Yehova Onnanikhaviherya Okhwaaniherya Mirici Sahu​—Mwaha ola okuxiwe mu Anuário das Testemunhas de Jeová, 2013

Miyanmar (Burma)

Epaaxina 101, eparakrafo 3

Olaleerya ni Ohusiha mu Burmese

Alipa ootaphulela yaale oopacerya yaakumana ni makacamiho mancipale. “Miyaano kaanalapa othana wi kivakulele echoko aka nave kamala kaanataphulela miyaha ohiyu ni nliiso noohaarya phaama,” onnuupuwela Naygar Po Han, yoowo aakunxe muteko wootaphulela vaavaa Ba Oo ahiwenryeiye opwahiherya weerano. “Nsuweliho naka na Englesi naatepa oyeva, mwawiihiiha yookhumelelavo ya otaphulela waka waari woohaakhwanela. Nyenya hiyaano moohiwehererya naachuna wi irevista sahu saaphiyerye achu ancipale anaweryeya.” Vaavaa Robert Kirk aamvenkeiye murokora Doris Rai wi amutaphulele A Sentinela mu Burmese, murokora aahilimeliwa vancipale ophiyerya ohaleeliheya nave aahinla. “Miyaano kaarino pahi mahusiheryo oopacerya nave nkaasuwela otaphulela,” onnaloca Doris. “Nyenya, Munna Kirk aakilipiha wi keererye. Mwawiihiiha kaavekela wa Yehova nave kaapacerya olapa.” Olelo, waacamela iyaakha 50 vahoolo, Doris nlelo onalapa ntoko mulipa ootaphulela o Beteli ya Yan­gon. Naygar Po Han, vano orino iyaakha 93, ori tho o Beteli nave moohakalala onnatitelela okhaviherya oya vahoolo wa muteko wa Omwene.

Epaaxina 111, eparakrafo 3 ophiyerya epaaxina 112 eparakrafo 2

Wunnuwa mu Epooma ya Chin

Vaavaa Than Tum aahin’yeiye Hakha, Donald Dewar, piyoneero avameekhaaya a iyaakha 20 sa oyariwa, aakuxa nipuro nawe. Nthowa na orowihiwa wa asitiithi a Donald, Frank ni Lily (khalai Lily May) Dewar, munnawe Donald a iyaakha 18 sa oyariwa, Samuel, aahiyawo wi akhaleke vamoha ni yoowo. “Naakhala mu empa ekhaani yaaviha mu elimwi ni yaariirya mu muchulo,” onnaloca Donald. “Nyenya, kaasuwela wi omeekha nikacamiho ntokotoko. Moohihiyererya kaanalapa meekhaaka mu orummwa nave nkaawerya oloca phaama elocelo ya vanipuroni, Hakha Chin. Pahiru Samuel ni miyo ni mulaleeryi mukina mmoha nari eeli naanaya mmithukumano. Tonto-tonto, miyaano kaakhala oothanana nave kaaphiyerya wuupuwela ohiya murici aka.

“Elukuluku yeele, kaahaalakhanya yaweereya yoolipiha mu Anuário vooloca sa annihu o Malawi yaatitelenle okhala oororomeleya vathi va wiikariwa woonanara.a Kaahiikoha mukhataaka, ‘Wakhala wi nkinawerya ovilela omeekha, kahaala owerya hai ovilela wiikariwa?’ Miyaano kaaveleela wa Yehova sawuukhula saka mu nivekelo nave kaapacerya okhala ootaphuwa. Kaalipiheya tho moorweela wa waalakhanya ni wuupuwelela Piipiliya ni miyaha sa A Sentinela. Vaavaa kaaxekuryiwaaka mootutuxa ni Maurice Raj ni Dunstan O’Neill, waakhanle ntoko kaawoona ankeelo eeli! Vakhaani vakhaani, nyenya kiroromelaka, kaakookela ohakalala.”

Muhoolo, arumeelaka ntoko ooweherya aweeceeca, Donald aanapharihela osuwela wawe wi aalipihe Anamoona oorakamela. Wiilipixerya wawe tho mu Hakha waahiima sawiima. Hakha vano oovuwa okhalano muloko woolipa nave moohihiyererya onnapakiwawo asembleiya ni akongreso eeKiristu. Alaleeryi eeli yaawo yaaphiya mithukumano o Hakha, Johnson Lal Vung ni Daniel Sang Kha, yaakhala mapiyoneero avameekhaaya a mvai yaawo yaakhavihenrye vancipale omwarya michaka ya Phaama mu Epooma ya Chin.