MWAHA WA EKAAPA | MUNII MVOOTHE HAI WUUKHUWA

Wuukhuwa Ntakhara Yawoopiha

Alona onnaloca: “Vaavaa kiiwalaaka oruma wa akapuchi, murima aka waapacerya okuukucha, nave kaachimaka wi kiipithe. Nyenya naamwi kiipinthe nlelo kaari awuukhuwa. Enakhala yoovilaxa kakhala okhwipi ohiriwo woochawelavo. Nihiku nimoha kirikimweeca muramphani, kaapacerya wunla nave nkaawerya omumula. Yaaviravo elukuluku yincipale wi kikhale oomaaleleya. Voocharela akapuchi yaakookela oruma.”

Ekhoco echu ekina enatannya wuukhuwa. Ntoko yootakiherya, osuwela wi nyuwaano naari oosiveliwa anyu ookhalano ereca yoohipenuxeya enahaala oweerihaani okhala oohaleeliheya mmuupuweloni. Nave wa akina echu enaweeriha okhala awuukhuwa iri minikwa ntakhara omwaahiyu. Minikwa ntoko, ‘Apwanne anamwane ahu ni anaaya anahaala okhalaka mu elapo yoosareya ikhoco, nlala ni masooso?’ Nnii nivilele hai ni sawuukhula seiya?

Vaavaa onooneiye ichu soonanara seereyaka, “mutxhu a miruku, onnòna yawopiha, ahuluwa [iipitha].” (Masiposipo 27:12, BNM) Hiiha ntoko nniisaakihaahu omwiilini, nnawerya tho weeravo echu wi naakihe okhala wahu phaama wa mmuupuweloni. Mathatelo a nlala ni michaka seiyo irino iruku sa nlala sinnaaceererya wuukhuwa wahu ni wuukhuwa wa anamwane ahu. Nnaphwanela osepa iruku seyo. Muluku haapatunxe muupuwelo ahu wi okhalekeno ichu soonanara. Moohiyana, nnaphwanela osareiha muupuwelo ahu ni “itchu . . . separipari, . . . sochichimiheya, . . . siniweya saphama.” Wakhala wi noheerano yeeyo, “Muluku a murechele” onahaala onivaha murecele mmuupuwelo ni mmurimani.​—Afilipi 4:8, 9.

ESISAPO YA NIVEKELO

Nroromelo neeparipari ninnanikhaviherya ovilela ni wuukhuwa. Piipiliya onnanceenyerya ‘oweherya m’mavekelo.’ (1 Petro 4:7) Nimveke Muluku wi anikhaviherye nave anivahe miruku ni olipa murima wi nikhumelele phaama mmakacamiho ahu, nsuwelaka wi owo “annaníwa ni etchu yeyo n’navekahu, ninnasuwela wi nokhalano iha nimvekilahu.”​—1 Yohane 5:15.

Piipiliya onnathariha wi Satana tokhanle “mutokwene a elapo ela ya vathi” nave wi “elapo yothene ya vathi enakona mwa mulipa-onanara owo” ohiya mwa Muluku. (Yohane 12:31; 1 Yohane 5:19) Nthowa na yeeyo, Yesu mookwakwaleya oonihusiha ovekela: “Munivulushe wa ónanara owo.” (Mateyu 6:13) Alona onnaloca: “Vaavaa oruma wa akapuchi onapaceryaaya, kinnamveka Yehova wi akikhaviherye omaaleleya. Nave tho aiyaka annavekela ni miyaano. Ovekela onnakhaviherya chiryene.” Ela enniiwanana ni masu ala a Mpiipiliyani: “Yehova ori vakhiviru ni yawo enamwitchana, Othene yawo enamwitchana mweparipari.”​—Salmo 145:18.

EWEHERERYO AHU YA OMWAAHIYU

Mu Mwaha awe wa Vamwaako, Yesu aahaahusiha oomuchara awe ovekela: “Omwene anyu orwe.” (Mateyu 6:10) Omwene wa Muluku onahaala omaliha wuukhuwa woothene okhala wookhala. Moorweela wa Yesu yoowo okhanle “Mwene a muretxele,” Muluku onahaala ‘ohíha ekhocho [ophiyerya] o makutchuwelo elapo ya vathi.’ (Isaiya 9:5, BNM; Salmo 46:9) “Apwiya [Muluku] anamukhala muthoriha a atxhu othene, . . . Maloko hekawana yawo-yawo, nave herwa enahuserya mawanelo a ekhotxo. . . . Nave havotho oni anamututusa [mukina].” (Mikeya 4:3, 4, BNM) Achu oohakalala “anamuteka ipa ni anamukhala mwemmo, anamwàla miri nave anamulya sawima saya sene.” (Isaiya 65:21, BNM) “Havo oni ikhupanyeryeke va nthowa na witxeliwa.”​—Isaiya 33:24, BNM.

Olelo, naamwi neereryaka osepa ipahu, hori wooweryeya ikwaha soothene osepa saweererya soohiwehereryeya naari osepa okhala mu nipuro naari mweelukuluku yoonanara. (Eklesiyaste 9:11) Ntoko enereyaaya opacerya khalai, ikhoco, nlala ni ireca sinnatitelela owiipha achu aphaama. Ewehereryo taani achu yaawo aryaayano?

Achu oohaalakhanyeya, yaawo waaca waya pahiru osuweliwe ti Muluku, anahaala okhala ni okumi wanaawiili. Mwa hiihaano, awo anamurupa, ookhapeleleya mmuupuweloni mwa Muluku, ophiyerya nihiku nenlo “othene ari m’mahiyeni enarwa . . . ekhuma.” (Yohane 5:28, 29) Alocaka sa ovinya mookhwaani, Piipiliya onnaniroromeliha: “[Ewehereryo] yeyo nriahuno ntoko ankora ókumi, yotikitheryeya ni yolipatho.” (Ahebri 6:19) Nave Muluku “avaha atchu othene yochichimiherya ya hiho, ámvíhaliye [Yesu] wa okhwa.”​—Saweriwa Tarummwa 17:31.

Mwa hiihaano, naamwi yaale aniilipixerya omuhakalaliha Muluku anahaala okumana ni sawuukhula. Moorweela wa omwaacamela Muluku mu nivekelo, ni wunnuwiha nroromelo mu ewehereryo ya omwaahiyu yoorweela Mpiipiliyani, Paulo, Yaneti ni Alona annakhumelela phaama mu ovilela ni wuukhuwa. Hiiha ntoko yeren’yaaya ni yaawo, “Muluku a eweheryeryo osaryeni nyuwo ni otheya wothene ni murechele muroromela.”​—Aroma 15:13.

[Ekaaxa va epaaxina 9]

Hanka Waavya Nikhaviheryo na Alipa Eekumi?

Wakhala wi munnuukhuwa nihiku nnihiku naamwi mwiilipixenrye omaliha, akhweya onamuchuneya waavya nikhaviheryo na alipa eekumi. Vaavaa wuukhuwa onaaceereryeyaaya ophiyerya ekhala ereca, eyo ennooniherya wi owo mwaha wawiiseela. Mutokweene Eekumi akhweya onahaala waalikhela mwiili anyu, woona wi wuukhuwa ikwaha ikina onarweela wa nikacamiho noovitheya. Orweela wa waalikhela Mutokweene Eekumi onahaala wookhaviheryaani olakelela mukhalelo wa olooliwa.a

[Nsu na vathi]