Munnoona Ntata na Muluku mu Okumi Anyu?

“Ntata n’Apwiya nnamwakhaviherya yale anàroromela.”​—ISAIYA 66:14.

MACIPO: 65, 26

MWAAHAALA WAAKHULA HAI?

Ntakhara heeni achu akina annoona ntata na Muluku mu okumi aya nyenya akina hooye?

Tiheeni enooniherya wi Yehova onnanthokororya mmahiku ahu?

Nnii niwerye hai woona ntata na Muluku mu okumi ahu?

1, 2. Tiheeni achu akina anuupuwelaaya vooloca sa Muluku?

OLELO, achu ancipale anuupuwela wi saweera saya hasinamvolowela Muluku. Anoona wi Muluku hanapwacha yeeyo enaaphacuwela. Ntoko yootakiherya, echeku etokweene emanle onanariha makupa mancipale a Filipina mu Novempro a 2013, mutokweene a epooma emoha aaloca: “Akhweya Muluku ori ocai.”

² Achu akina anuupuwela wi Muluku hanawerya woona yeeyo awo aneeraaya. (Isaiya 26:10, 11; 3 Yohani 11) Akina mmahiku a murummwa Paulo yuupuwela mmukhalelo woolikana. Paulo aaloca wi awo ‘akhotxa osuwela wa Muluku.’ Awo yaari oohiroromela, a nrima ni oonanara.​—Aroma 1:28, 29.

3. (a) Makoho taani nnaphwanelaahu wiipakela? (b) Mpiipiliya, “ntata” na Muluku enaahiwa eheeni?

³ Hanka hiyaano? Noosuwela wi Yehova onnoona soothene nnapakaahu. Nyenya apwanne ninneemererya wi Yehova onnanthokororya? Ninnoona ntata nawe nookhaviherya mu okumi ahu? Mpiipiliya, “ntata” na Muluku nnaahiwa ikuru sawe sawaakiha. Owo onnapharihela ikuru sawe wi aakhaviherye akapuro awe ni owiikicha ntakhara amwiicani awe. (Mwaalakhanye Malamulo 26:8.) Yesu aaloca wi achu akina enarwa “emona Muluku.” (Mateu 5:8) Apwanne nri variyari va yaawo? Nnii niwerye hai ‘omona Muluku’? Hankooni nihuserye sootakiherya sa Mpiipiliya sa yaale yoonne ntata na Muluku mu okumi aya ni yaale yaahiwenrye woona. Nnahaala tho ohuserya mukhalelo nroromelo nnanikhaviheryaaya woona ntata na Muluku.

YAALE YAAKHONCE WOONA NTATA NA MULUKU

4. Amwiicani a Isarayeli yaakhonce hai woona ntata na Muluku?

⁴ Khalai, achu ancipale yaakhalano ekari ya woona ni wiiwa mukhalelo Muluku aakhavihenryeiye Aisarayeli. Mootikhiniha Yehova aawoopola achu awe o Yiikuputu nave aahaatoloxa mamwene awaaca mu Elapo ya Nlakano. (Yosuwa 9:3, 9, 10) Naamwi mamwene yoonne ni wiiwa mukhalelo Yehova aawooponleiye achu awe, “yavanela owana ni Yosuwa vamoha ni nloko na Isarayele.” (Yosuwa 9:1, 2) Awo yaakhalano ekari ya woona ntata na Muluku vaavaa yaawannaaya ni Isarayeli. Ntoko yookhumelela ya ikuru itokweene sa Yehova “nsuwa nahèmela navetho mweri wahèmela ophiyerya nloko na Isarayeli niwinlenle ikuhu amwitxana aya.” (Yosuwa 10:13) Yehova aaheeriha wi amwiicani a Isarayeli “yumihe murima,” wi ewane ni Isarayeli. (Yosuwa 11:20) Amwiicani awo yaavoothiwa nthowa na okhooca weemererya wi aari Yehova yoowo aawana ntakhara achu awe.

5. Tiheeni Mwene oonanara Akape aakhonceiye weemererya?

⁵ Ohoolo waya, Mwene oonanara Akape aakhalano ekari ya woona ntata na Muluku ikwaha sincipale. Eliya aamuleela: “Miyakha sa mmwahiyu herupa epwila nari hinimà nikami, ophiyerye elukuluku kineraka kilotxe!” (1 Mamwene 17:1) Ela yaaheererya pahiru orweela wa ntata na Muluku, nyenya Akape aakhooca weemererya. Voocharela, Eliya aavekela wa Yehova nave owo aahaakhula moorweela wa orumiha mooro wirimu. Akape aahoona yeela. Ohoolo waya, Eliya aamuleela Akape wi Yehova aahaala omaliha elimwi ni orupiha epwila. (1 Mamwene 18:22-45) Akape aahoona sootikhiniha soothene, naamwi hiiha aakhooca weemererya wi saari ikuru sa Yehova. Tiheeni nnahuseryaahu orweela wa yaweereya yeela? Nnaphwanela waavya ikari sa woona ntata na Muluku mu okumi ahu.

VAYA YAAHOONA NTATA NA YEHOVA

6, 7. Tiheeni Akapawoni ni Rahapi yeemerenryaaya?

⁶ Akapawoni yaari oohiyana ni maloko makina. Awo yaahoona ntata na Muluku. Ohiya owana ni Aisarayeli, Akapawoni yaachuna opaka murecele ni yaawo. Ntakhara heeni? Awo yaaloca wi waari nthowa na wiiwa vooloca sa Yehova ni soothene aapankeiye. (Yosuwa 9:3, 9, 10) Yaari echu ya miruku weemererya wi aari Yehova yoowo aawana ntakhara Isarayeli.

⁷ Rahapi tho aahoona ntata na Yehova. Owo haari Muisarayeli, nyenya aahiiwa mukhalelo Yehova aavulunxeiye achu awe o Yiikuputu. Vaavaa anamahocela apiili yaaruulaaya wa yoowo, Rahapi aaloca: “Kòsuwela wi Apwiya ahonnyani elapo ela.” Rahapi aanaroromela wi Yehova anwerya omoopola owo ni emusi awe. Aahooniherya nroromelo nawe wa Yehova naamwi asuwelaka wi weerano yeeyo yaari yawoopiha.​—Yosuwa 2:9-13; 4:23, 24.

8. Aisarayeli akina yoonne hai ntata na Muluku?

⁸ Moohiyana ni Mwene Akape, Aisarayeli akina yaawo yoonne mooro okhumaka wirimu vaavaa Eliya aavekenleiye yaaheemererya wi ti Muluku eenreno. Awo yaakhuwela: “[Yehova] Muluku a eparipari”! (1 Mamwene 18:39) Vaya chiryene yaahoona ntata na Muluku.

9. Nnii nimoone hai Yehova ni ntata nawe olelo?

⁹ Noothokororya sootakiherya saphaama ni soonanara inanikhaviherya wiiwexexa yootaphulela ya ‘omona Muluku’ naari woona ntata na Muluku. Vaavaa nnamusuwelaahu Yehova ni mikhalelo sawe, ninnoona ntata ni “mitho a murima.” (Éfeso 1:18) Ela ennanceenyerya waatakiherya achu oororomeleya a khalai ni amutano yaawo anoona mukhalelo Yehova onaakhaviheryeiye. Apwanne nookhalano eneneeryo yawi Muluku onaakhaviherya achu awe olelo?

ENENEERYO YA NTATA NA MULUKU

10. Eneneeryo taani nryaahuno enooniherya wi Yehova onnaakhaviherya aachu olelo? (Moone eruku yoopacerya.)

¹⁰ Nookhalano ineneeryo sincipale inooniherya wi Yehova onaakhaviherya achu olelo. Ikwaha sincipale ninniiwa saweereya sa yaale yaavekenle evekaka nikhaviheryo na Muluku mu okumi aya nave yaakhuliwa. (Salumu 53:2) Ntoko yootakiherya, vaavaa Allan aalaleeryeiye mu evilivili ekhaani ya Filipina, owo aamphwanya muthiyana yoowo aapacenrye wunla. Allan onnaloca: “Wooxixelo wa nihiku nenle, muthiyana owo aavekela wi Anamoona a Yehova emuxekurye.” Owo aamuhuserya Piipiliya ni Anamoona a Yehova ari namwali, nyenya aatheliweiye aathaamela o evilivili, nave aahiya ohuserya. Muluku aahaakhula nivekelo nawe mwawaakuveya nave eyo yaatannya murima awe. Ehivinre eyaakha, owo aaveleela okumi awe wa Yehova.

11, 12. (a) Yehova onaakhaviherya hai alapeli awe? (b) Mutharihe mukhalelo Yehova aamukhavihenryeiye murokora mmoha.

¹¹ Alapeli ancipale a Yehova annoona ntata nawe nookhaviherya vaavaa anacharuwaaya sookhovelela soonanara ntoko omulya soona, mirece, naari woona epwitikiri. Akina annaloca wi yaaheererya ocharuwa mu ikuru saya nyenya ehiwerya. Nyenya vaavaa yaavenkaaya nikhaviheryo na Yehova, owo aahaavaha “owerya . . . otokotoko,” nave yaawerya ocharuwa sookhovelela saya soonanara.​—2 Korinto 4:7; Salumu 37:23, 24.

¹² Yehova tho onnaakhaviherya alapeli awe ovilela ni makacamiho a muchu mukhateiye. Ela yaaheereya ni Amy. Owo aavekiwa okhaviherya otekiwa wa Empa ya Omwene ni empa ya mamisiyonaariyo o evilivili ya Oceano Pacífico. Sookhovelela saari soohiyana, nyenya hiwaariwo makeesi naari maahi aphaama, mixewe saari soosareya maahi, aakhalano munkhela ni emusi awe, nave aakhala mu ekwartu ekhaani ya hotel. Nihiku nimoha owo aamusamela murokora yoowo aalapeiyeno. Aatepa osooseya murima nthowa na yeeyo enreiye. Vaavaa aakookenleiye mu ekwartu awe, owo aavekela wa Yehova avekaka nikhaviheryo. Vaavaa makeesi yaavarenlaaya, owo aahaalakhanya mwaha mmoha wa Mulipeleli waaloca sa exikola ya Kileyati. Mwaha owo waaloca sa nikacamiho nimohamoha aareiyeno. Owo oriye: “Kaahoona wi Yehova aaloca ni miyaano mweelukuluku yeele. Eyo yaakiceenyerya otitelela muteko aka.”​—Salumu 44:25, 26; Isaiya 41:10, 13.

13. Eneneeryo taani nryaahuno enooniherya wi Yehova onnaakhaviherya achu awe waakiha ophwanelela waya olaleerya?

¹³ Yehova tho onnaakhaviherya alapeli awe waakiha ni otikitherya michaka yaphaama. (Filipi 1:7) Ntoko yootakiherya, vaavaa alamuleli yeerenryaaya omaliha muteko ahu wa olaleerya, naahiisaakiha variyari va olamulelo. Noovootha miyaha sawaakhwana 268 elapo yoothene ophitaanyerya 24 naavonthaahu ni Corte Européia dos Direitos Humanos opacerya eyaakha ya 2000. Ti yawooneya wi haavo onahaala omaaliha ntata na Muluku!​—Isaiya 54:17; mwaalakhanye Isaiya 59:1.

14. Eneneeryo taani ekina nryaahuno wi Muluku ori ni achu awe?

¹⁴ Olaleeryiwa wa michaka yaphaama orukurerya elapo eneneeryo ekina ya ntata nookhaviherya na Muluku. (Mateu 24:14; Saweriwa T’arummwa 1:8) Alapeli a Yehova a maloko oothene ari awiiwanana nthowa na nikhaviheryo na Yehova. Wiiwanana iwo ti wavameekhaaya! Ophiyerya achu ahinamulapela Yehova annaloca: “Muluku ori epariparyene veri vanyu.” (1 Korinto 14:25) Nookhalano ineneeryo sincipale inooniherya wi Muluku ori ni achu awe. (Mwaalakhanye Isaiya 66:14.) Hanka vooloca sa nyuwo? Munnoona ntata na Yehova mu okumi anyu?

MUNNOONA NTATA NA YEHOVA MU OKUMI ANYU?

15. Tiheeni enahaala onihiiha woona ntata na Yehova mu okumi ahu?

¹⁵ Ikwaha ikina, hannoona ntata na Muluku mu okumi ahu. Ntakhara heeni? Vaavaa nnakhalaahu mmakacamiho, ti wookhweya ocuwala wi Yehova aanikhaviherya khalai ikwaha sincipale. Ela yaaheereya ni Eliya. Owo aari oolipa murima, nnya vaavaa Mwene a Mwaamuthiyana Yesapeli aamoopopinheiye omwiipha, Eliya aahoova. Owo aacuwala wi Yehova aamukhaviherya khalai. Piipiliya onnaloca wi Eliya aachuna okhwa. (1 Mamwene 19:1-4) Ti woowi aahaaleiye ophwanyawo nikhaviheryo ni olipa murima? Aaphwanela omuroromela Yehova!​—1 Mamwene 19:14-18.

16. Nnii niwerye hai omoona Muluku vaavaa nnakhalaahu mmakacamiho?

¹⁶ Yupu aari ooteteiwa ni makacamiho awe nave hoona mukhalelo awe ntoko Yehova ooneiye. (Yobi 42:3-6) Ikwaha ikina, hiyaano tho nnahaala woona okhala woovila omoona Muluku nthowa na makacamiho ahu. Tiheeni enahaala onikhaviherya woona yeeyo Muluku onaneereleiye? Nnaphwanela wuupuwelela yeeyo Piipiliya onaloceiye sa makacamiho ahu. Ela enamuneeriha omoona Yehova okhala eeparipari, nave tho nnahaala oloca: “Khalai kosuwenleni vawiwa mulotxiwaka, nto vano kowonani ni mithi aka.”

17, 18. (a) Munii moone hai ntata na Yehova mu okumi anyu? (b) Muloce yaweereya enooniherya wi Muluku onnanikhaviherya olelo.

¹⁷ Munii moone hai ntata na Yehova mu okumi anyu? Hankooni nthokororye sootakiherya thanu. Yoopacerya, muupuwele wi Yehova ohookhaviheryaani ophwanya eparipari. Yanaawiili, akhweya montoko oya mmuthukumano Weekiristu ni owiriyana mwaha nave muloca, “Chiryene ti yeela kaachunaaka!” Yaneeraru, akhweya munnuupuwela mukhalelo Yehova aakhunleiye nivekelo nanyu. Yaneexexe, akhweya mwaanachuna omurumeela phaama Yehova nave moona mukhalelo ookhavihenryeiyeni ophwanya yoolakelela anyu. Yaneethanu, akhweya moohiya muteko anyu yoowo woohiihaani omurumeela Yehova nave moona waakhwanela wa yooloherya ya Muluku yawii: “Nkirwa kohiya.” (Ahebri 13:5) Nakhalano onthamwene woolipa ni Yehova, ti wookhweya woona ntata nawe mu okumi ahu.

¹⁸ Saara murokora onakhala o Keniya, ooloca: “Kaavekela vooloca sa muhuserya aka a Piipiliya yoowo ahaasiveliwa omuhuserya Piipiliya. Kaamukoha Yehova waakhanle wi kaanaphwanela ohiya omuhusiha. Kirikimulocaru ‘Amen,’ telefone aka aniichana. Muhuserya owo a Piipiliya aahiichana avekaka oya o muthukumano vamoha ni miyaano! Yaari yootikhiniha!” Wakhala wi ninnuupuwelela yeeyo Muluku onaneereleiye, nnahaala woona ntata nawe nookhaviherya. Rhonna, murokora yoowo onakhala o Asiya, ooloca wi nnaphwanela ohuserya woona mukhalelo Yehova onanikhaviheryeiye mu okumi ahu. Owo onnaaceererya: “Vaavaa nnuupuwelelaahu, ti woohakalaliha woona onipwacha wawe!”

19. Echu taani ekina nnaphwanelaahu weera wi nimoone Muluku?

¹⁹ Yesu aaloca wi yaale enii ‘emone Muluku’ anaphwanela okhala “awela murima.” (Mateu 5:8) Ela enataphulela eheeni? Nnaphwanela okhalano sawaanyiherya saphaama ni ocharuwa weera echu vyakala yoonanara. (Mwaalakhanye 2 Korinto 4:2.) Mmwaha yoola, noohuserya wi naariki nimoone Muluku, nnaphwanela olipiha onthamwene ahu ni yoowo. Mmwaha onacharela, nnahaala ohuserya mukhalelo nroromelo nnahaalaaya onikhaviherya woona phaama ntata na Yehova mu okumi ahu.

[Ekaaxa va epaaxina 16]

MASU ATHARIHIWE

Ninnoona ntata na Muluku mu okumi ahu vaavaa nnoonaahu waakhuliwa wa mavekelo ahu ni mukhalelo onanikhaviheryeiye

Ninnamoona Yehova ni miitho a murima vaavaa nnamusuwelaahu phaama owo ni mikhalelo sawe