MWAHA WA EKAAPA | MUNII MVOOTHE HAI WUUKHUWA

Wuukhuwa Ntakhara Ikhorowa

Paulo, tiithi a anamwane eeli onnaloca: “Vaavaa yaamanlaaya yoolya mu elapo ahu, yoolya yaari yoowalamela ni yoothowa. Naaneemela iwora sincipale niweheryaka yoolya, nyenya yaanamala muchu ahaakumve othuma. Achu yaari awooca nthowa na etala, nave akina yaanakhwa mu ramphani. Ichu sookhweleya saari soowalamela vancipale. Voocharela, ikhorowa saarama. Kaayeleela ikhorowa, ni muteko aka.”

Paulo aanasuwela wi emusi awe yaariki evuluwe, aaphwanela opharihela “mahusiho.” (Masiposipo 3:21, BNM) Paulo onnaloca: “Kaakhalano muteko kaasuwenlaka, nyenya kaaneemererya muteko vyakala kaaphwanyaaka, naamwi phatamari aakhala vakhaani. Akina yaakiliva ni yoolya naari ichu ikina. Wakhala wi kiliviwe ni ipaara xexe sa sapau, kaatumiha piili kilapela ikina. Kaakhalano asaana a alakhu 40. Vaavaa yinnuwaaya, kaahaatumiha nave kaathuma akina 300. Voocharela, kaahaatoroka alakhu 50 ni isaakhu piili sa yoolya. Ni yoolya yeeyo kaavakulela emusi aka ni amusi akina mu elukuluku yincipale.”

Paulo tho oosuwela wi echu yoochuneya muchu onaphwaneleiye opaka ori omuroromela Muluku. Vaavaa nnapakaahu yeeyo Muluku onalamuleleiye, owo onnanikhaviherya. Vooloca sa soothowa sa okumi Yesu aaloca: “Nave nyuwo muhitchunetchune yeyo . . . nyenya Atithinyu annasuwela wi iha sinnothowani.”​—Luka 12:29-31.

Moothananiha, Satana, mwiicani a Muluku, onnaawoka ancipale wi yuukhuweke ni ichu soomwiilini. Achu annuukhuwa ni soothowa saya seeparipari ni sawaanyiherya, nave annuukhuwa vancipale wi ephwanye ichu seiyo ihiri sookhweleyaxa. Ancipale annapaka ivaale, nave annahuserya mmukhalelo woovila wi “mutxhu osiyanre, kapuro a yole ompolen’ye.”​—Masiposipo 22:7, BNM.

Akina annapaka soolakelela soonanara. Paulo onnaloca: “Amwaacamani ancipale yaahiya imusi saya nave yaavinya eyaaka waavya yoolya mmapuro makina. Akina yaavinnye ehirino ipaaxo soophwanelela nave hiyawenrye ophwanya muteko. Wiiliwiili awo yaaniipitha ntakhara mapilisa nave yaanakona mphironi. Awo hiyaamvye miruku wi Muluku aakhaviherye. Nyenya hiyaano ninnavilela ni othowa wa ikhorowa vamoha ntoko emusi, nnikhaviheryo na Muluku.”

OCHARA EKANO YA YESU

Paulo onnaloca: “Yesu aaloca: ‘Ntakhara awe muhipele murima ni omelo: vawi omelo onarwa-wisípela murima mekhaya.’ Mwawiihiiha mavekelo aka a nihiku nnihiku yaari awi Muluku ‘anivahe hiyo olelo yólya yahu ya’lelo’ wi niwerye ovuluwa. Nave owo aanikhaviherya, hiiha ntoko Yesu aaroromelinheiye. Tahi wi mahiku oothene naanawerya ophwanya yeeyo naachunaahu. Nihiku nikina, kaaheemela wi kithume yoolya nave nkaasuwela yeeyo yaatumihiwa. Kaaphin’yaaka, kaahoona wi saari ipulaxa. Miyaano nkinasiveliwa ni ipulaxa. Nyenya iho saari yoolya, mwawiihiiha naahikhuura ipulaxa ohiyu yoole. Kinnamuthamalela vancipale Muluku woona wi variyari va elukuluku yeeyo, emusi aka hetonko okona ehilyile.”a

“Hiihaano ichu ti sookhweya othuma wa hiyo. Nyenya moorweela wa yaweereya ahu noohuserya wi nikhaviheryo nookhweleyaxa ovilelano wuukhuwa ori omuroromela Muluku. Yehovab onahaala onikhaviherya waakhala wi nootitelela opaka yookhwela awe. Ninnoona waakhwanela wa Salmo 34:8: ‘Nkalawihani, nave onani wi Yehova taphama; Óréla mutchu yowo onamuroromela Yowo.’ Ntoko yookhumelela, hiyaano hannoova okumanano makacamiho a ikhorowa wanawiili.

“Vano nohiiwexexa wi echu achu anachunaaya wi evuluwe tahi muteko ni ikhorowa, nyenya yoolya. Ninnaweherya elukuluku yeeyo yoolaiherya ya Muluku enahaalaaya okhwaaniherya: ‘Mwilaponi’mmo munarwa-mukhala’mo olya munchipale.’ Mu elukuluku yeela, ‘nakhalano sólya ni sawikhunelano, iha sinikhwáne.’ Ninnachara masu ala oorweela Mpiipiliya: ‘Murimányu okhale wohisivela muhakhu, hiho murianyuno sokhwánelekeni; ntakhara Yowo tálonchiye, Nkirwa kohiyaru nari, nari woriha, nkirwa-koriha tchiri.’ Mwawiihiiha ni mathowa aphaama nnanwerya oloca: ‘Mulipa-okikhaviheryaka ti Apwiya; nkirwa-kóva.’”c

Ninnachuneya nroromelo neeparipari weeca ni Muluku ntoko Paulo ni amusi awe aneeraaya. (Mapacereryo 6:9) Moohipwacha wakhala wi ninnahooxeya ni othowa wa ikhorowa hiihaano naari omwaahiyu, yootakiherya ya Paulo ya nroromelo ni miruku soophara muteko ennanihusiha ichu soochuneya.

Hanka wakhala wi makacamiho a emusi annaneeriha okhala awuukhuwa?

[Masu a vathi]

[Eruku va epaaxina 5]

Muluku onnaakhaviherya oororomela ophwanya ‘yólya aya ya’lelo.’