Mithukumano ‘Sinnanilipixrya mu Osivela ni Mwa Miteko Yaphaama’

MOOVIRA wa iyaakha, achu a Yehova annathukumana mmukhalelo wooreheryeya. Elukuluku ya Aisarayeli, alopwana oothene yaanapaka mukwaha eyaaka o Yerusalemu ntakhara ifesta raru itokweene sa Ayuta. (Malam. 16:16) Mu nsana noopacerya, Akristu yaanathukumana moohihiyererya, vaate va munna naari murokora a mmulokoni. (Filé. 1, 2) Olelo nookhalano mithukumano, sa ekulucu ni sa muceche. Ntakhara heeni alapeli a Muluku anathukumanaaya? Opwaha soothene, nthowa nawi eyo ennapaka makupa a malapelo.—Sal. 95:6; Kol. 3:16.

² Ohiya yeeyoru, mithukumano sinnaakhaviherya oothene anaphiya. Mwawiiwanana ni yeeyo yeereya omakuchuwelo wa iyaakha thanu napiili mu elukuluku ya Ifesta sa Mixakala, Aisarayeli yaahileeliwa wi: “Muthukumanyeke vamoha muloko wa alopwana, wa athiyana, wa anamwane, ni wa anamarwa yaawo oomaka ni nyuwo, wi ewiriyane waalakhanyiwa waya ni wi ehuserye owoova Apwiya Muluku anyu, wiiwelela ni ochariha masu oothene a nlamulo nla.” (Malam. 31:12) Ti yawooneya wi yoolakelela etokweene ya othukumana ori ‘ohusihiwa ni Apwiya [Yehova].’ (Isa. 54:13) Onthamwene Weekristu nryaahuno mmulokoni onnanivaha ekari ya osuwelana phaama, oceenyeryiwa ni okhala oolipiheya.

MITHUKUMANO SA MULOKO

³ Oohuserya yaawo yaathukumanne amanle Pentekoste a 33 E.K., yaatikitheryen’ye mmahusiheryo a arummwa nave “nihiku nnihiku, ni murima mmoha yaantitelela othukumana ompani ya Muluku.” (Saw. 2:42, 46) Moovira wa iyaakha, vaavaa Akristu yaathukumanaaya, awo yaanaalakhanya soorempwa sooveereliwa, ophitaanyerya ikaarata sa arummwa ni ikina sa oohuserya Eekristu. (1 Kor. 1:1, 2; Kol. 4:16; 1 Tes. 1:1; Tiy. 1:1) Mu ilukuluku seiyo, awo tho yaanavekela. (Saw. 4:24-29; 20:36) Vakina vaya, saanalokohiwa saweereya sa muteko woolaleerya wa omisiyonaariyo. (Saw. 11:5-18; 14:27, 28) Yaanathokororya mahusiheryo a Piipiliya ni waakhwanela wa sooloherya sooveereliwa. Yaanavahiwa mahusiheryo vooloca sa meecelo Eekristu ni omulapela Muluku. Oothene yaanaceenyeryiwa wi ekhale anamalaleya amvai a michaka saphaama.—Aro. 10:9, 10; 1 Kor. 11:23-26; 15:58; Éfe. 5:1-33.

⁴ Mmahiku ahu, mithukumano Seekristu sinachariha meerelo mamohamoha atikitheryiwe mu elukuluku ya arummwa. Hiyaano ninniiwelela nceenyeryo nnaphwanyeya mu Ahebri 10:24, 25: “Nuupuwelelaneke mukina ni mukhwaawe, . . . nihicompeke mmithukumanoni mwahu, ntoko akina akhovelenlaaya. Nto, niceenyeryaneke mukina ni mukhwaawe, voopwahasha munoonaanyu wi ninnaacamela nihiku nookuchula.” Mmahiku yaala ookuchula oovila okhala, ninnachuna nlipiho nenno nnaakhelaahu vaavaa nnathukumanaahu moohihiyererya. Eyo ennanilipiha oomunepani ni okhala oororomeleya ntoko Akristu. (Aro. 1:11, 12) Ntoko Akristu nnakhala variyari va achu oohuwela ni ootakhala. Ninnakhooca ohimucicimiha Muluku ni minkhela sa elapo. (Fil. 2:15, 16; Tito 2:12-14) Vanonto, tiheeni yaahaala okhala yoochuneyaxa opwaha onthamwene ahu ni achu a Yehova? (Sal. 84:10) Nave tiheeni yaahaala okhala yamphurelo wawaaca opwaha ohuserya ni othokororya vamoha masu a Muluku? Moone mithukumano soohiyanahiyana nryaahuno ntakhara mphurelo ahu.

MUTHUKUMANO ONEEREYA OMAKUCHUWELO WA ESUMANA

⁵ Nikupa noopacerya na muthukumano oneereya omakuchuwelo wa esumana onakhala mwaha wa Piipiliya yoowo xaxaxa onaperekhiwa wa achu oothene, akina a yaawo anampacerya ophiya mmithukumano. Mwaha wa vanlakani onnakhwaaniherya soothowa soomunepani sa yaale anampacerya othukumana ni alaleeryi a muloko.—Saw 18:4; 19:9, 10.

⁶ Kristu Yesu, arummwa awe ni yaale yaathukumana ni yaawo yaanapaka mithukumano sa vanlakani moolikana ni seiya nryaahuno olelo mmilokoni sa alapeli a Yehova. Moohikhwa minikwa, Yesu aari namaloca oovuwa yoowo aakhanlevo veelaponi yavathi. Yaanalociwa sa yoowo wi: “Haavo muchu ontonko oloca si mulopwana yoowo.” (Yoh. 7:46) Yesu aaloca ni otokweene, aweerihaka oowiriyana awe okhala ootikhiniheya. (Mat. 7:28, 29) Yaawo yeemererya michaka sawe yaanaphura vancipale. (Mat. 13:16, 17) Arummwa yaanachariha yootakiherya awe. Mu Saweriwa T’arummwa 2:14-36, ninnaalakhanya mwaha wootannya murima waalociwe ni Pedro mu nihiku na Pentekoste a 33 E.K. Achu ancipale yaahiceenyeryeya weeravo echu mwawiiwanana ni yeeyo yiiwalaaya. Moovira wa iyaakha, akina tho yaahiroromela emanle owiriyana mwaha wa Paulo o Atena.—Saw 17:22-34.

⁷ Moolikana, macikhwi aachu mmahiku ahu annakumiha mphurelo miyaha sa vanlakani sa esumana ti esumana inapakiwa mmilokoni hiiha ntoko miyaha sa vanlakani inalociwa mmithukumano sa ekulucu ni sa muceche. Miyaha seiya sinnanikhaviherya owiriyana phaama mahusiheryo Eekristu ni otitelela mmuteko ahu wa Omwene. Moorweela wa waawopa yaale arino nchuno ophitaanyerya achu oothene, nnahaala weeriha wi achu esuwele mahusiheryo ari mathipelo a Piipiliya.

⁸ Ichu inathokororyiwa mu miyaha sa vanlakani sinakhala soohiyanahiyana. Miyaha sinaphitaanyerya mahusiheryo a Mpiipiliyani, ni sooloherya malakiheryo a Piipiliya, ikano vooloca sa okumi wa echoko ni othela, saweereya seiyo amiravo ni asimwali anakumanaayano ni meecelo Eekristu. Miyaha mikina sinnathariha miteko sootikhiniha sa Yehova vooloca sa soopatuxiwa. Mikina sinavuwiha sootakiherya sa nroromelo, olipa murima ni ororomeleya wa achu analociwa Mpiipiliyani, sooniheryaka ichu nnahuseryaahu mmahiku ahu.

⁹ Wi nikumihevo mphurelo miyaha sa vanlakani, ti woochuneya okhala oomaaleleya, waavya soorepa sinalociwa ni namaloca ni ochariha vaavaa onaalakhanyeiye ni othariha. (Luka 8:18) Vaavaa nnawiriyanaahu ichu inalociwa va mwaha, nnahaala okhala ooreheryeya opharihela yeeyo nihusenryaahu ni opharihela mookumini mwahu.—1 Tes. 5:21.

¹⁰ Wakhala wi aakhalavo anamaloca awaakhwanela, muloko onahaala okhalakano mwaha wa vanlakani esumana ti esumana. Ilukuluku ikina, annawompwa anamaloca a miloko sa vakhiviru. Wakhala wi arivo anamaloca vakhaani, miyaha iho inahaala olociwaka wakhala wooweryeya.

¹¹ Nikupa nanawiili na muthukumano oneereya omakuchuwelo wa esumana enakhala Yoohuserya ya Mulipeleli, anathokororyiwa makoho ni maakhulo wa miyaha silaleeryiwe mu erevista yoohuserya ya Mulipeleli. Moorweela wa Mulipeleli, Yehova onnanivaha yoolya yoomunepani mu elukuluku yoophwanelela.

¹² Miyaha sa ohuserya wiiliwiili sinaloca sa ophariheleya wa malakiheryo a Piipiliya a okumi wa nihiku nnihiku. Iho sinnaalipiha Akristu okhooca “munepa wa veelaponi ya vathi” ni meecelo ooriipiheya. (1 Kor. 2:12) Moorweela wa Mulipeleli, mahusiheryo ni sooloherya sa Piipiliya sinnavuwihiwa mookwakwaleya, yeerihaka wi oothene enasuwela miyaha mivyaani sa eparipari ni otitelela okhala mu ephiro yawookololowa. (Sal. 97:11; Masi. 4:18) Ophwanyeya va Yoohuserya ya Mulipeleli ni ovahererya maakhulo, onnaneeriha okhala oohakalala ni owehererya elapo evyaani yeekhaikhai ya Yehova. (Aro. 12:12; 2 Ped. 3:13) Muthukumano yoola onnanikhaviherya wunnuwiha sawiima sa munepa ni olipiha yoolakelela ahu ya omurumeela Yehova mwamvai. (Gal. 5:22, 23) Ninnalipihiwa wi nivilele saweeha ni ‘okhaviheryeya mmahiku anoorwa’ wi ‘niphare okumi weeparipari.’—1 Tim. 6:19; 1 Ped. 1:6, 7.

¹³ Nni nikumihevo hai mphurelo wa marehereryo yaala a yoolya yoomunepani? Nnaphwanela orehererya yoohuserya woosiilo ene, naamwi nrivo meekhihu, naari ni amusi ahu, waalakhanya soorepa seiyo iromoliwe nave mmithukumano ovaha maakhulo ni masu ahu. Eyo enahaala weeriha wi eparipari etikitheryeye mmurimani mwahu, nave akina anahaala ophura vaavaa anawiriyanaaya masu ahu a nroromelo. Vaavaa nnawiriyanaahu moomaaleleya maakhulo a akina, nnahaala ophura orweela wa yoohuserya esumana ti esumana.

MUTHUKUMANO WA VEERI VA ESUMANA

¹⁴ Esumana ti esumana, muloko onnathukumana mu Empa ya Omwene ntakhara marehereryo arino muru Okumi ni Muteko Ahu Weekristu. Muthukumano ola wookhalano makupa mararu yaawo ananikhaviherya okhala “oophwanelela” ntoko alapeli a Muluku. (2 Kor. 3:5, 6) Sooleeliherya ni miyaha sinahaala ovahereryiwa mweeri ti mweeri mu Okumi ni Muteko Ahu Weekristu—Yoochariha ya Mithukumano. Yoochariha yeelatho ennakhalano ochekula wa ntakiheryo wi ophariheliwe mmuteko woolaleerya.

¹⁵ Makupa oopacerya a muthukumano yoola, aniichaniwa Muhakhu wa Masu a Muluku, annanikhaviherya osuwela mwawiiseela saweereya sa Mpiipiliyani ni ophariheleya waya mu okumi ahu. Makupa yaala a muthukumano anaphitaanyerya mwaha, waalakhanyiwa wa Piipiliya ni othokororya vamoha ni alipa oowiriyana onathipeleya mu waalakhanyiwa wa Piipiliya wa esumana. Yoochariha ennaphitaanyerya iruku ni ovyakiha enanikhaviherya ohusiha miyaha seiyo. Othokororya yoola wawiiseela onathipeleya Mpiipiliyani ti wamphurelo mu okumi ni mahusiheryo ahu, wi ‘nikhale awaakhwanela ni ooreheryeya mmiteko soothene saphaama.’—2 Tim. 3:16, 17.

¹⁶ Nikupa nanaawiili na muthukumano, Mwiivyakihe Mmuteko Woolaleerya, nrino yoolakelela ya waavaha oothene ekari ya opharihela mmuteko woolaleerya ni orehererya mavyakelo aya a olaleerya ni ohusiha. Mu waaceererya makupa a anasikola, ixilema sa ochekula wa ntakiheryo sinnathokororyiwa. Nikupa nenla na muthukumano ninnanikhaviherya okhalano ‘nlumi na oohusiheya’ wi niwerye ‘owaakhula ookhulumuwa mu elukuluku yoophwanelela.’—Isa. 50:4.

¹⁷ Nikupa naneeraru, na Okumi ni Muteko Ahu Weekristu, ninnathokororya mukhalelo wa opharihela malakiheryo a Mpiipiliya mu okumi wa nihiku nnihiku. (Sal. 119:105) Echu yoochuneya va nikupa nenla na muthukumano eri Yoohuserya ya Piipiliya ya Muloko. Hiiha ntoko Yoohuserya ya Mulipeleli, Yoohuserya ya Piipiliya ya Muloko anathokororyiwa makoho ni maakhulo.

¹⁸ Mweeri ti mweeri, vaavaa enaphiyaaya Yoochariha ya Mithukumano Okumi ni Muteko Ahu Weekristu, muhooleli a nikhuuru na atokweene, naari mutokweene onnamukhaviherya ovareryela mwawiichaalela ni opaka yoochariha. Esumana ti esumana mutokweene yoowo ori muhusiha aphaama nave eemereryiwe nnikhuuru na atokweene, onahaala orumeela ntoko muhooleli a muthukumano. Murici awe ori ororomela wi muthukumano opacerye nave okuchuwe mu elukuluku yoophwanelela ni ovaha othamalela ni ekano wa yaale arino makupa a anaxikola.

¹⁹ Moorweela wa wiirehererya phaama ntakhara muthukumano Okumi ni Muteko Ahu Weekristu, oyawo ni opaka makupa, ninnakhalano masuwelelo a mu Soorempwa, wiiwexexa malakiheryo a Piipiliya, okhalano nroromelo na olaleerya michaka saphaama ni mavyakelo a waapaka oohuserya. Yaale anaphiya va muthukumano yoola nave ehiri Anamoona a Yehova oopatisiwa annakhaviheryeya moorweela wa miyaha soomunepani. Wi nikhaviheryeye wiirehererya phaama ntakhara muthukumano yoola ni mikina, nnaphwanela ompharihela Watchtower Library, JW Library^® EPIIPILIYOTEKA ya Watchtower^™ (wakhala wi sinnaphwanyeya mu elocelo anyu) ni epiipiliyoteka eri mu Empa ya Omwene. Epipiliyoteka eri mu Empa ya Omwene sinnaphwanyeyamo soolaleeryiwa sa Anamoona a Yehova, ntoko Índice das Publicações da Torre de Vigia naari Yoohoolela ya Otholathola ya Anamoona a Yehova, ni Apiipiliya oohiyanahiyana, tisiyonariyu ni ireferensiya soochuneya. Epipiliyoteka eyo enanwerya ophariheliwa ni muchu vyakala muthukumano ohaakumve naari imanle mithukumano.

MITHUKUMANO SA MUTEKO WOOLALEERYA

²⁰ Mu ilukuluku soohiyanahiyana variyari va esumana naari wookuchulani wa esumana, nikhuuru na alipa oolaleerya ninnathukumana wi yalaleerye. Mithukumano iho wiiliwiili sineereya mmavaate mwa anna naari mmapuro makina oophwanelela. Empa ya Omwene enanwerya ophariheliwa ni yoolakelela yeela. Okhalavo makhuuru makhaani mmapuro oohiyanahiyana mu ekulucu onakhala wookhweya wa alaleeryi ophiya va muthukumano ni oya mu ekulucu. Ti wookhweya wiirehererya mwawaakuveya ni oya mu ekulucu. Onakhalatho wookhweya oohoolela a nikhuuru na olaleerya waathokororya anna ni arokora a mu nikhuuru nawe. Naamwi okhalakavo mphurelo othukumana mookawanyeya, ilukuluku ikina akhweya onamuchuneya makhuuru othukumana vamoha. Ntoko yootakiherya, wakhala wi alaleeryi avakhaani tanaya mmuteko woolaleerya variyari va esumana, enamukhala yaphaama othukumanya makhuuru oothene mu Empa ya Omwene naari othukumana mpuro mukina ori woophwanelela. Mmukhalelo yoola, alaleeryi anamukhalano muchu oolapano. Akhweya muloko onamulakelela othukumanya makhuuru oothene mu Empa ya Omwene mmahiku a ifesta wi ekhume mmuteko woolaleerya. Naari muloko onamulakelela wi ethukumane emanle Yoohuserya ya Mulipeleli.

²¹ Wakhala wi makhuuru a olaleerya anathukumana mapuro oovalaanyeya, muhooleli a nikhuuru na olaleerya ookhalano murici wa weeciha muthukumano wa muteko woolaleerya. Ikwaha ikina muhooleli a nikhuuru onnamveka mukhaviheryi awe naari munna mukina oophwanelela wi eeciheke mithukumano seiyo. Muhooleli onaphwanela okhala ooreheryeya wi athokororye echu enahaala okhala yamphurelo ni yookhaviherya mmuteko woolaleerya. Nikhuuru nimanle okawanyiwa, annaleeliwa ekulucu anayaaya olapawo, nave munna mmoha onnapaka nivekelo. Voocharela nikhuuru ninnaya mu ekulucu mwawaakuveya. Mithukumano seiyo inamaliha aminutu athanu naari athanu napiili, nto hisinalekela wakhala wi inapakiwa imanle mithukumano sa muloko. Iho inaphwanela ovahererya nlipiho, ohoolela, ni mahusiheryo oophara muteko wa yaale anaya mmuteko woolaleerya. Alaleeryi avyaani naari akina yaawo anachuna nikhaviheryo ananwerya olapa ni alaleeryi arino mavyakelo wi yaavyakihe.

MAREHERERYO A MITHUKUMANO MMILOKO MIVYAANI NAARI MIKHAANI

²² Vaavaa ancipale anakhalaaya oohuserya, miloko sinnaaceereryeya. Yooveka ya ohuliwa muloko muvyaani ennavonyeryiwa ooweherya a ekulucu. Nyenya, miloko mikhaani sinnaphwanya mphurelo othukumana vamoha ni muloko ori vakhiviru vaya.

²³ Akhweya mmiloko mikhaani anakhalavo arokora pahi. Yakhala wi ti hiiha, murokora yoowo onapaka mavekelo mmulokoni naari weeciha mithukumano onaphwanela weerano ahuruwenle muru awe, mwawiiwanana ni marehereryo a mu Soorempwa. (1 Kor. 11:3-16) Wiiliwiili, owo onaphwanela weerakano soothene akiraanthe, ohoolo wa nikhuuru. Arokora hanapaka miyaha mmithukumano. Moohiyana, awo annaalakhanya yoolaleeryiwa evahereryiwe ni marehereryo ni oloca sa yeeyo, naari moohiyana awo ananwerya othokororya eyo moorweela wa yawooniherya. Efiliyale enahaala omveka murokora mmoha wi arumiheke naari waakhela sooleeliherya so filiyale ni weeciha mithukumano. Veelukuluku aya, vaavaa anna anaphwanelelaaya opaka yeeyo, awo anahaala okhapelelaka mirici seiya.

MITHUKUMANO SA EKULUCU

²⁴ Eyaakha ti eyaakha, annapakiwa marehereryo wi miloko sa ekulucu emohamoha ithukumane wiili ntakhara muthukumano wa ekulucu wa nihiku nimoha. Ilukuluku seiyo soohakalaliha annalipihiwa oothene athukumanne wi ‘murima [aya] ohuleye’ mu waataana Weekristu. (2 Kor. 6:11-13, BNM) Yeereryaka waakhwaniherya yoothowa yammoori, marehereryo a Yehova annarehererya miyaha sa mu Soorempwa ni makupa oohiyanahiyana. Michaka inalociwa moorweela wa miyaha soohiyanahiyana, sawooniherya, nawiilocele, ni okoha ni waakhula. Mahusiheryo yaawo aphaama annaakhaviherya oothene ari va muthukumano. Mithukumano seiyo sa ekulucu sinnaavaha ekari oohuserya avyaani wi epatisiwe mu wiiveleela waya wa Yehova.

MITHUKUMANO SA MUCECHE

²⁵ Ekwaha emoha vayaakhani, achu ancipale annathukumana. Owo muthukumano wa muceche wa mahiku mararu, inathukumanyiwa miloko sinarweela mu ikulucu sawaaca. Ifiliyale ikhaani sinnoona okhala waphaama wi miloko soothene sa ekulucu ya efiliyale ithukumane nipuro nimoha. Mu ilapo ikina, marehereryo yaawo a othukumana aneereya mwawiiwanana ni mikhalelo naari ohoolela onavahiwa mmareheryo. Mweelukuluku aya, muthukumano wa muceche wa ilapo soohiyanahiyana naari sa vameekhaaya sinneeriwa mu ilapo ikina nave annathukumana Anamoona a Yehova macikhwi macikhweene oorweela ilapo soohiyanahiyana. Moovira wa iyaakha, ancipale aahuserya michaka yaphaama ya Omwene nthowa na olokohiwa vanlakani wa mithukumano seiya mitokweene.

²⁶ Wa achu awiiveleela a Yehova, mithukumano sa muceche elukuluku yoohakalaliha ya omulapela Yehova. Awo annooniherya omwaleela wa eparipari onooneya variyari va mithukumano sa muceche. Mu mithukumano mikina sa muceche, sinnavonyiwa soolaleeryiwa ivyaani wi ihuseryiweke mmulokoni naari opharihela mmuteko woolaleerya. Mmithukumano seiyo tho achu annapatisiwa. Mithukumano sa muceche makupa oochuneya anavuwiha wunnuwa woomunepani. Iho sinnooniherya wi achu a Yehova annavoloweliwa ni osivela wa onna wa Akristu awiiveleela yaawo anooniherya eneneeryo ya oohuserya a Yesu Kristu.—Yoh. 13:35.

²⁷ Moorweela wa ophiya mmithukumano sa muloko, sa ekulucu, ni sa muceche sa Anamoona a Yehova, ninnalipihiwa weerano yookhwela ya Yehova. Navetho ninnakhapeleleya moorweela wa ovolowela wa elapo enahaala oceecheiha nroromelo nahu. Othukumana yoowo onnamvuwiha ni omucicimiha Yehova. (Sal. 35:18; Masi. 14:28) Ninnamuthamalela Yehova onavaha yoolya yeela yoomunepani wa achu awe awiiveleela mu elukuluku yeela yookuchula.

MUKONELO WA APWIYA

²⁸ Eyaakha ti eyaakha mu wuupuwelela okhwa wa Yesu Kristu, miloko sa Anamoona a Yehova orukurerya elapo sinnuupuwelela okhwa wa Yesu, naari wi Yoolya ya Apwiya. (1 Kor. 11:20, 23, 24) Ola muthukumano woochuneyaxa wa vayaakhani wa Anamoona a Yehova. Ninnalamuleliwa wuupuwelela Mukonelo.—Luka 22:19.

²⁹ Nihiku na Mukonelo nniiwanana nnihiku na Paskha akhalai, yoowo onalociwa mu Soorempwa. (Muk. 12:2, 6; Mat. 26:17, 20, 26) Paskha waari wuupuwelela wa vayaakhani Mmukwaha wa Aisarayeli yaakhummaaya o Yikuputu mu eyaakha ya 1513  E. E.K. Mu elukuluku yeele, Yehova aathanla nihiku na 14 na mweeri woopacerya ntoko nihiku naya na olya epucepuche ya Paskha ni okhuma mu okapuro o Yikuputu. (Muk. 12:1-51) Nihiku naalakeleliwa moorweela wa waalakhanyeryiwa mahiku khumi nararu ovinyerya elukuluku mweeri muvyaani onooneyaaya waacamela elukuluku ya oriirya vaavaa waakhalaaya wawooneya o Yerusalemu. Xaxaxa, mukonelo weereya nihiku noopacerya na mweeri waakhalaaya wawooneya phaama elukuluku ya oriirya.

³⁰ Mu yoorepa ya Mateu 26:26-28 ennaloca masu a Yesu vooloca sa mukhalelo Mukonelo oneeriwaayano. Owo tahi muhapo, nyenya yoolya yoosiphela enalyiwa ni yaale aniichaniwa wi yakhale vamoha ni Yesu mu Omwene Wawirimu. (Luka 22:28-30) Akristu oothene awiiveleela ni achu arino nchuno annaceenyeryiwa okhalavo va Mukonelo wa Apwiya. Ophiya waya va Mukonelo, yawooniherya ya othamalela waya marehereryo Yehova Muluku opankeiye wi achu oothene ephure moorweela wa Mwanawe, Yesu Kristu. Ohaakumve Mukonelo, mwaha wa vanlakani onnalociwa wi otannye nchuno wa yaweereya yeela ni waalipihe yaale arino nchuno na yoohuserya ya Piipiliya.

³¹ Anamoona a Yehova annahakalala othukumana vamoha mu ilukuluku seiya sinalokohiwa woosiilo, mummo ‘nnuupuwelanaahu mukina ni mukhwaawe, nlipisheryanaka mu osivela ni mwa miteko yaphaama.’ (Ahe. 10:24) Namuteko oororomeleya ni amiruku onakhala ooreheryeya ovahererye mithukumano ntoko seiya mwawiiwanana ni soothowa sahu soomunepani. Alapeli oothene a Yehova hiiha ntoko achu arino nchuno annaceenyeryiwa ophura marehereryo a othukumana vamoha moohihiyererya. Moorweela wa wooniherya othamalela ni murima woothene soovaha sa Yehova mmarehereryo awe, alapeli a Muluku anakhala vamoha mwawiiwanana. Echu yoochuneyaxa, ninnamvuwiha ni omucicimiha Yehova.—Sal. 111:1.