Achu Athanu Nararu Yaavolowa Elapo Evyaani

Nowa ni ahimaawe vamoha ni axinama yaavolowa mmwaaceyani. Yehova aawala mulako, nave epwila yammora orupa. Mwaaceya aapacerya owela nave elapo yoothene yaasareya maahi. Achu oothene oonanara yaawo yaari vaate, yaakhwa! Nyenya Nowa ni ahimaawe yaahoopowa woona wi yaari mpuwa. Onnawerya waanyiherya mukhalelo yaahakalanlaaya nthowa na omwiiwelela Yehova?

Epwila yaamalinhe mahiku 40 erikimurupa othana ni ohiyu, ohoolo waya yaamaala. Nave maahi yaapacerya okukuceya. Mwa yeeyo, mwaaceya aaheemela vasulu va mwaako. Nyenya nivano maahi hiyaawelenle, nave Nowa ni ahimaawe hiyaaphwanela opwahamo mmwaaceya maahi ehiwelenle.

Vakhaani vakhaani, maahi yaaweleela. Nowa ni ahimaawe yaahikhala mmwaaceya ophiyerya muyakha mmoha. Yehova aahaaleela wi ekhumele vaate wi yoone elapo evyaani. Awo yaamuthamala vancipale Yehova nthowa na owoopola, nave awo yaapaka mukucho wi yooniherye othamalela.

Yehova aahakalalela mukucho yoowo. Owo aalipela wi harwa uuluula otoloxa elapo ni maahi mancipale. Ntoko eneneeryo ya nlakano nenlo, owo aaheeriha wi echweele ekhwiini yoopacerya wirimu. Wontoko woona ekhwiini?

Yehova aamuleela Nowa ni emusi awe wi ekhalekeno anamwane ni esareye elapo yoothene.