Europa

Yoohuserya ya Piipiliya “Muthooroni”

Epaaxina 69, iparakrafo 2-5

Wooxixelo woothene Markareti aaneeca ni mwanapwa awe muthooroni o Alemanha. Owo onnaloca: “kaaneererya oloca ni muchu ori oothene, wakhala wi awo yaamwiichuuwa kaanavaanelano sa Mpiipiliya.”

Nihiku nimoha owo aamphwanya muthiyana aarino iyaakha variyari va 70 yoowo eeca vamoha ni mwanapwa awe. Markareti aapacerya ovaanela ni muthiyana ole. Muthiyana aasiveliwa nave aamuleela Markareti wi aanavekela nave tho anamwaalakhanya Piipiliya mahiku oothene. Ovinyerya vaavaa, awo yaanakumana mahiku oothene nave yaanavaanela ichu soomunepani. Nihiku nimoha muthiyana aamukoha Markareti: “Owenrye hai osuwela ichu sincipale sa Mpiipiliyani?” Markareti aamuleela wi Namoona a Yehova.

Ikwaha sincipale Markareti aamvaha muthiyana yoohuserya ya Piipiliya, nyenya owo aakhooca. Naamwi hiiha, ovaanela waatitelela. Miyeeri vakhaani ohoolo, Markareti aamveka wi emuhuseryeke Piipiliya owannyawe. Mu elukuluku ela muthiyana aamuleela wi owo oova omuhuserya Piipiliya ntakhara wi iyawe aanawiica Anamoona a Yehova.

Mu elukuluku ekina Markareti aakeleiye weeca muthooroni, owo aamukuxa Piipiliya ni liivuru Piipiliya Onahusiha Eheeni. Vaavaa aamoonneiye muthiyana, Markareti moolipa murima aaloca: “Ekwaha ela nkinachuna omuhuserya Piipiliya owannyaa, nyenya kinachuna woovaha yoohuserya ya Piipiliya ‘muthooroni.’” Ni ohakalala vancipale, moohilekela muthiyana owo aaheemererya. Owo aanaya omuhuserya Piipiliya ‘muthooroni’ ikwaha thanu nammoha va esumana. Mwawiiwanana ni elukuluku, ikwaha ikina Markareti aaneeciha yoohuserya ya Piipiliya yiikhuneelaka ni kwartaxuuva vamoha ni yawiimoleelano.

[Epaaxina Ohirivo Echu 7]