Muluku Aapaka Erimu ni Elapo

Yehova Muluku ti Mpatuxa. Owo topanke ichu soothene, inooneya ni soohooneya. Ahaakumve opaka ichu nnaweryaahu woona, aapacenrye waapaka ankeelo ancipale. Wohaasuwela ankeelo taani? Ankeelo achu yaawo Yehova aapankeiye wi ekhaleke ni yoowo wirimu. Hannawerya owoona, hiiha ntoko nihinamoonaahu Muluku. Munkeelo oopacerya Yehova aampankeiye aanamukhaviherya apakaka itheneeri, elapo ni ichu ikina. Elapo nipuro nooreera okhalamo.

Yehova aarehererya elapo wi ekhalekemo achu ni axinama. Owo aapaka nsuwa nnamwaleela elapo. Aapaka tho miyaako, iphareya ni mihice.

Tiheeni yeeren’ye voocharela? Yehova aaloca: ‘Kipake echaya emele munyepu ni miri.’ Voocharela saapacerya omela ithutu, munyepu ni miri. Yehova aahaapaka axinama oothene—axinama aneeca ni aniipurula, ipalame ni ihopa. Nave aahaapaka akhaani, ntoko anamarokolo, atokweene, ntoko ichepo. Mwaaxinama taani onoosivela?

Yehova aaloca ni munkeelo oopacerya ariki: ‘Nimpake muchu.’ Achu ari oohiyana ni axinama. Awo annawerya opaka ichu. Annawerya oloca, otheya ni ovekela. Muluku aachuna wi awo ekhapeleleke elapo ni axinama. Woomusuwela taani aari mulopwana oopacerya? Hanko nimusuwele.