Mukhapelele Mvai Anyu mu Orummwa

OLALEERYA michaka yaphaama muteko wookhweleyaxa oneeriwa veelaponi yavathi olelo. Nyuwaano, ntoko murummwa a Yehova, munoona okhala ncicimiho ntokotoko ophara muteko yoola wa waapaka oohuserya. Nyenya munahaala weemererya wi mapiyoneero ni alaleeryi ikwaha ikina annakacamiheya okhapelela mvai aya mu orummwa.

Wa alaleeryi akina onakhala woovila omphwanya muchu mu orummwa wa empa ni empa. Chiryene, anamakhala ancipale hanaphwanyeya vaate. Vaava anamakhala anaphwanyeyaaya, awo akhweya annaakaaha michaka ya Omwene. Alaleeryi akina aakhalano ekulucu yaphaama nyenya anoona wi yootepa wunnuwa nave hanawerya olaleerya mu ekulucu aya yoothene. Nave achu akina a mmulokoni annalaleerya mu iyaakha sincipale​—elukuluku yincipale opwaha yaawehereryaaya​—nave vano aaceecheya.

Mano ninnatikiniheya wi achu oothene a Yehova annakumana ni makacamiho anavukula mvai aya mmuteko woolaleerya? Hooye. Opwaha soothene, nanweherya okhala wookhweya olaleerya michaka sinavuluxa okumi mu elapo enalamuleliwa ni “mulipa-onanara owo,” Satana Musaserya?​—1 Yohane 5:19.

Muroromele wi Yehova onahaala wookhaviheryaani wi mvoothe makacamiho oothene munakumanaanyuno mu olaleerya michaka yaphaama. Vanonto, tiheeni munaphwanelaanyu weera wi mwaaceererye mvai anyu mu orummwa wanyu Weekiristu? Hankooni nthokororye miruku iha.

MWAAKHAVIHERYE ALALEERYI AVYAANI

Eyaakha ti eyaakha, macikhwi aachu annapatisiwa ntoko Anamoona a Yehova avyaani. Wakhala wi hiihaanoru muhooniherya wiiveleela wanyu wa Muluku moorweela wa opatiso wa maahi, moohikhwa minikwa munahaala othamalela masuwelelo a yaale apacenrye olaleerya khalai. Nave wakhala wi mwa mulaleeryi a Omwene mu iyaakha sincipale, chiryene waahaala okhala wa mphurelo waavyakiha alaleeryi avyaani.

Yesu aasuwela wi oohuserya awe yaanachuna ohooleliwa wi ekhale alaleeryi aphaama, nave owo aahooniherya mukhalelo wa ophara muteko owo. (Luka 8:1) Olelo tho, onnachuneya waavyakiha akina wi ekhale arummwa aphaama.

Hinnaphwanela wuupuwela wi mulaleeryi muvyaani onahaala okhalano mavyakelo a ohusiha moorweela wa wuuka mu orummwa pahiru. Owo onnachuna ovyakihiwa ni muhusiha aphaama ni oosivela. Ovyakiha iwo onaphitaanyerya omooniherya mulaleeryi muvyaani mukhalelo wa (1) orehererya mapaceryiho, (2) ovaanela ni namakhala naari namavira, (3) ovaha soolaleeryiwa, (4) oxekurya, ni (5) opaceryiha yoohuserya ya Piipiliya. Chiryene, onahaala okhala wa mphurelo wakhala wi mulaleeryi muvyaani onnavarerya nave onnatakiherya makhalelo anaphariheliwa ni yoowo onamuvyakiha. (Luka 6:40) Moohikhwa minikwa, mulaleeryi muvyaani onahaala othamalela olapa vamoha ni muchu onahaala owerya omwiiwexexa ni omukhaviherya wakhala woochuneya. Mulaleeryi muvyaani onahaala ophura othamaleliwa ni ovahiwa miruku soophara muteko.​—Ekle. 4:9, 10.

MUNAVAANELA NI NTHAMWENE ANYU MU OLALEERYA

Moohipwacha wiilipixerya wanyu wi mvaanele ni anamakhala, mweelukuluku emohamoha munaphwanela ochekula ni nthamwene anyu mmuteko wa mmacani. Muupuwele wi Yesu aarumme oohuserya awe “eli eli” wi yalaleerye. (Luka 10:1) Vaavaa yaalapaaya vamoha, awo yaanalipihana mukina ni mukhwaawe. Mwawiihiiha elukuluku nnamalihaahu mmacani ni munnihu enanivaha ekari ya olipihana.​—Arom. 1:12.

Ichu taani munaphwaneelaanyu oloca? Ookhala ophwannye hiihaanoru yaweereya yoolipiha? Moophwanya echu yooreera mu yoohuserya anyu ya muchu mukhateiye naari yeechoko? Moolipiheya ni echu mwiiwalaanyu mmuthukumano? Ikwaha ikina, mulaleeryi munalapaanyuno hiihaano hamunalapano wiiliwiili. Moosuwela ovolonwe hai mu eparipari? Tiheeni emulekenche wi ala marehereryo a Yehova? Ikari taani ni saweereya onapuheiye? Akhweya munanwerya omuleela saweereya sanyu. Moohipwacha waakhulela nnahaalaahu ophwanya mmacani, olapa ni nthamwene mu orummwa onnavaha ekari yaphaama ya olipihana mukina ni mukhwaawe.​—1 Ates. 5:11.

MUKHOVELELE OHUSERYA WAPHAAMA

Okhovelela ohuserya waphaama ti wookhweleya wi nikhapelele mvai mu orummwa. “Kapuro óroromeleya” onnalaleya miyaha soohiyanahiyana. (Mat. 24:45) Wi mulye yoolya yoomunepani munaphwanela ohuserya miyaha seiyo. Haya nthokororye yootakiherya ya mwaha waphaama wa yoohuserya ya muchu mukhateiye: Ntakhara heeni muteko woolaleerya Omwene ti wookhweleyaxa? Ekaaxa enacharela ennavaha mathoweene.

Othokororya ichu iri mu ekaaxa yeela enahaala wooceenyeryaani otitelela olaleerya mwamvai. Munanwerya olakelela ohuserya wi mphwanye mathowa mancipale? Voocharela muupuwelele mathowa awo ni soorempwa iri mathipelo aya. Moohikhwa minikwa, mweerano hiihaa munahaala olipiha mvai anyu mu orummwa.

MUNAAKHULELA PHAAMA MIRUKU

Marehereryo a Yehova wiiliwiili anavaha miruku wi inikhaviherye olaleerya phaama. Ntoko yawooniherya, ophitaanyerya muteko wa empa ni empa, nnanwerya orepa ikaarata, olaleerya ni telefone, olaleerya muramphani naari mmapuro makina a vanlakani, ni wuuka michaka yaphaama ni achu mu onamoona woohilakelela ni mmapuro a maroca. Hiyaano nnanwerya tho orehererya soophara sahu wi niwerye olaleerya mu ikulucu soorakamela.

Nyuwaano munnaakhulela phaama miruku seiya? Montoko weererya opharihela muteko? Ancipale aneerano annahakalala ni sookhumelela saphaama. Muthokororye sootakiherya chaaru.

Yootakiherya yoopacerya enavolowela echu yaalociwe mmwaha wa Orummwa wa Omwene sa opaceryiha soohuserya sa Piipiliya. Eyo yaamuceenyerya murokora oniichaniwa April opaceryiha yoohuserya ni asinthamwene awe oomutekoni araru. Owo aatikiniheya vaavaa ooraaru awo yeemerenryaaya ohuserya nave epacerya ophiya mmithukumano sa muloko.

Yootakiherya yanapiili enavolowela ovaha irevista sahu. Hiyaano ninnaceenyeryiwa owaavya achu yaahaala osiveliwa ni miyaha sa irevista sahu. Ooweherya a ekulucu o Estatu Unitu oolokoha wi aahaavaha ahooleli oothene a ilooxa sa maroota mwaha wa erevista Despertai! aaloca sa maroota. Owo ni mwaariye yaakuxa tho miyaha sa “Omwiiwexexa Totoro Aa” aavaha mu ikupweete 100 sa atotoro mu ekulucu eyo. Owo onii: “Oxekurya wuuwu waari wa mphurelo wi nsuweliwe ni soolaleeryiwa sahu. Nimanle osuwelana ni achu mmapuro yaala, naatitelela waaxekurya.”

Yootakiherya yaneeraru enavolowela olaleerya ni telefone. Murokora oniichaniwa Yute aarepela o Peteli etokotoko athamalelaka marehereryo a olaleerya ni telefone. Owo aalokoha wi amama awe a iyaakha sa oyariwa 86, yaawo arino makacamiho mancipale a okumi, annapuha mukhalelo yoola wa muteko waweela nave annahakalala vancipale weeciha yoohuserya ya Piipiliya ni telefone ni muchu a iyaakha sa oyariwa 92!

Miruku sa olaleerya inaperekhiwa mu soolaleeryiwa sahu sinnaphara muteko chiryene. Mpharihele seiyo! Iho inahaala wookhaviheryaani okhapelela ohakalala ni mvai anyu mu orummwa.

MUKHALENO SOOLAKELELA SOOPHIMELELA

Okhumelela mmuteko ahu woolaleerya honarweela wa ovaha soolaleeryiwa sincipale, weeciha soohuserya sa Piipiliya sincipale, waakhaviherya achu ancipale wi ekhale alapeli a Yehova. Opwaha soothene, achu akavi a emusi awe yoorakamela Noowa aakhavihenryeiye wi ekhale alapeli a Yehova? Nyenya, Noowa aari mulaleeryi ookhumelela phaama. Echu enachuneya ori omurumeela Yehova moororomeleya.​—1 Akor. 4:2.

Alaleeryi ancipale a Omwene annoona wi, wi yaaceererye ohakalala waya mmuteko woolaleerya, anaphwanela okhalano soolakelela soophimelela. Soolakelela taani? Miruku sinnaphwanyeya mu ekaaxa enacharela.

Nnikhaviheryo na Yehova, mwaavye makhalelo wi muteko anyu okhale wa mphurelo. Vaavaa munakhwaaniheryaanyu soolakelela sanyu, munahaala ohakalala osuwela wi munneerano soothene munaweryaanyu wi mulaleerye michaka yaphaama.

Chiryene, olaleerya michaka yaphaama tahi echu yookhweya. Nyenya sookhalavo ichu munaweryaanyu weera wi mukhale mulaleeryi a Omwene a mvai. Mpuhe olipihana ni nthamwene anyu mu olaleerya, mukhovelele ohuserya waphaama, mpharihele miruku sa kapuro oororomeleya, nave mukhaleno soolakelela soophimelela. Opwaha soothene, munuupuwela wi Muluku ohoovahaani ekari etokotoko ya olaleerya michaka yaphaama ntoko Namoona awe. (Yes. 43:10) Ohakalala otokweene munahaalaanyu opuha mwatitelela okhapelela mvai anyu mu orummwa!

[Ekaaxa va epaaxina 28]

NTAKHARA HEENI OKHAPELELA MVAI ANYU MU ORUMMWA?

▪ Muteko wa olaleerya onnakhaviherya waakhwanela wa yooloherya ya Piipiliya.​—Mar. 13:10.

▪ Ninnooniherya wiiwelela moorweela wa ophwanyeya mmuteko wa wapaka oohuserya.​—Mat. 28:19, 20.

▪ Yehova onachuna wi aweera soonanara elopoliwe vooloca sa sookhumelela sa meecelo aya.​—Esek. 3:19.

▪ Nookhalano murici wa wuuka michaka yaphaama ni achu.​—Saw. 20:26, 27; Arom. 1:14, 15.

▪ Ophwanyeya mmuteko wa olaleerya onnanaakiha okhalano nthowa na nikhami.​—Esek. 3:18.

▪ Ohusiha Soorempwa ti yoochuneya wi nivuluwe, nave ennaavuluxa tho akina.​—1 Tim. 4:16.

▪ Oloca sa Yehova ni omulaleya vanlakani ichu soochuneya sa malapelo ahu.​—Ahe. 13:15.

▪ Ninnooniherya omusivela wahu Yehova ni Yesu moorweela wa weerano muteko yoola mwawiiwelela.​—Yoh. 14:15; 1 Yoh. 5:3.

▪ Orummwa wahu onnakhaviherya ovaanya sawootha vooloca sa Yehova seiyo Satana onamwaramwaxeiye.​—Yes. 43:10-12; 2 Akor. 4:4.

[Ekaaxa va epaaxina 30]

MUKHALENO SOOLAKELELA SOOPHIMELELA

▪ Mukhaleno marehereryo a esumana a muteko wa olaleerya, nave mucharihe.

▪ Mpharihele ikari soothene wi mpaceryihe yoohuserya ya Piipiliya.

▪ Mwaalakhanye yoorepa ni namakhala, wakhala wooweryeya.

▪ Mwaaceererye ovaha wanyu irevista.

▪ Mwaaxekurye oothene yaawo awiriyanne muchaka wa Omwene.

▪ Mweereno mikhalelo soohiyana hiyana sa orummwa.

▪ Mwaavye ikari sa ovaha onamoona woohilakelela.