MWAHA WA EKAAPA | SATANA OOKHALA CHIRYENE?

Satana Ookhala Chiryene?

“Kinnunwe o El-Salvador. Vaavaa kahiwiiiwelelaaka amama, awo yaanaloca, ‘Musaserya onahaala orwa ookuxe!’ Nave miyaano kaanaavaanya kiriki, ‘Mmuhiye arwe!’ Miyaano kaamweemererya Muluku, ohiya Satana.”​—ROXELIO.

Nyuwaano munneemererya yeeyo mmiravo ola Roxelio aalonceiye? Wa masu anacharela taavi muneemereryaanyu?

• Satana hakhanle; owo yoosiphela ya echu yoonanara.

• Satana ookhala, nyenya hanaaphwacha achu.

• Satana yoopatuxiwa yoomunepani yakuruxa yeeyo enaavolowela vancipale achu.

Moonelo ori woothene onneemereryiwa ni achu ancipale, mweeparipari macikhwi aachu. Apwanne ti woochuneya osuwela moonelo taani ori weeparipari? Wakhala wi Satana hakhanle, yaale anamweemererya ntoko muchu aawokeya. Wakhala wi Satana ookhala nyenya hanaaphwacha achu, ancipale yaawo aniikasoopa ophiyerya omoova, aneera eyo mahaleene. Mwawiihiiha, wakhala wi Satana mulipa oohuweliha oovyaka, owo tawoopihaxa opwaha vaavaa achu anuupuwelaaya.

Hankooni nthokororye ti mwawiihai soorempwa saweela inaakhulaaya makoho yaala: Satana tiheeni naari taani​—yoosiphela ya echu yoonanara naari wi yoopatuxiwa yoomunepani? Wakhala wi ookhala, Satana tawoopiha wa nyuwaano? Wakhala wi tihiiha, munii muwerye hai wiikhapelela mukhatiinyu?