MWAHA 11
Ekhwiini Yoopacerya
MANO munnasuwela echu yoopacerya yeeyo Noowa ni echokwaawe yeenraaya ekhumakaru m’mwaaceyani? Yaari yooveleela nari yamahala wa Muluku. Munnawerya omoona eerakano eyo verukuni vathi va. Noowa aahiveleela yamahalaawe ya inama wii amuthamale Muluku yoowo aavulunxe echokwaawe va maahi mancipale.
Mano munnoona wii Yehova aahisiveliwano yamahaleeyo? Aayi, aahisiveliwano. Nave va nthowa nenlo aahilakana ni Noowa wii haahaalatho otoloxa elapo ni maahi.
Mu elukuluku yavakhaani, elapo yaahuuma, nave Noowa ni echokwaawe yaahipacerya okumi wahihano, vaate va mwaaceya. Muluku ahaareliha nave aahi: ‘Munnaphwanela okhala ni anamwane ancipale nave mukhale ancipale, ophiyerya okhalevo achu veelaponi yoothene yavathi.’
Nyenya, woovira wa elukuluku, vavaa achu yiiryaaya yiiweke olociwa wa maahi mancipale, akhweya yahaala woovaka wii anahaala orwatho. Va nthowa nenla Yehova aahaavaha echu yeeyo yii ewupuxeryeke nlakano nawe nawii elapo yoothene yavathi herwaru emiryiwa ni maahi. Mano moosuwela yeeyo aavanhiye ntoko eneneeryo? Ekhwiini.
Wiili-wiili, epula yaarupa, vaavaa nsuwa nnoopaya, ekhwiini ennooneya. Eyo yookhalano ikoore sincipale sooreera. Mano moontoko woona emoha? Mano munnoona emoha va eruku ela?
Muluku aariye wii: ‘Kinnalakana wii nkirwaruu kaatoloxa achu ni inama ni maahi. Kinnakuha ekhwiini aka mmeekuni. Nave vaavaa ekhwiini enooneyaaya, miyo kinarwa koona nave kinarwa kuupuwela sa nlakano naka.’
Hiihaa, vaavaa nyuwo munoonanyu ekhwiini, mano munaphwanela wuupuwela eheeni? Aayi, sa nlakano na Muluku na ohirwaru ananariha elapo ni maahi mancipale.
Mapacereryo 8:18-22; 9:9-17.