NIKUPA 3

Ovinyerya va Woopoliwa wa o aYiikuputu Ophiyerya va Mwene Oopacerya a Isarayeli

Moose aahaahoolela aIsarayeli muukapuroni o Yiikuputu ophiyerya vamwaakoni wa Sinai, vaavaa Muluku aavanhiiyevo malamulo awe. Vachuli vaya, Moose aahaarumiha alopwana 12 wi yahocele elapo ya Kaanani. Nyenya, 10 a mwa yaawo yaahikooka ni michaka yoonanara. Yaahaatuunyerya achu ochuna okookela o Yiikuputu. Nthowa noohikhala ni nroromelo, Muluku ahaalaka aIsarayeli awo, mwa oweeceechiha mutakhwani mu iyaakha 40.

Vookuchula vaya, Yosua aahithanliwa wii aahoolele aIsarayeli awo weelapo ya o Kaanani. Wii aakhaviherye okuxa elapweeyo, Yehova aaheriha sootikiniha. Aaheemexa ochimaka wa maahi a muhice wa Yoortano, aahikumula ixiri sa Yeriko nave aaheemexa nsuwa va nihiku noothene. Saavinre iyaakha thanu nammoha wii ekuxe elapo ya asinaKaanani.

Opacerya ni Yosua, Isarayeli aalamuleliwe ni alipa oothoriha, mu iyaakha 356. Nnahaala ohuserya sa ancipale a yaawo, ntoko Baraki, Gideoni, Yefita, Samsoni ni Samueli. Nnahaalatho waalakhanya sa athiyana ntoko Rahabi, Teepora, Yaeli, Rute, Naomi ni Dalila. Nikupa ANEERARU ala, voothevene anuuraanya iyaakha 396 sa oovuwa.