Awo Yaari Oorehererya wi Epaceryihe Yoohuserya ya Piipiliya—Mwaha ola okuxiwe mu liivuru Anuário a Anamoona a Yehova a 2015

Amerika

Kapriyele Aahaakhaviherya Amunnawe

Epaaxina 55, eparakrafo 1, ophiyerya 56

Ayaaka owaani omanle muthukumano wa ekulucu o Parakwayi, Kapriyele a iyaakha thanu nammoha aahuupuwelela okhweleya wa olaleerya michaka sa Omwene. Voocharela aahuupuwelela wi ookhalavo muchu ookhweleya aachuneiye wi ekhale vamoha mu parataiso​—amunnawe. Nyenya amunnawe hiyantonko wooniherya nchuno wa eparipari nave yaanamwiica oothelana aya ni anamwane aya, yaawo yaari anamoona a Yehova.

Nihiku nimoha, Kapriyele aahaaveka asitiithi awe wi aloce ni amunnawe yaakhala o Arxentina moorweela wa interneti. Kapriyele aahaaleela amunnawe mphurelo onarweela wa omuhuserya Piipiliya nave mookwasa aahaakoha, “Amunna, munnachuna ohuserya ni miyaano?” Amunnawe yaaheemererya. Kapriyele aahaaveka wi ehuseryeke eproxura Mmuwiriyane Muluku nave Mukhale Okhala Wookhala. Mu miyeeri vakhaani soocharela, awo yaanahuserya eproxura vamoha. Woona wi oopiili hiyaasuwenle waalakhanya phaama, awo yaaniirehererya ehaakumve. Mu soohuserya soothene, Kapriyele aanarehererya phaama makupa nave anawara malaya ni ekravata.

Ohoolo waya amunnawe yaalakelela oxekurya emusi ya Kapriyele mu miyeeri vakhaani. Variyari wa oxekurya waya, amunnawe Kapriyele yaaya mmithukumano. Vaavaa awo yaakookenlaaya o Arxentina, yaatitelela omuhuserya Piipiliya ni munna a elapo aya, nave yaaya vahoolo ophiyerya okhala mulaleeryi oohipatisiwa. Vano amunnawe Kapriyele annapaka mavekelo vamoha mahiku oothene. Vooloca sa Kapriyele owo tho mulaleeryi oohipatisiwa. Amunnawe ahooniherya wiiveleela waya wa Yehova moorweela wa opatiso.