Yohuserya 9

Mano Asiinthamwene A Muluku Taani?

Yesu Kristu ti Mwana a Yehova ni nthamwene awe shashasha ni osiveliwasha. Ahinakuve okhala ntoko mutchu velaponi yavathi, Yesu ahikhala wirimu ntoko yopachushiwa yomunepani yakuru. (Yohane 17:5) Vachuli vaya owo aarwa velaponi yavathi wii aahusihe atchu eparipari volocha sa Muluku. (Yohane 18:37) Owo ahivelelatho okumi awe womutchu wii avulushe atchu awiwelela wa yotcheka ni okhwa. (aRoma 6:23) Yesu vano tori Mwene a Omwene wa Muluku, epoma ya wirimu yeyo enahaala opakiha elapo ela yavathi okhala Paradaiso.—Yawupulula 19:16.

Angelo ti asiinthamwenetho a Muluku. Angelo hiyapacherinhe okumi aya ntoko atchu velaponi yavathi. Yapachushiwe wirimu Muluku ahaakunve opaka elapo yavathi. (Yobu 38:4-7) Akhalavo mamilyawu a angelo. (Danieli 7:10) Asiinthamwenene yawo awirimu a Muluku annatchuna wii atchu ehuserye eparipari volocha sa Yehova.—Yawupulula 14:6, 7.

Muluku okhalanotho asiinthamwene velaponi yavathi; owo onawiitchana anamona awe. Va nipuro nothoriherya milachu, namona onathoriha hiiho osuwenliiye volocha sa mutchu mukina nari volocha sa etchu ekina. Anamona a Yehova annaalela atchu yeyo asuwenlaya volocha sa Yehova ni sotchuna sawe. (Yesaya 43:10) Hihaa ntoko angelo, Anamona annatchuna wokhaviheryani nyuwo ohuserya eparipari volocha sa Yehova. Annatchuna wii mukhaletho nthamwene a Muluku.