Mastroloku ni Alipa a Ihako—Apwanne Annoona sa Omwaahiyu?

MASTROLOKU

Astroloxiya mukhalelo wa waanyiherya onathipeleya mu ororomela wi itheneeri, mweeri, ni iplaneta inanwerya ovolowela ikumi sa achu veelaponi. Mastroloku annaloca wi mathitimanelo a ineneeryo sa wirimu mu elukuluku ya oyariwa, sinnavolowela makhalelo a muchu ni omwaahiyu awe.

Naamwi elociwaka wi mapacereryo a astroloxiya weeren’ye o Papulu akhalai, eyo ennatitelela okhala yawunlaana. Mwawiiwanana ni otholathola weeriwe mu 2012 o Estatu Unitu, achu avakhaani yaatholathonle, yuupuwela wi astroloxiya waari “mukhalelo wa siyensiya.” Apwanne ti yeeyo? Hooye. Vala aakhalavo mathowa ene.

• Iplaneta ni itheneeri hisaano ikuru sa waavolowela achu ntoko mastroloku analocaaya ni anapakaaya.

• Wiiliwiili sooloha sinnakhala sawunlaana seiyo inawerya ophariheleya wa muchu ti muchu.

• Waalakhanyerya wa mastroloku olelo, anapaka mwawiiwanana ni soororomela sakhalai wi iplaneta ineeceeca moorukurerya wa elapo. Mweeparipari iplaneta ineeceeca moorukurerya wa nsuwa.

• Sooloherya mastroloku aneeraayano wa muchu mmohamoha hasiniiwanana.

• Astroloxiya onnaaromola achu mmakhuuru khumi napiili, naari mu ineneeryo soolikana, mwawiiwanana ni nihiku anayariwaaya. Nthowa na otorokeya wa mathitimanelo a elapo moovira wa iyaakha, mahiku yaawo yiiwananihiwe ni ineneeryo soolikana hasiniiwanana vaavaa nsuwa nnaviraaya wa makhuuru a ineneeryo yiichaneliwaaya.

Enalociwa wi ineneeryo imohamoha sinnavaha makhalelo oomuchu. Mweeparipari achu yaawo ayariwe nihiku nimohamoha haanono ophwanelela omohamoha; nihiku na oyariwa hinnooniherya echu vooloca sa makhalelo a muchu. Opwaha owoona achu ntoko akhalenlaaya, mastroloku anoona mikhalelo ni meecelo a muchu moorweela wa waanyiherya. Mano hamunoona wi ola mukhalelo wa nthalu?

ALIPA A IHAKO

Ovinyerya khalai, achu yaanaakoha alipa a ihako. Akina yaanaavya yootaphulela wa ichu vyakala ntoko ikhopela sa asinama ni sa achu naari mukhalelo muthupi onathupaaya enuku. Akina anapaka waanyiherya ni makukhu a chaaya naari inuku sa kafe. Olelo anapharihela ikaarata sataro, mphirya awooneela, ni sootaphulela ikina sa “waalakhanyerya” omwaahiyu wa muchu. Apwanne alipa a ihako annawerya osuwela sa omwaahiyu? Hooye, honaweryeya. Hankooni nthokororye phaama.

Muthokororye mwaha wa otitelela. Meerelo oohiyana a waanyiherya a alipa a ihako wiiliwiili haniiwanana ni mukina. Naamwi ephariheliwaka meerelo mamohamoha, oloherya onakhala woohiyana. Ntoko yootakiherya, wakhala wi muchu ohaakoha alipa a ihako oohiyanahiyana nikoho nimohamoha vooloca sa omwaahiyu mu “waalakhanyerya” ikaarata sataro imohamoha, mweeparipari naakhulo naaphwanela okhalaka nimohamoha. Nyenya nnakhala noohiyana vancipale.

Meerelo a alipa a ihako onakhala wookhwiha minikwa. Alipa oovaanya analoca wi ikaarata sataro naari mphirya awooneela ichu satheru nave alipa a ihako anaalakhanyerya pahiru meerelo a muchu. Ntoko yootakiherya, mulipa a ihako a mavyakelo onnapaka makoho awunlaana nave onnavarerya malocelo a muchu yaahaala wooniherya echu vooloca sa yoowo omphwannye. Mulipa a ihako onahaala okhalano ekari ya osuwela mukhalelo ni saweereya seiyo muchu omphwannye ahaasuwenleiye. Vano alipa a ihako emanle omulekecha muchu, annamveka ikhorowa sincipale.

TIHEENI PIIPILIYA ONANLEELEIYE

Mastroloku ni alipa a ihako analoca wi omwaahiyu ahu ti woothuperiwa. Apwanne ti yeeyo? Piipiliya onnanleela wi nookhalano mavyakelo a othanla echu nnaroromelaahu naari nnachunaahu opaka nave soothanla sahu sinnavolowela omwaahiyu ahu.—Yosuwa 24:15.

Alapeli a Muluku aakhalano mathowa aphaama a okhooca mukhalelo wa astroloxiya ni wa alipa a ihako—Muluku onniica meerelo oothene a waasya ihako. Mpiipiliyani ninnaphwanya masu ala: “Ahikhalemo mwa nyuwano . . . oni àsyeke ehako nari wasya osuwela sa omwahiyu, ahikhale oni akhale mulipa a masitxa, wera sa malavi, nari okoha minepa nari olowa; ahikhale oni asyeke wakoha atxhu òkhwa. Yole orimukhala mutxhu onera itxhu seiha onnathanyiwa ti Apwiya. Wa nthowa na itxhu seiho sothanyeya Apwiya, [Yehova] Muluku anyu, anamwikaravo maloko yawo vamithoni vanyu.”a—Malamulo 18:10-12.