“Upuwelani sa Wirimu”

“Upuwelani sa Wirimu tahi sa velaponi hoe.”​—AKOL. 3:2.

MWAHAALA WAAKHULA HAI?

Aaparahamu ni Saara yoonihenrye hai nroromelo naya mwa Yehova?

Nnasuwela hai wi Moose aatitelela weerano yookhwela ya Muluku?

Mmakhalelo taani nnahaalaahu wuupuwelela ichu sa wirimu?

1, 2. (a) Tiheeni enooniherya wi muloko wa nsana noopacerya wa Akolose waari mu yawoopiha? (b) Ekano taani yaavahiwe wi yaakhaviherye anna Akolose okhala oororomeleya?

NSANA noopacerya Akiristu a muloko wa Akolose yaari mu yawoopiha! Akina mmulokoni yaanatannya okawanyeya moorweela wa ovuwiha wiiwelela Nlamulo na Moose. Akina yaanachariha miruku sa amalapo, saavolowela wiipahula otokotoko. Avaanyaka mahusiheryo yaawo atheru, murummwa Paulo aarepa ekaarata yoolipiha, aalopolaka Akolose: “Wehani wi vahikhale mukina ówákhani nyuwo ntoko muhakhu, ntoko munasivelelanyu miruku, ni owoka watherutheru, wotchara ekano ya atchu, votchara selapo ya vathi, tahi vomutchara Kristu.”​—Akol. 2:8.

² Waakhanle wi Akiristu yaale oothanliwa yaakuha muupuwelo aya “votchara selapo ya vathi,” yaahaala orerya eculi soovaha sa Yehova sa ovuluxa. (Akol. 2:20-23) Wi ekhaviheryiwe okhapelela waataana waya wa esisapo ni Muluku, Paulo aahaalopola: “Upuwelani sa Wirimu tahi sa velaponi hoe.” (Akol. 3:2) Aai, anna a Kiristu yaaphwanela wuupuwela ewehereryo aya ya omwaakhela phatamari oohuuca yoowo ‘alokoleliwaya wirimu.’​—Akol. 1:4, 5.

3. (a) Ewehereryo taani Akiristu oothanliwa anakuhaaya mmuupuwelo? (b) Nikoho taani nnahaala othokororyiwa mmwaha yoola?

³ Olelo, Akiristu oothanliwa moolikana annakuha muupuwelo aya mu Omwene wa wirimu wa Muluku ni ewehereryo ya “mikelampa mikhwaya ya Kristu.” (Arom. 8:14-17) Nyenya hanka vooloca sa yaale arino ewehereryo ya veelaponi yavathi? Masu a Paulo anaphariheleya hai wa yaawo? Mmukhalelo taani “ipuchepuche sikina” sinuupuwelaaya ichu “sa wirimu”? (Yoh. 10:16) Nave oothene hiyo nnaphura hai orweela wa othokororya yootakiherya ya alopwana oororomeleya ntoko Aaparahamu ni Moose, yaawo moohipwacha makacamiho aya, yaakunhe muupuwelo aya mu ichu sa wirimu?

ENATAPHULELA EHEENI OKUHA MUUPUWELO AHU MU ICHU SA WIRIMU

4. Ipucepuche ikina inii ikuhe hai muupuwelo aya mu ichu sa wirimu?

⁴ Naamwi ipucepuche ikina ihirino ewehereryo ya wirimu, iho tho inanwerya okuha muupuwelo aya mu ichu sa wirimu. Mwawiihai? Moorweela wa omuhela Yehova Muluku ni sookhwela sa Omwene mu nipuro noopacerya mu ikumi saya. (Luka 10:25-27) Mmahiku yaala ookuchula, hiyaano ninnanweha Kiristu ontoko yootakiherya ahu. (1 Pet. 2:21) Ntoko annihu a nsana noopacerya, hiyaano ninnakumana ni mahusiheryo atheru, miruku sa elapo, moonelo wa wiithukumanyerya mmukhalelo yoola wa ichu wa Satana. (Mwaalakhanye 2 Akorinto 10:5.) Ntoko oomutakiherya Yesu, nnaphwanela okhala awiilipelela vooloca sa sawoopiha mmakupa ahu oomunepani.

5. Nnii niwerye hai waalikhela muupuwelo ahu vooloca sa wiithukumanyerya?

⁵ Apwanne moonelo wa wiithukumanyerya wa elapo onnavolowela ikumi sahu? Ichu seiyo nnasivelaahu sinnooneya orweela wa muupuwelo ni saweera sahu. Yesu aaloca: “Wiwo ori muhakhuá, wiwo onarwa-okhala murimá’tho.” (Mat. 6:21) Wi nsuwele ti woowi murima ahu onanikerihaayawo, ti yaphaama wiisaalikhela voovira wa elukuluku. Mwiikohe: ‘Elukuluku hai kinamalihaaka kuupuwelaka miyaha sa ikhorowa? Apwanne wuukhuwa ni maroca, muhakhu, naari ophwanya mukhalelo wa okumi woopuha onnamaliha elukuluku aka yincipale? Naari kinniilipixerya wi kikhaleno niitho na omoha nenno nniikhalela mu ichu soomunepani?’ (Mat. 6:22) Yesu aahooniherya wi yaale anahela voopaceryani ‘muhakhu wa elapo’ anniihela va yawoopiha mmakupa oomunepani.​—Mat. 6:19, 20, 24.

6. Nnavootha hai owana wahu ni mathitimanelo a mwiili?

⁶ Mwiili ahu woohiphaameya onnaneeriha wuupuwela ichu inahakalaliha moonelo ahu. (Mwaalakhanye Aroma 7:21-25.) Nihirino ovolowela wa munepa waweela wa Muluku mu okumi ahu, nnahaala ovaha mpuro “miteko yepiphi.” Eyo enanwerya oneeriha olapa “miteko yepiphi . . . mmararuwo ni yootakhala.” (Arom. 13:12, 13) Wi nivoothe ekhoco ni sa “velaponi”​—ichu seiyo inahakalaliha mwiili—​nnaphwanela okuha muupuwelo ahu mu ichu sa wirimu. Weerano yeeyo onachuneya wiilipixerya. Ti nthowa nene murummwa Paulo aalonceiye: “Kinathakamela vathi mwíli aka nave kinnera kapuro.” (1 Akor. 9:27) Moohikhwa minikwa, hannaphwanela wiihiya wakhala wi ninnachuna wiikhalelaru mmapokha a okumi! Hankooni nthokororye yeeyo Alopwana eeli oororomeleya yaapankaaya wi ‘emuhakalalihe’ Muluku​—Ahe. 11:6.

AAPARAHAMU “ÀHAROROMELA APWIYA”

7, 8. (a) Makacamiho taani Aaparahamu ni Saara yaakumannaayano? (b) Aaparahamu aakunhe muupuwelo awe mu eheeni?

⁷ Vaavaa Yehova aamulenleiye Aaparahamu ohiya echoko awe oya o Kaanani, owo aahiiwelela. Nthowa na nroromelo ni wiiwelela wa Aaparahamu, Yehova aatikitherya nlakano ni yoowo, ariki: “Nloko nà nnamukhala ntokotoko, kinamorèliha.” (Map. 12:2, BNM.) Iyaakha ohoolo waya, Aaparahamu ni mwaariye Saara, nlelo hiyaarino anamwane. Apwanne Yehova aacuwala nlakano nenlo owo aapankeiye ni Aaparahamu? Opwaha yeeyo, okumi o Kaanani hiwaari wookhweya. Aaparahamu ni mwaariye yaahiya empa ni amusi aya o Ur epooma yooreela o Mesopotamiya. Awo yaaheeca opwaha ikilomeeturu 1.600 wi ephiye o Kaanani, weiwo yaakhalaaya mmixakalani, ekumanaka ni etala ni ampava. (Map. 12:5, 10; 13:18; 14:10-16) Naamwi hiiha, awo hiyaarino nchuno na okookela opuha wa Ur!​—Mwaalakhanye Ahepri 11:8-12, 15.

⁸ Opwaha oteteiwa ni ichu “sa velaponi” ya vathi, Aaparahamu “àharoromela Apwiya.” (Map. 15:6, BNM.) Aai, owo aakuha muupuwelo awe mu ichu sa wirimu, mwawiihiiha owo aahikhala mu soororomeliha sa Muluku. Ntoko yookhumelela, nroromelo na Aaparahamu naareelihiwa vaavaa Muluku a Owerya Woothene amphiyenryeiye nave aloca: “Owehe wirimu ni wàlikhanye ithenèri, wawerya walikhanya! Nave yàhatxererya: Atxhu a nloko nà anamurelana.” (Map. 15:5, BNM.) Ela yaatepa omulipiha! Elukuluku yoothene Aaparahamu aweheiye erimu yoosareya itheneeri, owo anwerya wuupuwela yoororomeliha ya Yehova ya waaceererya nloko nawe. Nave mu elukuluku yoophwanelela ya Muluku, Aaparahamu aapaka evyo, hiiha ntoko yaaroromelihiwaaya.​—Map. 21:1, 2.

9. Ochara yootakiherya ya Aaparahamu enahaala onilipiha hai okhala ooweiwa mmuteko wa Muluku?

⁹ Hiiha ntoko Aaparahamu, hiyaano tho nnaweherya waakhwaniheryeya soororomeliha sa Muluku. (2 Pet. 3:13) Wakhala wi hannakuha muupuwelo ahu mu ichu sa wirimu, nnahaala woona olekela waakhwaniheryeya soororomeliha nave nnahaala okhulumuwa mmiteko sahu soomunepani. Ntoko yootakiherya, nyuwaano moopaka mikucho khalai wi mulape mmuteko wa opiyoneero naari mmukhalelo mukina wa waaceererya orummwa? Wakhala wi ti hiiha, munnaphwanela othamaleliwa. Hanka hihano? Muupuwele, Aaparahamu aakuha muupuwelo awe mu “muchetche wokhalano mathipelo.” (Ahe. 11:10) Owo “ámuroromela Muluku, nave yáhálakhanyeryiwa wa yowo ekhaikhai.”​—Arom. 4:3.

MOOSE AAMOONA “MULIPA OHONEYA OWO”

10. Mukhalelo taani wa okumi Moose aareiyeno ntoko mmiravo?

¹⁰ Muchu mukina yoowo aakunhe muupuwelo awe mu ichu sa wirimu aari Moose. Ntoko mmiravo, owo “áhuserya miruku yothene ya aAikupto.” Owo waari ohusiha otokweene. Tahi wi pahiru Yiikuputu aari olamulelo otokweene a elukuluku yeele, nyenya tho Moose aakhala mu echoko ya Farawo. Hiwaavo minikwa wi ni osuwela yoola wa vasulu, Moose aakhala “a’kuru m’masu awe m’mitekoni mwawe.” (Saw. 7:22) Mwaanyiherye ikari aahaaleiye okhalano! Naamwi hiiha, Moose aakuha muupuwelo awe mmwaha woochuneya​—weerano yoochuna ya Muluku.

11, 12. Mahusiheryo taani Moose acicimiheiye vancipale, nave nnasuwela hai?

¹¹ Ovinyerya woonamwane, Amannya Moose, Yokepeti chiryene yaamuhusiha vooloca sa Muluku a Aheepiri. Moose aanacicimiha mahusiheryo a Yehova ntoko a esisapo etokweene opwaha muhakhu vyakala. Owo akhweya aayeleela ikari seiyo aahaaleiye okhalano nthowa nawi owo akhala vaate wa echoko ya Farawo. (Mwaalakhanye Ahepri 11:24-27.) Moohiyana, mahusiheryo oomunepani a Moose ni nroromelo nawe wa Yehova saamweeriha okuha muupuwelo awe mu ichu sa wirimu.

¹² Moose aavahiwa mahusiheryo aphaamaxa a mulaponi yaawo yaaphwanyeya mmahiku awe, apwanne aapharihela wi ayeno vahoolo muteko awe o Yiikuputu, ovuwa, naari wiithukumanyerya soomwiilini? Hooye. Waakhanle wi aaheerano yeeyo, owo haahaala okhooca “weriwa mwanawe a mwana mwamuthiana a Fareo; athanla wereliwa sonanara vamoha ni atchu a Muluku, ahikhwelaru sohakalaliha sa sonanara.” Chiryene, Moose aapharihela mahusiheryo oomunepani wi ayeno vahoolo yoochuna ya Yehova.

13, 14. (a) Tiheeni yaamukhavihenrye Moose ophwanelela muteko yoowo Yehova aahaaleiye omvaha? (b) Ntoko Moose, tiheeni nnachunaahu weera?

¹³ Moose aari ooteteiwa ni Yehova ni achu Awe. Arino iyaakha 40 sa oyariwa, Moose aahuupuwela wi aari ooreheryeya waakhaviherya achu a Muluku woopowa mu ohooxa wa Muyiikuputu. (Saw. 7:23-25) Nyenya Yehova ahaakumve omvaha muteko yoowo, Moose aanachuna echu ekina. Owo aanachuna okhalano makhalelo ntoko wiiyeviha, opixa murima, ophaama, ni wiihiiha. (Masi. 15:33) Moose aanachuna ovyakihiwa yoowo waahaala omukhaviherya ovilela makacamiho yaawo yahaala okhumelela. Iyaakha vakhaani ntoko mukukhuli sahaala omvaha mavyakelo yaachuneya wi akhaleno makhalelo oomuluku.

¹⁴ Apwanne Moose aahuserya echu orweela wa ovyakiha yoowo aakhenleiye ntoko mukukhula? Aai! Masu a Muluku annaloca wi Moose aakhala “awiyeviha wapwana atxhu othene yàri mw’elapo ya vathi.” (Nama. 12:3, BNM.) Owo aakhala awiiyeviha, yeeyo yaamukhavihenrye waahoolela achu oohiyana ni makacamiho aya oohiyana hiyana moopisa murima. (Muk. 18:26) Moolikana, hiyaano ninnachuna okhalano makhalelo oomunepani yaawo anahaala onikhaviherya ovira mu “yohósha etokotoko” ni ovolowa mweelapo yahihano ya Muluku yeekhaikhai. (Yaw. 7:14) Apwanne ninnawerya okhala ni achu, ophitaanyerya yaale nnawoonaahu okhala ooceecheyaxa? Ti waphaama wiiwelela masu a murummwa Petro, yoowo aaloponle Akiristu akhwaawe: “Mwáchichimihani atchu othene. Mwásivelani anna.”​—1 Pet. 2:17.

OKUHA MUUPUWELO AHU MU ICHU SA WIRIMU

15, 16. (a) Ntakhara heeni ti woochuneya okuha muupuwelo ahu mu ichu saphaama? (b) Ntakhara heeni ti woochuneya Akiristu okhapelela meecelo aphaama?

¹⁵ Hiyaano nnakhala mu “ilukuluku sohosha.” (2 Tim. 3:1) Mwawiihiiha wi niikhaleleru ooreheryeya omunepani, ti yookhweleya okuha muupuwelo ahu mu ichu saphaama. (1 Ates. 5:6-9) Muthokororye mukhalelo nnaphwanelaahu weerano yeeyo mmakupa mararu a okumi ahu.

¹⁶ Meecelo ahu: Petro aanasuwela ochuneya waya meecelo aphaama. Owo aaloca: “Mukhalo anyu mwa amalapo okhale worera, wi . . . emuchichimiheke Muluku eniryaya yoneke miteko anyu yaphama.” (1 Pet. 2:12) Moohipwacha wakhala wi nri owaani, omuteko, oxikola, omathatelo, naari mu orummwa, ninniilipixerya oruuha ncicimiho wa Yehova moorweela wa meecelo ahu aphaama. Chiryene, ntoko achu oohiphaameya, oothene hiyo ninnahesa. (Arom. 3:23) Nyenya moorweela wa otitelela owanano “ekhocho yaphama ya nroromelo,” nnanwerya ovootha ekhoco ya mwiili ahu woohiphaameya.​—1 Tim. 6:12.

17. Nnii ntakiherye hai muupuwelo yoowo Kiristu Yesu aareiyeno? (Moone eruku yoopacerya.)

¹⁷ Moonelo ahu: Echu ekina eniiwanana ni okhapelela meecelo aphaama ori okhalano moonelo waphaama. Murummwa Paulo aaloca: “Mukhaleno mmurimani mwanyu monelo mmohamoha wa Yesu Kristu.” (Fil. 2:5, BNM.) Mukhalelo taani wa moonelo Yesu aareiyeno? Owo aari awiiyeviha. Wiiyeviha waamukhaviherya owetha mu orummwa awe. Waalaleerya akina vooloca sa michaka yaphaama ya Omwene wa Muluku waari woopacerya mmuupuweloni mwawe. (Mar. 1:38; 13:10) Yesu oona Masu a Muluku okhala akuru. (Yoh. 7:16; 8:28) Ni nthiti aahuserya Soorempwa Saweela wi awerye oromola, waakiha, ni othariha. Moorweela wa okhala awiiyeviha ni a mvai mu orummwa wahu ni mu yoohuserya ya muchu mukhateiye, nnahaala okhala ntoko Kiristu mmuupuweloni mwahu.

18. Mmukhalelo taani woochuneya nnaweryaahu okhaviherya muteko wa Yehova?

¹⁸ Nikhaviheryo nahu: Yehova ootikitherya wi “mu nsina na Yesu nikutha n’nikutha nikhwinyanye, na sa wirimu ni sa velaponi.” (Afil. 2:9-11) Naamwi mmakupa awe a vasulu, Yesu mwawiiyeviha onahaala wiiwelela yoochuna ya Tiithi awe, nave hiyaano tho nnaphwanela wiiwelela. (1 Akor. 15:28) Mwawiihai? Moorweela wa okhaviherya ni murima woothene muteko yoowo nnaleeliwaahu weerano, eyo ti wi ‘wahusiha atchu a maloko othene.’ (Mat. 28:19) Ninnachuna tho oweerela “othene sorera,” niweerelaka saphaama amwaacamani ahu ni annihu.​—Akal. 6:10.

19. Nnaphwanela olakelela weera eheeni?

¹⁹ Ninnathamalela wi Yehova onnanuupuxerya okuha muupuwelo ahu mu ichu sa wirimu! Mmakuchuwelo yaala, hiyaano ninnachuna ‘otchimaka ni evilelelo wupwaha wiwo nivahiwahu.’ (Ahe. 12:1) Hankooni oothene hiyo nlape “morwela m’murimani, ntoko mwa Apwiya,” nave Tiithi ahu a wirimu onahaala oreeliha wiilipixerya wahu.​—Akol. 3:23, 24.

[Eruku va epaaxina 30]

Olaleerya michaka yaphaama ya Omwene wa Muluku yaari echu yoopacerya mmuupuweloni wa Yesu (Moone eparakrafo 17)