MWAHA WA EKAAPA | NTAKHARA HEENI YESU AAHOOXEYA NAVE AKHWA?
Apwanne Ela Yoheereya Chiryene?
Mu elimwi ya 33 E.K., Yesu o Kaisareya aahiiphiwa. Owo aahootheryiwa ntoko mulipa oohuweliha, nave aakhomeliwa vamwirini. Aakhwa mmukhalelo woohooxa. Nyenya Muluku aamukookiherya okumi, nave mahiku 40 ohoolo waya, Yesu aakookela wirimu.
Yaweereya ela yootikhiniha ennanuupuxerya Michaka misese sa Soorempwa Seekiriki, iniichaniwa Nlakano na Hiihaano. Apwanne ichu seiye soheereya chiryene? Nla nikoho noochuneyaxa. Wakhala wi hooye nroromelo na Akiristu ti natheru nave ewehereryo ya ekumi Mparataiso ti yasiiyo. (1 Korinto 15:14) Mmukhalelo mukina, waakhanle wi ichu seiye soheereya, wookhalavo omwaahiyu wootikhiniha wa achu, yoowo munahaalaanyu ophura. Mwawiihiiha, apwanne saweereya seiya sa Michaka ti seeparipari naari hooye?
YEEYO SAWEEREYA INOONIHERYAAYA
Moohiyana ni ithale, ichu seiyo anamarepa a Michaka arempaaya ti seeparipari. Ntoko yootakiherya, aarepa masina a mapuro eeparipari, mancipale a yaawo anaxekuryiwa olelo. Ahaaloca achu yaawo okhala waya oniiwanana ni miyaha sa elapo. —Luka 3:1, 2, 23.
Yesu onnalociwa ni anamarepa a nsana noopacerya ni nanawiili.a Okhwa wawe ntoko onatharihiwaaya mu Michaka onniiwanana ni meerelo a wiipha a Aroma a elukuluku yeele. Opwaha yeeyo saweereya soothene ti seeparipari ophiyerya wi sinnaloca soohesa sa oohuserya a Yesu. (Mateu 26:56; Luka 22:24-26; Yohani 18:10, 11) Saweereya seiya soothene sinnooniherya wi anamarepa a Michaka yaari oororomeleya mwa yeeyo arempaaya vooloca sa Yesu.
HANKA VOOLOCA SA OVINYA WA YESU?
Naamwi yeemereryiwaka wi Yesu aakhala nave akhwa, akina annakhwa minikwa sa ovinya wawe. Oohuserya awe tho woopaceryani hiyeemererya wi aaviihiwa mookhwani. (Luka 24:11) Vaavaa oohuserya yaamonnaaya Yesu mu ilukuluku soohiyana hiyana, minikwa saahaamalela. Yaweereya emoha, yeeren’ye variyari va anamoona 500.—1 Korinto 15:6.
Naamwi yoopopihiwa ni okhwa, oohuserya moolipa murima yaalaleerya ovinya wa Yesu wa oothene—ophiyerya wa yaawo yaamwiiphale owo. (Saweriwa T’arummwa 4:1-3, 10, 19, 20; 5:27-32) Apwanne oohuserya ancipale yaahaala okhala oolipa murima esuwelaka wi Yesu havinnye mookhwani? Mweeparipari, ovinya mookhwani wa Yesu waakhaviherya waaceereryeya wa Muloko Weekiristu khalai, ni hiihaano.
Saweereya sa Michaka vooloca sa okhwa ni ovinya wa Yesu sinnavaha onamoona weeparipari. Waalakhanya seiyo mwawiichaalela sinahaala woolekechaani wi saweereya seiya chiryene soheereya. Olekecheya wanyu onanwerya woolipihaani moorweela wa wiiwexexa ntakhara heeni iho soheereya. Mwaha onacharela onahaala othariha.
[Nsu na vathi]
a Tasitu, aayariwe mu 55 E.K., oorepa wi “Kiristu, yoowo nsina na [Akiristu] nnarweelaayavo, aahooxeya vancipale variyari va olamulelo wa Tiperio ni muthoriha Pontio Pilato.” Yesu tho onnalociwa ni Suetoniu a (nsana noopacerya); Mulipa a miyaha a Ayuuta Yoosefe a (nsana noopacerya); ni Pliny mulamuleli Mmiravo o Pitiiniya (waacamela nsana nanawiili).
[Ekaaxa va epaaxina 4]
Ntakhara Heeni Hinaavovo Nikhaviheryo na Miyaha sa Elapo?
Wi nroromele wi Yesu aakhala veelaponi yavathi nave aaviihiwa mookhwani, apwanne nnaphwanela oweherya miyaha sa nsana noopacerya omuhiya Piipiliya? Hannaphwanela. Mmukhalelo mukina michaka irempwe iyaakha 2.000 khalai. Soorepa vakhaani sa elukuluku yeeyo sookhala. (1 Pedro 1:24, 25) Nihiweherye wi tho amwiicani ancipale a Yesu yaahaala orepa echu vyakala yaahaala waakhaviherya achu omweemererya ni omuroromela Yesu.
Vooloca sa ovinya wa Yesu, Petro mmoha a oohuserya, oothariha: “Muluku ònvinyiha mokhwani nihiku naneraru naya, ni àhera wi isoneihe, ohikhanle wa atxhu othene, nto wa anamona Muluku athanlileiye wopatxeryani, hiyo nlyile ni niwunrye ni yowo, avinnyeiye mokhwani.” (Saweriwa T’arummwa 10:40, 41) Ntakhara heeni ohikhala wa oothene? Muchaka wa Mateu onnanleela wi amwiicani a ikerexa yiiwalaaya vooloca sa ovinya wa Yesu, awo yaaheererya omaaliha michaka vooloca sa ovinya wa Yesu.—Mateu 28:11-15.
Apwanne eyo enooniherya wi Yesu aachuna wi ovinya wawe mookhwani ohisuweliwe? Hooye, woona wi Petro aaloca: “Owo ònruma walalerya atxhu ni òlokoha wi Muluku òmwera Yesu muthoriha a akumi ni a atxhu òkhwa.” Akiristu eeparipari anneerano yeela.—Saweriwa T’arummwa 10:42.