Apwanne Muteko Anyu Ori Ntoko Nikami?
ORUMMWA wahu ori wookhweleya ni wa esisapo. Nyenya tahi wi oothene nnaalaleeryaahu anniiwexexa yeela. Naamwi achu echunaka osuwela yeeyo Piipiliya onaloceiye, tahi wi elukuluku yoothene annoona okhala woochuneya ohuserya Masu a Muluku ni hiyo.
Muthokororye yootakiherya ya Kavin. Owo aanaphiya mmithukumano o Empa ya Omwene, nyenya haachuna okhalano yoohuserya ya Piipiliya. Owo onnathariha wi aasuwela vakhaani vooloca sa Piipiliya nave haachuna wi akina esuwele yeeyo. Aanoova ovekiwa opaka makupa a ekerexa, nave tho haachuna owokiwa. Tiheeni munuupuwelaanyu? Waari wookhweya omukhaviherya Kavin? Muupuwelele yookhumelela yaphaama mahusiheryo a Piipiliya anakhalaayano mu okumi wa muchu. Yehova aaloca wa Isarayeli: “Masu aka emwalamwale ntoko nikami: ntoko matxoitxoi a màhi mmanasini.” (Malamulo 31:19, 30; 32:2) Hankooni nihuserye ichu ikina vooloca sa nikami nave nlikanyihe orummwa wahu ni nenlo wi niwerye waakhaviherya phaama “atxhu othene.”—1 Timóteo 2:3, 4.
ORUMMWA WAHU ONI OLIKANE HAI NI NIKAMI?
Nikami ti naphaama. Nikami nnapakeya vakhaani vakhani moorweela wa nakhutu onathatuwa macoicoi a maahi. Masu a Yehova ‘yamwalamwanle ntoko nikami’ mwawiihai? Owo aalonce ni achu a Muluku mwaphaama, mweepewe ni moothokororya. Ninnamutakiherya owo vaavaa nnooniheryaahu ncicimiho wa soororomela sa akina. Ninnaaceenyerya awo wi yiisuupuwelele nave epake soolakelela saya. Vaavaa nnaathokoroyaahu, awo anahaala weemererya yeeyo nnalocaahu, nave olaleerya wahu onamukumiherya mphurelo.
Nikami ninnakurumuxa. Orummwa wahu onamwaakurumuxa akina vaavaa nnuupuwelaahu makhalelo oohiyana hiyana wi naakhaviherye awo ohuserya eparipari. Munna oniichaniwa Chris, yoowo woopaceryani aamvanhe Kavin yoohuserya ya Piipiliya, haamukhinyerenre weemererya eyo. Opwaha yeeyo Chris aaheererya ophwanya makhalelo oohiyana hiyana wi amweerihe Kavin weemererya omuthokororya Piipiliya. Chris aaloca ni Kavin wi sookhalavo michaka sookhweleya othokororya orweela Mpiipiliyani nave wi ohuserya michaka seiyo yaahaala omukhaviherya wiiwexexa phaama mithukumano. Voocharela, Chris aamutharihela wi sooloherya sa Piipiliya saamulekecha wi Piipiliya teeparipari. Ntoko yookhumelela oopiili yaakhalano ichu sincipale sa othokororya vooloca sa okhwaaniheryeya wa sooloherya. Ovaanela weiwo waamukurumuxa Kavin, nave voocharela aaheemererya omuhuserya Piipiliya.
Nikami ninnakhaviherya ekumi. Variyari va elukuluku ya oviha o Isarayeli, sinnavira miyeeri sincipale ehirumpe epula. Ohirivo nakhutu yoowo onapakeya nikami, miri saahaala wuuma. Yehova aaloherya wi mmahiku ahu yaahaala okhalavo elimwi, yeeyo achu yaahaalaaya okhalano nthanana na “owiriyana masu a Apwiya.” (Amosi 8:11) Yehova aaloherya wi awoocihiwa yaahaala okhala “ntoko nikami nrumihiwe t’Apwiya” vaavaa yeeraaya elaleeryeke michaka saphaama sa Omwene, ekhaviheryiwaka ni “iputxeputxhe ikina.” (Mikeya 5:6; Yohani 10:16) Michaka nnalaleeryaahu makupa a soovaha sa Yehova wi saavahe okumi yaale arino nthanana na eparipari. Apwanne ninnavaha esisapo michaka seiya?
Nikami mareeliho anarweela wa Yehova. (Malamulo 33:13) Orummwa wahu onamukhala mareeliho naari yoovaha wa yaale aneemererya. Omuhuserya Piipiliya yaari mareeliho wa Kavin woona wi oomukhaviherya ophwanya maakhulo a makoho awe oothene. Owo aaya vahoolo mwawaakuveya, apatisiwa nave vano onnapuha olaleerya michaka saphaama sa Omwene vamoha ni mwaariye Joyse.
MUCICIMIHERYE ORUMMWA WANYU
Olikanyiha muteko ahu wa olaleerya ni nikami enamunikhaviherya wiiwexexa wi wiilipixerya wahu mmuteko wa olaleerya ti wookhweleya. Mwawiihai? Ncoicoi na maahi ninnakhaviherya vakhaani, nyenya vaavaa anakhalaayavo macoicoi macikhwi, nipuro ninnanyoowa. Moolikana, yeeyo muchu ti muchu onapakeiye mmuteko woolaleerya enamukhala ntoko echu vakhaani wa hiyo. Ntoko yookhumelela ya wiilipixerya wa macikhwi a akapuro a Yehova, onnavahiwa onamoona wa “maloko othene.” (Mateu 24:14) Apwanne orummwa wahu onahaala okhala mareeliho oorweela wa Yehova wa akina? Chiryene, michaka sahu sinahaala olikana ntoko nikami, nenlo nri naphaama, nookurumuxa, nave nnakhaviherya ekumi!