Apwanne Tiithi Aya—Aparahamu Naari Musaserya?

Nlelo o Yerusalemu ntakhara efesta ya misakala, Yesu onnatitelela ohusiha iparipari sookhweleya. Ayuta ari vaava annaloca wa yoowo: “Hiyo nri ana a Abrahamu nave hintonko okhala akapuro.” Yesu onnaakhula: “Kosuwela wi muri ana a Abrahamu, nto munasya okipha, ntakhara nsu naka hinaponwela mwa nyuwano. Miyo kinalotxa seiho konnaka wa Atithi, nave nyuwo munera seiyo mwiwalanyu wa atithinyu.”—Yohani 8:33, 37, 38.

Masu a Yesu tookhweya: Tiithi awe toohiyana ni tiithi aya. Ehiiwexexaka yootaphulela ya Yesu, Ayuta annatitelela olaca: “Tithihu ti Abrahamu.” (Yohane 8:39; Isaiya 41:8) Mwawooneya awo muyareriwo awe. Mwawiihiiha awo anoona wi aakhalano nroromelo nimohamoha ntoko na Aparahamu nthamwene a Muluku.

Nyenya, Yesu onnavaha naakhulo noohiyana: ‘Mwarì ana a Abrahamu, [mwaahaala] otxharihaka miteko sa Abrahamu.’ Mweevelevelo, mwaana ori eeparipari onnaatakiherya atiithinya. “Nyenya hihano munakhwela okipha Miyo” Yesu onnatitelela “ti yomi kúlumme ni nyuwo eparipari, yeyo kiwalaka wa Muluku: ela Abrahamu hénre.” Voocharela Yesu onnaloca masu oovila wiiwexexa: “Nyuwo munera miteko sa atithinyu!”—Yohani 8:39-41.

Nlelo Ayuta hanamusuwela yoowo Yesu onamuloceiye. Awo annatitelela wi anamwane eeparipari, elocaka: “Hiyo hinri ana òraruwiwa; nòkhalano tithi mmoharu, Muluku.” Apwanne, chiryene Muluku tiithi aya? Yesu onnaloca: “Muluku arì tithinyu, muni munamukikhwela, ntakhara kivinnye wa Muluku ni kinarwa wa yowo. Nkirwile mekhaka, nto ti yole okirumme.” Yesu onnapaka nikoho nave onnaakhula mukhateiye: “Ntakhara seni muhinasuwelanyu malotxelo aka? Ti wi himunawerya owiriyana nsu naka.”—Yohani 8:41-43.

Yesu onneererya wooniherya sookhumelela sa omukhooca yoowo. Nyenya vano owo onnaloca mwawooneya: “Nyuwo, tithinyu ti satana, ni munnakhwela wera okhwela wa atithinyu.” Tiithi aya ta mukhalelo taani? Yesu onnamuthariha mwawooneya: “Owo ori mulipa awipha ovinya wopatxeryani, ni halekenle mwa eparipari.” Yesu onnaaceererya: “Yowo ori a Muluku onniwa masu a Muluku, nto nyuwo himuniwa, ntakhara himuri a Muluku.”—Yohani 8:44, 47.

Othoriha wuuwu onnaanyeenyeiha Ayuta, yaawo anaakhula: “Hinalotxa vale phama nriki: we wà musamaría ni wòkhalano [nsololo]?” Moorweela wa omwiichana Yesu “musamaría,” awo anammunyemula. Nyenya Yesu ahithokororyaka onyemula waya, onnaakhula: “Miyo nkano [nsololo], nto kinnàtxitximiha Atithi aka, nave nyuwo himunakitxitximiha.” Nave ola mwaha mutokweene onawerya wooneya ni yoororomeliha yootutuxa ya Yesu. “Mutxhu yole oni akhapelele nsu naka, harwa ona okhwa mahiku othene.” Awo hanaloca wi arummwa ni akina yaawo anamuchara herwa ekhwa. Opwaha yeeyo, awo herwa ekhwa moomalela, “okhwa wanawili” ohirino ewehereryo ya ovinya mookhwani.—Yohani 8:48-51; Wupulula 21:8.

Nyenya Ayuta anapharihela mwawooneya masu a Yesu, elocaka: “Vano nòsuwela wi wòkhalano [nsololo]. Abrahamu àkhwa, alipa a miririmutho yàkhwa, nto weyano oni: mutxhu oni akhapelele nsu naka harwa ona okhwa mahiku othene. Wakhweya weyano ori mutokwenesa ompwaha tithihu Abrahamu akhwile? . . . Nto weyano onisera ani?”—Yohani 8:52, 53.

Enakhala yawooneya wi Yesu onaloca wi owo ti Mesiya. Nyenya opwaha waakhula nikoho naya mookwakwaleya vooloca sa omuchu awe, owo oni: “Miyo kivuwihaka mekhaka, ovuwa waka ti wasiyo. Nto anakivuwiha t’Atithi aka, nyuwo muneranyu: ti Muluku ahu. Nyuwo himwasuwenle, nto miyo kìhasuwela; nave miyo kenre wi nkasuwenle, kaya okhala mulipa awotha ntoko nyuwano.”—Yohani 8:54, 55.

Vano Yesu onnakookela oloca yootakiherya ya tiithi aya oororomeleya: “Abrahamu, tithinyu, òhakalala wa nthowa na wona nihiku naka, owo òhona ni òsareya òhakalala!” Chiryene, eemereryaka yoororomeliha ya Muluku, Aparahamu aanawehererya orwa wa Mesiya. Ayuta annaloca mooheemererya: “Hiwano nivano miyakha makhumi mathanu ni wòmona Abrahamu?” Yesu onnaakhula: “Eparipari txhiryene kinnolèlani: Abrahamu ahiyariwe, miyo kòkhala.” Owo onaloca sa okumi awe ntoko yoopatusiwa yakuru yoomunepani wirimu.—Yohani 8:56-58.

Ayuta, annanyeenyeya moorweela wa Yesu oloca wi aahikhala Aparahamu ahaakumve okhala, ophiyerya enachuna omvonya ni maluku. Nyenya Yesu onnakhumavo ahiphoren’ye.