MWAHA 13
Aaparahamu—Nthamwene A Muluku
NIMOHA na mapuro yaawo achu yaakhalaayawo vachuli va Maahi niichaniwa Uuri. Epooma ela yaahikhala yoochuneyaxa, ni ipa sooreera. Nyenya achu a mummo yaalapela miluku yoowoka. Saari hiihaatho yeerenlaaya o Paapel. Achu a Uuri ni o Paapel hiyaaphwana-phwana ni Noowa ni mwanawe Xeemi, yaamurumeela Yehova.
Noowa aahikhwa, ovinrevo iyaakha 350 vachuli va maahi. Waari ovinrevo iyaakha piliru pahi vachuli vaya vaavaa aayariwiiye muchuwo munamoonaanyu verukuni. Aari muchu a vamekheiyexa wa Muluku. Nsina nawe eeriwa Aaparahamu. Aakhala ni echokwaawe m’epooma yeele ya Uuri.
Nihiku nikina Yehova aahi wa Aaparahamu: ‘Khumamo mu Uuri ni wa annaa, nave oye weelaponi yeeyo kiniiryaaka koothonyerye.’ Mano Aaparahamu aahimwiiwelela Muluku ahiya okhala waphaama woothene wa mu Uuri? Aayi, aahimwiiwelela. Waari nthowa nawii Aaparahamu aahimwiiwelelaru Muluku weerinhe wii asuweliweke okhala nthamwene a Muluku.
Akina a emusi ya Aaparahamu yaahichaananano, vaavaa aacimunliiye o Uuri. Atiithi awe Teera yaahitchaananano, ni musulwaawetho Looti. Navetho, mwaara a Aaparahamu, Saara. Yaahiphiyanto va nipuro naweeriwa Haraani, vaavaa Teera aakhwiliiyevo. Yaari ociiwene ni Uuri.
Elukuluku vakhaani vachuli vaya, Aaparahamu ni yaawo a mpa mwawe yaahivinya o Haraani nave yaahiphiya veelapo yaweeriwa Kaanani. Vaavaa Yehova aahi: ‘Ela ti elapo kinahaalaaka waavaha anamwanaa.’ Aaparahamu aahikhala m’Kaanani akhalaka mu ipa sakuwo.
Muluku aahikhala amukhaviheryaka Aaparahamu, nave owo aahiphiyerya okhala ni miloko mincipale ya ipucepuche ni sa inama sikina, ni arummwa masana masaneene. Nyenya, owo ni Saara hiyaarino anamwane.
Vaavaa Aaparahamu aariiyeno iyaakha 99, Yehova aahi wa yoowo: ‘Kinnoolakiherya wii weyo onahaala okhala tiithi a maloko mancipale.’ Nyenya, mano eyo yaahaala oweryeya mwawiihai okhala ni anamwane wookhala wii Aaparahamu ni Saara yaari yuuluvanleene vancipale?
Mapacereryo 11:27-32; 12:1-7; 17:1-8, 15-17; 18:9-19.