Yaphaama Aka Ori Okhala Vakhiviru va Muluku

VAAVAA kaaryaakano iyaakha thanu naxexe sa oyariwa, kaakota orakama. Olelo kirino iyaakha 43 sa oyariwa ni meeturu mamoha a orakama waka. Vaavaa asitiithi aka yaasuwenlaaya wi kaakota orakama, yaanakiceenyerya olapa mwakuru wi kihuukhuweke ni mukhalelo aka. Wi kititelele okhala ooweiwa kaanatumiha sawiima ohoolo wa empa ahu, nave kaanarehererya phaama. Ela yaaneeriha wi achu ancipale ethumeke.

Olapa mwakuru hiwaatoronke echu. Kaatitelela okhala ookhuveya, nave kaanaviliwa ni ichu ikhaani, ntoko orakama wa epalkau ya mulooxa. Yaakhala ntoko wi ichu soothene apakeliwe achu oorakama okipwaha miyaano. Kaaniikhupanyerya, nyenya eyo yaatorokeya vaavaa kaaryaakano iyaakha 14 sa oyariwa.

Nihiku nimoha, athiyana apiili yaawo yaari Anamoona a Yehova yaathuma maroca aka, nave yaapaceryiha yoohuserya ya Piipiliya ni miyo. Ohoolo waya kaahoona wi omusuwela Yehova ni yookhwela awe ti woochuneyaxa opwaha okhuveya waka. Ela yaakikhaviherya vancipale. Kaanasiveliwa ni Salumu 73:28. Makupa oopacerya a yoorepa yeela anii: “Yaphama aka ti okhala vakhiviru va Muluku.”

Moohilekela emusi ahu yaathaama o Costa do Marfim eya o Purkina Faso, nave mukhalelo wa okumi aka waatorokeya. Kaaryaaka o Costa do Marfim, kaari oosuweliwa kitumihaka sawiima. Nyenya o Purkina Faso kaari muchu oohisuweliwa ni oohiyana ni achu ancipale. Achu yaanakiroha. Nthowa na yeeyo kaanamaliha isumana sincipale kihikhumme mpa. Nto kaahuupuwela wi ti waphaama omwaacamela Yehova. Kaarepela efiliyale ya Anamoona a Yehova nave yaamurumiha muchu oophwanelela. Nani, misiyonaariyo a mwaamuthiyana yoowo eeca ni moota aarwa okixekurya.

Iphiro saari soosareya matope, nave mu elukuluku ya epula wakhala woovila weeca. Nani, aanathoowa ni moota awe ikwaha soohaalakhanyeya arwaaka ohuserya ni miyaano, nyenya owo haahiyale. Nihiku nimoha, aahiivaha okikuxa wi niye o mithukumano. Kaahoona wi eyo yaataphulela okhuma mpa ni ovilela oroha wa achu. Mwawaaceererya owela moota waahaala waaceererya ohokola ni okhala woovila weeciha. Naamwi hiiha, kaaheemererya kuupuwelelaka makupa anaawiili a yoorepa aka yookisivela: “Mwa Apwiya kòkuhamo ntxhawelo naka.”

Miyaano ni Nani ikwaha sincipale naanathoowela va matope, nyenya echu yaanihakalaliha waari ophiya mmithukumano. Osivela wa achu mu Empa ya Omwene waari woohiyana ni oroha wa achu a vaate! Miyeeri mithanu naxexe ohoolo waya, kaapatisiwa.

Makupa aneeraru a yoorepa aka yookisivela anii: “Wi kilaleye miteko saya sothene.” Kaanasuwela wi olaleerya waahaala okhala woovila wa miyaano. Nlelo kinnuupuwela ekwaha yoopacerya kaakelaaka olaleerya empa ni empa. Anamwane apiili ni atokweene yaanakiroha, ekicharaka nave etakiheryaka weeca waka. Ela chiryene yaanakisoosa, nyenya kaanuupuwela wi awo annamuchuna Parataiso hiiha ntoko miyaano, mwawiihiiha kaatitelela.

Wi okhale wookhweya, kaathuma ecika ya maroota mararu. Nthamwene aka a muteko aanakixova va moko nave aanawela ecika vaavaa naakhuruwelaahu moko. Naamwi muteko wa olaleerya waari woovila woopaceryani, yaakhala ehime ya ohakalala otokweene, ophiyerya wi mu 1998, kaakhala piyoneero a elukuluku yoothene.

Kaaneeciha soohuserya sa Piipiliya, nyenya axexe a yaawo aapatisiwa. Mwawaaceererya, murokora aka mmoha oheemererya tho eparipari! Wiiwa mukhalelo akina anayaaya vahoolo yaanakilipixa mweelukuluku kaachunaaka nikhaviheryo. Nihiku nimoha vaavaa kiiceliwaaka korowesa, kaahaakhela ekaarata yoorweela o Costa do Marfim. Kapaceryiha yoohuserya ya Piipiliya ni muchu aahuserya mu exikola etokweene o Purkina Faso. Ohoolo waya namahuserya owo aathaamela o Costa do Marfim. Kaatepa ohakalala vaavaa kiiwalaaka wi owo aari mulaleeryi oohipatisiwa!

Kiniivakulela hai? Marehereryo yaawo anaakhaviherya achu oorakala yaakihusiha osona. Muhusiha aka mmoha aahoona olapa waka nave aaloca: “Nnaphwanela omuhusiha ompaka soopho.” Nave yaakihusiha. Kaanampaka soopho owaani. Achu yaanasiveliwa ni soopho kampakaaka nave yaanaaleela akina. Kaanaakerihela kipharihelaka moota wa maroota mararu.

Moothananiha, mu 2004, kaahiya opiyoneero nthowa nawi muthana waatepa okiicela. Naamwi hiiha, nlelo kinnakhaviherya muteko wa olaleerya.

Achu annaloca wi koosuweliwa nthowa na otheya waka woohakalala. Kookhalano mathowa mancipale a okhala oohakalala ntakhara yaphaama aka ori okhala vakhiviru va Muluku.​—Olociwe ni Sarah Maiga.