MWAHA WA EKAAPA | MUNII MVOOTHE HAI WUUKHUWA

Wuukhuwa Ori Voothevene!

“Kaaya othuma yoolya nyenya kaaphwannye pahiru ipulaxa​—saatepa owalamela! Mmeeloni mwaya omusika hiyaariwo yoolya.”​—Paulo, Simpapwe.

“Iyaka aakihiya vamoha ni anamwane. Kaahaala ovootha hai nikacamiho nlo? Tiheeni yaahaala weereya ni anamwane aka?”​—Yaneti, Estatu Unitu.

“Vaavaa akapuchi yaarumaaya, kaachimaka kikona nave kiikhuneela elukuluku yeeyo ikaruma saaphuwaaya. Voocharela kaanathukumela.”​—Alona, Isarayeli.

Nnakhala mu, “ilukuluku sohósha.” (2 Timoteo 3:1) Ancipale anahooxeya ni othoiwa wa ikhorowa, okawanyeya wa imusi, ikhoco, ireca sawiipha ni ipahu sa maphacuwelo ni ikina. Mwawaaceererya achu oohiyana hiyana ari awoova: ‘Otorokeya kinoonaaka mmwiilini apwanne enahaala okhala ereca?’ ‘Asisulwa aka anahaala wunnuwa mu elapo ya mukhalelo taani?’

Wuukhuwa woothene tahi woonanara. Hiyaano ninnuukhuwa nihaakumve opaka eporova, operekha mwaha, naari waakhula makoho vaavaa nnachunaahu muteko. Nave woova epahu onnanikhaviherya osepa okhwa. Nyenya woova woopwaha mphimo naari wuukhuwa woonyesererya onnapahula. Otholathola wa hiihaanoru onaavolowela achu atokweene oophiyerya 68.000 onnooniherya wi wuukhuwa onnatannya okhwa wawaakuveya. Ni mathowa aphaama, Yesu ookoha: “Nave tani a nyuwo ni wipa murima anawerye wachererya va wunnuwa wawe mwono mmoha?” Chiryene, wuukhuwa honaaceererya okumi wa muchu. Yesu aalopola: “muhipe murima.” (Mateyu 6:25, 27) Eyo enahaala oweryeya hai?

Naakhulo nnaphitaanyerya opharihela miruku soophara muteko, wunnuwiha nroromelo neeparipari mwa Muluku, oteka nroromelo ntakhara omwaahiyu. Naamwi hiihaano nihihoolelaka makacamiho omwaahiyu nnahaala okumanano. Hankooni noone ti mwawiihai weerano yeeyo yaamukhavihenryaaya Paulo, Yaneti, ni Alona ovilela ni wuukhuwa.