Yohuserya 7
Yolopola Ya Elukuluku Evinree
Yehova harwa emererya wii atchu oonanara empahule Paradaiso. Mummo onahaala okhalamo pahiru asiinthamwene awe. Mano tiheni enahaala owerela atchu oonanara? Wii musuwele wakhula, mpwatche mwaha weeparipari wa Nowa. Owo ahikhala iyakha amile muchulimu. Aari mutchu aphama nave aneereryaereryaru wii ereno yotchuna ya Yehova. Nyenya atchu akina velaponi yavathi yeera itchu soonanara. Mwa yela Yehova ahimuleela Nowa wii Owo ahaala oruha mahi wii yaatoloshe atchu othene ale oonanara. Ahimuruma Nowa wii ampake mwacheya, wii owo ni etchoko awe ehikhwe vavaa Mahi yahaalaya orwa.—Genesis 6:9-18.
Nowa ni etchoko awe yahimpaka mwacheya. Nowa ahaalela atchu wii Mahi yahaala orwa, nyenya awo hiyaamwiiwelenle. Yanapwahiherya weerano itchu soonanara. Emmalinhene mwacheya, Nowa ahikusha inama avoleiha nave owo ni etchoko awetho yaavolowamo. Yehova ahiruha mwawihiha etcheku etokwene. Yahirupa epula mahiku 40 othana ni ohiyu. Mahi yahisareya elapo yothene yavathi.—Genesis 7:7-12.
Atchu oonanara yaahikhwa, nyenya Nowa ni etchoko awe yahivuluwa. Yehova ahavulusha mwa Mahi nave ahakeriha mu elapo yotaphuwa ni soonanara. (Genesis 7:22, 23) Biblia onlocha wii ennarwatho elukuluku yeyo Yehova onahaaliiye watolosha atchu yawo anakhocha werano yeyo eri yaphama. Atchu aphama herwa etoloshiwa. Enarwa ekhala ni okumi wawiikhalelaru mu elapo yavathi ya Paradaiso.—2 Petro 2:5, 6, 9.
Olelo vava, atchu anchipale annerano itchu soonanara. Elapo yosareya ni sokachamiha. Yehova onnarumiha Anamona awe elukuluku ni elukuluku wii yalopole atchu, nyenya anchipale a yawo hanatchuna owiriyana masu a Yehova. Awo hanatchuna otcharuwa mukhalelo aya wa okumi. Hanatchuna wemererya yeyo Muluku olonchiiye volocha sa yeyo eri yaphama ni yeyo eri yoonanara. Mano tiheni enahaala oweerela atchu yawo? Nihiku nikina enarwa etcharuwa? Anchipale herwa etcharuwa. Ennoorwa elukuluku yeyo atchu oonanara eniraya etoloshiwe nave herwa ekhalatho.—Salmo 92:7.
Elapo yavathi herwa etoloshiwa; eyo enahaala otatushiwa okhala paradaiso. Yawo anahaala okhala asiinthamwene a Muluku enarwa ekhala ni okumi wawiikhalelaru mu Paradaiso velaponi yavathi.—Salmo 37:29.