Masololo Annakhaviherya Wootha wi Achu Ookhwa Ari Akumi

Piipiliya onnaloca wi Satana onnawoka “elapo yothene” yavathi. (Yawupulula 12:9) Satana ni masololo awe hanachuna wi hiyo nnamweemererya Piipiliya, masu a Muluku. Owo onnaavyavya oweeriha achu weemererya wi achu ookhwa ari akumi o makupa ammori mu elapo yoohooneya ya minepa. Hinkoni noone mummo awo aneerelaaya eyo.

Malapelo Atheru

Malapelo mancipale anahusiha wi achu oothene aakhalano echu mmwiilini yeeyo enapwahiherya okhala ekumi vachuli va okhwa wa muchu. Annaloca wi muchu akhwa yookhalavo echu mpuwa mwawe enakhala ekumi vachuli va okhwa wa mwiili nave enaya o elapo onakhalawo minepa.

Nyenya Masu a Muluku hanahusiha yeeyo. Ntoko yawoniherya, vaavaa Piipiliya athorihaka opatuxiwa wa Aatamu onii: “Nave Apwiya Muluku yaamuupa mulopwana ni nchupi na echaya, emveerela miwiya mphulani, emvaha okumi. Nave muchu aakhala ni okumi.” (Mapacereryo [Genesis] 2:7) Mwawihiihaa Muluku hahenlemo echu mpuwa mwa mwiili wa Aatamu wi ewerye okhala ekumi vachuli va okhwa.

Piipiliya onaloca wi muchu akhwa, hiyavovo echu mwa yoowo enapwahererya okhala ekumi, nthowa nawi muchu oothene ookhwa. Muchu yoowo hanawerya ovolowela okumi wa achu akina. Piipiliya onii: “Nthakhara anahiyaaya omumula, anakookela onchupini, nihiku nene nenlo miteko sawe uupuweleleiye sinnamala.”—Masaalimu 146:4.

“Muchu onacheka—yoowo toni akhwe.”—Ezekieli 18:4.

“Ntakhara aniriye akhwe, harwa akuxa echu. Muhakhu awe horwa omuchara.”—Masaalimu 49:17.

Soorempwa ikina inooniha wi hiihaa ntoko axinama annakhwa, achu tho annakhwa (Eklesiasti 3:19, 20). Achu ookhwa hanasuwela echu eri yoothene (Eklesiasti 9:5). Mwawihiihaa muchu akhwa chiryene honahalavo echu.

Haamomoru makupa mamoha mano mPiipiliyani munahaalanyu ophwanyamo eyuupuwelo yawi achu ookhwa ari akumi o nipuro nikina. Vaavaa muchu akhwa hanathatuwaru munepa. Ehusiho eyo yawi minepa ya achu ookhwa inaya o elapo yoohooneya ya minepa heri mPiipiliyani. Nyenya, ti ehusiho ya Satana ni masololo awe. Yehova onniica sawootha soothene sa malapelo.—Proverpio 6:16-19; 1 Timoteo 4:1, 2.

Namulosiwe

Makhalelo makina Satana onaahuweliheiyeno achu ti moorweela wa anamulosiwe. Namulosiwe ti muchu yoole onawerya wakhela michaka inarwela mwiilaponi onakhalawo minepa. Achu ancipale, ophitaanyerya ni anamulosiweene, annaroromela wi michaka iha inarweela wa minepa sa achu ookhwa. Nyenya, ntoko nonnaahu mPiipiliyani ela heri yooweryeya.—Eklesiasti 9:5, 6, 10.

Mano vano michaka sene seiya inarweela woowi? Inarweela wa masololo! Masololo, annawerya omoona muchu ari mukumi; annasuwela mummo muchu owo aaloceleiye, tivi yaari ethoi awe, yeeyo eereiye nave tiheeni yoowo aasuweleiye. Mwawihiihaa, ori wookhweya wa masololo waatakiherya achu ookhwa.—1 Samuele 28:3-19.

Myaha Sawootha

Ephiro ekina yeeyo Satana oneereryeiyeno okhaviherya wootha vooloca sa achu ookhwa ti moorweela mwa myaha sawootha. Myaha sene seiya moohihiyererya sinnahuweliha achu mu eeparipari ya Piipiliya.—2 Timoteo 4:4.

Mu Afrika, sookhalamo saweereya sincipale vooloca sa achu anooniwa vachuli va okhwa. Moolikanyiha wooneya wuuwu oneereya ochai wa nipuro weiwo muchu aakhaleiyewo. Nyenya, nikohe: ‘Mano eri yamahala, muchu arino ikuru sa okooka wukhwani, akookele o nipuro noochaiwene wa echokwaawe ni asinthamwenaawe?’

Nave tho hiyahaala weereya wi muchu ooniwe ti oophwanaphwana ni muchu ookhwa owo? Ntoko yawooniherya, arummwa eeli eeKiristu yaalaleerya o mukuma a mmawani, yaahoona wi mulopwana mmoha awuuluvala aanaachara mu ilukuluku sincipale. Vaavaa yaamukonhaaya vooloca sa yeeyo, yaakhala esuwelaka wi mulopwanoowo uupuwenle wi mmoha a arummwa ala, aari munnawe akhwile khalai. Mweevelevelo aahiwokeya, nave haachunne ororomela wi aarimwiiwoka. Onnaweryeya waanyiherya mwaha mulopwana ola olonceiye wa asinthamwenaawe ni amwaachamanaawe voocharela vaya!

Sawoona, Sooloha ni Masu

Moohikhala minikhwa, moosuwela ichu sooronya seiyo achu yoonnaaya, yiwalaaya nari aloonhaaya. Wiili wiili ichu sene seiya soohikhala samaphaxuwo sinnawoopiha yaawo arino. Marein, yoowo aakhala o Afrika onaya echeku yamurupi, aaniwa nsu na amunnaawe yaawo yaakhwile emwichanaka ohiyo moohihiyererya. Mu woova, Marein aanakhuwela, aaveihaka achu oothene mpa mmo. Vookuchula vaya Marein ahithatuwa naanepa.

Vano wakhala wi achu ookhwa chiryene akumi, mano ti ya miruku yaawo waahooxa achu oosiveliwaaya? Mwa oyariwa, hooye. Michaka yeela yoonanara inarweela wa masololo.

Mano hanka vooloca sa michaka inakhala ntoko yoochuneya nave yoohakararya? Ntoko yawooniherya, Gbassay, o Serra Leoa, aamwiicheliwa. Owo aahikhala ni yooloha mummo atithaawe akhwile yaamurweenlaaya. Awo yaahimuleela wi aye va mwirini wammoori achoche nikukhu nimoha, apweseherye ni maahi nave awurye. Haaphwanela oloca ni muchu ori oothene ahaakumve weerano yeeyo. Owo aaherano hiihaa nave aahipenuwa.

Muthiyana mukina olonce wi, aiyawe akhwile yaahimurweela ohiyu. Muthiyanoowo olonce wi awo yaari ooreera nave yaawanre ikuwo sooreera.

Michaka ni sawoona seiya iri ntoko saphaama ni soochuneya. Mano seiya inarweela wa Muluku chiri? Hooye hasinarweela wa Muluku. Yehova ti “Muluku ekhaikhai.” (Masaalimu 31:5) Yehova, haneemererya oniwoka nari onihuweliha. Masololo pahiru taneerano hiihaa.

Mano akhalawo masololo aphaama? Hooye. Naamwi ikwaha ikina annakhala ntoko ookhaviherya, oothene yaawo toonanara. Vaavaa Musaserya aalonceiye ni Haava, aakhanle ntoko nthamwene. (Mapacereryo 3:1) Mano Haava aaphunre eheeni vachuli va omwiiwelela ni weera yeeyo Satana aamurummeiye? Haava ookhwa.

Noosuwela wi tahi yeelecho muchu oonanara opaka onthamwene ni yaawo onchunachuneiye waawoka nari waahuweliha. “Minno aweela, murima wooripa,” onnaloca muhapo wa o Afrika. Masu a Muluku anii: “Satana mkhatiye annisoneiha ntoko mungelo ómwaléla.”—2 aKorinto 11:14.

Muluku hanaloca tho ni achu veelaponi yavathi moorweela wa sooloha, sawoona nari masu o elapo ya minepa. Muluku onaahoolela achu ni waahusiha moorweela wa Piipiliya, onawerya omweeriha muchu okhala “óphwanelela, óryeheryeya werano miteko yothene yaphama.”—2 Timoteo 3:17.

Hiihaa, vaavaa Yehova aanilopolaka moovaanyihana ni miraakho sa Satana, Owo onneera hiihaa nthowa nawi onnanisivela hiyo. Yehova oosuwela wi masololo ti amwiicani awoopiha.

[Eruku va epaaxina 13]

Achu, axinama, ihopa ni ipalame oothene anaweherya okhwa

[Mwaneene a eruku]

Based in part on photos produced by IRIS-EXPORT MEXICHROME

[Eruku va epaaxina 14]

Piipiliya onnooniherya wi muchu akhwa, hiyaavo emphwahiherya okhala ni okumi

[Eruku va epaaxina 15]

Masololo anniisera okhala ntoko minepa sa achu ookhwa

[Eruku va epaaxina 16]

Achu akineene, annupuwela wi awoona achu akoonke wukhwani

[Eruku va epaaxina 17]

Masololo annaawoka achu moorweela wa sooloha, sawoona ni masu

[Eruku va epaaxina 18]

Satana aalonche wi Haava hakaakhwile. Haava aamweemererya Satana, nyenya omakuchuwelo waya Haava aahikhwa