Yoolakelela ya Mithukumano sa Mmacani

1. Muthukumano wa mmacani orino yoolakelela taani?

¹ Mu elukuluku emoha, Yesu aahaathukumanya arummwa awe 70 ehaakumve oya mmuteko woolaleerya. (Luka 10:1-11, BNM) Owo aahaalipiha ni waaceenyerya moorweela wa owuupuxerya wi awo hiyaahaala okhala mukhataaya, nyenya yaahaala ohooleliwa ni “anene a ematxa,” Yehova. Nave tho aahaavyakiha wi ekhale oophwanelela ophara muteko, nave ahaakawa “eli eli.” Olelo, muthukumano nnakhalaahuno nihaakumve oya mmuteko wa mmacani orino yoolakelela emohamoha​—ya olipiha, ovyakiha, ni onireherya.

2. Muthukumano wa mmacani onaphwanela omalihaka aminutu akavi?

² Hiihaanoru, muthukumano wa mmacani weeriwano mu aminutu 10 naari 15, yaaphitaanyerya waakawa anna, oloca ekulucu, vamoha ni opaka nivekelo. Vano, ela enahaala otorokiwa. Opacerya April, muthukumano wa mmacani onahaala weeriwakano mpuwa mwa aminutu athanu naari athanu napiili. Mwa yeela, wakhala wi muthukumano wa mmacani onacharela omanle muthukumano wa muloko, onaphwanela okhala wawaakuveya, woona wi anna aawiriyana soorepa sithokororyiwe mmuthukumano. Opaka muthukumano wawaakuveya onahaala waakhaviherya oothene omaliha elukuluku yincipale mu orummwa. Mwa waaceererya, wakhala wi mapiyoneero naari alaleeryi akina apacenrye olaleerya ohaakumve muthukumano wa mmacani, anaphwanela okwatelela muteko aya mu elukuluku vakhaani.

3. Muthukumano wa mmacani onaphwanela oreheryiwa hai wi waakhaviherye alaleeryi ancipale?

³ Muthukumano wa mmacani onaphwanela orehereryiwa phaama wi okhale wa mphurelo wa alaleeryi. Mmiloko sincipale, enakhala ya mphurelo nikhuuru ti nikhuuru othukumana mmapuro mwaya, ohiya oothene olakana othukumana nipuro nimoha. Ela enahaala waakhweiherya alaleeryi ophiya omuthukumano wa mmacani ni oya o ekulucu. Alaleeryi ananwerya othukumana mwawaakuveya, ni okhala wookhweya wa ooweherya a nikhuuru omuthokororya mmoha ti mmoha a nikhuuru. Nikhuuru na atokweene nnaphwanela othokororya makhalelo a nipuro wi elakelele tiivi eri yaphaama weera. Omanle okuchuwa muthukumano ni nivekelo nawaakuveya, oothene anaphwanela osuwela ti woowi nave taani anayaaya olapano.

4. Ntakhara heeni muthukumano wa mmacani honaphwanela wooniwa ntoko ti wasisapo vakhaani opwaha mithukumano mikina?

⁴ Tahi sa Esisapo Vakhaani Opwaha Mithukumano sa Muloko: Mithukumano sa mmacani ti sa mphurelo wa oothene yaale anaya mu orummwa, nave honaphwanela owiriyaniwa ni achu oothene. Mwa yeela, henataphulela wi onaphwanela wooniwaka ntoko muthukumano wa esisapo vakhaani opwaha mithukumano sa muloko. Ntoko mithukumano sahu soothene, muthukumano wa mmacani yamahala enarweela wa Yehova enanikhaviherya mu waanyiheryana mukina ni mukhwaawe mu osivela ni miteko yaphaama. (Ahe. 10:24, 25) Nthowa na yeela, oohoolela onaphwanela wiirehererya phaama wi othokororya wawe omucicimihe Yehova ni oruuha mphurelo wa oowiriyana. Ti yamphurelo wi alaleeryi oothene yaale anaya mu orummwa, wiilipixerya wi ephiye mmuthukumano yoola.

5. (a) Muteko taani ooweherya a muteko oreiyeno mu opaka marehereryo a mithukumano sa mmacani? (b) Mmakhalelo taani murokora onaphwaneleiye ohoolela muthukumano wa mmacani?

⁵ Wiirehererya wa Oohoolela: Mweeparipari, wi muchu akhale awiirehererya phaama onaphwanela okaweliwa makupa woosiilo. Muthukumano wa mmacani tahi wa esisapo vakhaani. Chiryene, vaavaa nikhuuru na muteko wa mmacani nnathukumanaaya mwa meekhaaya, ooweherya a nikhuuru naari ookhaviherya onneeciha muthukumano wa nikhuuru nawe. Nave, vaavaa muloko onalakelelaaya othukumana vamoha wi oye mmuteko wa mmacani, ooweherya a muteko onaphwanela omuthanla woosiilo yoowo onahaala ohoolela. Ooweherya akina aanaakawela yoochariha oohoolela oothene nave emoha ethomeya va nipuro na soolokoha. Ooweherya a muteko onaphwanela okhala a miruku vaavaa onaathanleiye anna wi ehoolele makupa yaala, akhaleno mmuupuwelo wi ophwanelela wa mithukumano, onarweela xaxaxa mmavyakelo ni wiirehererya wa oohoolela. Aahikhalavo mutokweene, murummwa oorumeela, naari munna oophwanelela wi akhaviherye mahiku makina, oweherya a muteko onaphwanela omuthanla murokora oophwanelela wi ahoolele.​—Moone mwaha “Vaavaa Murokora Onaphwaneleiye Ohoolela.”

6. Ntakhara heeni ti woochuneya wi munna othanleliwe wi ahoolele muthukumano iirehererye phaama?

⁶ Vaavaa nnaakhelaahu makupa a muthukumano wa Exikola ya Orummwa Woomuluku, ninnathokororya vancipale ni wiirehererya phaama. Ancipale hanaweherya ophiya mmuthukumano wi epacerye wuupuwelela yeeyo anahaalaaya oloca. Mwathanliwa ohoolela muthukumano wa mmacani munaphwanela woonaka mmukhalelo mmohamoha. Musuwele wi muthukumano wa mmacani onahaala okhala wookhuveya, nave wiirehererya phaama ti woochuneya vancipale wi muthukumano okhale wa mphurelo, nave tho wi omale mu elukuluku yaphaama. Wiirehererya tho phaama onaphitaanyerya osuwela woosiilo ekulucu enaya olapiwa.

7. Ichu taani mulipa oohoolela muthukumano wa mmacani onaphwaneleiye othokororya?

⁷ Echu Taani Yooloca: Woona wi makhalelo toohiyana nipuro nnipuro, ‘kapuro oororomeleya ni amiruku’ hanavahererya yoochariha wa muthukumano ori woothene wa mmacani. Ekaaxa “Mmuthukumano wa Muteko, Nyuwaano Munaphwanela Othokororya,” ennathariha miyaha mikina sa seiha. Ntoko yookhovelela, muthukumano onaphwanela weecihiwa mmukhalelo woothokororya. Ikwaha ikina, onaphwanela ophitaanyerya yawooniherya ereheryiwe phaama naari eviitiyu yoophwanelela enarweela mu jw.org. Vaavaa muniirehereryaanyu wi muhoolele muthukumano wa mmacani, munaphwanela wuupuwela yeeyo enahaala waaceenyerya ni waalipiha yaale anahaala oya mmuteko woolaleerya nihiku nenno.

8. Tiheeni enahaala okhala yamphurelo othokororya variyari va mithukumano sa Anawoorowa ni Mirunku?

⁸ Ntoko yootakiherya, nihiku Nawoorowa, alaleeryi ancipale annamvaha Mulipeleli ni Despertai! Ancipale anakhuma mmuteko woolaleerya nihiku nawoorowa, hanakhuma variyari va esumana, nave awo ananwerya okhalano makacamiho a wuupuwelela yeeyo yaarehenryaaya variyari va Malapelo aya a Echoko. Mwa yeeyo, enahaala okhala ya mphurelo wakhala wi muhooleli a muthukumano ohuuluulela sawooniherya sa ntakiheryo sinaphwanyeya oculi wa Orummwa Wahu wa Omwene. Echu ekina ori mukhalelo wa othokororya saweereya sa vanipuroni, naari iferiyaato, wi mvahe erevista, ni mukhalelo wa opaka mathipelo a oxekurya wakhala wi namakhala ohooniherya nchuno. Wakhala wi ookhalavo munna opharihenle woosiilo erevista eyo enaya ovahiwa, ohoolela a muthukumano onaphwanela omveka wi aloce mukhalelo owo eenreiyeno, naari oloca yaweereya yoolipiha. Nihiku na murunku, oohoolela muthukumano onaphwanela wuupuxerya vooloca sa soovaha sa mweeri. Soolaleeryiwa sa ohusiha, ntoko eproxura Michaka Yaphaama, Mmuwiriyane Muluku ni liivuru Piipiliya Onahusiha Eheeni Chiryene? onaphwanela ovahiwa nihiku vyakala. Variyari va muthukumano ti yaphaama othokororyiwa mwawaakuveya mukhalelo wa ovaha soolaleeryiwa seiha.

9. Tiheeni enaphwanela othokororyiwa omakuchuwelo wa esumana wakhala wi muloko ori mmukipici wavameekhaaya?

⁹ Wakhala wi muloko onapaka mukipici wavameekhaaya omakuchuwelo wa esumana, oohoolela onaphwanela othokororya mukhalelo wa ovaha irevista sa mweeri yoowo vamoha ni nwopelo naari etrataato, nave athokororye tiheeni eri yaphaama weera wakhala wi namakhala ohooniherya nchuno. Echu ekina ori oloca saweereya inooniherya esisapo ya opaka makupa mmukipici ntoko seiha.

10, 11. Ntakhara heeni wiirehererya wa alaleeryi ti woochuneya wi muthukumano wa mmacani weece phaama?

¹⁰ Wiirehererya wa Alaleeryi: Alaleeryi tho aakhalano makupa mmuthukumano wa mmacani wi weece phaama. Moorweela wa wiirehererya woosiilo ntakhara muthukumano, akhweya variyari va malapelo aya a echoko, ananwerya waakhaviherya alaleeryi akina. Wiirehererya phaama onavolowela okhalano soolaleeryiwa ehaakumve ophiya mmuthukumano wa mmacani, ela enahaala okhaviherya wi oothene ecimule oya o ekulucu ehilekenle.

¹¹ Navetho ti yaphaama olakelela ophiya aminutu vakhaani muthukumano wa mmacani ohipacenrye, hiyaano ninniilipixerya ophiya mmithukumano sa muloko mu elukuluku yaphaama. Nyenya, wakhala wi noolekela ophiya mmithukumano sa mmacani, nnahaala onanariha marehereryo. Mwawiihai? Munna onahoolela onnaalikhela mikhalelo sa anna ahaakumve okawa makhuuru. Wakhala wi alaleeryi ari vakhaani, oohoolela akhweya onnalakelela oya o ekulucu ekhaani. Wakhala wi akina aheeca eyaaka o muthukumano wa mmacani nave ekulucu eri woorakamela, owo akhweya onahaala waathanla wi yeece ni yaale arino ekaaro naari yoowela ekina. Wakhala wi ekulucu eyo ti yawoopiha, ohoolela onanwerya waathanla anna wi elape vakhiviru ni arokora. Alaleeryi arino makacamiho ananwerya othanleliwa olapa makupa a mureyareya ohiriwo moko. Alaleeryi avyaani anaphwanela othanleliwa wi ekhume ni alaleeryi oosuwela. Nyenya, wakhala wi mulaleeryi oolekela ophiya, enahaala ochuneyaka otoroka marehereryo wi avoliihiwe mmarehereryo yoole olekenle ophiya. Chiryene, mu ilukuluku ikina anahaala okhalavo mathowa aphaama anahaala oneeriha olekela ophiya. Nto, wakhala wi ti yookhovelela ahu olekela ophiya, ti yaphaama wiikoha: Apwanne kirimuyeleela othamalela muthukumano wa mmacani naari wi nkinawerya wiirehererya woosiilo.

12 Wakhala wi mookhalano yookhovelela ya omuthanla nthamwene anyu, tiheeni munaphwanelaanyu othokororya?

¹² Alaleeryi yaawo anaya othukumana ntakhara muteko wa mmacani ananwerya omuthanla nthamwene aya muthukumano ohaakumve naari oweherya othanleliwa nthamwene aya. Wakhala wi mookhalano yookhovelela ya omuthanla nthamwene anyu, mwanwerya ‘wunnuwiha’ murima anyu moorweela wa olapa ni alaleeryi oohiyanahiyana opwaha nthamwene mmoharu elukuluku yoothene? (2 Akor. 6:11-13) Mwanwerya ilukuluku ikina opaka marehereryo wi mulape ni mulaleeryi muvyaani wi mmukhaviherye waaceererya mavyakelo awe a ohusiha? (1 Akor. 10:24; 1 Tim. 4:13, 15) Nwiriyane phaama malakiheryo oothene munavahiwaanyu, ophitaanyerya nipuro munayaanyu opacerya olaleeryawo. Vaavaa muthukumano onamalaaya, musepe otoroka marehereryo naari ochimakela o ekulucu.

13. Wakhala wi oothene annathokororya ni opaka makupa aya, muthukumano wa mmacani onahaala onikhaviherya hai?

¹³ Emanle olaleerya, arummwa 70 yaawo Yesu aarehenreiye oya mu orummwa “yákóka mohakalala.” (Luka 10:17) Moohikhwa minikwa, muthukumano Yesu eenreiyeno ehaakumve opacerya olaleerya waahaakhaviherya okhumelela phaama. Olelo, muthukumano wa mmacani onanwerya okhalano mphurelo mmohamoha. Wakhala wi oothene annathokororya ni opaka makupa aya, muthukumano wa mmacani onahaala onilipiha, onivyakiha, ni onireherya wi nikhwaaniherye orummwa wahu wa ‘okhala namona wa atchu a maloko othene’​—Mat. 24:14.

[Yooleeliherya va epaaxina 4]

Muthukumano wa mmacani honaphwanela wooniwaka ntoko wa esisapo vakhaani opwaha mithukumano sa muloko

[Yooleeliherya va epaaxina 5]

Variyari va wiirehererya ntakhara ohoolela muthukumano wa mmacani, oohoolela onaphwanela wuupuwelela yeeyo enahaala waaceenyerya ni waalipiha yaale anaya mu orummwa nihiku nenno

[Ekaaxa va epaaxina 6]

Vaavaa Murokora Onaphwaneleiye Ohoolela

Murokora onaphwanela owariha muru awe nave aloceke akiranthe. Yeeyo owo onahaaleiye othanla wi athokororye emohamoha ni yeeyo munna aahaaleiye othokororya. Owo onaphwanela opacerya othokororya ahooneihaka okhala ntoko muhusiha a nikhuuru. Wakhala wi oomuthanla murokora mukina wi apake nivekelo, owo tho onaphwanela owariha muru awe. Wakhala wi munna oophiya muthukumano opacenrye, murokora onaphwanela onwopa owo wi akuchule muthukumano. Ooweherya a muteko onaphwanela olokoha ni ovaha malakiheryo oophwanelela wi asepe saweereya soohiphwanela. Ntoko yootakiherya, akhweya mmiravo oopatisiwa, orino iyaakha sihinaakhwana khumi, onanwerya okhala mmuthukumano vaavaa murokora onahooleleiye, ntakhara wi asitokweene aasuwela wi owo nivano hanaphwanela ohoolela. Mmukhalelo yoowo, ooweherya a muteko onaphwanela olokoha wa anna wi murokora onaphwanela ohoolela, nyenya munna onaphwanela opaka nivekelo wakhala wi asitokweene aasuwela wi owo onnaphwanela. Naari akhalavo munna awunnuwa ohiihiwe ohoolela muthukumano ni ovaha mavekelo mmuloko nthowa nsuweliwe ni asitokweene. Ohiya olokoha ya weephiini, asitokweene anaphwanela waathanla arokora yaawo anaphwanela ohoolela muthukumano ni opaka nivekelo naamwi munna awunnuwa ari vaava. Asitokweene anaphwanela omuleela munna wi asuwele mahiku taani arokora anahaalaaya ohoolela mithukumano sa mmacani.

[Ekaaxa va epaaxina 6]

Mmuthukumano wa Muteko, Nyuwaano Munaphwanela Othokororya:

• Sawooniherya sa ntakiheryo sinarweela mu Orummwa Wahu wa Omwene.

• Eviitiyu enaloca sa orummwa enarweela mu jw.org.

• Meerelo a operekha phaama miyaha, ntoko mapaceryiho oophwanelela, mukhalelo wa opaka mathipelo a oxekurya, naari oloca marehereryo a sooveleela vaavaa nnavahaahu yoolaleeryiwa.

• Yoorepa yoolipiha naari yoovyakiha enaloca sa orummwa.

• Yaweereya ya vanipuroni naari ya mu soolaleeryiwa vooloca sa muteko wa mmacani.

• Sooleeliherya inarweela mu Orummwa Wahu wa Omwene.

• Sooleeliherya inarweela mmakupa a Muthukumano wa Muteko.

• Sooleeliherya vooloca sa orummwa inarweela mu Mulipeleli.

• Sooleeliherya vooloca sa orummwa sinarweela mu aliivuru Escola do Ministério Teocrático ni “Venha Ser Meu Seguidor.”

• Iviitiyu sa jw.org sinaphwanela ophariheliwa mu orummwa.

• Miselo sinarweela mu efolyeto Mapaceryiho a Masu a Muluku (igw).

• Mukhalelo wa opaceryiha ochekula ni achu yaawo akhweya anaphwanyeya mu ekulucu anyu, ntoko achu ahineemererya wi Muluku ookhala achu oneemererya mathatuwelo, Hintu, naari Putista.

• Mukhalelo wa owaakhula yaale anakwatelela ochekula.

• Mukhalelo wa omukhaviherya nthamwene anyu mmuteko wa empa ni empa.

• Echu ya weera vaavaa nnamphwanyaahu muchu onaloca elocelo ekina.

• Mukhalelo wa opaka makupa mu ovaha onamoona, ntoko onamoona ni telefone, onamoona wa vanlakani, opaka oxekurya, naari weeciha soohuserya sa Piipiliya.

• Owuupuxerya vooloca sa wiiwehererya, waakuveya, ncicimiho, okhalano moonelo waphaama, naari makhalelo makina.