocharela, mmuleele Yehova mukhalelo muniisoonaanyu vooloca sa mikhalelo seiho. Nnaphwanela tho omucicimiha Yehova woona wi onnanikhaviherya hiyo vamoha ni anna ni arokora ahu oothene.—1 Sam. 2:1, 2. w23.05 ipaax. 3-4 ipara. 6-7

Mu 1919, Papulu Mutokotoko, aahiyeleela waavareryela achu a Muluku. Mu eyaakha yeele, “kapuro oororomeleya ni amiruku” aahipacerya olapa wi achu a mirima saphaama epacerye weeca mu “Mphiro Waweela.” (Mat. 24:45-47; Yes. 35:8) Muteko yoowo akina yaapankaaya khalai wa orehererya mphiro yoola waahaakhaviherya achu yaawo yaapacenrye opaka mukwaha mu mphiro yoowo ohuserya sincipale vooloca sa Yehova ni yookhwela awe. (Mas. 4:18) Awo tho yaahiwerya otoroka okumi aya wi ekhaleke mwawiiwanana ni malakiheryo a Yehova. Yehova hanaweherya wi achu awe epake matorokelo oothene oochuneya mu elukuluku emohamoha. Moohiyana, owo onnaarehererya achu awe vakhaani-vakhaani. Nnahaala okhala oohakalala vaavaa oothene ahu nneeraahu niweryeke omuhakalaliha Yehova mu ichu soothene nnahaalaahu opakaka. Miphiro soothene wiiliwiili sinnachuna orehereryiwa. Ovinyerya mu 1919, “Mphiro Waweela” onnatitelela orehereryiwa, ni yoolakelela ya waakhaviherya achu ancipale okhuma mu Papulu Mutokotoko. w23.05 epaax. 17 epara. 15; epaax. 19 epara. 16

Anna a Nikhuuru Noolamulela annaavyakiha mukhataaya akhaviheryi aya mu Itepartamentu sincipale. Akhaviheryi yaala mu elukuluku yeela annateexa moororomeleya murici woochuneyaxa. Awo ari ooreheryeya phaama opwahiherya muteko wa okhapelela ipucepuche sa Kristu. Vaavaa oothanliwa ookuchula enahaalaaya okusiwa ntakhara wirimu waacamela wa makuchuwelo wa yoohooxa etokotoko, malapelo aweela anahaala otitelela weereya veelaponi ya vathi vaava. Ni ohoolela woophaameya wa Kristu, alapeli a Muluku heyeleelaru echu. Eparipari wi, mu elukuluku yeeyo, nnahaala ohipheliwa ni Koki a Makoki, wiiwanana wa maloko. (Ese. 38:18-20) Nyenya ohiphela yoola wawaakuveya onahaala okuvya; horwa waahiiha achu a Muluku omulapela Yehova. Owo chiryene onahaala waavuluxa! Mu yawoona, murummwa Yohani aahoona “muloko mutokweene” wa ipucepuche ikina sa Kristu. Aahileeliwa wi “muloko mutokweene” onarweela wa “yoohooxa etokotoko.” (Wup. 7:9, 14) Chiryene, owo onahaala otitelela okhapeleliwa! w24.02 ipaax. 5-6 ipara. 13-14

Tiheeni nnaphwanelaahu weera wi naakhele munepa waweela? Nnanwerya ovekela ntakhara munepa waweela, ohuserya Masu ooveereliwa a Muluku, ni okhala mmarehereryo yaawo anahooleliwa ni munepa awe. Weerano yeela enahaala onikhaviherya winnuwiha “yawiima ya munepa.” (Aka. 5:22, 23) Muluku onaavaha munepa awe waweela pahiru yaale arino muupuwelo waphaama ni meecelo aphaama. Owo hatitelela onivaha munepa awe waweela wakhala wi ninnatitelela wuupuwela ichu sooriipiheya ni opaka ichu mwawiiwanana ni seiho. (1 Ate. 4:7, 8) Wi ntitelele waakhela munepa waweela, hannaphwanela ‘okhaliha mwa munyemu masu a miririmu.’ (1 Ate. 5:20) “Masu a miririmu” va, inaahiwa michaka seiho sinavahereryiwa ni munepa wa Muluku, ophitaanyerya seiyo sinaloca sa nihiku na Yehova ni waakuveya wa elukuluku ahu. Hannaphwanela wuupuwela wi nihiku na Yehova naari Armaketo herwa mmahiku nnakhalaahu. Ohiya yeeyo, ninnooniherya wi ninnasuwela wi owo onahaala orwa moorweela wa otitelela okhala ooweiwa mmuteko woolaleerya ni okhalano “meecelo aweela.”—2 Pet. 3:11, 12. w23.06 epaax. 12 ipara. 13-14

Tiheeni Mukristu onaphwaneleiye weera wakhala wi eruku ya epwitikiri yookhumelela mu telefoni naari mu komputatore mwawe? Nnaphwanela ohiya oweha mwawaakuveya. Enamukhala yookhweya weerano yeeyo wakhala wi nohuupuwela wi echu yoochuneyaxa ori onthamwene ahu ni Yehova. Iruku ikina inanwerya wooniwa ntoko wi tahi sa epwitikiri, naamwi hiihaa, iho inanwerya oneeriha okhalano nchuno na okonihana. Ntakhara heeni nnaphwanelaahu osepa iruku sa mukhalelo yoowo? Naamwi eri echu ekhaani, hinnachunaru weera echu enahaala oneeriha wuupuwela naari opaka ocapaheya. (Mat. 5:28, 29) Mutokweene mmoha o Tailantiya, awiichaniwa David, oriye: “Miyaano kinnamaala nave kuupuwela: ‘Naamwi iruku seiha ihiri sa epwitikiri, apwanne Yehova onahaala ohakalala wakhala wi kinnatitelela oweha?’ Wuupuwela mmukhalelo yoola ennakikhaviherya opaka soolakelela mwa miruku.” Woova opaka echu vyakala enahaala omuthananiha Yehova enahala onikhaviherya opaka soolakelela saphaama. Omoova Yehova “mapacereryo,” naari mathipelo “a miruku.” w23.06 epaax. 23 ipara. 12-13

“Mpa mwanyu” enanwerya osiphela miloko sahu. Variyari va yoohooxa etokotoko, nnahaala ophwanya okhapelela yoowo Yehova ororomelinheiye wakhala wi nootitelela okhala awiiwanana ni alapeli akhwiihu. Mwawihiiha, nnaphwanela olapa mwakuru hiihaano ohiya waatumerya anna ni arokora, nyenya tho waasivela yaawo. Woopowa wahu onahaala orweela mwa yeeyo. “Nihiku ntokotoko na [Yehova]” nnahaala oruuha wuukhuwa otokotoko wa achu a mweelaponi. (Sof. 1:14, 15, PMM) Achu a Yehova anahaala tho ohoolela makacamiho. Nyenya wakhala wi nohiirehererya hiihaano, nnahaala okhala oomaaleleya ni waakhaviherya akina. Nnanwerya ovilela makacamiho oothene anahaala okhumelela mu okumi ahu. Vaavaa annihu a munroromeloni anahooseyaaya nnanwerya opaka yeeyo nnaweryaahu wi naavahe nikhaviheryo ni wooniheryaka niphwanya nave naakhwaniheryaka soothowa saya. Nnahaala otitelela okhala awaacameleya ni anna ni arokora ahu yaawo nihusenryaahu waasivela ovinyerya khalai. Voocharela, Yehova onahaala onireeliha ni ekumi yoohimala mu elapo yeeyo ipahu soothene ni soohooxa inahaalaaya ocuwaliwa.—Yes. 65:17. w23.07 epaax. 7 ipara. 16-17

Piipiliya wiiliwiili onnaaloca alopwana oororomeleya ntoko oowerya ni oolipa. Nyenya ophiyerya yaale yaari oolipaxa, ikwaha ikina hiyiisoona hiiha. Ntoko yootakiherya, mu ekwaha emoha Mwene Tavite iisoona “oolipa ntoko mwaako,” nyenya ikwaha ikina owo aakhala “awoova.” (Sal. 30:7, TNM) Vooloca sa Sansawu, owo aahikhalano ikuru soomwiilini wanthowa na munepa wa Muluku, naamwiihiiha, owo aahisuwela wi nihirivo nikhaviheryo na Muluku ‘aahaala oyeleela ikuru, aahaala okhala ooceecheya nave aahaala olikanaka ni alopwana akina oothene.’ (Amut. 14:5, 6; 16:17, PMM) Alopwana yaala yaari oolipa pahiru nthowa nawi Yehova aahaavaha ikuru. Murummwa Paulo tho aanasuwela wi aanachuna owerya wa Yehova. (2 Ako. 12:9, 10) Owo aanahoolela makacamiho a okumi. (Aka. 4:13, 14) Ikwaha ikina, owo aaphwanela wiilipiserya vancipale wi apake yeeyo yaari yaphaama. (Aro. 7:18, 19) Mu ilukuluku ikina owo aanakhala awoova ni yeeyo akhweya yaahaala omweereela. (2 Ako. 1:8, 9) Naamwiihiiha, vaavaa Paulo aakhaleiye ooceecheya, owo aaniisoona okhala oowerya. Mwawiihai? Ela yaaneereya nthowa nawi Yehova aanamvaha ikuru aachuneiye wi avoothe makacamiho. w23.10 epaax. 12 ipara. 1-2

Wakhala wi ikwaha ikina munniisoona okhala oohichuneyaxa, muupuwele wi ti mwaneene Yehova, ohiya muchu mukina oothanlileeni wi mmurumeeleke yoowo. (Yoh. 6:44) Owo onnoona yaphaama wa hiyaano akhweya yeeyo nihinaweryaahu woona wa hiyo mukhatiihu, nave oosuwela murima ahu. (2 Math. 6:30) Mwawiihiiha, nnaphwanela omuroromela owo vaavaa onaloceiye wi na achu oochuneya. (1 Yoh. 3:19, 20) Nihaakumve ohuserya eparipari, akina a hiyo noopaka ichu seiho nlelo inahaala oneeriha wiiphwanyerya mathowa. (1 Pet. 4:3) Naari tho Akristu yaawo eri oororomeleya ennawaniha ni sooceecheiha. Apwanne murima anyu onnoothorihaani? Waakhanle wi ti hiiha, mulipiheye mu osuwela wi alapeli oororomeleya a Yehova annawaniha ni miyoonelo soolikana. Ntoko yootakiherya, murummwa Paulo aahikhala oothanana vaavaa uupuweleiye vooloca sa ohiphaameya wawe. (Aro. 7:24) Eparipari wi, Paulo aahicharuwa soocheka sawe ni aahipatisiwa. Naamwiihiiha, owo aahiiloca mwaneene ntoko ‘mukhaani wa arummwa’ nave ‘mulipa oopaka soocheka itokotoko’.—1 Ako. 15:9; 1 Tim. 1:15. w24.03 epaax. 27 ipara. 5-6

Echu emoha nnahuseryaahu orweela wa soolakelela soonanara sa Mwene Yowasi ti yawi onnachuneya waathanla asinthamwene enanivaha ovolowela waphaama—yaawo anamusivela Yehova nave anachuna omuhakalaliha yoowo. Nyenya asinthamwene anyu ananwerya okhala a iyaakha soohiyanahiyana. Muupuwele wi Yehoyata aari awunnuwelavo ompwaha mmiravo Yowasi. Vooloca sa asinthamwene anyu, mwiikohe: ‘Apwanne awo annakikhaviherya olipiha nroromelo naka mwa Yehova? Apwanne awo annakiceenyerya okhala mwawiiwanana ni malakiheryo a Yehova? Awo annaloca vooloca sa Yehova ni iparipari sa Mpiipiliyani? Awo annacicimiha malakiheryo a Muluku? Apwanne analoca ichu wi ekihakalalihe naari annakhalano olipa murima wi ekivahe ekano vaavaa kinachunaaka?’ (Mas. 27:5, 6, 17) Eparipari ti yawi, waakhanle wi asinthamwene hanamusivela Yehova, tahi oochuneya wa nyuwo. Nyenya waakhanle wi asinthamwene anyu annamusivela Yehova, mwiipharelele ni asinthamwene yaawo, woona wi awo anahaala wookhaviheryaani ilukuluku soothene!—Mas. 13:20. w23.09 ipaax. 9-10 ipara. 6-7

Alfa eleetera yoopacerya mu Ekiriki nave omeka eleetera yookuchula. Moorweela wa oloca “miyaano ka Alfa ni Omeka,” Yehova onnanikhaviherya wiiwexexa wi owo apacerya echu, onahaala okwaaxa. Yehova amanle ompatuxa Atamu ni Eva, Owo ahii: “Murelanesha, musareye elapo ya vathi nave muhooleleke.” (Map. 1:28, PMM) Mu elukuluku yeele, Yehova mwakuru aahiloca “Alfa.” Owo mookwakwaleya aahooniherya yoolakelela awe: Yaahaala ophiya elukuluku yeeyo muyareriwo woophaameya ni wawiiwelela wa Atamu ni Eva waahaalaaya osareya veelaponi yavathi ni otatuxa eyo okhala parataiso. Mu elukuluku yeeyo yoomwaahiyu, enahaala okhala ntoko wi Yehova onaloca “Omeka.” Amanle okwaaxa opatuxa “erimu ni elapo ya vathi ni soothene sa mwemmo,” Yehova aavaha yoororomeliha. Aahiroromeliha wi aahaala waakhwaniherya yookhwela awe ntakhara achu ni elapo yavathi aahihenseru. Eyo yaahaala waakhwanela moomalela omakuchuwelo wa nihiku naneethanu napiili.—Map. 2:1-3. w23.11 epaax. 5 ipara. 13-14

Mukwaha woovila wa okhuma o Papulu eyaaka o Isarayeli waahaala omaliha miyeeri mixexe, nyenya Yehova aahiroromeliha wi nikacamiho vyakala naahaala weererya ohiiha mukwaha yoole waahaala oviihiwavo. Ayuta oororomeleya yaanasuwela wi miphurelo sa okookela o Isarayeli saari itokweenexa opwaha echu vyakala yaahaalaaya weera. Mphurelo aya mutokweene waavolowela malapelo aya. Iwo, hiyaariworu empa ya Yehova o Papulu. Haariwo altare yoowo Aisarayeli yaahaalaaya ovahakavo mikucho saya mwawiiwanana ni Nlamulo na Mose, nave hiyaariwo alipa a mikucho yaawo yaahaala oveleelaka mikucho seiho. Mwawaaceererya, achu a Yehova yaari avakhaani waapwaha alopwana ni athiyana yahaamurumeela Muluku nave yaawo yahaamucicimiha Yehova ni malakiheryo awe. Mwawiihiiha, Ayuta ancipale yaawo yaamoova Muluku, yaanachuna ni murima woothene okookela mu elapo aya, weiwo yaahaalaaya okookiherya malapelo aweela. w23.05 ipaax. 14-15 ipara. 3-4

Nave ninnachuna nikhaviheryo na munepa waweela wa Muluku wi niwerye otitelela weeca “ntoko anamwane a omwaleela.” Ntakhara heeni? Nthowa nawi tahi wookhweya otitelela okhala aweela mu elapo yeela yoonanara. (1 Ate. 4:3-5, 7, 8) Munepa waweela onanwerya onikhaviherya owaniha ni muupuwelo wa elapo, ophitaanyerya afilosofiya ni miyoonelo seiho ihiniiwanana ni muupuwelo wa Muluku. Munepa waweela tho onanwerya onikhaviherya winnuwiha ‘eri yoothene yaphaama ni yawookololowa.’ (Aef. 5:9) Mukhalelo mmoha wa waakhela munepa waweela ori ovekela ntakhara yoowo. Yesu aahiloca wi Yehova ‘onahaala waavaha munepa waweela yaale anamveka.’ (Luka 11:13) Nave vaavaa nnamvuwihaahu Yehova vamoha mmithukumano Seekristu, ninnaakhela tho munepa waweela. (Aef. 5:19, 20) Ovolowela waphaama yoowo munepa wa Muluku oryaayano mwa hiyaano, onahaala onikhaviherya okhalaka mmukhalelo yoowo onamuhakalaliha Muluku. w24.03 ipaax. 23-24 ipara. 13-15

Munnachuna okhala oopixa murima? Yaari hiiha mvekele mvekaka opixa murima wawaaca. Opixa murima onnapaka makupa wa yawiima ya munepa. (Aka. 5:22, 23) Mwawiihiiha, nnaphwanela ovekela wa Yehova wi anikhaviherye okhalano mikhalelo seiho sinapaka makupa mu yawiima ya munepa waweela. Wakhala wi noohoolela mukhalelo oneeha opixa wahu murima nnahaala ‘otitelela oveka’ munepa waweela wi onikhaviherye wooniherya opixa murima. (Luka 11:13) Ohiya yeeyo, nnaphwanela omveka Yehova wi anikhaviherye woonaka miyaha mmukhalelo owo onooneiye. Ohiya ovekela pahiru, nnaphwanela opaka owetha wahu wi nikhale oopixa murima mahiku oothene. Vaavaa nnavekelaahu nivekaka okhala oopixa murima nave nniilipixerya mmukhalelo yoola, mukhalelo yoola onahaala opaka mitathari mmurimani mwahu ni opaka makupa a omuchu ahu. Nave tho enamookhaviheeryani wuupuwelelaka sootakiherya sa Mpiipiliya. Piipiliya onnaaloca achu ancipale yaawo yaari oopixa murima. Vaavaa nnuupuwelelaahu sootakiherya seiha, nnanwerya ohuserya mikhalelo sa opixa murima. w23.08 epaax. 22 ipara. 10-11

Yesu aahimuroromeliha Petru wi Yehova aahaala omukhapelela yoowo. Amanle oviihiwa mookhwani, mu ekwaha yanaawiili, Yesu aahimweeriha Petru ni arummwa awe akina ophara mootikhiniha ihopa sincipale. (Yoh. 21:4-6) Moohikhwa minikwa, yootikhiniha yeela yaahimweeriha Petru wiiwexexa wi Yehova aahaala mookhweya omvahererya soothene soomwiilini aachuneiye. Akhweya Petru aahuupuwela masu a Yesu vaavaa aalonceiye wi Yehova aahaala waakhapelela yaale yaahaala “waavya woopaceryani Omwene.” (Mat. 6:33) Soothene seiha saahimukhaviherya Petru okuha mu nipuro noopacerya mu okumi awe muteko woolaleerya ohiya muteko wa ototha ihopa. Owo aari oolipa murima nave aahilaleerya mu Pentekoste a 33 E.K., aakhaviheryaka macikhwi macikhweene aachu weemererya michaka saphaama. (Saw. 2:14, 37-41) Ohoolo waya, owo aahaakhaviherya a Samariya ni achu yahaari Ayuta okhala oomuchara a Kristu. (Saw. 8:14-17; 10:44-48) Moohikhwa minikwa, Yehova aahimpharihela Petru mmukhalelo wootikhiniha wi aakerihe mmuloko Weekristu achu a mukhalelo woothene. w23.09 epaax. 20 epara. 1; epaax. 23 epara. 11

Echu ya iyaakha piili Apapulu emanle ommwarya Yerusalemu. Mwene Napukotonosori o Papulu aahikhalano yooloha yootikhiniha ya eruku etokotoko. Owo aahaaleela anamiruku awe oothene ophitaanyerya Taniyeli wi emuleele yooloha ni yootaphulela aya. Waakhanle wi awo hiyenreno yeeyo, yaaphwanela wiiphiwa oothene aya. (Tan. 2:3-5) Taniyeli aaphwanela weeravo echu mwawaakuveya nthowa nawi oheerano yeeyo, yaahaala okumiherya okhwa wa achu ancipale. Owo “aaya, avolowa wa mwene, amuveka wi amvahe elukuluku yoorweela otaphulela yooloha yeele.” (Tan. 2:16; PMM) Waanachuneya olipa murima ni nroromelo. Piipiliya hanooniherya wi Taniyeli aahitaphulela yooloha mu elukuluku ene yeeyo. Owo aahaaveka asinthamwene awe wi enamvekela Muluku a wirimu “wi aamorele ikharari, awooniherye yawiiphiini yeela.” (Tan. 2:18, PMM) Yehova aahaakhula mavekelo yaala. Nnikhaviheryo na Muluku, Taniyeli aataphulela yooloha ya Napukotonosori. Taniyeli ni asinthamwene awe hiyiiphiwe. w23.08 epaax. 3 epara. 4

Muupuwele miphurelo sa okhala oopixa murima. Muchu oopixa murima toohakalala ni oohuukhuwa. Ohiya yeeyoru, opixa murima onanwerya orehererya okumi ahu omwiilini ni wa mmuupuweloni. Vaavaa nnakhalaahu oopixa murima ninnakhalano asinthamwene aphaama nave ninniiwanana ni akina. Ohiya yeeyoru muloko ahu onnakhala wawiiwanana. Vaavaa muchu onaninyeenyeiheiye hiyaano ninnasepa otepiha mwaha. (Sal. 37:8; Mas. 14:29) Echu yoochuneyaxa, ninnamutakiherya Tiithi ahu a wirimu nave ninnalipiha onthamwene ahu ni yoowo. Moohikhwa minikwa, opixa murima mukhalelo waphaama nnaphwanelaahu wunnuwiha! Eparipari wi opixa murima tahi wookhweya mu ilukuluku soothene, nyenya nnikhaviheryo na Yehova nnanwerya otitelela wunnuwiha mukhalelo yoola. Nave vaavaa nnawehereryaahu moopixa murima elapo evyaani, nnanwerya olekecheya wi “Apwiya tanaavarerya ni waakhapelela yaawo anawiiwelela, yaawo anawehererya ikharari saya.” (Sal. 33:18, PMM) Mwawiihiiha, hiihaano opwaha khalai, nnaphwanela olakelela otitelela okhala oopixa murima. w23.08 epaax. 22 epara. 7; epaax. 25 ipara. 16-17

Tiyaku aahithariha vooloca sa mulopwana aaloca wi ookhalano nroromelo, nyenya yeeyo eereiye hisiiwanana ni seiyo aaloceiye. (Tiy. 2:1-5, 9) Tiyaku tho aaloca sa ‘munna naari murokora yoowo othaaleliwe naari ohirino yoolya yawaakhwanela ntakhara nihiku,’ nyenya muchu haneeravo echu wi amukhaviherye. Naamwi owo alocaka wi ookhalano nroromelo, saweera sawe sinnooniherya wi haanono nroromelo. (Tiy. 2:14-16) Tiyaku oomuloca Rahapi ntoko yootakiherya yaphaama ya muchu yoowo orino nroromelo nave oonihenrye nenlo mmiteko. (Tiy. 2:25, 26) Rahapi aaniiwa elociwaka sa Yehova nave aanasuwela wi owo aanaakhaviherya Aisarayeli. (Yos. 2:9-11) Voocharela, owo aahooniherya nroromelo nawe mwa miteko—moorweela wa waakhapelela anamahocela apiili a Aisarayeli yaawo ekumi aya yaari va yawoopiha. Wanthowa nenla, muthiyana yoola oohiphaameya nave aahiri Muisarayeli, aahiichaniwa awookololowa hiihaa ntoko Aparahamu iichaniweiye awookololowa. Yootakiherya ya Rahapi ennanihusiha wi nroromelo nahu nnaphwanela okhaviheryiwaka ni miteko. w23.12 ipaax. 5-6 ipara. 12-13

Ntoko Akristu, hiyaano hannaphwanela pahiru wiiwexexa iparipari sa vasulusulu sa Piipiliya. Nnikhaviheryo na munepa waweela wa Yehova hiyaano nri oolekecheya ohuserya “ophiyerya ichu sawiixeela sa Muluku.” (1 Ako. 2:9, 10) Munoona hai opacerya marehereryo a yoohuserya ya muchu mukhateiye wi mmwaacamele vancipale Yehova? Ntoko yootakiherya, munanwerya otholathola vancipale vooloca sa mukhalelo Yehova oonihenryeiye osivela wa alapeli awe khalai ni mukhalelo owo onooniheryeiye wi onnoosivelaani. Munanwerya tho otholathola mukhalelo malapelo a Yehova yaarehereryiwaaya mu elukuluku ya Aisarayeli ni mukhalelo Yehova onachuneiye wi nimulapele mmahiku ahu yaala. Naari munanwerya ohuserya sooleeliherya sa sooloherya sa Yesu seiyo saakhwanenle mu elukuluku yeeyo Yesu aareiye veelaponi yavathi. Nyuwaano munanwerya ompharihela Índice das Publicações da Torre de Vigia naari Yoohoolela ya Otholathola ya Anamoona a Yehova mu otholathola wanyu. Munahaala woona wi opharihela ikaruma seiya sinahaala weeriha yoohuserya anyu okhala yoohakalalihaxa. Opaka yoohuserya ya Piipiliya yawiiseela enanwerya wookhaviheryaani olipiha nroromelo nanyu nave ‘munarwa mmusuwela Muluku.’—Mas. 2:4, 5, PMM. w23.10 ipaax. 18-19 ipara. 3-5

Masu murummwa Petru opharihenleiye awi “weeparipari” enataphulela “onyomola.” Makupa anaawiili a eversikulu annathariha yeeyo nnahaalaahu weera vaavaa nnakhalaahuno osivela weeparipari wa akina. Onnakhuneela soocheka sa annihu. Nnanwerya waanyiherya mmukhalelo ola: Ninnapharela osivela wahu ni mata meeli, ntoko ekuwo yoovitikeleliwa nave ninnaaneya vakhaani-vakhaani ophiyerya okhuneela, ohiya pahiru yoocheka emoha naari piili, nyenya ‘soocheka sawaaca.’ Okhuneela mmasu makina okhurumuwela. Hiiha ntoko ekuwo enakhuneelaaya niharipa, osivela onanwerya tho okhuneela sooceecheiya ni ohiphaameya wa akina. Osivela wahu ntakhara anna ni arokora onaphwanela okhala woolipaxa wi niwerye okhurumuwela ohiphaameya waya—naamwi weerano yeeyo okhalaka woovila. (Ako. 3:13) Vaavaa nnaweryaahu waakhurumuwela akina, nnahaala wooniherya wi osivela wahu ti woolipa nave wi ninnachuna omuhakalaliha Yehova. w23.11 ipaax. 11-12 ipara. 13-15

Vaavaa Mwene Yosiya aareiyeno iyaakha 26, aahipacerya orehererya empa ya Muluku. Waari vaavaa aaphwanyiweiye, “liivuru a Nlamulo na Yehova naavahiwe moorweela wa Mose.” Vaavaa mwene iiwaleiye yeeyo yaari mu liivuru, mwawaakuveya aahipaka matorokelo wi iiwelele yeeyo yaarempwe mwemmo. (2 Math. 34:14, 19-21) Apwanne moheererya omwaalakhanya Piipiliya mahiku oothene? Waakhanle wi aa, apwanne munnapuha? Apwanne munnarepela iversikulu ikina seiho inahaala wookhaviheryaani? Vaavaa Yosiya aareiyeno iyaakha 39, owo aahipaka soohesa saahenle okumi awe va yawoopiha. Ohiya waavya ohoolela wa Yehova, owo aahiiroromela mukhateiye. (2 Math. 35:20-25) Nla nihusiheryo ntokweene wa hiyaano. Moohipwacha iyaakha sahu naari elukuluku nimalinhaahu nimurumeelaka Yehova, hiyaano nnaphwanela otitelela omwaacamelaka Yoowo. Wi neereno yeeyo, nnaphwanela ovekelaka wa Yehova ilukuluku soothene, nivekaka ohoolela wawe, omuhuserya Piipiliya ni owiriyana ikano sa Akristu awiichwelavo. Mwawiihiiha, hokhala wookhweya wa nyuwaano opaka yoocheka nave munanwerya okhalano ekari yawaaca ya okhala oohakalala.—Tiy. 1:25. w23.09 epaax. 12 ipara. 15-16

Piipiliya annaaloca athiyana ancipale ootikhiniha yaawo yaamusivela Yehova ni yaamulapela yoowo. Awo yaari “oophimelela” ni “oororomeleya mu ichu soothene.” (1 Tim. 3:11) Mmahiku ahu yaala, mmiloko sookhalamo sootakiherya sa arokora awiichwelavo seiyo asimwali anaphwanelaaya otakiherya. Asimwali, munoona hai waavya yootakiherya ya murokora awiichwelavo ni weererya ohuserya vooloca sa yoowo? Mvarerye mikhalelo saphaama owo oreiyeno, nave voocharela muupuwele mukhalelo muneeraanyu mutakiherye mikhalelo seiyo. Mukhalelo mmoha woochuneyaxa Mukristu awiichwelavo onaphwaneleiye okhalano. Wakhala wi murokora tawiiyeviha, owo onahaala okhalano onthamwene woolipa ni Yehova nave onahaala okhala awaacameleya wa akina. Ntoko yootakiherya, muthiyana yoowo onamusivela Yehova nave ori awiiyeviha onnathanla wiiwelela ohoolela yoowo Yehova otikithenryeiye. (1 Ako. 11:3) Ohoolela yoowo onnathariha taani Yehova omuthanlileiye wi akhapeleleke miloko ni ichoko. w23.12 ipaax. 18-19 ipara. 3-5

Yehova onachuna wi mulopwana othenle amukhapeleleke mwaariye mmukhalelo woomwiilini, wa mmuupuweloni ni woomunepani. ntoko okhalano mavyakelo awuupuwela, waacicimiha athiyana, okhala oororomeleya, inahaala wookhaviheryaani okhala mulopwana othenle aphaama. Mmanle othela, akhweya munanwerya okhala tiithi. Tiheeni munahaalaanyu ohuserya orweela wa Yehova vooloca sa okhala tiithi aphaama? (Aef. 6:4) Yehova huuliwa muru oloca wa Mwanawe, Yesu, wi aanamusivela nave aanamweemererya yoowo. (Mat. 3:17) Wakhala wi munahaala okhala tiithi, muhicuwale waaroromeliha aniinyu wi munnaasivela. Nave ilukuluku soothene mmuthamaleleke mwaninyu wakhala wi oopaka ichu saphaama. Asitiithi yaawo anachariha yootakiherya ya Yehova annaakhaviherya tho anaaya okhala Akristu awiichwelavo. Nyuwaano munanwerya wiirehererya hiihaano wi mukhale tiithi aphaama moorweela wa waapwacha achu aveemusini vanyu, anna a mmulokoni nave tho waaleela mukhalelo munaasivelaanyu ni wi munniirumiha ni yaawo.—Yoh. 15:9. w23.12 ipaax. 28-29 ipara. 17-18

Naamwi nri alapeli oororomeleya a Yehova, nlelo ninnahoolela makacamiho ni wiiceliwa yoowo ori wawunlaana wa achu oothene. Nave tho nnanwerya ovilela ni waakaahiwa ni wiikariwa orweela wa yaale anawiica achu a Yehova. Naamwi Yehova ahinikhapelelaka mmakacamiho makina, owo oororomeliha onikhaviherya. (Yes. 41:10) Nnikhaviheryo nawe nnanwerya okhala oohakalala, opaka soolakelela saphaama ni otitelela okhala oororomeleya wa yoowo naamwi nihoolelaka mikhalelo soovila. Yehova onnaniroromeliha onivaha yeeyo Piipiliya oniichaneiye “murecele wa Muluku.” (Afi. 4:6, 7) Murecele yoowo ti omaaleleya wa mmuupuweloni ni wa mmurimani yoowo onakhala pahiru ni asinthamwene awe. Murecele yoola ‘onnapwaha wiiwexexa woothene’ nave ti wootikhiniha opwaha mummo nnaanyiheryaahu. Apwanne mohintoko wiisoona okhala oomaaleleya mmanle ovekela moohihiyererya wa Yehova? Moonelo yoowo woomaaleleya ti “murecele wa Muluku.” w24.01 epaax. 20 epara. 2; epaax. 21 epara. 4

Omusivela Muluku onnaaceenyerya achu oororomeleya ocicimihaka nsina nawe ni murima woothene. Mwene Tavite oorepa: “Okumi aka we, cicimiha Apwiya! Soothesene sa mpuwa mwaka sicicimihe nsina naya naweela.” Tavite aahiiwexexa wi ocicimiha nsina na Yehova ori omucicimiha mwaneene Yehova. Nsina na Yehova ninnavolowela mukhalelo awe, mwa yeeyo ennanruuhela mmuupuwelo mikhalelo sawe saphaama ni soopaka sawe sootikhiniha. Tavite aanachuna okhaliha nsina na Atiithi awe mwaweela ni ocicimiha nenlo. Owo aachuna weerano “soothesene sa mpuwa” mwawe—ela tiwi, ni murima awe woothene. Mmukhalelo mmohamoha, a Levi yaahititelela ovahererya ohoolela mu ocicimiha nsina na Yehova. Awo mwawiiyeviha yaaheemererya wi masu aya hiyi ewerye ocicimiha moomalela nsina naweela na Yehova ntoko nnaphwanelaaya. (Neh. 9:5) Moohikhwa minikwa, ncicimiho nenla ni wiiyeviha waahimuhakalaliha Yehova. w24.02 epaax. 9 epara. 6

Yehova harwa awoonaani ntoko muchu ooporora nthowa na ohiwerya waakhwaniherya yoolakelela yeeyo muhinahaalaanyu owerya waakhwaniherya. (2 Ako. 8:12) Moone sawaakanyerya ntoko mukhalelo wa ohuserya. Muupuweleke ichu seiho nwenryaanyu waakhwaniherya. Piipiliya onaloca wi “Muluku tahi oohookololowa wi acuwale muteko anyu.” (Ahe. 6:10) Mwawiihiiha, nyuwaano tho hamunaphwanela ocuwala ichu munapakaanyu. Muupuwele vooloca sa ichu seiho nwenryaanyu waakhwaniherya, ntoko yootakiherya, mohunnuwiha onthamwene ni Yehova, munnaloca ni akina vooloca sa yoowo, naari moopatisiwa. Hiihaa ntoko nyuwaano munnunwaanyu omunepani ni mwaakhwanihenryaanyu soolakelela soomunepani khalai, munanwerya oya vahoolo wi mwaakhwaniherye soolakelela sanyu sahiihaano. Vaavaa mutitelele wiilipixerya waakhwaniherya soolakelela sanyu soomunepani, muhicuwale ohakalala munapuhaanyu ni mukhalelo Yehova onookhaviheryeiyeni ni wooreelihaani variyari va mukwaha anyu. (2 Ako. 4:7) Wakhala wi hamukookenle muculi, munahaala waakhela mareeliho mancipale.—Aka. 6:9. w23.05 epaax. 31 ipara. 16-18

Ilukuluku soothene Yehova onnaavya mikhalelo sa owooniherya alapeli awe wi onnaasivela nave wi onnahakalala vancipale ni yeeyo awo anapakaaya. Soorepa sinnathariha saweereya piili vaavaa Yehova aalonceiye wa Yesu wi aari Mwana Awe oosiveliwa nave yoowo aamweemereryeiye. (Mat. 3:17; 17:5) Apwanne mwaamusiveliwa omwiiwa Yehova alocaka echu ntoko yeela wa nyuwaano? Olelo Yehova hanaloca ni achu mooluluwanya, nyenya owo onaloca moorweela wa Masu awe Piipiliya. Nnanwerya wiiwa nsu na Yehova vaavaa nnaalakhanyaahu masu a Yesu mu a liivru a Michaka. Yesu aahitakiherya moophaameya mukhalelo wa Atiithi awe. Mwawiihiiha vaavaa nnaalakhanyaahu masu aphaama a Yesu yaawo owo aalonceiye wa oomuchara awe oohiphaameya, hiyaano nnanwerya waanyiherya wi ti mwaneene Yehova onaloca masu ene yaale wa hiyaano. (Yoh. 15:9, 15) Wakhala wi nohoolela saweeha iho hasinooniherya wi nooyeleela weemereryiwa ni Muluku. Moohiyana ni yeeyo, ela ekari etokweene yawooniherya osivela wahu wawiixeela wa Muluku ni omuroromela wahu yoowo.—Tiy. 1:12. w24.03 epaax. 28 ipara. 10-11