MWAHA 9
Noowa Oonnampaka Mwaaceya
NOOWA aarino mwaariye mmoha ni anamwane araru. Anamwanaawe yiichaniwa Yeemi, Haami ni Yaafeti. Nave ori oothene aahikhalano mwaariye. Mwawihiihaa echoko ya Noowa yaarino achu athanu nararu.
Muluku aahimuruma vano Noowa wii ampake mwaaceya mutokotoko. Mwaaceyene yoola aari mutokotokoxa ntoko pophoro, nyenya aakhala ntokotho ekaxa etokotoko ni yoorekama. ‘Ompake mu ipa raru soothitaanyeryana nave omuhele miruku,’ aahi Muluku. Iha saari ntakhara a Noowa ni echokwawe, inama, nii ntakhara a yoolya ya oothene.
Muluku aahimuruma Noowa ompaka mwaaceya mmakhalelo awii ohivolowekemo maahi. Muluku aahi: ‘Kinahaala orumiha maahi mancipale ni otoloxa elapo yoothene. Yoowo onii ahikhale mmwaaceyani mmo onahaala okhwa.’
Noowa ni anamwanaawe yaahimwiiwelela Yehova nave yaahipacerya ompaka mwaaceyoowo. Achu akina yaamoona otheya. Yaahipwahiherya okhala oonanara. Haavovo eemerenrye vavaa Noowa aathorinhiiye yeeyo Muluku aahaaliiye weera.
Waahiviravo elukuluku yincipale yoompaka mwaaceya, nthowa nawii owo aari mutokotokoxa. Vachuli va iyaakha sincipale, aahimala opakiwa. Vanonto, Muluku aahimuruma Noowa ovoleiha inama mmwaaceyanimmo. Aaphwanela ovoleihaka piili sa muloko ori woothene, yeelopwana ni yeethiyana sa inama sa mmori. Sa miloko mikina, Muluku aahimuruma ovoleiha thanu napiili. Muluku aahimuleelatho Noowa wii avoleihe miloko yoothene yoohiyana-hiyana ya ipalame. Noowa aaheerano yeeyo Muluku aamurummiiye.
Vachuli vaya, Noowa ni echokwaawe yaahivolowa mmwaaceyanimmo. Muluku vano aahiwala nsele. Noowa ni echokwaawe yaahikhala ewehereryaka. Nkuupuwelani nyuwo muri vamoha ni yaawo mmwaaceyanimmo, muwehereryaka. Mano onahaala okhalavo maahi, ntoko Muluku aalocenliiye?
Mapacereryo 6:9-22; 7:1-9.