MWAHA 3
Mulopwana Ni Muthiyana Oopacerya
MANO tiheeni eri yoohiyana va eruku ela? Ahe, wokhalavo achu. Ti mulopwana oopacerya ni muthiyana oopacerya. Mano taani aapankee? Ti Muluku. Mano munnasuwela nsina na Muluku? Ti Yehova. Nave mulopwana owo ni muthiyana owo yiichaniwa Aatamu ni Haava.
Yehova Muluku aampanke Aatamu mwawihiihaa. Aakunxe nchupi vakhaani na echaya apakano mwiili woophaameya, mwiili wa mulopwana. Vanonto, owo ahiveerela mphulani mwa mulopwana owo, nave Aatamu aahikhala mukumi.
Yehova Muluku aahikhalano muteko ntakhara a Aatamu. Aahimuleela wii achuwe masina miloko yoothene ya inama. Onnaphwanela wii Aatamu aahiviriha elukuluku yiinchipale avareryaka inama, wii achuwe masina aphaama. Nyenya, vaweerano ela, aahipacerya woonavo echu. Mano moosuwela wii tiheeni?
Inama soothene saahikhala ni mukhwaaya. Ahikhalavo tiithi ni mayi a ichepo, ni tiithi ni mayi a amwacho. Nyenya, Aatamu haarino ori oothene oophwana-phwanano. Va nthowa nenla, Yehova ahimurupiha Aatamu ikhove nave amviiheryavo eparari emoha. Va eparari yeela, Yehova aahimpaka muthiyana ntakhara a Aatamu, akhala mwaariye.
Aatamu aahakalanle mwawiihai nki! Nave Haava onnaphwanela aakhanle ari oohakalala mwawiihai nki, okhalano emaca yooreera vancipale ya okhalakamo! Mwawihiihaa, yahaala waayara anamwane ni okhalaka vamoha moohakalala.
Yehova aachunne wii Aatamu ni Haava ekhaleke ni okumi mwawiikhalelaru. Aachunne wii epake elapo yoothene okhala yooreera vancipale ntoko emaca ya Eeteni. Aatamu ni Haava onnaphwanela yaakhanle oohakalala mwawiihai nki, vawuupuwela pahi yeeyo! Mano nyuwo munnachuna mwaakhanleno makupa a opaka elapo yavathi okhala emaca yooreera? Nyenya ohakalala wa Aatamu ni Haava hiwaapwahihenrye vancipale. Hinkoni noone nthowa nene.
Salmo 83:18; Mapacereryo 1:26-31; 2:7-25.