Novempuru

Wakhala wi mookhalano anamwane, mwaakhaviherye yaawo orehererya maakhulo oophwanelela mwawiiwanana ni iyaakha saya. Ikwaha ikina, miyaha sawiiseela ntoko makacamiho mu othela naari ichu vooloca sa meecelo sinnathokororyiwa variyari va yoohuserya. Naamwi hiihaa, ti yawooneya wi enahaala okhalavo eparakrafo emoha naari piili seiho aniinyu aryaayano ophwanelela wa ovaha maakhulo. Nave tho mwaakhaviherye yaawo wiiwexexa wi tahi wi ilukuluku soothene aneeraaya eviihe nwono anahaala othanliwa wi evahe maakhulo. Mmukhalelo yoola, vaavaa akina anathanliwaaya wi evahe maakhulo, awo hekhala oonyeenyeya. (1 Tim. 6:18) Oothene ahu nnanwerya orehererya maakhulo aphaama, yaawo anamucicimiha Yehova ni enaalipiha annihu. (Mas. 25:11) Ikwaha ikina nnawerya ovahererya maakhulo nipharihelaka yaweereya ya okumi ahu. Nyenya nnaphwanela okhalano ekaasoope wi nihiivuwihe vancipale. (Mas. 27:2; 2 Ako. 10:18) Ohiya yeeyo, maakhulo ahu anaphwanela otikitheryeya wa Yehova, Mmasu awe ni alapeli awe a elapo yoothene.—Wup. 4:11. w23.04 ipaax. 24-25 ipara. 17-18

Osivela ti woochuneya wi ntitelele okhala awiilipelela ni okhapelela mukhalelo ahu wa wuupuwela. (Mat. 22:37-39) Omusivela Muluku onnanikhaviherya ovilela mmuteko woolaleerya moohipwacha makacamiho muteko yoowo onanruuhelaaya. (2 Tim. 1:7, 8) Wa nthowa na waasivela yaale ahinamurumeela Yehova, ninnatitelela olaleerya naamwi nivahaka onamoona moorweela wa telefoni ni ikaarata. Hannayeleela ewehereryo wi nihiku naya achu anahaala opaka matorokelo ni opacerya opaka yeeyo eri yaphaama. (Ese. 18:27, 28) Waasivela amwaacamani ahu onnaphitaanyerya tho Akristu akhwiihu. Ninnooniherya osivela yoola moorweela wa “olipihana mukina ni mukhwaawe ni otikitheryana mukina ni mukhwaawe.” (1 Ate. 5:11) Hiihaa ntoko anakhoco anakhaviheryanaaya mu ikhoco, hiyaano ninnalipihana mukina ni mukhwaawe. Hinrwa nimphoreiha munna naari murokora moolakelela naari okookiheryana yoonanara ni yoonanara. (1 Ate. 5:13, 15) Hiyaano tho ninnooniherya osivela wahu moorweela wa waacicimiha anna yaawo anahoolela mmulokoni.—1 Ate. 5:12. w23.06 epaax. 10 epara. 6; epaax. 11 ipara. 10-11

Mukhalelo mmoha wa olipiha nroromelo nahu ori moorweela wa wuupuwelela mukucho wa woopola. Mukucho yoola onnanroromeliha wi yookhwela ya Muluku enahaala waakhwanela. Vaavaa nnuupuwelelaahu mwawiiseela vooloca sa ntakhara heeni ovahereryiwaaya mukucho wa woopola ni yeeyo evolowenle, ninnalipiha nroromelo nahu nawi yoororomeliha ya Muluku ya onivaha okumi woohimala mu elapo yaphaamaxa, moohikwa minikwa enahaala waakhwanela. Ntakhara heeni nnalocaahu yeela? Vano mukucho wa woopola waavolowela eheeni? Yehova oomurumiha Mwanawe oosiveliwa ooyariwa meekheiye, nthamwene awe awaacameleyaxa, orweela wirimu wi ayariwe ntoko muchu oophaameya veelaponi yavathi. Vaavaa aareiye veelaponi yavathi, Yesu aahivilela ni makacamiho a mukhalelo woothene. Voocharela aahihooxeya nave aahihoolela okhwa wawiicelaxa. Chiryeene Yehova aahihooxeya vancipale! Muluku ahu oosivela haahaala weemererya wi Mwanawe ahooxeye ni okhwa pahiru wi anivahe ekumi yaphaama mu elukuluku yavakhaani. (Yoh. 3:16; 1 Pet. 1:18, 19) Woona wi Yehova omvaha Mwanawe wi anikhaviherye, onahaala weeriha wi okhale wooweryeya wa hiyo okhalano okumi woohimala mu elapo evyaani. w23.04 epaax. 27 ipara. 8-9

Apwanne Yehova ookhalano nchuno na waaviiha achu akhwile? Chiryene ookhalano. Owo aahaaveerela oomurepa ancipale a Piipiliya wi erepe yoororomeliha awe ya waaviiha achu mookhwani omwaahiyu. (Yes. 26:19; Wup. 20:11-13) Nave vaavaa Yehova onapakeiye yoororomeliha, owo ilukuluku soothene onnaakhwaniherya yeeyo. (Yos. 23:14) Mweeparipari, Yehova onnachuna ni murima woothene waaviiha achu akhwile. Muupuwele vooloca sa masu a Yupu. Owo aanaroromela wi naamwi aakhwile, Yehova aahaala ochuna omoona wanaawiili. (Yupu 14:14, 15) Yehova ookhalano nchuno nimohamoha ntakhara alapeli awe oothene akhwile. Owo onnachuna waaviiha yaawo mookhwani eri akumi ni oohakalala. Hanka vooloca sa apilyawu a achu yaawo akhwile, ehirino ekari ya ohuserya eparipari vooloca sa Yehova? Muluku ahu oosivela onnachuna tho waaviiha yaawo. (Saw. 24:15) Owo onachuna wi awo ekhaleno ekari ya okhala asinthamwene awe ni opuha okumi okhala wookhala veelaponi yavathi.—Yoh. 3:16. w23.04 epaax. 9 ipara. 5-6

Muni nwerye hai olipiha ewehereryo anyu? Waakhanle wi ewehereryo anyu ti okhala veelaponi ya vathi okhala wookhala, mwaalakhanye saweereya sa Mpiipiliyani seiyo sinaloca sa Parataiso ni muupuweleleke seiyo. (Yes. 25:8; 32:16-18) Muupuwelele mukhalelo okumi onahaalaaya okhala mu elapo evyaani nave mwiisaanyiherye muri mwemmo. Wakhala wi nootikitherya ewehereryo ahu ya elapo evyaani mmuupuweloni mwahu, makacamiho ahu anahaala okhala a ‘elukuluku vakhaani ni ooveya.’ (2 Ako. 4:17) Moorweela wa ewehereryo Yehova onoovaheiyeeni, owo onarwa oolipihaani. Onnoovahaani soothene munachunaahu wi mwaakhele ikuru inarwa wa yene. Mwawiihiiha, vaavaa munachunaanyu nikhaviheryo wi mwaakhwaniherye murici, ohoolela nikacamiho naari otitelela okhala oohakalala, muhule murima anyu wa Yehova mu nivekelo. Nave mwaavyeke ohoolela wawe orweela wa yoohuserya ya muchu mukhateiye. Mweemererye nikhaviheryo ni nlipiho na anna. Mmaliheke elukuluku mwaanyiheryaka mukhalelo okumi onahaalaaya okhala Mparataiso. Voocharela, nyuwaano munahaala ‘olipihiwa ni owerya woothene, mwawiiwanana ni owerya woocicimiheya wa [Muluku], wi nwerye ovilela mwawaakhwanela, moopixa murima ni moohakalala.’—Ako. 1:11. w23.10 epaax. 17 ipara. 19-20

Hiyaano nookhalano mathowa mancipale a omuthamalela Yehova mmavekelo. Nnaphwanela othamalela ntakhara echu vyakala yaphaama nryaahuno nthowa nawi yamahala yoothene yaphaama enarwa wa yoowo. (Tiy. 1:17) Ntoko yootakiherya, nnanwerya othamalela ntakhara elapo yaphaama nryaahuno ni ichu sootikhiniha opankeiye. Nnanwerya tho othamalela ntakhara ekumi ahu, emusi, asinthamwene ni ewehereryo ahu. Nave hiyaano tho ninnaphwanela omuthamalela Yehova nthowa nawi owo onnaneemererya opuha onthamwene wavameekhaaya ni yoowo. Akhweya onamuchuneya wiilipixerya wi nuupuwelele vooloca sa mathowa a muchu mukhateiye nryaahuno wi nimuthamalele Yehova. Ntakhara heeni? Nthowa nawi achu ancipale olelo hanathamalela. Awo wiiliwiili anatikitheryeya mu yeeyo anachunaaya ohiya mu yeeyo anaphwanelaaya weera wi yooniherye othamalela waya ntakhara ichu aryaayano. Wakhala wi mukhalelo owo woonivolowela, mavekelo ahu anahaala okhala elista ya sooveka. Wi ela eheereye, nnaphwanela otitelela wunnuwiha ni wooniherya othamalela wahu ntakhara ichu soothene Yehova onapakeiye wa hiyo.—Luka 6:45. w23.05 epaax. 4 ipara. 8-9

Tiithi ahu oosivela Yehova, hanasiveliwa onoona nihooxeyaka. (Yes. 63:9) Naamwiihiiha, owo hananikhapelela wa makacamiho ahu oothene, yaawo anawerya olikanyihiwa ni mihice naari mooro. (Yes. 43:2, PMM) Nyenya, owo oororomeliha onikhaviherya ‘olapuwa’ seiho, naari ohoolela moohakalala. Nave moohipwacha makacamiho nnahoolelaahu hiihava, owo onahaala onikhaviherya wi ilukuluku soothene okhale wooweryeya wa hiyo omurumeela yoowo. Yehova tho onnanivaha munepa awe waweela ni woowerya wi onikhaviherye ovilela. (Luka 11:13; Afi. 4:13) Ntoko yookhumelela, nnanwerya ororomela wi ilukuluku soothene nnahaala okhalano yeeyo ene nnachunaahu wi niwerye ovilela ni otitelela okhala oororomeleya wa yoowo. Yehova onaweherya wi nimuroromele yoowo. (Ahe. 11:6) Ikwaha ikina nnanwerya woona makacamiho okhala oovilaxa wi nivilele. Ophiyerya wi nnanwerya opacerya okhalano minikwa waakhanle wi Yehova onahaala onikhaviherya. Nyenya Piipiliya onnaniroromeliha wi moorweela wa ikuru sa Muluku nnanwerya owelela ‘ixiri.’ (Sal. 18:29, NN) Ohiya weemererya wi minikwa sinnuwe, nnaphwanela ovekela nivekaka nroromelo noolipa, nroromelaka wi Yehova onahaala waakhula mavekelo ahu.—Tiy. 1:6, 7. w23.11 epaax. 22 ipara. 8-9

Ola otharihiwa wooreera wa osivela weeparipari! Masu ala annaalipiha atheli: Nyuwaano munanwerya okhalano osivela weeparipari mukina ni mukhwaawe. Onnachuneya wiilipixerya wi atheli etitelele osivelana. Wi niphwanaphwanihe: Wi mooro otitelele ovarela phaama, onnachuneya wi muchu atitelele ohelavo ikhuuni. Wakhala wi muchu henreno yeeyo, mooro onahaala oxipha. Moolikana, osivela variyari va mulopwana ni mwaariye onanwerya tho otitelela okhala woolipa wakhala wi awo annalipiha onthamwene aya. Ikwaha ikina, mutheli onanwerya woona wi osivela waya onnariirya, xaxaxa vaavaa anahoolelaaya makacamiho a ikhorowa, a okumi, naari okhinyererya mu waaphuwa anamwane. Wi ‘mooro wa Yehova’ otitelele ovarela, mulopwana ni mwaariye anaphwanela wiilipixerya wi elipihe onthamwene aya ni Yehova. w23.05 ipaax. 20-21 ipara. 1-3

Wi ninnuwihe olipa murima, tiheeni nnaphwanelaahu weera? Asitiithi ahu ananwerya oniceenyerya okhala oolipa murima, nyenya awo hanawerya onivaha mukhalelo yoowo ntoko yoohiyeryiwa ya veemusini. Okhalano olipa murima ori ntoko ohuserya mavyakelo mavyaani. Mukhalelo mmoha wa ohuserya mavyakelo ori moorweela wa ovareryaka vakhiviru saweera sa muhusiha, nave voocharela ocharihaka yootakiherya awe. Mmukhalelo woolikana, ninnahuserya okhala oolipa murima naavareryaka vakhiviru khiviru mukhalelo akina anooniheryaaya mukhalelo yoola wa olipa murima, nave voocharela nnachariha yootakiherya aya. Hiiha ntoko Taniyeli, nnaphwanela osuwela phaama Masu a Muluku. Hiyaano nnanwerya okhala asinthamwene awaacameleya ni Yehova moorweela wa oloca ni yoowo mootaphuwa ni moohihiyererya. Nave nnaphwanela omuroromela Yehova moorweela wa olekecheya wi ilukuluku soothene owo onahaala onikhaviheryaka. Vaavaa nroromelo nahu nneehiwaaya, nnahaala okhala oolipa murima. Achu oolipa murima annacicimihiwa ni akina. Awo tho ananwerya waakhaviherya achu akina omusuwela Yehova. Mweeparipari nookhalano mathowa aphaama wi ninnuwihe olipa murima. w23.08 epaax. 2 epara. 2; epaax. 4 ipara. 8-9

Masu a Ekiriki ataphuleliwe ntoko ‘waalikhela’ aaphariheliwa mwawiiwanana ni ovarerya mithipo sasisapo. Mwawiihiiha, nnaphwanela waalikhelaka yeeyo nniiwaahu ni yeeyo nnaalakhanyaahu wi noone waakhanle wi ti yaphaama vaavaa yoohooxa etokotoko enaacamelaaya. Ohiya weemererya ichu vyakala seiho achu akina analocaaya, ninnapharihela mavyakelo ahu awuupuwela wi nlikanyihe yeeyo nnaalakhanyaahu naari yeeyo nniiwaahu ni yeeyo Piipiliya ni marehereryo a Yehova analocaaya. Neerano yeela, hinirwa niwokiwa ni soolokoha vyakala sa masololo naari mavyakelo aya. (Mas. 14:15; 1 Tim. 4:1) Ntoko nikhuuru, achu a Muluku anahaala okophola mu yoohooxa etokotoko. Nyenya, hannasuwela yeeyo enahaala weereya ni mmoha ti mmoha a hiyo omeelo. (Tiy. 4:14) Moohipwacha waakhanle wi nnahaala okhala variyari va yoohooxa etokotoko naari ehaakumve, nnahaala oreelihiwa ni ekumi yoohimala wakhala wi nootitelela okhala oororomeleya. Oothene ahu nnaphwanela otikitheryeya mu ewehereryo ahu yaphaamaxa ni otitelela okhala ooreheryeya ntakhara nihiku na Yehova! w23.06 epaax. 13 ipara. 15-16

Hiyaano hansuwenle mukhalelo sooloherya ikina sa Mpiipiliyani sinahaalaaya waakhwanela. (Tan. 12:8, 9) Nthowa nawi hansuwenle mukhalelo sooloherya ikina inahaalaaya waakhwanela, eyo henooniherya wi iho hisaakhwanela. Nnaphwanela ororomela moomalela wi Yehova onahaala onikhaviherya wiiwexexe yeeyo nnachunaahu mu elukuluku yoophwanelela, ntoko eenreiyeno khalai. Yoolokoha ya “murecele ni okhapeleleya” enahaala opakiwa. (1 Ate. 5:3) Voocharela, alamuleli a elapo anahaala wiica ni otoloxa moomalela malapelo atheru. (Wup. 17:16, 17) Ohoolo waya, awo anahaala waahiphela achu a Muluku. (Ese. 38:18, 19) Saweereya seiho sinahaala okeriha mu ekhoco yookuchula ya Armaketo. (Wup. 16:14, 16) Nnanwerya ororomela wi ichu soothene seiho inahaala waakhwanela moohilekela. Niweheryaka, hankooni ntitelele wooniherya othamalela wa Tiithi ahu a wirimu moorweela wa ohuserya moopwacha sooloherya sa Mpiipiliyani ni waakhaviherya akina weerano emohamoha. w23.08 epaax. 13 ipara. 19-20

Vaavaa murummwa Paulo aalonceiye sa nroromelo, ewehereryo ni osivela, owo aaphiyerya makuchuwelo wi “etokweenexa wa [mikhalelo] seiha ti osivela.” (1 Ako. 13:13) Ntakhara heeni Paulo aalonceiye yeela? Omwaahiyu, hochuneya okhalano nroromelo mwa soororomeliha sa Muluku vooloca sa elapo evyaani naari oweherya wi soororomeliha saakhwanele woona wi iho ini ineera saakhwanenle. Nyeenya ilukuluku soothene nnahaala ochuna okhalano osivela ntakhara Yehova ni achu. Mweeparipari, osivela wahu wa yaawo onahaala otitelela wunnuwa okhala wookhala. Vaavaa nnooniheryaahu osivela, ninnooniherya wi na Akristu eeparipari. Yesu aaloca wa arummwa awe: “Oothene enarwa esuwela wi mwa oohuserya aka moorweela mwa ela: Mwakhalano osivela mukina ni mukhwaawe.” (Yoh. 13:35) Ohiya yeeyoru, osivelana mukina ni mukhweiye onnaneeriha okhala awiiwanana. Paulo olonce wi osivela “nimakelo noophaameya na wiiwanana.” (Ako. 3:14) Murummwa Yohani aahaarepela akhweiye a munroromeloni ariki: “Yoole onamusivela Muluku onaphwanela tho omusivelaka munnawe.” (1 Yoh. 4:21) Vaavaa nnooniheryaahu osivela wa mukina ni mukhwaawe, ninnooniherya osivela wahu ntakhara Muluku. w23.11 epaax. 8 ipara. 1, 3

Piipiliya onnalikanyiha okumi wa Akristu ni ochimaka. Alipa oochimaka yaawo anawerya ophiya okhomoni ananwerya waakhela okumi woohimala. (2 Tim. 4:7, 8) Ti nthowa nene nnaphwanelaahu opaka owetha wahu wi ntitelele ochimaka, xaxaxa nthowa nawi makuchuwelo a ochimaka wahu aakhuveela. Murummwa Paulo ooloca yeeyo enahaala onikhaviherya tho weerano emohamoha. Paulo ooloca wi ‘nrihe soothene inanlimela nave nchimake ni ovilela mu ochimaka yoowo nthoonyeryiwaahu.’ Apwanne Paulo aachuna oloca wi Mukristu hanaphwanela oteexa echu vyakala yoolimela? Hooye. Ohiya yeeyo, owo olonce wi nnaphwanela ohiya echu vyakala yoolimela yoohichuneya. Ichu soolimela ntoko seiho inanwerya onceecheiha ni onikomiha. Ti nthowa nene, wakhala wi ninnachuna otitelela ovilela nnaphwanela woona waakhanle wi ninnateexa ichu soolimela ntoko seiho ni oriha mwawaakuveya. Nyenya sookhalavo ichu ikina soolimela, naari maphuta, nnaphwanelaahu oteexa. Nave nnaphwanela weerano yeeyo, woona wi naaheerano enahaala okhala ntoko wi nnamuhiya ochimaka.—2 Tim. 2:5. w23.08 epaax. 26 ipara. 1-2

Okhala oophimelela onahaala onikhaviherya ocicimiha miyoonelo sa akina. Ntoko yootakiherya, arokora akina annasiveliwa wiimakeyaara, nyenya akina, hooye. Akristu akina annalakelela owurya mwa mphimo, nyenya akina annathanla ohiwuryaru. Nyenya oothene ahu ninnachuna okhalano ekumi yaphaama, nave ninnathanla mikhalelo soohiyana sa okhapelela okumi. Wakhala wi ninniisoona wi ilukuluku soothene nnapaka soolakelela saphaama nave nnaalekecha akina weererya opaka yeeyo nnapakaahu, nnanwerya waakwaculiha akina ni otannya okawanyeya mmulokoni. (1 Ako. 8:9; 10:23, 24) Ntoko yootakiherya, ohiya onileela mukhalelo wa owara, Yehova oonivaha malakiherya wi ncharihe. Hiyaano nnaphwanela owaraka mmukhalelo onamucicimiha Muluku, nikhalaka oophimelela, oocicimiheya ni “amiruku.” (1 Tim. 2:9, 10) Hiyaano hinnachuna wi achu yiitikitheryeke mmukhalelo nnawaraahu. Malakiheryo a Piipiliya ananwerya tho waakhaviherya asitokweene a muloko ohitikitherya malamulo vooloca sa mukhalelo wa owara naari orehererya miihi. w23.07 ipaax. 23-24 ipara. 13-14

Yehova oonooniherya mukhalelo nneeraahu nikhaleno omwaahiyu woohakalaliha. Yaale aneemererya nwopelo wa “muthiyana ori mulolo” anaavya soochuna sawi “vyaa” naari sawiiphiini, ntoko ocapaheya. Yookhumelela ti yawi, mukhalelo yoowo wa okumi onahaala waakeriha “mmahiye awiixa.” (Mas. 9:13, 17, 18, TNM) Nto yaale aneemererya nwopelo wa muthiyana amiruku, naari wi “miruku seeparipari”, yookhumelela enakhala yoohiyana! (Masi. 9:1, PMM) Weerano hiihaa, nnahuserya osivela yeeyo Yehova onasiveleiye ni wiica yeeyo oniiceiye. (Sal. 97:10) Nave ninnasiveliwa waawopa akina ohuserya “miruku seeparipari.” Ori ntoko wi hiyaano ‘nnakhuwela mmapuro oocukhuwa a epooma nriki: Achu oothene oohisuwela, murwe nno!’ Nave miphurelo nnakhalaahuno vamoha ni yaale aneemererya nwopelo tahi sa elukuluku ya vakhaani. Iho ti soohimala nave sinnanikhaviherya okhala, okhala wookhala ‘ncharaka ephiro ya osuwelaxa.’—Mas. 9:3, 4, 6, TNM. w23.06 epaax. 24 ipara. 17-18

Muniisoona hai vaavaa nthamwene anyu ooxikola naari oomutekoni onoopakeleiyeni makoho vooloca sa soororomela sanyu? Apwanne munnakhala awuukhuwa? Ancipale a hiyo ninnakhala. Nyenya makoho yaawo ananwerya onikhaviherya osuwela yeeyo muchu owo onuupuweleiye nave enamunivaha ekari ya oloca sa michaka saphaama. Nto ikwaha ikina, achu annapaka makoho pahiru wi enaakaahe. Eyo henantikhiniha! Ancipale anniiwa soolokoha sawootha vooloca sa soororomela sahu. (Saw. 28:22) Ti yawooneya wi hiyaano nnakhala “mmahiku ookuchula,” elukuluku yeeyo achu aryaaya “oohaataanyiheya”, nave ophiyerya tho wi ‘toowali.’ (2 Tim. 3:1, 3) Akhweya nyuwaano munnuupuwela: ‘Ti mwawiihai kineeraaka kikhale oomaaleleya vaavaa muchu onachuneiye waakaaha mwaha vyakala wa Mpiipiliyani?’ Moosuwela echu enahaala wookhaviheryaani? Ori okhala—oomaaleleya. Muchu oomaaleleya hanaakuvela onyeenyeya, moohiyana, owo onnawerya wiivareryela naamwi aroxiwaka nave ahinasuwela mukhalelo wa waakhula. w23.09 epaax. 14 ipara. 1-2

Vakina vaya, ninnaakhela ohoolela yoowo onanikhapelela ohikhala ootikitheryeya mu wiithukumanyerya ni miteko seiho sinahaala onikeriha va yaawoopiha ni onanariha malamulo a Muluku. Mmakupa yaala nnahaala ophuravo vancipale wakhala wi pahiru ninnachariha ohoolela wa Yehova. (Yes. 48:17, 18; 1 Tim. 6:9, 10) Moohikwa minikwa, Yehova onahaala otitelela waapharihela ahooleli wi avahererye ohoolela variyari va yoohooxa etokotoko ni mu Olamulelo wa Iyaakha Ncikhwi. Apwanne nnahaala otitelela ochariha ohoolela yoola? Onahaala okhala wookhweya weerano yeeyo, wakhala wi ninnachariha ohoolela wa Yehova hiihaano. Mwawiihiiha, ntitelele ochariha ohoolela wa Yehova ophitaanyerya yoowo onavahereryiwa ni alopwana yaawo athanliwe wi enihooleleke. (Yes. 32:1, 2; Ahe. 13:17) Vaavaa nneeraahu yeela, ninnakhalano mathowa oothene a omuroromela Yehova yoowo ananeeciha anikerihaka ocai wa yawoopiha yoomunepani nave ananihoolela o nipuro nnayaahuwo—mu elapo evyaani ntakhara ekumi yoohimala. w24.02 epaax. 25 ipara. 17-18

Murummwa Paulo aahipuha okumi woohakalaliha mmuteko wa Yehova, nave aahikhalano makacamiho mancipale aaphwaneleiye ovootha. Ikwaha sincipale Paulo aanapaka mikwaha soorakama, nave mikwaha iho hisaari sookhweya mmahiku yaale. Mmikwaha sawe owo aanahoolela “sawoopiha mmihiceni” ni “sawoopiha sa ampava.” Owo aanakhalihiwa moonanara ni alipa awaakaaha. (2 Ako. 11:23-27) Tahi wi ikwaha soothene annawe yaanathamalela wiilipixerya woothene aapakeiye wi aakhaviherye yaawo. (2 Ako. 10:10; Afi. 4:15) Tiheeni yaamukhavihenrye Paulo otitelela mmuteko wa Yehova? Paulo aahuserya ichu sincipale vooloca sa mikhalelo sa Yehova mu soorempwa nave tho mu saweereya sawe. Paulo aalekecheya wi Yehova aanamusivela. (Aro. 8:38, 39; Aef. 2:4, 5) Owo aahipacerya omusivela vancipale Yehova. Paulo aahooniherya osivela wawe wa Yehova “moorweela wa waakhaviherya ni otitelela waakhaviherya aweela murima.”—Ahe. 6:10. w23.07 epaax. 9 ipara. 5-6

Achu ancipale annasuwela wi ti waphaama okhalano “alamuleli” ni wiiwelela makina a malamulo yaawo atikitheryiwe ni yaawo. Nyenya achu ene yaawo annakhooca wiiwelela malamulo vaavaa ahinasiveliwaayano naari anoonaaya okhala oohookololowa. Piipiliya onnaloca wi olamulelo woothene wa achu onavareryeliwa ni Satana, onnatannya makacamiho nave voohilekela onahaala otoloxiwa. (Sal. 110:5, 6; Ekl. 8:9; Luka 4:5, 6) Owo tho onnanleela wi “yoowo onavaanyihana ni alamuleli, onavaanyihana ni nlamulo ntikitheryiwe ti Muluku.” Wa hiihaano, Yehova onneemererya wi alamuleli ekhale wi etitelele orehererya ichu nave owo onaweherya wi hiyaano niwiiweleleke yaawo. Mwawiihiiha, nnaphwanela ‘waavaha oothene yeeyo enaaphwanela,’ ophitaanyerya oliva misokho, ncicimiho ni owiiwelela. (Aro. 13:1-7) Vakina vaya, nnanwerya woona wi nlamulo vyakala tahi noophwanelela, noohookololowa naari wi nnahaala onikumiherya yookhumelela yoowaawa. Nyenya hiyaano ninnamwiiwelela Yehova nave owo onnanleela wi nnaphwanela owiiwelela alamuleli. Mukhalelo mmoha nihinaphwanelaahu owiiwelela ori vaavaa awo ananivekaaya opaka echu vyakala ehiniiwanana ni malamulo a Yehova.—Saw. 5:29. w23.10 epaax. 8 ipara. 9-10

Vaavaa Sansawu aayariweiye, Afilisti yaanahiphela ni ohooxa nloko na Isarayeli. (Amut. 13:1) Awo yaari anlalaxa nave ti nthowa nene Aisarayeli yaahooxeyaaya mmatani mwaya. Yehova aahimuthanla Sansawu wi ‘awoopole Aisarayeli wa Afilisti.’ (Amut. 13:5, PMM) Wi aakhwaniherye murici yoowo, Sansawu aaphwanela omuroromela Yehova. Mu ekwaha emoha, nikhuuru na anakhoco na Afilisti naaya o Leyi, woonaru o Yuta wi yamphare Sansawu. Achu o Yuta yaakhala awoova, mwawiihiiha, awo yaalakelela omperekha Sansawu wa amwiicani aya. Nloko na Sansawu naahimmaka ni mikoyi miili mivyaani ni emperekha mmatani mwa Afilisti. (Amut. 15:9-13) Nyenya, “Munepa wa Apwiya [Yehova] wamvolowa ni ikuru.” Nave Sansawu aahitaphula mikoyi seiho aamakiweiyeno. Waari vaavaa Sansawu ‘aaconceiye elakutha ekithi ya puuru,’ nave ni yeeyo aawiiphano alopwana a Afilisti awaakhwana ncikhwi.—Amut. 15:14-16, PMM. w23.09 epaax. 2 ipara. 3-4

Yehova onuupulela vakhaani-vakhaani “yookhwela yoohimala” Mpiipiliyani. Ilukuluku soothene Yehova onnawerya weera yeeyo onachuneiye, nthowa nawi ‘echu ti echu opankeiye, yookhala opakenleiye.’ (Mas. 16:4, BNM) Nave soothene Yehova onapakeiye sinnakhala okhala wookhala. Vano teevi eri yookhwela ya Yehova nave matorokelo taani opankeiye wi aakhwaniherye yookhwela awe? Muluku aaloca wa mutheli oopacerya yookhwela awe ntakhara yaawo. Muluku aaloca wa yaawo: “Murelanesha, musareye elapo ya vathi nave muhooleleke . . . soopatushiwa soothene ineeca veelaponi ya vathi.” (Map. 1:28, PMM) Wanthowa na ohiiwelela wa Atamu ni Eva achu oothene aacheka, nyenya eyo hetoronke yookhwela ya Yehova. Owo pahiru otoronke mukhalelo yoochuna awe yaahaalaaya waakhwanela. Mwawaakuveya, Yehova aahilakelela otikitherya Omwene wirimu wi aakhwaniherye yookhwela awe yoopacerya ntakhara achu ni elapo yavathi.—Mat. 25:34. w23.10 epaax. 20 ipara. 6-7

Yehova onanwerya onikhaviherya ohivelavela. Chiryene, tahi wi ilukuluku soothene ti wookhweya oya vahoolo, xaxaxa vaavaa nnawanihaahu ni yooceecheiha mu elukuluku yincipale. Ikwaha ikina, sooceecheiha sahu inanwerya okhala soovilaxa opwaha seiho murummwa Petru aahoolenleiye. Nyenya Yehova onanwerya onivaha ikuru nnachunaahu wi nihivelavele. (Sal. 94:18, 19) Ntoko yootakiherya, moone yaweereya ya munna yoowo ahaakumve ohuserya eparipari aarino mukhalelo wa okumi wa okonihana ni achu a mwiikho woolikana mu iyaakha sincipale. Owo aahitoroka okumi awe moomalela nave anakhala mwawiiwanana ni yeeyo Piipiliya onahusiheiye. Naamwiihiiha, ilukuluku ikina owo aanawaniha ni nchuno noonanara. Vano, tiheeni emukhavihenrye ohivelavela? Owo ooloca: “Yehova onnanilipiha. Nnikhaviheryo na munepa waweela . . . , Miyaano koohuserya wi ti wooweryeya otitelela mu ephiro ya eparipari . . . Moohipwacha ohiphaameya waka, Yehova onnakipharihela nave onnatitelela okilipiha.” w23.09 epaax. 23 epara. 12

Anna muri amiravo, ti woochuneya wiilipixerya wi mukhale Akristu awiichwelavo. Nyuwaano munaphwanela ochariha sootakiherya saphaama, winnuwiha mavyakelo awuupuwela, okhala oororomeleya, ohuserya ophara miteko wi mwiivakulele ni wiirehererya ntakhara mirici sa omwaahiyu. Akhweya ikwaha ikina munahaala okhala awuukhuwa vaavaa munuupuwelaanyu miteko soothene siri ohoolo wanyu. Nyenya munahaala owerya. Muupuwele wi Yehova ori ooreheryeya wi ookhaviheryeeni. (Yes. 41:10, 13) Ti yawooneya wi, anna ni arokora a mmulokoni anahaala wookhaviheryaani tho. Vaavaa munakhalaanyu munna awiichwelavo, ekumi anyu enahaala okhala yoohakalaliha vancipale. Hiyaano ninnoosivelaani vancipale amiravo! Munanwerya ororomela wi Yehova onahaala wooreelihaani vancipale wakhala wi munniilipixerya wi mukhale Mukristu awiichwelavo. w23.12 epaax. 29 ipara. 19-20

Mwaanyiherye wi muri mmuthukumano wammoori nnikhuuru na anna ni arokora. Nyuwaano muri oohakalala, nave munnakumiha eruku ya nikhuuru noothene. Mweeparipari, munnakumiha iruku ikina piili moovaka wi yoopacerya akhweya hekhumme phaama. Vano nyuwaano murino iruku raru. Nyenya mu eruku emoha, munnoona wi munna mmoha oonanariha owanoni. Nave nyuwaano munnaxipiha nthowa nawi mookhalano iruku ikina piili, seiho anna oothene, ophitaanyerya munna yoole, anatheyaaya. Wiiliwiili ninnuupuwela ilukuluku saphaama seiho nimalinhaahu ni anna ni arokora ahu khalai. Nyenya akhweya, mu ekwaha emoha sa seiho, munna naari murokora ooloca naari weera echu yoonyeenyeiha. Tiheeni nnaphwanelaahu weera ni muupuwelo yoowo? Munoona hai oxipiha hiiha ntoko mwaahaalaanyu oxipiha emoha ya iruku seihe? (Aef. 4:32) Nnanwerya weerano yeeyo woona wi ninnuupuwela ilukuluku sincipale saphaama nimalinhaahu ni yoowo. Owo mukhalelo wa muupuwelo nnaphwanelaahu okhapelela ni ovaha esisapo. w23.11 ipaax. 12-13 ipara. 16-17

Masu a Ekiriki aphariheliwe va, annooniherya wi ilukuluku soothene muthiyana aaphwanela owaraka mmukhalelo woophwanelela ni wooniherya opwacha ni miyoonelo sa akina. Hiyaano ninniirumiha vancipale ni arokora yaawo anapharihela ekano yeela ni anawara mmukhalelo woophimelela! Miruku mukhalelo mukina yoowo ori woochuneyaxa wa Akristu awiichwelavo. Nyenya miruku tiheeni? Ari mavyakelo a owerya ohiyaniha yeeyo eri yaphaama—wa yooheseya nave voocharela othanla yeeyo eri yaphaama. Moone yootakiherya ya Apikayeli. Aiyawe yaahipaka yoolakelela yoonanaraxa yeeyo yaahenle va yawoopiha oothene yaakhala ni yaalapa ni yaawo. Nyenya Apikayeli aaheeravo echu mwawaakuveya. Mwawaakuveya, owo aahisuwela echu yaphaama ya weera, nave nthowa na yeeyo, aahivuluxa ikumi sa ancipale. (1 Sam. 25:14-23, 32-35) Miruku inanwerya onikhaviherya osuwela elukuluku ya oloca ni ya omaala. Nave tho sinnanikhaviherya wooniherya opwacha wa akina, nihivolowenle ikumi saya.—1 Ate. 4:11. w23.12 epaax. 20 ipara. 8-9

Murummwa Paulo aahirepa masu yaala ntakhara muloko wo Roma. Anna ni arokora a muloko yoowo yaahihuserya vooloca sa Yehova ni Yesu, yunnuwiha nroromelo nave ekhala Akristu. Mwawiihiiha, Muluku ‘aahiweera awookololowa wanthowa na nroromelo’ nave aahaathanla ni munepa waweela. (Aro. 5:1) Awo yaanwerya owehererya waakhela mareeliho ni okhala oohakalala ni olekecheya wi eyo yaahaala weereya chiri. Voocharela, Paulo aahaarepela Akristu o Efeso vooloca sa ewehereryo yeeyo awo yaakhenlaaya. Ewehereryo yeela enaphitaanyerya waakhela “yoohiyeryiwa wa aweela murima.” (Aef. 1:18) Nave vaavaa aarepenleiye Akolose, Paulo aahooniherya ti woowi Akristu oothanliwa yaahaalaaya waakhela nchuwelo naya. Paulo aahiichana eyo wi “ewehereryo ekhapeleliwe ntakhara nyuwo wirimu.” (Ako. 1:4, 5) Mwawiihiiha, ewehereryo ya alipa oothanliwa ti yawi awo anahaala oviihiwa ntakhara okumi wirimu, weiwo anahaala olamulelaka ni Kristu.—1 Ate. 4:13-17; Wup. 20:6. w23.12 epaax. 9 ipara. 4-5

Masu awi “okhapelela” yaaphariheliwa ni anakhoco wi eloce sa anakhoco yaawo yaalipelela epooma wi ekhale ookhapeleleya. Achu mu epooma yaakhapeleliwa yanwerya okona mmureceleni esuwelaka wi anakhoco yaanakhapelela milako. Mmukhalelo mmohamoha, vaavaa murecele wa Muluku onakhapelelaaya muupuwelo ni mirima sahu, ninniisoona oomaaleleya nsuwelaka wi nri ookhapeleleya. (Sal. 4:8) Hiihaa ntoko Ana, naamwi mukhalelo ahu ohitoroken’ye mwawaakuveya, nlelo nnanwerya okhalano murecele. (1 Sam. 1:16-18) Vaavaa nniisoonaahu okhala oomaaleleya, ninnoona okhala wookhweya wuupuwelela moomaleleya ni opaka soolakelela mwa miruku. Tiheeni nnaphwanelaahu weera? Vaavaa munakhalaanyu a wuukhuwa mmwiichane ‘mukhapeleli.’ Mwawiihai? Mvekele ophiyerya woona murecele wa Muluku. (Luka 11:9; 1 Ate. 5:17) Wakhala wi munnavilela ni makacamiho, mutitelele ovekela nave munahaala woona murecele okhapelelaka murima ni muupuwelo anyu. —Aro. 12:12. w24.01 epaax. 21 ipara. 5-6

Wi eelihe nsina na Atiithi awe, Yesu aahihooxiwa, aahiruwaniwa nave aahootheryiwa. Owo aahisuwela wi aahiwiiwelela Atiithi awe mu ichu soothene nave haarino echu vyakala wi uuliheye muru. (Ahe. 12:2) Owo tho annasuwela wi Satana annamuhiphela mu ilukuluku seihe soovila. (Luka 22:2-4; 23:33, 34) Satana aachuna onanariha ororomeleya wa Yesu; Naamwiihiiha owo haawenrye! Yesu ohoona moomalela wi Satana nawoothe oonanara ni wi Yehova ookhalano alapeli awe oororomeleya, yaawo enakhapelela ororomeleya waya naamwi ehoolelaka saweeha soovilaxa! Nyuwaano munnachuna omuhakalaliha Mwene anyu onalamulela? Mutitelele ocicimiha nsina na Yehova, mwaakhaviheryaka akina ohuserya mikhalelo sootikhiniha sa Muluku ahu. Vaavaa muneeraanyuno yeeyo, munachariha inaani sa Yesu. (1 Pet. 2:21) Hiiha ntoko Yesu, nyuwaano munnamweeriha Yehova okhala oohakalala, mooniheryaka wi mwiicani Awe Satana nawoothe ohinuuliwa muru! w24.02 ipaax. 11-12 ipara. 11-13

Variyari va iyaakha thanu ivirale, macikhwi mancipale aachu aapatisiwa ntoko Anamoona a Yehova. Vaavaa nyuwaano muniiveleelaanyu wa Yehova, munnathanla okhala oohuserya a Yesu Kristu ni opaka yookhwela awe okhala yoochuneyaxa mu okumi anyu. Tiheeni enavolowela wiiveleela ntoko Mukristu? Yesu ooloca: “Yoole onachuna okichara, iikhooce mukhateiye.” (Mat. 16:24) Masu yaala ataphuleliwe mu Ekiriki awi: “iikhooce mukhateiye” ananwerya tho otaphuleliwa ntoko “owo onaphwanela oloca wi hooye mukhateiye.” Ntoko mulapeli awiiveleela a Yehova, nyuwaano munaphwanela okhooca echu vyakala yeeyo enahaala onanariha onthamwene anyu ni Yehova. (2 Ako. 5:14, 15) Eyo enaphitaanyerya okhooca “miteko sa mwiili,” ntoko ocapaheya. (Aka. 5:19-21; 1 Ako. 6:18) Apwanne soohiiha seiya inamukacamiha okumi anyu? Hooye, wakhala wi munnamusivela Yehova nave mulekecheya ni malakiheryo awe tamphurelo wa nyuwaano.—Sal. 119:97; Yes. 48:17, 18. w24.03 epaax. 2 epara. 1; epaax. 3 epara. 4

Yehova onnaavaha munepa awe waweela wa yaale onaweemereryeiye. (Mat. 12:18) Nnanwerya wiikoha: ‘Apwanne miyaano kinnawerya wooniherya mukhalelo mukina wa yawiima ya munepa wa Muluku mu okumi aka?’ Apwanne nyuwaano munnoona wi munnapixa murima ni akina opwaha vaavaa muhaakumve omusuwela Yehova? Vaavaa nyuwaano munannuwihaanyu mikhalelo saphaama sa munepa waweela wa Muluku, munanwerya okhalano ororomela wi Yehova onnaweemereryaani! Yehova oovahererya woopola wi aakhaviherye yaale onaweemereryeiye. (1 Tim. 2:5, 6) Nyenya, hanka wakhala wi nyuwaano hamunalekecheya wi Yehova onnaweemereryaani, naamwi murino nroromelo mu mukucho ni mpatisiwe? Muupuwele ela: Hannaphwanela wiiroromela mukhatiihu, nyenya moohiyana nnaphwanela omuroromela Yehova. Wa Yene, yaale enaroromela mukucho onnaweera eekhaikhai va miithoni vawe, nave Owo onnaaroromeliha waareeliha.—Sal. 5:12; Aro. 3:26. w24.03 epaax. 30 epara. 15; epaax. 31 epara. 17