MWAHA 1
Muluku Onnapacerya Opatuxa Ichu
ICHU soothene saphaama nryaahuno sinarweela wa Muluku. Owo opaka nsuwa, wii nnimwaleeleke othana, ni mweeri ni itheneeri, wii nikhalekeno omwaleela vakhaani ohiyu. Nave Muluku oopaka elapo, wii nikhalekemo.
Nyenyanto, nsuwa, mweeri, itheneeri ni elapo hisaari ichu soopacerya opakiwa ti Muluku. Mano munnasuwela seiyo saari soopacerya? Muluku voopacerya aapanke achu oophwanaphwana ni yoowo. Hinnawerya owoona, ntoko mummo nihinaweryaahu omoona Muluku. Piipiliya onaweera achweene yaawo wii ti angelo. Muluku ahaapaka wii ekhaleke ni yoowo wirimu.
Mungelo oopacerya opakiwa ti Muluku aari avamekheiyexa. Aari Mwaana oopacerya a Muluku, nave vahoolo vaya owo aahiphara muteko ni Atithyaawe. Ahimukhaviherya Muluku opaka ichu ikina soothene, nsuwa, mweeri, itheneeri ni elapo ahutho.
Mano elapo yaari mwawiihainto? Wuupaceryani, haavovo ii awerye okhala veelaponi. Waarivo pahiru eniya etokotoko veelapo yoothene. Nyenya Muluku aahichuna wii achu ekhalevo veelaponi. Ti nthowa nene aaryeheryenryiiye ichu ntakhara a hiyo. Mano tiheeni eenriiento vano?
Voopacerya, elapo yaachuneleya omwaleela. Hiihaa, Muluku aaheeriha wii omwaleela wa nsuwa waaryelevo. Aahera ela mwa okhalavo ohiyu ni othana. Vachuli vaya, Muluku aahikhumeleliha echaya yawuuma vasulu va maahi a mu’niya.
Sipacheryaka, hiwarivo echu va echaya yawuuma. Waari ntoko munoonelaanyu veerukuni va. Hiwaarivo ithutu, naari miri, naari inama. Hiwaarivo naari ihopa muniya. Muluku nlelo aahikhalano muteko muncipale woopakiha elapo okhala yaphaama ntakhara a okumi wa inama ni achu.
Yeremiya 10:12; aKolose 1:15-17; Mapacereryo 1:1-10.