YAWEEREYA YA OKUMI

Mairima Annakhala Arokora Oomunepani Eeparipari

Ntoko elociwaaya ni Felisa ni Araceli Fernández

MU IYAAKHA sincipale ivirale, murokoraka Araceli aananariwa nave akhuwela: “Omaale oloca ni miyo. Nkinachuna owiriyana echu vyakala vooloca sa ekerexa aa. Eyo ennakinyeenyeiha nave kinnawiica!” Masu awe yaakiceecela vancipale. Vano kirino iyaakha 91 sa oyariwa, nave nlelo kinnuupuwela phaameene. Nyenya ntoko Eklesiyaste 7:8 onaloceiye, “ti yaphama omaliha muteko [mwaha] ohiya opatxerya.”—Felisa.

Felisa: Kunnunwe mu emusi yoohaawa o Espanya. Emusi aka yaari Katoolika, nave naanatepa ovekela. Chiryene amusi aka 13 yaari maphaatiri naari wi yaalapa okerexa. Ataata yaari phaatiri ni muhusiha a exikola ya Akatoolika. Emanle okhwa, Papa João Paulo II aahacicimiha moorweela wa waavekelela. Apapa yaalapa ni mithipo, nave amama yaalapa mmacani. Naari anamwane athanu nararu, nave miyaano kaari oopacerya.

Kaarino iyaakha 12 vaavaa yaapacenryaaya ekhoco o Espanya. Emanle ekhoco, apapa yaavonyeryiwa mukalaposo nthowa nawi alamuleli hiyaasiveliwano miruku saya. Waari woovila amama ophwanya yoolya yawaakhwanela ntakhara oothene hiyo. Mwawiihiiha amama yaahaarumiha arokora aka araru, Araceli, Lauri, ni Ramoni, wi yakhaleke ni mairima o epooma ya Pipau. Weiwo arokora aka yaakhalano yoolya yawaakhwanela.

Araceli: Mu elukuluku yeele kaarino iyaakha 14 sa oyariwa, Lauri aarino 12, nave Ramoni aarino 10. Naacuwala emusi ahu. Muteko ahu waari orehererya empa. Iyaakha piili ohoolo waya, mairima yaanirumiha mu nipuro ntokweene o Sarakosa nnaakhapelela achu awuuluvala. Naakhalano muteko mutokweene wa orehererya onaapeiwawo yoolya, nave ela yaananivelaveliha.

Felisa: Vaavaa murokora aka aakeleiye o nipuro na mairima o Sarakosa, amama ni ataata, yaawo yaari phaatiri a vanipuroni, yaalakelela okirumiha tho oya weiwo yaariwo arokora aka. Awo yaachuna okirapeliha mmiravo yoowo aasiveliwa ni miyo. Kaalakelela omaliha elukuluku o nipuro na mairima woona wi kaanamusivela Muluku. Kaanaya okerexa mahiku oothene, nave kaanachuna okhala misiyonaariya a Akatoolika o Afrika ntoko munnaka.

Nyenya o nipuro na mairima, kaahoona wi nkaapaka ichu sincipale kaachunaka opaka. Mairima hiyaakiceenyerya omurumeela Muluku mu elapo ekina, ntoko kaaweheryaaka. Mwawiihiiha eyaakha emoha ohoolo waya, kaachikela owaani nave kaawaavya ataata yaari phaatiri. Kaanapaka miteko saya sa vaate, nave naanamvekela Terso ohiyu mahiku oothene. Kaanasiveliwa tho waavya ithutu kiyaakano okerexa nave kaanawara eruku ya Mariya ni ya achu “aweela.”

Araceli: Kaaryaaka o Sarakosa, nlakano naka noopacerya kaachuna okhala irma. Voocharela mairima yaakimwalanya ni arokora aka. Mwawiihiiha yaakirumiha o nipuro na mairima o Matriti nave Lauri o Valensiya. Ramoni aatitelela okhala o Sarakosa. O Matriti, kaahuuluula nlakano naka na okhala phaatiri amuthiyana. Achu ancipale ophitaanyerya achu awunnuwelavo, yaarwa wi nikhale vamoha ntoko anamahuserya. Weiwo waakhalawo muteko muncipale wa ophara. Miyaano kaalapa o nipuro na areca.

Kaanaweherya opharihela okumi aka ntoko irma. Kuupuwela wi naahaala omalihaka elukuluku yincipale nimwaalakhanyaka Piipiliya ni omuhuserya. Nyenya kaari ooximwa. Haavo aampharihela Piipiliya naari mano oloca sa Muluku naari Yesu. Kaahuserya Elatini, kaasuwela okumi wa achu “aweela,” Aakatoolika nave kaanamulapela Mariya. Nyenya elukuluku yincipale, naaphara muteko woolimela.

Kaapacerya onyeenyeya ni woova. Koona wi kaamukhalano ikhorowa wi kikhaviherye emusi aka ohiya olapa o nipuro na mairima wi achu akina ereele. Mwawiihiiha kaaloca ni irma yoowo aanihoolela, wi kaachuna ohiya muteko. Nyenya owo aakiwalela mukalaposo. Yene uupuwela wi kaamulekecheya wi kihirowe.

Mairima yaakikumiha mukalaposo, nyenya vaavaa yaasuwenlaaya wi nlelo kinachuna ohiya muteko, yaakiwalela wanaawiili. Emanle weerano hiiha mu ikwaha raru, awo yaakileela wi kaahaala ohiya wakhala wi koorepa masu ala anacharela: “Kinnahiya muteko nthowa nawi kinachuna omurumeela Satana opwaha Muluku.” Kaahaleeliheya. Kaanachuna opwaha chiryene, nyenya nkaaphwanela orepa masu yaala. Wookuchulani, kaaloca wi kinachuna oloca ni phaatiri, nave kaamuleela yeeyo yeeren’ye. Owo aaheemereryiwa orweela wa Pispu wi kikookiheryiwe o nipuro na mairima o Sarakosa. Imanle miyeeri vakhaani kiri weiwo, kaaheemereryiwa orowa. Voocharela, Lauri ni Ramoni tho yaahiya muteko aya.

LIIVURU AANIKAWANNYE

Felisa: Woovira wa elukuluku, kaatheliwa nave n’ya nanakhala o Kantapria, muceche wa Espanya. Nlelo kaanaya okerexa wiiliwiili. Murunku mmoha okerexa, phaatiri aakhuwela, “Mmoone liivuru ola!” Owo aanooniha liivuru A Verdade que Conduz a Vida Eterna (Eparipari Enahoolela Ekumi Yoohimala). Owo aaloca, “Wakhala wi muchu ohoovahaani liivuru ola, mukinnye naari mmurihe okhwipi!”

Nkaatonko okhalano liivuru yoole, nave kaanamuchuna. Mahiku vakhaani ohoolo waya, athiyana eeli yaarwa owannyaka. Yaari Anamoona a Yehova, nave awo yaakivaha liivuru yoole. Kaamwaalakhanya liivuru ohiyu yoole. Vaavaa athiyana ale yaakoonkaaya, yaakikoha waakhanle wi kaanachuna omuhuserya Piipiliya nave kaawaakhula wi aa.

Mahiku oothene kaanachuna omuhakalaliha Muluku. Voocharela kaahuserya eparipari vooloca sa Yehova, nave kaapacerya omusivela vancipale. Kaachuna waaleela achu oothene sa Yehova. Mu 1973, kaapatisiwa. Wakhala woowererya, kaaneererya oloca ni emusi aka vooloca sa eparipari. Nyenya emusi aka, nave xaxaxa murokora aka Araceli, aanatitelela oloca wi echu kaaroromelaaka yaari yatheru.

Araceli: Woona wi kaanakhalihiwa moonanara o mutekoni, kaakhala oonyeenyeya nave nkaasiveliwano ekerexa aka. Nyenya kaanatitelela oya okerexa, nave kaanamvekela Terso mahiku oothene. Nlelo kaanachuna omwiiwexexa Piipiliya, kaamveka Muluku wi akikhaviherye. Voocharela Felisa aakilela yeeyo aahusenryeiye. Owo aanacicimiherya yeeyo aaroromeleiye nave yaakeriha wuupuwela wi aari naanepa. Nkeemererya yeeyo aaloceiye.

Ohoolo waya, kaakookela o Matriti wi kalapeke nave kaatheliwa. Moovira wa iyaakha, kaahoona wi achu yaaya okerexa wiiliwiili hiyaakhala mwawiiwanana ni mahusiheryo a Yesu. Mwawiihiiha kaamaala oya okerexa. Nkaaroromela achu “aweela” naari cukuca a mooro, nave nkeemererya wi phaatiri onanwerya okhurumuwela soocheka. Ophiyerya oriha iruku soothene kaaryaakano. Nkaasuwela waakhanle wi echu kaapaka yaari yaphaama. Kaaceecheya, nyenya kaatitelela omvekela Muluku kiriki: “Kinachuna woosuwelaani. Mukikhaviherye!” Kinnuupuwela wi Anamoona a Yehova yaarwa owaani ikwaha sincipale, nyenya nkaawaakhela. Nkaaroromela ekerexa eri yoothene.

Murokora aka Lauri aakhala o Fransa, nave Ramoni o Espanya. Mu 1980, awo yaapacerya omuhuserya Piipiliya ni Anamoona a Yehova. Kaasuwela wi hiiha ntoko Felisa, awo hiyaasuwela wi yaahusihiwa sawootha. Ohoolo waya, kaamusuwela Anxela ni iyawe yaari amwaacamani aka, nave naakhala asinthamwene. Oopiili yaari Anamoona a Yehova. Anxela ni iyawe yaakiveka waakhanle wi kaanachuna omuhuserya Piipiliya ni yaawo. Yaasuwela wi naamwi kaalonce wi nkinachuna osuwela vooloca sa ekerexa, chiryene kaanachuna osuwela vooloca sa Piipiliya. Wookuchulani kaaloca: “Yookhala phaama. Nyenya kinahaala weemererya ohuserya wakhala wi nnampharihela Piipiliya aka!” Miyaano kaarino Piipiliya a Nácar-Colunga.

WOOKUCHULANI PIIPILIYA AANAATAANIHA

Felisa: Vaavaa kaapatisiwaaka mu 1973, yaariwo Anamoona a Yehova awaakhwana 70 o Santanter, muceche wa Kantapriya. Naaneeca mukwaha mutokweene wi naalaleerye achu oothene mu ikulucu sawaakhwana nsana. Mwawiihiiha naaneeca ni karera ohoolo waya ni ekaaro neecaka muceche ti muceche.

Moovira wa iyaakha, kaanaahusiha achu ancipale Piipiliya, nave 11 a yaawo yaapatisiwa. Achu ancipale kaahusihaaka yaari Akatoolika. Kaaphwanela oopixa murima ni yaawo. Ntoko miyaano, awo yaanakhweleya elukuluku wi esuwele wi yeeyo yaaroromelaaya yaari yatheru. Kaanasuwela wi pahiru Piipiliya ni Munepa waweela wa Yehova ti waahaala omukhaviherya muchu otoroka muupuwelo awe nave iwexexe eparipari. (Ahebri 4:12) Iyaka, Benvintu, aari mpilisa, aapatisiwa mu 1979, nave amama yaapacerya omuhuserya Piipiliya, vahilekenle yaakhwa.

Araceli: Kaapacenryaaka omuhuserya Piipiliya ni Anamoona a Yehova, koona wi nkirwa kaaroromela. Nyenya voovira wa elukuluku, kaahiya wuupuwela mmukhalelo yoola. Anamoona hakihusinhe pahiru Piipiliya nyenya tho wiiwelela mahusiheryo awe. Nroromelo naka wa Yehova ni Piipiliya naapacerya wunnuwa, nave kaanahakalala vancipale. Amwaacamani aka akina yaahoona matorokelo aka nave yaaloca, “Araceli, otitelele oyano vahoolo ephiro yeeyo othanlilaawe!”

Kinnuupuwela kivekelaka, “Koothamalela Yehova, nthowa na ohikicuwala nave okivaha ikari sincipale wi kiphwanye ichu kaavyaaka—masuwelelo a Piipiliya.” Nave tho kaamveka murokora aka Felisa wi akikurumuwele nthowa na omulocela masu oopwaalu. Ovinyerya vaavaa, ohiya waakhulana yeehuyeehu, ninnahakalala oloca sa Piipiliya. Kipatisiwe mu 1989, kirino iyaakha 61.

Felisa: Vano kirino iyaakha 91. Iyaka ookhwa, nave miyaano nkinawerya opaka ichu sincipale ntoko khalai. Nyenya nlelo kinnamwaalakhanya Piipiliya mahiku oothene, nave kinnaya mmithukumano ni mmuteko woolaleerya wakhala wooweryeya.

Araceli: Kinnasiveliwa oloca sa Yehova wa aphaatiri oothene ni mairima kinakumanaakano, akhweya woona wi kaari mmoha a yaawo. Kinnaloca ni akina a yaawo nave ancipale annaakuxa aliivuru ni irevista. Miyaano kinnamuupuwela xaxaxa phaatiri mmoha. Kimanle oloca ni yoowo mu elukuluku vakhaani, owo aaheemererya yeeyo kaalocaaka. Voocharela aakikoha: “Wakhala wi koohiya ekerexa, achu aka ni emusi aka anaya oloca eheeni?” Kaamwaakhula: “Nave Muluku onaya oloca eheeni?” Aanasuwela wi kaaloca eparipari, nave kaanamoona wi aari oothanana. Nyenya waakhala wi haari oolipa murima wi apake matorokelo.

Nkirwa kicuwale vaavaa iyaka aalonceiye wi aachuna oya omuthukumano ni miyaano. Owo aarino iyaakha 80 vaavaa aakeleiye omuthukumanoni ekwaha yoopacerya, nave ovinyerya vaavaa hantonko ocompela mithukumano. Aamuhuserya Piipiliya nave aapacerya olaleerya. Kinnuupuwela ichu sincipale nlapaka vamoha mu orummwa. Iyaka okhwile miyeeri miili nihaakumve nihiku aayeiye opatisiwa.

Felisa: Kaapacenryaaka omurumeela Yehova, arokora aka araru yaanakiica. Nyenya ohoolo waya, yaahuserya tho eparipari. Chiryene ela yaari echu yootikhiniha mu okumi aka. Voocharela, naanasiveliwa omaliha elukuluku vamoha ni oloca sa Muluku ahu oosivela Yehova, ni Masu awe! Wookuchulani, oothene hiyo naamulapela Yehova.a

[Nsu na vathi]