MWAHA WA EKAAPA | MUNII MVOOTHE HAI WUUKHUWA

Wuukhuwa Ntakhara Emusi

Yaneti onnaloca: “Kimanle waayeleela atiithi aka mookhwani, aiyaka yaakileela wi yaahaala omwaavya muthiyana mukina. Ohoolo waya, ehilannye yaakuxa ichu saya nave ekihiya miyaano ni anamwane aka apiili.” Yaneti aaphwanya muteko, nyenya ikhorowa aaphwanyeiye hisaakhwana echu. Nave aakhalano sawuukhula sincipale ohiya pahiru wuukhuwa ni ikhorowa. “Woona wi kaari mukhataaka kaanakhulumuwa nthowa na waaca wa mirici kaaryaakano. Kaaniisoona okhalano nthowa woona wi nkaawerya waavakulela phaama anamwane aka hiiha ntoko asitiithi akina. Ophiyerya hiihaano kinnoova achu okikhwa minikwa miyaano ni anamwane aka. Apwanne annakhwa minikwa waakhanle wi kaahiilipixerya okhapelela othela waka?”

Mavekelo annamukhaviherya Yaneti ovilela ni wuukhuwa wawe ni olipiha onthamwene awe ni Muluku. Owo ooloca: “Elukuluku ya ohiyu vaavaa elapo enakhalaaya cuu kinnatepa okhala awuukhuwa. Ovekela ni omwaalakhanya Piipiliya onnakikhaviherya okona. Makupa anatepa okisivela anaphwanyeya mu Afilipi 4:6, 7: ‘Muhúkhuweru mmurima; nyenya mu sothe sene n’nivekelo, ni ochichimiha, vamoha ni othamala, hiho munavekanyu sisuweliwe ti Muluku. Nave murechele wa Muluku wopwaha osuwelasha wothene, onarwa-okhapelela mirimányu ni sawupuwelela sanyu.’ Kinnamaliha elukuluku yincipale kivekelaka, nave kinnoona murecele wa Yehova mpuwa mwaka.”

Masu oohakalaliha a Yesu vooloca sa nivekelo annaphariheleya wa mukhalelo woothene wa wuukhuwa: “Atithinyu annasuwela itchu sinothowani, nyuwo muhipachenrye omveka Yowo.” (Mateyu 6:8) Nave nnaphwanela omveka. Nivekelo mukhalelo yoowo onanikhaviherya ‘omwachamela Muluku.’ Tiivi eri yookhumelela ya weerano yeeyo? “Anarwa-awachamelani nyuwo.”​—Yakobo 4:8.

Chiryene, tahi wi nivekelo pahiru nnamoona onivaha murecele mmuupuweloni nthowa na oloca wuukhuwa wahu. Yehova, “Awiwa nivekelo,” onneeravo echu ntakhara yaale anamwaavya moororomeleya. (Salmo 65:2) Ti nthowa nene Yesu aahusinheiye oomuchara awe “ovekela mahiku othene, óhivela.” (Luka 18:1) Nnaphwanela otitelela omveka Muluku wi anihoolele ni onikhaviherya, nsuwelaka wi onahaala oreeliha nroromelo nahu. Hannaphwanela okhalano minikwa vooloca sa nchuno nawe ni owerya wawe. ‘Ovekela mohihiyeryerya’ onnooniherya wi nookhalano nroromelo neeparipari.​—1 Atesalonika 5:17.

OKHALANO NROROMELO ONATAPHULELA EHEENI CHIRYENE

Nroromelo tiheeni? Nroromelo onavolowela ‘omusuwela’ Muluku ntoko muchu. (Yohane 17:3) Ninneerano yeeyo moorweela wa ohuserya muupuwelo wa Muluku moorweela wa Piipiliya. Ninnahuserya wi onnamoona muchu ti muchu a hiyo nave onnachuna onikhaviherya. Nyenya, nroromelo neeparipari ninnaphitaanyerya ichu sincipale ohiya pahiru osuwela ichu vooloca sa Muluku. Ennaphitaanyerya tho okhalano onthamwene waphaama ni yoowo. Hiiha ntoko eneereyaaya ni achu, onthamwene honaphacuwa mwawaakuveya. Moovira wa elukuluku, ‘nroromelo [nahu] ninnannuwa’ vaavaa nnahuseryaahu sincipale sa yoowo, vaavaa nneeraahu “hiho sinamutheyiha Yowo,” ni vaavaa nnoonaahu nikhaviheryo nawe. (2 Akorinto 10:15; Yohane 8:29) Mukhalelo yoowo wa nroromelo, naamukhaviherya Yaneti ovilela ni wuukhuwa wawe.

Yaneti ooloca: “Echu chiryene ekikhavihenrye wunnuwiha nroromelo naka ori woona mukhalelo Yehova aakikhaviheryeiye mu soothene. Ilukuluku sincipale naaneereliwa soonanara saakhala ntoko soohiweryeya ovilela. Ni mavekelo, Yehova ikwaha soothene aanavaha woochawelavo mmukhalelo naahaanyiheryaahu. Vaavaa kinuupuwelaaka ichu soothene onakeereleiye, eyo ennakeeriha omuthamalela. Wiiliwiili Yehova onnanikhaviherya mu elukuluku yoophwanelela,vaavaa nnachunaahu nikhaviheryo. Nave onnakivaha asinthamwene aphaama yaawo ari Akiristu eeparipari. Wiiliwiili anniivaha wi ekikhaviherye nave annavaha yootakiherya yaphaama wa anamwane aka.”a

“Koosuwela ntakhara heeni Yehova onaloceiye mu Malakiya 2:16, BNM, wi: ‘kinnitxanano omwalana.’ Wa yoole ohirino nthowa, ti woovila ovilela nikacamiho nenlo . Soovira iyaakha sincipale opacerya vaavaa aiyaka akihiyalaaya, nyenya mu ilukuluku ikina kinnoona omeekha ni wiisoona ohikhala echu. Vaavaa kinakhalaaka awuukhuwa, kinneera echu wi kimukhaviherye muchu mukina, nave eyo ennakikhaviherya tho.” Moorweela wa opharihela nlakiheryo na Piipiliya ni ohiivalaanya, Yaneti onnawerya okukuca wuukhuwa wawe.b​—Masiposipo 18:1.

Yaneti onnaloca: “Echu enakilipiha ori osuwela wi Muluku ‘ti Atithi a ikwasuni, ni óthoriha a anámukhwele.’ Owo harwa anihiya ntoko aiyaka yenraaya.” (Salmo 68:5) Yaneti oosuwela wi Muluku hananeeha “ni sonanara.” Moohiyana, owo onnavaha miruku “ni muriméne” nave tho onnavaha “otokwene wopwaha wa’kuru” wi anikhaviherye ovilela ni sawuukhula sahu.​—Yakobo 1:5, 13; 2 Akorinto 4:7.

Hanka wakhala wi nri awuukhuwa nthowa na okumi ahu okhala va yawoopiha?

[Masu a vathi]

[Eruku va epaaxina 7]

Muluku “ti Atithi a ikwasuni, ni óthoriha a anámukhwele.”​—Salmo 68:5