MWAHA 2
Emaca Yooreera
NKAWEHANI elapo va! Mota soothene irenraaya! Nkamooneeni kapinka, miri, ithutu ni inama soothene. Mano munnasuwela wii etchepo tiivi nave amwacho taavi?
Mano emaca yoorereene yeela ekhumelenle mwawiihai? Phaameene, noone mummo Muluku oryeheryenliiye elapo ntakhara a hiyo.
Voopacerya, Muluku aaheeriha wii kapinka mukithi akhuneele elapo. Nave owo aahipaka miloko yoothene ya miri mikhaani, ephovo ni miri. Seiya sinneeriha elapo okhala yooreera. Sinnareeriha opwaha vaavaa. Mincipale sa seiyo sinnaimatho sawiima soosiva ntakhara a hiyo.
Vachuli vaya, Muluku aahipaka ihopa wii seekheke mmaahini ni ipalame wii ivaveke musulu. Ahaapaka anapwa, apuusi ni akavalo; inama itokotoko ni ikhaani. Mano inama taani inakhala vakhiviru ni wiiwo nyuwo munakhalaanyuwo? Mano hinnaphwanela ohakalala wii Muluku oopaka soothene seiyo ntakhara a hiyo?
Vookuchula vaya, Muluku aahipaka makupa mamoha a elapo okhala nipuro na vameekhaayaxa. Iichana wii emaca ya Eeteni. Yaari yoophaameya. Soothene saari sooreera. Nave Muluku aachunne wii elapo yoothene ekhale ntoko hiihaa yakhalenlaaya emaca yeela yooreera aapankiiye.
Wehanitho va eruku ya emaca ela. Mano moosuwela yeeyo Muluku oonniiye wii ennahalela? Hinkoni noone.
Mapacereryo 1:11-25; 2:8, 9.