MWAHA 34
Muxove Wahiihaano Wa Yoolya
MANO moosuwela yeeyo achu anarolaaya vachayani? Ntoko nakhutu. Ti yaweela nave ntoko maralala. Nyenya tahi nakhutu; ti echu yawii elyiweke.
Weera orimona oviravo mweeri mmoha ovinyerya vavaa aIsarayeli yaakhummaaya o Yiikuputu. Yaarinto vano mutakhwani. Mummo yoolya yaari yavakhaani, nave va nthowa nenla achu yaahiikhupanyerya eriki: ‘Yehova aaniiphaleru o Yiikuputu. Weiwo naahikhalano yoolya yoothene naachunaahu.’
Hiihaanto, Yehova aahi: ‘Kinahaala orupiha yoolya okhumela wirimu.’ Nave ti yeeyo Yehova eenriiye. Wooxixelwaaya, aIsarayeli yaahoona echu ela yaweela yaamonre, enakoha wii: ‘Mano tiheeni yeela?’
Moose aahi: ‘Ela ti yoolya yeeyo Yehova oovanhiiyeni.’ Achu yaahichuwa yoolyeeyo okhala MAANA. Yaasiva ntoko ebolu ya maahi eenui.
Moose aahi wa achu: ‘Ori oothene a nyuwo aroleke yaawo onaweryiiye olya.’ Nave yaaheerano ela wooxixelo ori woothene. Vavaa nsuwa naavihaaya maana ehiiweene vachayani, yaamutothowavo.
Moose aahiitho: ‘Ahikhalevo onii aahiyeke maana ntakhara a omeelwaaya.’ Nyenya, akina hiyaiwelenle. Mano moosuwela yeeyo yeerenyee? Wooxixelwaaya, maana okhapeleliwaawo yaahisareya myuuku nave yaahipacerya wunkha!
Nihiku nimoha vamurunkuni, Yehova aahilamula wii achu eroleke maana mwawuuluulela. Naari nihiku naneethanu nammoha. Nave Yehova aariye wii yaanaphwanela okhapelela ntakhara a omeelwaaya, nthowa nawii mu nihiku naneethanu napiili hiyii ephwanyeyeru. Vavaa yaakhapelenlaaya maana ntakhara a nihiku naneethanu napiili, hiyaasareenye myuuku, nari mano wunkha! Yotikiniha ekina!
Mu iyaakha soothene aIsarayeli yaakhanlaaya mutakhwani, Yehova aahaalyiha ni maana.
Mukwaha 16:1-36; Namarepela 11:7-9; Yosuwa 5:10-12.