Okhalano Moonelo wa Soorempwa wa Ovitha Muruchu​—Nikupa 2

¹ Wakhalavo okhwa, amusi, asuweli ni asinthamwene wiiliwiili annaweherya owara yoowara ya makhwelo. Ti yoochuneya woona wi yoowara ya makhwelo enalociwa vaava, tahi yoowara pure nari enawariwa mu ilukuluku ikina nyenya tho poti owariwa vaavaa onavithiwaaya muruchu. Yoowara ya makhwelo, enawariwa xaxaxa mwawiiwanana ni okhwa. Yoowara ya makhwelo enawariwa ntoko yawooniherya ya othanana. Mathepa ni mukhalelo wa yoowara eyo yookhalano yootaphulela yavameekhaaya enarweela wa soororomela sa malapelo a khalai, xaxaxa mukhalelo wa mulipa ookhwa ni onthamwene owo aareiyeno ni awo ahanle. Yoowara ya makhwelo, poti owariwa nihiku nimoha, mahiku vakhaani, miyeeri mincipale, nari eyaakha, nari iyaakha sincipale omanle ovithiwa muruchu.

² Othokororya Malakiheryo: Yoopacerya, achu a Yehova hanooniherya vanlakani othanana ntoko eneereyaaya ni achu akina “yawo ehikhanleno oweheryerya.” (1 Ates. 4:13) Yanawiili, hiyaano hinnachuna weera echu yaahaala okhala “yokwachuliha” wa akina. (2 Akor. 6:3) Nuupuwelaka nlakiheryo nenla nnaphwanela wiikoha mukhatihu: ‘Kawara yoowara ya makhwelo yaahaala othoonyerya wa akina wi kinachara soororomela ni saweera sihiniiwanana ni Soorempwa? Mano yaahaala waakwaculiha yaale anasuwela soororomela sa Anamoona a Yehova vooloca sa okhwa? Yoowara eyo yaahaala wuukhula yawuupuxerya-ya-murima ya anna? Owara yoowara eyo yaahaala waaceecheiha anna yaawo yaakhonce awara yeeyo nave yiikariwe nthowa na yoolakelela aya?a

³ Nto, wa malakiheryo oothene anaphwanela othokororyiwa, hinaavovo nookhweleyaxa opwaha nla: Hiyaano hinnachuna weera echu yaahaala omunanara Yehova. (Masi. 27:11; Akol. 1:9, 10) Vaavaa nnasuwelaahu yootaphulela yoosiphela ya yoowara ya makhwelo, ni opharihana waya ni yoororomela ya wi alipa ookhwa annasuwela echu, nnaphwanela wiikasopa ti mwawiihai ochara yookhovelela ela yaahaalaaya ovolowela waataana wahu ni Yehova. Hiyaano ‘hinnawerya owurerya ekahi ya [Yehova] ni ekahi ya masololo.’​—1 Akor. 10:21, 22.

⁴ Chiryene, ancipale akhweya hanasuwela yootaphulela yoosiphela ya yoowara yeela yavameekhaaya. Nyenya, haavo a yaawo onawerya otaphulela ntakhara heeni awo anoonaaya okhala woochuneya owara yoowara eyo pahiru elukuluku ya okhwa. Naamwi ancipale ewaraka eyo ehiiwexexaka phaama yootaphulela aya yoosiphela, hiyaano hinnaphwanela waatakiherya. Wuupuwelela malakiheryo yaala ni mavekelo enahaala onikhaviherya wiiwexexa ntakhara heeni hiyaano nnaphwanelaahu osepa otakiherya sookhovelela sa owara yoowara yavameekhaaya ya ovitha muruchu ntoko eneneeryo yawooniherya othanana.

⁵ Soowara Soophwanelela sa Ovitha Muruchu: Yoowara ya mukhalelo taani nnaphwanelaahu owara nayaaka o makhwelo? Voovira wa iyaakha soolaleeryiwa sa nikhuuru na kapuro oororomeleya ni amiruku sinnaloca mwaha yoola.b Ninnaceenyeryiwa wi nooniherye ophimelela moorweela wa othanla soowara mwa seiyo nryaahuno iri saphaama ni soophwanelela. Soowara seiho poti okhalano mathepa aniiwanana ni othanana onavarihana ni ‘echoko orivo makhwelo’. (Ekle. 7:2) Wi nihiwuukhule nari waanyeenyeiha akina, hiyaano poti othanla osepa soowara sa mathepa a waaryaxa nari soohiphwanelela. Moohipwacha yeeyo nnalakelelaahu owara, wiiwexexa wahu phaama mukhalelo wa alipa ookhwa onahaala onikhaviherya wooniherya ncicimiho vaavaa muchu onakhweiye nihiwanre yoowara ya makhwelo ekhoveleliwe.

Orehererya Ovitha Muruchu

⁶ Ovithiwa muruchu Weekiristu onaphwanela weeriwano mmukhalelo wa ncicimiho mwa wiiwanana ni malamulo oothene a epooma ni eruso. Wakhala wi ovitha muruchu onahaala weeriwano mmukhalelo onahaala ovahererya ohakararya weeparipari onarweela mu Soorempwa, nave onahaala wooniherya vanlakani eparipari vooloca sa mukhalelo wa alipa ookhwa, hori waweemereryiwa sookhovelela nari mihapo sihiniiwanana ni Soorempwa. (Aef. 5:7-11) Yeeyo eneereya va ovithiwa muruchu henaphwanela wuukhula yawuupuxerya-ya-murima ya anna. (1 Akor. 10:32) Nnii nipharihele hai malakiheryo yaala a Piipiliya vaavaa nnarehereryaahu ovitha muruchu Weekiristu?

⁷ Murici Ti Wawani? Mmapuro mancipale amusi oohiroromela anoona wi nihimo noothene nookhalano murici wa olakelela ti mwawiihai nave ti liini muruchu onahaalaya ovithiwa. Nyenya, mu othela Weekiristu, mulopwana ni muthiyana tarino murici wa opaka soolakelela sookhweleya sinavolowela okumi aya ni wa anamwane aya. Amusi, asuweli ni achu a mmulokoni Weekiristu anaphwanela ocicimiha murici yoola wa mu Soorempwa. (Mat. 19:5, 6) Chiryene, yaahaala okhala hiihaa elukuluku ya waavitha oosiveliwa ahu akhwile. (Map. 23:19; 35:29) Wi nsepe okhala “omakiwa mu nipisini vamoha ni ohiroromela,” Mukiristu onaphwanela wooniherya phaama wi marehereryo oothene a ovitha muruchu anahaala weeriwano mwawiiwanana ni malakiheryo a Piipiliya. (2 Akor. 6:14-17) Tiheeni nnaphwanelaahu weera wi niwerye weerano?

⁸ Mooniherye Phaama Yoolakelela Anyu: Wakhala wi mulipa ookhwa owo aarepa ikano sawe vooloca sa marehereryo a ovitha muruchu, onahaala okhala wookhweya woopelela ni amusi, vawoona wi awo wiiliwiili annacicimiha soochuna sa mulipa ookhwa owo. (Map. 50:5) Ekaarata erino nsina ni anamoona ti yoophwanelela. Ekaarata yoorempwa eyo poti okhala yoohiyana ni ekaarata enapakiwa vooloca sa ichu soomwiilini. Yaale anaweha omwaahiyu ni oroora ni miruku, annasuwela wi hanaphwanela owehererya wuuluvala nari wiiceliwa wookuchulela wi yeerano yeela. (Ekle. 9:11) Moota wa ovithiwa muruchu, ti liini nave ti woowi onaphwanelaaya weereya, nave taani onaphwanela okhalano murici wa orehererya ni ophara khata nikupa na ovitha muruchu, ichu soothene iha inaphwanela wooniheryiwa muchu nlelo ari mukumi.

⁹ Akina hanoona phaama vooloca sa orepa ichu seiya va ekaarata elukuluku ehaakumve. Nyenya, weerano hiihaa enooniherya osivela ni wiichwa Weekiristu. Yaale arino nsuweliho nawaakhwanela na eparipari ya Piipiliya annasuwela wi opaka marehereryo yaala herwa yaakuviha nari olekeliha okhwa wa muchu. Chiryene, ikano soorempwa ilocaka mwawiiweya wi amusi oohiroromela hanaphwanela ovolowela makupa ari oothene a ovithiwa muruchu awe, poti waanyeenyeiha ni waananara yaawo. Ti yaphaama muchu wooniherya phaama ichu seiya nlelo ari mukumi ohiya ohiya mwaha owo othokororyiwa ni amusi oothanana, yaawo akhweya anahaala okhala ookhinyereryiwa weera saweera soonanara seiyo mulipa ookhwa owo aakhooceiye. (Afil. 2:4) Wuukhuwa iwo woohikhala nrima ti yawooniherya yoolipa yawi muchu onnaasivela ni onnaapwacha akina.​—Aef. 5:28, 33.

¹⁰ Meerelo ni Amusi Ahiri Anamoona: Mmapuro makina ti yookhovelela orehereryiwa othukumana woopacerya elukuluku tonto amala okhwa muchu. Ancipale aniichana wi ti esumana ya othanana. Yookhwela aya ti othukumanya ikhorowa ni okhaviherya ni opaka soolakelela vooloca sa ti liini ni moota taani ovitha muruchu onahaalaaya weereya. Saweereya sinnooniherya wi elukuluku yeela wookhalavo yawoopiha wa Namoona oyeleela murici wa ohoolela ovitha muruchu wi weeriweno ni amusi oohiroromela. Ntoko noonnaahu, Soorempwa sinnooniherya phaama wi hiyaano hinnaphwanela weemererya wi amusi oohiroromela ehoolele nikupa nri noothene na ovitha muruchu, muloko opharaka nikupa nikina. (2 Akor. 6:14) Mwawiihiiha, wakhala wi mulipa ookhwa owo aari Mukiristu oororomeleya, hori woophwanelela weemererya wi amusi ahiri Anamoona epake “nikhuuru na ovitha muruchu” nenlo nahaala olakelela moota ovithiwa muchu owo waahaalaaya weeriwano. Hori woochuneya tho wi achu a mmulokoni yaawo ahiri a emusi evolowe mu mithukumano soopacerya nari ovolowela marehereryo a ovithiwa muruchu.

¹¹ Echoko Yeekiristu moosivela enaphwanela oloca mweepewe marehereryo a ovitha muruchu apakiwe. Hori woochuneya waahiya okhwipi amusi oohiroromela wakhala wi annachuna wiiwelela. Mano, hanka wakhala wi amusi oohiroromela annuumelela opaka sookhovelela ni saweera soonanara? Ori woochuneya olipa nave mweepewe nave moolipa murima oloca yoolakelelaahu Yeekiristu. Chiryene, waahaala osepiwa vancipale olocihana ni waakhulana waakhanle wi mulipa ookhwa owo oohiya ekaarata yoorempwa erino ikano vooloca sa moota owo aachuneiye weeriwano ovithiwa wa muruchu awe.

¹² Wakhala wi, moohipwacha soothene iha, amusi oohiroromela nlelo aalakelela ohoolela marehereryo, nto amusi oororomela poti othanla ohiya khuluwi ovitha muruchu owo. Yeereya yeela, poti opakiwa mukhalelo wookhweya wa yawuupuxerya mu Empa ya Omwene nari nipuro nikina noophwanelela wi nuuke “ohakararya wa sorempwa” ni yaale anathanana chiryene ni okhwa wa oosiveliwa owo. (Arom. 15:4; Sal. 119:50) Naamwi muruchu poti ohikhalavo, nrehereryo nenla naahaala okhala na ncicimiho nave naweemereryiwa. (Malam. 34:5-6, 8) Naamwi ovolowela woonanara wa amusi oohiroromela poti waaceererya ohaleeliheya ni wiicela wa okhwa, hiyaano ninnahakararyeya va osuwela wi yoolakelelaahu ya weera yeeyo eri yaphaama ennooniwa ti Muluku, yoowo onavaha ‘ikuru soopwaha’ wa akapuro awe oororomeleya.​—2 Akor. 4:7.